Ododo 112

Meli Otur Woko i Cula Nam

NEN! yeya tye i peko! Tye katur woko matino tino! Itye ka neno jo ma gupye i pii-ni? Jo mogo dong gitye ka o aoa i wi tura. Ca-ni mono aye Paulo? Wanenu kong gin ma obedo ka timme i kome.

Po ni, pi mwaka aryo kulu Paulo obedo mabuc i Cecaria. Dok en ki lumabuc mukene giketogi i yeya, ci gucako cito Roma. Ka gukato ki i nget cula nam me Kurete, yamo mo magwar otagogi. Yamo okodo matek ma jo-ni dong pe giromo kwango yeya. Dok pe gineno ceng i dyeceng nyo lakalatwe i dyewor. Lacen, i nge nino mapol, jo ma i yeya onongo dong pe gitye ki gen me bwot.

Ci Paulo oa malo ka owaco ni: ‘Kadi ngat acel i kinwu pe birwenyo kwone; yeya keken aye biballe. Pien i dyewor mukato-ni lamalaika pa Lubanga obino bota ci owaco ni: “Paulo, pe ilwor! In myero i cung i nyim Cecar laloc me Roma. Dok Lubanga bilaro jo ducu ma gitye ka kwang kwedi.”’

Cokcok ki cwiny dyewor me nino me 14 i nge cakke pa yamo magwar-ri, lukwang guneno ni pii dong pe tye ka doko tut! Pi lworo yokke ki got pi col piny, gin gubolo lajuk yeya woko. Orwone guneno gul nam. Gin gutamo me kwango yeya me terone woko atir kunnu ka ma kweyo tye iye-ni.

Dong, i kare ma guo cokcok ki tura, yeya otwomo kweyo mutorre kacel i te pii ci omoko woko. Ci twagge pa pii ocako yokone, ci yeya ocako tur ongidde matino tino. Ladit mony ma loyogi owaco ni: ‘Wun jo ducu ma wuromo kwang wukwong pye i pii wukwang wucit i wi tura. Jo mudong mukene-ni wupye i korgi, ci wunong dul kom yeya ma ongidde-ni wungabbe i komgi.’ Dok meno aye gin ma gutimo. I yo ma kit man jo 276 ducu ma onongo gitye i yeya-ni guo labongo ayela mo i wi tura, kit ma lamalaika ociko.

Cula nam-mi kilwongo ni Molta. Jo ma iye kitgi beco, dok gugwoko jo ma gua ki i yeya-ni. Ka piny dong opye maber, giketo Paulo i yeya mukene ci gitero Roma.

Tic pa Lukwena 27:1-44; 28:1-14.