Лука иҟынтә ажәабжь бзиа 20:1—47
20 Зны Иисус аныҳәарҭаҿы ауаа Анцәа иажәа андирҵоз, ажәабжь бзиагьы анрылеиҳәоз, аԥшьаҩ еиҳабацәеи, азакәанрҵаҩцәеи, ажәлар реиҳабацәеи неин,
2 ус иарҳәеит: «Убас ҟаҵатәуп ҳәа уазҳәада? Иузҭада азин?»
3 Иисус иҳәеит: «Саргьы зҵаарак шәысҭоит, аҭак сышәҭ:
4 Иоанн ауаа ӡааихларц азин изҭада — Анцәа иакәу*, ауаа ракәу?»
5 Дара ус еибырҳәо иалагеит: «„Анцәа иоуп“ ҳҳәар, „нас, игәра зышәымгеи?“ ҳәа дҳазҵаауеит.
6 „Ауаа роуп“ ҳҳәар, ажәлар ахаҳә ҳадыргоит, избанзар дара Иоанн дышԥааимбарыз агәра ганы иҟоуп».
7 Убри азы иҳаздырӡом ҳәа иарҳәеит.
8 Усҟан Иисус иҳәеит: «Ус акәзар, саргьы азин сызҭаз дызусҭоу шәасҳәаӡом».
9 Анаҩс Иисус изыӡырҩуаз абри аҿырԥштәы рзааигеит: «Хаҵак аӡахәа еиҭеиҳаит. Нас уи аӡахәаҭра қьырала аӡахәааӡаҩцәа ириҭан, даҽа тәылак ахь дцеит. Уа кыраамҭагьы даанхеит.
10 Ажь аҭаара аамҭа анааи, иара аӡахәааӡаҩцәа рахь имаҵуҩы дишьҭит, ихәҭаа ирҭарц азы. Аха аӡахәааӡаҩцәа уи дрыпҟан, акгьы имҭаӡакәа доурышьҭит.
11 Усҟан иара даҽа маҵуҩык дишьҭит. Аха дара уигьы дрыпҟан, ахьымӡӷ ирганы, акгьы имҭаӡакәа дрышьҭит.
12 Нас ахԥатәи дишьҭит, аха дара уигьы дрыпҟан, аӡахәаҭра дҭырцеит.
13 Усҟан аӡахәаҭра зтәыз иҳәеит: „Иҟасҵарызеи? Бзиа избо сԥа дсышьҭып, ма уи ҳаҭырла изныҟәап“.
14 Аха аӡахәааӡаҩцәа уи данырба, ус еибырҳәеит: „Ари аӡахәаҭра зтәхо иоуп. Шәааи даҳшьып, усҟан аӡахәаҭра ҳара иаҳтәхоит“.
15 Нас дааныркылан, аӡахәаҭра дҭыганы дырган, дыршьит. Аӡахәаҭра зтәу урҭ ирзиуеи?
16 Иара дааны аӡахәааӡаҩцәа ишьуеит, аӡахәаҭра даҽа шьоукы ириҭоит».
Ари заҳаз ус рҳәеит: «Уи ҟалашьа амам!».
17 Усҟан иара днарҿаԥшын, ус дразҵааит: «Ҵакыс ирымоузеи, нас, Аҩыраҿы иану абарҭ ажәақәа: „Аргылаҩцәа ирҭахымхаз ахаҳә хыхьтәи акәакь аҿы ишьҭарҵо хаҳәны иҟалеит“?
18 Уи ахаҳә иақәҳауа дԥыххааса дцоит, иара зықәҳауа дарҟьацуеит».
19 Азакәанрҵаҩцәеи аԥшьаҩ еиҳабацәеи Иисус иҿырԥштәы дара ишрызкыз еилыркааит, иаразнак дыкны дыргарцгьы рҭаххеит, аха ажәлар ирыцәшәеит.
20 Дара Иисус ишьклаԥшуан. Нас шьоукы аԥара рзыршәан, Иисус иахь ирышьҭит, иуаа бзиақәоушәа рхы аарԥшны, иакәым ак идырҳәарц азы, избанзар аҳәынҭқари амчра змаз ауааи дрырҭар рҭахын.
21 Урҭ Иисус ус иарҳәеит: «Арҵаҩы, ҳара иаҳдыруеит уара иуҳәо шиашоу, ауаа идурҵогьы шиашоу. Иаҳдыруеит Анцәа имҩа иазкны ауаа аиаша шыдурҵо, аӡә далымкааӡакәа зегь пату рықәуҵоит.
22 Иҳаҳәа, ацезарь ашәахтә изшәара аҭаху-иаҭахыму?»
23 Иисус урҭ ргәы ацәгьара шҭаз идырын, ус реиҳәеит:
24 «Исшәырба адинар*. Зсахьеи зыхьӡи аныда ара?» — «Ацезарь», — рҳәеит дара.
25 Усҟан Иисус ус реиҳәеит: «Ус акәзар, ацезарь иитәу ацезарь ишәҭала, Анцәа иитәу — Анцәа».
26 Абас дара Иисус иакәым издмырҳәаӡеит. Ииҳәаз иаршанхан, ажәак рзымҳәо иқәхеит.
27 Уи ашьҭахь аԥсцәа рыԥсы ҭалаӡом ҳәа зҳәо асаддукеицәа наидгылан, ус иарҳәеит:
28 «Арҵаҩы, Моисеи абас иҩуан: „Аӡәы ахшара димоуӡакәа дыԥсыр, иԥҳәыс иашьа ԥҳәысс дигароуп, иԥсыз ишьҭра иациҵарц азы“.
29 Иҟан быжьҩык аишьцәа. Аиҳабы аԥҳәыс дааигеит, аха ахшара димоуӡакәа дыԥсит.
30 Иԥҳәыс иашьа дигеит, аха уигьы ахшара димоуӡакәа дыԥсит.
31 Убас ихьит ахԥатәигьы. Убас абыжьҩыкгьы ахшара дырмоуӡакәа иԥсит.
32 Аҵыхәтәаны уи аԥҳәысгьы дыԥсит.
33 Рыбыжьҩыкгьы уи ԥҳәысс дрыман. Нас, рыԥсы анҭало, дызтәхода лара?»
34 Иисус иреиҳәеит: «Ари адунеи* иатәу ауаа хаҵа ицоит, ԥҳәыс дааргоит,
35 аха аԥсҭалареи ԥхьаҟатәи* аԥсҭазаареи иаԥсаны иԥхьаӡахо ԥҳәысгьы дааргом, хаҵагьы ицом.
36 Дара уаҳа иԥсӡом, избанзар амаалықьцәа иреиԥшхоит, рыԥсы анҭалалак ашьҭахь Анцәа ихәыҷқәа ракәхоит.
37 Аԥсцәа рыԥсы шҭало атәы ҳҳәозар, уи Моисеигьы иҳәеит. Амца зкыз ачықь аӡбахә аниҳәоз, иара Иегова* „Авраами, Исааки, Иакови Рынцәа“ ҳәа изиҳәеит.
38 Иара зыԥсы ҭам Рынцәа иакәӡам, зыԥсы ҭоу Рынцәа иоуп, избанзар иара изы урҭ зегьы рыԥсы ҭоуп».
39 Усҟан азакәанрҵаҩцәа рҟынтә шьоукы ирҳәеит: «Арҵаҩы, шаҟа ибзианы иуҳәазеи!»
40 Уи ашьҭахь Иисус зҵаарак иҭара аӡәгьы изыгәаӷьуамызт.
41 Иара ус дразҵааит: «Избан Христос Давид иԥа иоуп ҳәа зырҳәо?
42 Давид ихаҭа иоуми Аԥсаломқәа рҿы изҳәаз: „Иегова Исықәиҭу иеиҳәеит: ‚Сарӷьараҿы утәаз,
43 уаӷацәа ушьапаҿы ишьҭасҵаанӡа‘“.
44 Давид уи Исықәиҭу ҳәа изиҳәазар, нас, иԥа злаиакәзеи?»
45 Ажәлар зегьы анизыӡырҩуаз аамҭазы иҵаҩцәа ус реиҳәеит:
46 «Азакәанрҵаҩцәа шәырмеиԥшхан. Дара иауу амаҭәа рышәҵаны аныҟәара бзиа ирбоит, бзиа ирбоит аџьармыкьаҿы аԥсшәа анрарҳәо, бзиа ирбоит асинагогақәа рҿы иреиӷьу аҭыԥқәа рынкылара, ачараҿы аханы атәара.
47 Дара аҳәсеибацәа ирымоу* рымырхуеит, ауаа ҳарбандаз ҳәа акыраамҭа игыланы Анцәа иҳәоит. Урҭ уаӷеимшхара рзыҟалоит».
