Profecía 5. Mod caxin gudxlio

«[Dios] sanitló guirá buñ ni caxin gudxlio» (APOCALIPSIS 11:18).

● Pirri ratoʼbu vino de palma gudx Kpor (Nigeria), per nigoreʼ ma diti napbu dxiin, portín petróleo binitló palmeras xtunybu. Pirri ná: «Ragaityni belien, raxinni laidyno né raxinni guʼuc ni napno. Diti napa stoib mod par guidxinaʼya ni guáya».

¿XÍ RADUDY DIITZ DATOS REʼ? Tipnés buñnan ná que más de xhoop millón de toneladas de guix riabni lainy nisdaʼ guirá íz. Né 50% de guix reʼ nacni lách né raclani más de tigayoʼ íz par guixinni. Tipnés buñnan ná que Gudxlio raclani diecisiete beʼo par guisiaani láacani, per buñgudxlio nosi raquiin doce beʼo par guitop cantida reʼ.

BUÑ DITI RONY CRER. Buñgudxlio naní xcalrrien né noʼ ni labúu gonyibu par guilaayibu Gudxlio.

¿LABÚU GUININO QUE SCÚ NACNI LA? Xidal grupos ecologistas né stipnés buñ cayonyibu rutirigaʼlni layibu par guilaayibu Gudxlio. Ná scú, Gudxlio reʼ nigolú caxinni.

¿XÍ RONYLO PENSARY? ¿Raquiin buñ xcalrracné Dios par guilaa Gudxlio, xomod ma goniʼbu la?

Ma bisuidyno gáay profecías reʼ, la Biblia láaca raniʼ tipnés cós sacróyen ni gac ló dzú ni ma guidubylagaʼ. Guisetlano toib ejemplo.

[Comentario]

«Nigoreʼ ma diti napa toib lagary sacróyen, nigoreʼ ma nacni toib lagary ro rasapy buñ guix» (NDEʼ GONIʼ ERIN TAMBER, NI RABÉS COSTA SUR DE ESTADOS UNIDOS, ÓRNI BIXÚ PETRÓLEO GOLFO DE MÉXICO ÍZ 2010).

[Cuadriyen]

¿Nap Dios dool la?

La Biblia goniʼ guirá galnagan ni cacalóno ló naareʼ, per ndeʼ diti radudy diitz que Dios nap dool de guirá galnagan ni cacalóno. Dios nosi goniiny láabu que guirá ndeʼ ñanno láani.

[Reconocimientos]

U.S. Coast Guard photo