Mmušo wa Modimo ke pušo ya kgonthe yeo e hlomilwego ke Jehofa Modimo. Le gona ka Beibeleng “Mmušo wa Modimo” o bitšwa “mmušo wa legodimo,” ka ge o buša go tšwa legodimong. (Mareka 1:14, 15; Mateo 4:17, King James Version) O swana le mebušo ya batho ka dibopego tše dintši, eupša o e phagametše ka ditsela ka moka.

•   Babuši. Modimo o kgethile Jesu Kriste gore e be Kgoši ya Mmušo woo le gona o mo neile matla a magolo go feta ao mmuši le ge e le ofe a ka bago le ona. (Mateo 28:18) Jesu o diriša matla a go dira feela dilo tše dibotse, ka ge a šetše a impontšhitše gore ke Moetapele yo a ka botwago le yo a nago le kwelobohloko. (Mateo 4:23; Mareka 1:40, 41; 6:31-34; Luka 7:11-17) Ka tlhahlo ya Modimo, Jesu o kgethile batho ba itšego go tšwa ditšhabeng ka moka bao ba tlago go “buša e le dikgoši godimo ga lefase” ba na le yena legodimong.—Kutollo 5:9, 10.

•   Nako Yeo o Tlago go e Fetša o Buša. Ka go se swane le mebušo ya batho yeo e bago gona ka nakwana ke moka ya wa, Mmušo wa Modimo ‘o ka se ke wa fedišwa.’—Daniele 2:44.

•   Balata. Motho le ge e le mang yo a dirago seo Modimo a se nyakago e ka ba molata wa Mmušo wa Modimo, go sa šetšwe gore borakgolokhukhu ba gagwe ke bomang goba gore o belegetšwe kae.—Ditiro 10:34, 35.

•   Melao. Melao (goba ditaelo) ya Mmušo wa Modimo ga e fo thibela motho go itshwara ka tsela e fošagetšego. E dira gore balata ba wona ba be le boitshwaro bjo bobotse. Ka mohlala, Beibele e re: “‘O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.’ Ye ke taelo e kgolokgolo le ya pele. Ya bobedi ya go swana le yona ke ye: ‘O rate moagišani wa gago ka mokgwa wo o ithatago ka wona.’” (Mateo 22:37-39) Go rata Modimo le moagišani go tutueletša balata ba Mmušo wo go direla batho ba bangwe dilo tše dibotse.

•   Thuto. Le ge Mmušo wa Modimo o beela balata wa wona ditekanyetšo tše di phagamego, o bile o ruta batho kamoo ba ka fihlelelago ditekanyetšo tšeo.—Jesaya 48:17, 18.

•   Morero. Mmušo wa Modimo ga o humiše babuši ba wona ka go ikhola ka balata ba wona. Go e na le moo, o tla phetha thato ya Modimo, go akaretša le kholofetšo ya gore bao ba mo ratago ba tla phela ka mo go sa felego lefaseng la paradeise.—Jesaya 35:1, 5, 6; Mateo 6:10; Kutollo 21:1-4.