Goniʼsa ló toib barrio de gudx Ángeles (California, ni noʼ Estados Unidos), buñ rimbu lagarycu portín noʼ drogas né pandillas. Góca toibtica de xhoop mbiox ni gop bixiosa né xinaʼya.

Órni góca mbiox xinaʼya goyné naʼ lainy toib iglesia evangélica. Órni goniʼsa ni bisudi goyoʼni tiplad guidiaga né bireʼni stiplad. Guirá doming biila coro, per lainy xomal gosadxeya, biquiinna drogas né buni galyoxh.

Góca buñ nadox né nimaca bidzutzi. Nitisi cós góc xquiba par ñoni gan ló galrradíil. Ni bisudi lainy iglesia diti gocnéni naʼ xitcal. Goniya: «Señor rony que buñ quiix ni rony, né naʼ roni xchiimbu». Dzú ni ma guidubylagaʼ íz sesenta, órni gopa 18 íz, bioladxi mod buny pensary toib grupo político ni góc laa Panteras Negras, ni godíil por derechos xtuny buñ. Goyoʼya lad toib grupo de mbiox scuel ni láaca godíil por derechos xtuny buñ. Xidal buelt goyoʼdo marchas, né por ngú ma diti goyoʼ scuel.

Per diti goyoʼya conforme né ngúsi. Galrrianladx ni gopa bichiinni naʼ ñoni cós mal. Ximiga né naʼ goyoʼdo cine par bibiʼdo películas ro rarecaa ximod buñ Estados Unidos bunynaayibu buñ yaʼas ni goyoʼ xan xomandaryibu. Guirá ni bibiʼdo bitzuitzni lóodo, por ngú godindo mbioxhlas quiich ni goyoʼ lainy cine, né biyopydo más buñ quiich ro rabésyibu par naguindo layibu.

Par ló dzúcu, guirá buchi né naʼ ma bunydo xidal galkié né dada ma goyoʼdo nisló buñchiin. Toibtica de buchi ni más lahuin goyoʼbu lad toib pandilla ni bunygoluʼ cós mal, né naʼ láaca bidzaga layibu. Cuensosi mod bibani.

Bixios toibtica ximiga gocyibu testigos xtuny Jehová né biruʼyibu naʼ ñaʼya xireuniónyibu. Primer buelt ni goyaʼya bidudi cuent que gadzé mod gocyibu. Guiráyibu gopyibu toib Biblia né biquiinyibu láani. ¡Dada mbioxhlasien bitudy discurs dop! Bidziguiaʼya ni goona que laa Dios ngú Jehová, né biquiinyibu láani órni goniʼyibu de Dios (Salmo 83:18). Ná goyoʼ buñ de xidal lagary biendxichni que diti bianladxyibu saʼyibu nili goleʼyibu saʼyibu tiplad.

Primer la, diti bioladxi nasuidyibu naʼ ni ná la Biblia, per bioladxi goyaʼya reunión. Toib goxin laʼga noʼya ló reunión, tipnés de ximiga goyee ló toib lanii né godinyibu toib mbioxhlas dada bigaityibu par ñaneyibu xhap mbioxhlas reʼ. Stoib dzúcu nigolú biatzyibu né ni bunyibu. Dada órni goyeeyibu nisló juez ralooyni par layibu diti toib galkié rodann ni bunyibu. Casi guiráyibu goyoʼyibu lachquiip. ¡Bibaladxi portín diti goyaʼya né layibu! Órcu goloʼya guica natzaʼya mod nabani, né gosalóya bisudi ni ná la Biblia.

Góca toib buñ ni nigolú bianladx buñ quiich, por ngú órni bibiʼya ni rony testigos xtuny Jehová nigolú bidziguiaʼya. Por ejemplo, órni toib testigo xtuny Jehová ni nac buñ quiich goyeebu toib viaj bisiambu ximbioxbu né toib famil yaʼas. Láaca toib famil quiich goloyoʼbu toib mbioxhlas yaʼas ni caquiin ro guiaʼan. Ngú gocné naʼ nadudi cuent que testigos xtuny Jehová rony cumplir né diitz ni bisetlaa Jesús ló Juan 13:35: «Modcu guirá buñ san que lóoto nacto xpiina: pal nadxiʼto saʼto». Goona que bidzela herman ni rony xinésni.

Por ni bisudi ló la Biblia goona que non natzaʼya mod naca. Buni rutigoygaʼlni naʼ par ñaca buñtzay dada lainy xcalnabani (Romanos 12:2). Dxoga dxoga bitzaʼya mod góca, né beʼo enero íz 1974, goyonisa né bidxin góca testigo xtuny Jehová.

Ná ma goyonisa, bunysaya dxiin par nachóga ló xcalnadzutzi. Toibtica dzú ro canido xtiitz Dios, bibiʼya toib buñ gobáan sané radio xtuny xcamiónga. Goynala láabu né órni ma yaca nanaʼsa láabu, bisalbu radio xtuni layoo né seebu. Órni goodxi herman xi buni par nadxiguetbu radio xtuni, toib hermano de experiencia góoch naʼ: «¿Xí ñonylo pal nanáslo láabu?». Galrranabdiitzcu gocnéni naʼ ñoni pensary que yása guisiana guiráxadit mod góca.

Ló beʼo octubre íz 1974, góca precursor. Bisudi buñ ni ná Dios tigayoʼ ór guirá beʼo. Después biruʼyibu naʼ par ñoni dxiin ló central de testigos xtuny Jehová ni noʼ Brooklyn (Nueva York). Par ló íz 1978 bibigueta gudx Ángeles par goona xinaʼya ni ma caxoʼ. Chop íz después buni galtzeʼel né Aarhonda. Láabu nigolú gocnébu naʼ gondo xinaʼya dada dzú goitybu. Después biruʼyibu lóodo ñoodo Escuela Bíblica de Galaad de la Watchtower. Dzú bisloxdo scuel cú, bixelyibu lóodo xomod misioneros gudx Panamá, ro noʼdo dada nigoreʼ.

Desde dzú goyonisa goyoʼ ór ro bisac nagana guichoga xcalnadzutzi. Ni roni ngú, rareʼya lagarycu par diti tíila né buñ né diti gonyxiroʼya láani. Xidal buñ, dada tzeʼela rony felicitaryibu naʼ por mod roni, né dada naʼca radziguiaʼya naʼ. Naana que diti por stipnaʼca bitzaʼya mod naca. Nandxichi que xcalnadip la Biblia racnéni buñ guitzaʼ mod nac (Hebreos 4:12).

La Biblia ma gocnéni naʼ nadudi cuent que diti nac nacsi nabani né ma bisuidyni naʼ gaca buñtzay. Ma diti raguina buñ, xalagary ngú, racnéya buñ guimbu’ Dios. Dada bisudi toib buñ ni diti bidzaga sacró dzú góca mbioxhlas. Después ni goyonisbu, golésdo toibsi, né dada nigoreʼ nacbu ximigdxina. Dada ló dzú reʼ, tzeʼela né naʼ ma gocnédo ochent buñ góc testigos xtuny Jehová.

Nigolú radudi guixquix Jehová por ni nabani goxtiguie’ né radzaʼga pórsi buñ ni rony xinésni.