1, 2. Избан иахьа изхадоу агәрахаҵара аизырҳара? Иаажәга аҿырԥшы.

АГӘРАХАҴАРА. Ари баша ажәаӡам, аха иссиру, зыхә ҳараку ҟазшьоуп. Аха ҳара агәрахаҵара ҳаналацәажәо, ҳхаҿы иааиуазароуп даҽа жәак — «иахмырԥакәа». Избанзар ҳара агәрахаҵара ҳамамзар, уи аизырҳара ҳахыццакыроуп. Аха иҳамазар, иҳахәҭоуп уи ахьчара, насгьы арӷәӷәара. Избан?

² Шәхаҿы иаажәг ҳәаа змам ацәҳәыра шәықәушәа. Ӷәӷәала шәӡышоит. Аӡы анышәыԥшаалак, ишәтароуп, насгьы ишуа амра иацәышәыхьчалароуп. Иара убас аӡы еснагь ишәырҭәлароуп, амҩа шәықәнаҵ ишәызхарц азы. Иахьа ҳара адоуҳатә цәҳәыраҿы ҳанхоит — иҵабыргу агәрахаҵара ацәҳәыраҿы иҟоу зыхә ҳараку аӡы иахьеиԥшу адунеи аҿы, аха уи аӡы ирласны иҭабоит иаҳмыхьчалар, насгьы ианаамҭоу иаҳмырҭәлар. Ҳара ӡыда ҳшызнымхо еиԥш, гәрахаҵарадагьы доуҳала ҳҭахоит (Рим. 1:17).

3. Иҳаиҭазеи Иегова ҳагәрахаҵара арӷәӷәаразы, насгьы иаҳгәалашәалар акәзеи?

³ Иегова идыруеит агәрахаҵара шаҟа иаҳҭаху, насгьы иахьа уи аизырҳареи арӷәӷәареи шыуадаҩу. Убри азоуп иара ҳазҿыԥшыша зҳаиҭаз. Анцәа иԥшьоу идоуҳа ацхыраарала апостол Павел ҳгәазҭеиҵон «зыгәрахаҵареи зычҳареи рыла изқәыргәыӷыз аиура заҭәашьахо ауаа» рҿыԥшра (Аур. 6:12). Убри азоуп Иегова иорганизациа ҳгәы зызҭанаҵо ишҳамчу ала Анцәа изиашаз ахацәеи аҳәсеи рҿыԥшра, ари ашәҟәаҿы зыӡбахә анугьы уахь инарылаҵаны. Иҟаҳҵалар акәзеи уажәы? Иаҳгәалашәозароуп зда ԥсыхәа ҳамам: 1) еснагь ҳагәрахаҵара арӷәӷәара, насгьы 2) еснагь ҳгәыӷра еилыкка ҳхаҿы ахьчара.

4. Иҽшԥазишәо Аҩсҭаа ҳагәрахаҵара арԥсыҽра, насгьы изаԥсамзеи ҳара ҳзы агәкажьра?

⁴ Еснагь шәыгәрахаҵара шәырӷәӷәала. Аҩсҭаа иҽазишәоит ҳагәрахаҵара ишакәзаалакгьы арԥсыҽра. Иара ари адунеи напхгаҩыс дамоуп азы, иахьатәи асистема агәрахаҵара ахьчара ахьыуадаҩу, ашоура бааԥс ахьыҟоу ацәҳәыра еиԥшны иҟаиҵеит. Ҳаӷа ҳара ҳаасҭа дыӷәӷәоуп. Аха иаԥсоума агәкажьра, агәрахаҵара аизырҳареи арӷәӷәареи залшом ҳәа ӡбаны? Мап, иаԥсам! Иҵабыргу агәрахаҵара аизырҳара зҽазызшәо зегьы рзы Иегова Дҩыза бзиоуп. Анцәа агәра ҳиргоит, иара еснагь ҳицзар Аҩсҭаа иҿагылара шҳалшо, нас уи даҳԥырҟьаны дышцо! (Иак. 4:7). Есҽны ҳагәрахаҵара еизҳарҳауазар,  насгьы иҳарӷәӷәозар, ҳара иҳалшоит Аҩсҭаа иҿагылара. Ишԥа?

5. Ишԥеиздырҳауаз рыгәрахаҵара Абиблиаҿы зыӡбахә ҳәоу Анцәа изиашаз ахацәеи аҳәсеи? Иҳаилшәыркаа.

⁵ Ишаҳбаз еиԥш, Абиблиаҿы зыӡбахә ҳәоу Анцәа изиашаз ахацәагьы аҳәсагьы рыгәрахаҵара еиздырҳауан. Дара ишьақәдырӷәӷәеит агәрахаҵара — ари Иегова иԥшьоу идоуҳа алҵшәа шакәу (Гал. 5:22, 23). Дара ацхыраара иа́ҳәон азы, Анцәа рыгәрахаҵара ирӷәӷәон. Шәааи урҭ ҳарҿыԥшлап, иара убас еснагь иаҳгәалаҳаршәалап Иегова иԥшьоу идоуҳа меигӡарахда ишриҭо уи иа́ҳәо, насгьы а́ҳәарақәа инарықәыршәаны зхы мҩаԥызго ауаа зегьы (Лука 11:13). Иҟаҳҵар ҳалшозеи уаҳа?

6. Ишԥаҳзаанаго Абиблиа аԥхьара ахәарҭа ду?

⁶ Ари ашәҟәаҿы ҿырԥштәқәак роуп еилҳаргаз агәрахаҵара ӷәӷәа аазырԥшуаз ауаа ирызкны. Аиашазы, урҭ акырӡа ирацәоуп! (Шәаԥхьа Ауриацәа рахь 11:32.) Анцәа изиашаз арҭ аҳәсеи ахацәеи рҿырԥшқәа ҳрызхәыцны Анцәа ҳиҳәаны иҭаҳҵаалароуп, избанзар дара-дара еиԥшӡам. Хыхь-хыхь, ҳаццакны мацара ҳаԥхьалар, ҳагәрахаҵара ҳзырӷәӷәом. Ҳзыԥхьо хәарҭа ҳзаанагаларц азы аконтекст, насгьы аиҭаҳәа аҭоурых ҳахәаԥшлароуп. Дара «ҳарҭ зегьы иҳаиԥшыз» инаӡамыз ауаа шракәыз ҳгәалашәозар, урҭ ҳара ҳзы иҟаҵәҟьоу ракәхоит, насгьы иаҳзааигәахоит (Иак. 5:17). Рыгәхьаақәа рыцеиҩаҳшозар, ҳхаҿы иааҳгалар ҳалшоит ҳара иҳамоу аԥышәарақәа рҩызцәа даргьы ианрықәшәоз, урҭ зызхәыцуаз, насгьы цәаныррақәас ирымаз.

7—9. а) Иарбан цәаныррақәоу ирызцәырҵрыз абиблиатә аамҭақәа раан инхоз Иегова изиашаз ауаа, иахьа ҳара ҳаиԥш амаҵзура алшара рымазҭгьы? б) Избан изҳахәҭоу ҳагәрахаҵара усла арӷәӷәара?

⁷ Иара убас ҳара ҳагәрахаҵара усла иҳарӷәӷәоит, избанзар «усла ишьақәырӷәӷәам агәрахаҵарагьы» ԥсуп (Иак. 2:26). Шәазхәыц шаҟа иаргәырӷьарыз урҭ Анцәа изиашаз имаҵзуҩцәа Иегова иахьа ҳара иҳадиҵаз аус дара ириҭазҭгьы!

⁸ Ишԥақәҿиҭрыз Авраам, ацәҳәыраҿы ахаҳә џьаџьа иалху амҭанагарҭа аԥхьа акәымкәа, иара «харантә» дызхьыԥшуаз ақәыргәыӷрақәа хәҭа-хәҭала иахьалацәажәо Аҳратә зал ԥшӡақәеи аконгресс дуқәеи рҿы, адоуҳатә аишьцәеи аиаҳәшьцәеи рыбжьара Иегова ирҳаракра илшоит ҳәа иарҳәазҭгьы? (Шәаԥхьа Ауриацәа рахь 11:13.) Иԥшақәҿиҭрыз Илиа, ихьаҵыз аҳ инапхгараан Иегова имаҵ уа, Ваал иԥааимбарцәа бааԥсқәа рышьра акәымкәа, агәыӷреи агәырҭынчреи иазку ажәабжь ауаа ирызнеигалоит ҳәа иарҳәазҭгьы? Абиблиатә аамҭақәа раан инхоз Иегова изиашаз имаҵзуҩцәа ҳәарада даараӡа еигәырӷьарын иахьа ҳара ҳаиԥш амаҵзура алшара рымазҭгьы.

 ⁹ Убри аҟынтә шәааи ҳагәрахаҵара усла иҳарӷәӷәалап. Убасала ҳара иааҳарԥшуеит Анцәа Иажәа агәра згоз рҿырԥшала ҳшынхо. Насгьы аԥхьажәа аҿы ишҳәаз еиԥш, дара ҳҩызцәа гәакьақәа реиԥш иаҳзыҟалоит. Уи адагьы, ҳаиҩызара иаарласны иҟаҵәҟьоу акы еиԥшхоит.

10. Иарбан гәырӷьароу иаҳзыԥшу Џьанаҭ дгьыл аҿы?

¹⁰ Еснагь шәгәыӷра шәхаҿы ишәыхьчала. Анцәа изиашоу имаҵзуҩцәа агәыӷра еснагь амч рнаҭон. Ишәнаҭома амч уи шәара? Шәазхәыц шаҟа игәырӷьарахо «ииаша-ҵабыргу... иԥсхьоу» рыԥсы анҭалалак рԥылара. (Шәаԥхьа Аусқәа 24:15.) Иарбан зҵаароу урҭ ирышәҭарыз?

11, 12. Иарбан зҵаарақәоу адунеи ҿыц аҿы ираҳҭар ҳалшо а) Авель? б) Нои? в) Авраам? г) Руфь? д) Авигеиа? е) Есфирь?

¹¹ Ишәҭахымхари Авельи шәареи шәанеибабалак, иҭаацәа зеиԥшраз иазҵаара? Акыр дразҵаауазма иара Едем аҭаларҭа зыхьчоз ахерувимцәа, насгьы ирҭозма урҭ аҭак? Шәиазҵаарызу шәара Нои анефилимцәа дрыцәшәозма ҳәа? Ишԥаилшоз шықәс дуӡӡак аковчег иҭаз аԥстәқәа рхылаԥшра? Шәиазҵаарызу Авраам Сими иареи еиқәшәахьазма ҳәа? Изеиҭазҳәодаз иара Иегова иӡбахә? Ицәыцәгьазма иара Ур ааныжьра?

¹² Убасҵәҟьа, Анцәа изиашаз аҳәса рыԥсы анҭалалак, урҭ рахьгьы шәызҵаарақәа рацәахар ҟалоит. Лгәазҭазҵазеи Руфь Иегова имаҵзуҩы лакәны аҟалара? Дшәозма Авигеиа Давид дышицхрааз Навал иаҳәара? Ирԥеиԥшхазеи Есфирьи Мардохеии?

13. а) Иарбан зҵаарақәоу ишәырҭар рылшо зыԥсы ҭалараны иҟоу ауаа? б) Шәаргәырӷьома шәара ажәытәан инхоз Анцәа изиашаз имаҵзуҩцәа рбара алшара ахьыҟоу?

¹³ Ҳәарада, арҭ Анцәа изиашоу имаҵзуҩцәа шәара шәахьгьы азҵаарақәа роуеит. Шәазхәыц шаҟа иаҳгәарԥханы дара ирзеиҭаҳҳәало ари асистема аҵыхәтәантәи амшқәа рыӡбахә, насгьы Иегова ижәлар дшырзылԥхоз иуадаҩыз аамҭақәа раан! Ҳәарада, дара ргәаҵанӡа инеиуеит Иегова иқәыргәыӷрақәа зегь шынаигӡаз раҳар. Уи аамҭа анааилак, абиблиатә персонажқәа зеиԥшраз ҳәа азҵаарақәа уаҳа иҳазцәырҵлаӡом. Дара Џьанаҭ дгьылаҿы иҳацынхалоит! Убри аҟынтә ишәылшо зегь ҟашәҵала, шәара шәзы дара иахьагьы иҟаҵәҟьоу ракәхарц азы. Шәаҿыԥшла урҭ рыгәрахаҵара. Ишәзыҟалааит дара Иегова наӡаӡа имаҵ шәыцзуло ҩызцәаны!