Anga kina Christopher, Hannah, na Gina du na gi bipai re te. Dungu aboro rogo zegino dunduko idi kuti gupai nga Mbori nabi yo wa abakureako. Na ginipai du tipa ro? Ya mo mo nabi tiro nga mo mbembedi na Mbori? Watadu mo naida ka du mbembedi na ko? Mo ima rengba kaa bakabangiro nga, ‘Ya mo si taata fu boro ni du na wene pagume na Mbori Tanduapai Dũ? Ka i ya si taata, wai du?’

Ringbisihe kuti Ziazia Kekeapai, si taata boro mbedi na Mbori na kidu na wene pagume na ko. Ziazia Kekeapai naya Mbori ayambu gu ruru kumba nangia Abarayama nga “badiare” watadu badiangbako. (Yesaya 41:8) Mo bingo gu wene yambahe du rogo Yakoba 4:8 naya: “Oni mbédi na Mbori, ko ki mbedi na oni.” Rogo gi gene re, si nayugoho nga si taata ka zio bakure watadu kadu na wene pagume na Mbori. Ono wa ani arengbanga ka bi Mbori ya, wai rengbe mo ka ‘mbeda’ na ko na tipa kadu na wene pagume na ko?

Tipa ka karagapai kuti gu sanahe re, mo bingo gupai ninaamanga dagba agu aboro naida ka zio pa bakure. Si natona dedede nga aboro ue naasada ka ino arimoyo. Fuani, ho i nikaa fura ni dagbayo dedede, na kini pekepa agu apai du tipa yo, gayo pa bakure nasona. Na ho i aundo tiyo ni dagbatiyo, si na nyakasa gayo pa bakure. Ani rengbe ka pepai wakina gure tipa zio bakure na Mbori. Ani bingo wai rengbe gipai re ka manga.