Yekova Ima Rẽ Ani Ini Ko

YA MO si rengbe ka du nga nyanyakipa pai kinaho rogo raka yo mo azangaha? Ka si du nga mo ini kina betepai gbua tipa Mbori, si tie ziazia nga pai kinaho mo azangaha. Tipagine du he ti ni wo? Mbiko wa dungu amirioni aboro naye ka inoho, ye ka ino gu Mbori du pako rogo Baibiri yo naye na badungu aundo rogo raka yo. Mo natona gbia undo ni basa awere na mo nikaa gbia undo agbia kindi kumbatayo.

Yekova Mbori nga Baenge ke Baibiri, naida gupai nga ani ini ko. Bake papara Atambuahe akepai ki ya: “I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.” Ko aima ino gupai nga pa ino ani ko si tipa kina gani undo. “Mi nga Yekova ga Mbori, nayugo pai foro sa u.” Wai du ani agbia undo ti ino ani Yekova Mbori nga Bahe Kisusi?—Atambuahe 83:18; Yesaya 48:17.

Gu ndikidi undo sa ani agbiaha nga, ani nagbia ngbembatayo rogo agu akpakarapai ani agbia tirani na ni na a′uru dũ, wene maabangirise tipa kumbatayo, na zereda nga ga berãse yo. Kurii gure, pa du ani na inohe wenengai tipa Yekova, nafõ rani ani sonosi gu bipai du kia nibipa gu nyanyakipa asanahe aboro agbiatiyo areme na ni rogo gi zegino re. Agu asanahe re nga gine?

Ya mo gamo raka na rogo yo ti ni?

Wa vura duhe nga gu inohe nga ga wiri aboro nasona kina kumbatayo, areme, aboro nibasasa nasana kina gi bangisa nyanyakipa asanahe re kindi nga: Tipagine du mi ti ni ane? Wari mi andu kuo ni? Gini ndupai aboro araka ti ni? Ka boro agbianga wene akaragapai kuti agi asanahe re ya, gani raka arengbanga ka du na ndikidi rogoyo ti ni te. Ya mo kina gu bangisa bipai re du badungu aboro na ni? Gu wisigopai i amangihe Germani yo ti digido agu agarã nga1990, bisue bawe rii kama nga ga agu aboro nafu karagapai anaabihe abi ti gu kura aregbo nga gayo raka na rogo yo ti ni te. Isoke, kina gu bangisa pai re a du ti agu aboro du rogo gu rago mo araka rogoho.

Ho adunga boro ni na ndupai beni rogo raka yo ya, si nasa ni ni zanga mburu gupai rengbe ni ka sonosa gani asasa riihe. Dungu aboro futiyo ka du na diabese rogo gayo sunge yo ni dungura yo aũkumuko tipa ka gipai re dunga na maapai kuriyo ya. Wa vura duhe wo, pa biyo tiyo nga sunge ti gayo raka te napeka fuoyo kindi. Pa zanga du boro na ndupai rogo raka yo ima rengba ka fuda ni si ki da ti gupai nga ni naabi ti ni ya ndupai ho berewe ni naaraka te. Gere wa kina gu pangbanga nadu tipa gu bawene paranga dee nga gu ri i asonosi ri ringbisihe kuti gu pangbanga nga ga International Herald Tribune na gu bipai nga, “gu yangara wenepai rogo raka yo nga ka du na aũkumuko gbiati gu worimo adunga na digidoho ti ni ya.” Wa vura duhe nga ri aaraka fiõfiõ raka, ri anaabi tiri nga ri nisari, na sunge ti gari raka te. Ri ambiri dawa rame na i ki ye ki bi kina kangba ri. Mo ima rengba ka ino gu kura boro nakpara ti ni nisani nga gu ni gani raka adigi ngba gbegberẽ gene.

Wa vura duhe wo, ya mo mo aginga kura aboro i nipe gupai nga aboro birĩ-inohe ima rengba ka pe agu apai naabaha du tipa raka? Waraga pangbanga sa nga ga Germani weekly Die Woche ape gupai nga: “Wa vura duhe nga science ima rengba kadu ni rengo, si arengbanga ka undo boro rogo toro yo te. Gu yugopai nga ahe akuru nisaha nangera wa gupai du taata, na zavura quantum physics si arengbanga ka fu rengo apai dunduko te, bambiko si nga gupai boro ainongo wai si amanga ya, na si afunga wasa gbiati bandahe te.” Aboro birĩ-inohe ima manga bakere asadatise ka sakapai tipa araka ngba arikoho, na ki sakipai tipa wai ahe a′aria tihe na gu gene si amangapai ngbaha tipa ka sa raka si nindu kina kumbatayo. Ono tie, aboro birĩ-inohe arengbanga ka pe ndu gupai du ani ti ni ane na wari ani andu kua ni te. Ka ani kido gbua kina kuti aboro birĩ-inohe, gaani asanahe tipa ndu gupai ani araka ti ni, ani rengbenga ka gbia akaragapai kuti ni te. Ni sangbana gipai re, gu waraga apangbanga nga Süddeutsche Zeitung ape pai ki ya, “gipai re naida na bakere undo gbe.”

Da rengbe nzunzu ka fu gu ngbatunga undo re susi Bakusiahe? Wa du ko nakusi wiri aboro ku auru kpotosende ti tonatona rago, ko ima ino gu ndupai du yo ti ni ane. Baibiri nape gupai nga, Yekova akusi wiri aboro tipa i hiisi kpotosende, kini ngere fuoho na kini bandaha. Rogo gayo mangaapai yo dunduko, si aaida wiri aboro yugu asino Mbori wagu nga, rurupai, tatamana, gbiati nyemuse. Ho ani arugatirani ni na gu ndupai Yekova akusi rani ti ni, ani naye ka ino gu ndupai du ani ti ni ane.—Bambata Pai 1:26-28.

Ginipai si Aida Mo Mangihe?

Ka si dunga mbata kusayo mo aagbianga ndikidi akaragapai kuti agu asanahe du wa gu nga: ‘Tipagine du mi ti ni ane? Wari mi andu kuo ni? Ginipai aboro araka ti ni?’ Baibiri nangarasa ro nga mo asadi ka ino Yekova wenengai gbe. Nirengo, Yesu aya: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” I nangarasa ro berewe a nga, mo sonosi asino Mbori, gu susi asusa gbe nga nyemuse, na ki moihe ni gamo sasa ka raka tii gu ga Mbori Kindo naye nga gu Kindo nga ga Masiya. Gamo raka nika du na rogoyo ti ni na mo kidu na bawene nyanyaki maabangirise tipa kumbatayo. Si nawira wa, mo nika gbia akaragapai agbia kuti gu nyanyakipa asanahe nga gu nafuda aboro kindi da ku awere.—Yoane 17:3; Batungusipai 12:13.

Waigu pa ino mo akaragapai kuti gu nyanyakipa asanahe re narengbe ka du na maapai kuriro? Hans nga gu kumba rengbe ka ino akaragapai ku ti ni. * Bete agarã kusayo, Hans aduadu na bete aida kuti Mbori, ono gako idapase aadunga na maapai kurii gako raka te. Hans aagbia ngbarago ti dia kere angua, ta fuo agu adee nga abanambara, manga rukutu gbegberẽ apai gbiati ora na motoro. Ko ape gupai nga, “Gi raka aadunga na rogo yo ti ni te, mi aagbianga ndikidi ngbarago te.” Ho garã Hans aambeda ni kuti 25, ko adiberã nitiko ka ino Mbori ni geda ko Baibiri wenengai. Nibasa fuo Hans tona ka ino Yekova wenengai, ko arugu tiko na ndu gupai aboro araka ti ni, ko ki mangi ariapai rogo gako gene raka ki zi bapatiza, na ki da ni Dezire Yekova. Ko aima digo nimangi sunge tungusapai ti aregbo dunduko vuru agu agarã yo bawe susi kusayo re. Ko nape gupai gbaiga nga: “Iriso Yekova nga gu wene gene raka ngba kisusi. He ho rengbe yo ka ringbisaha kuti ni te. Pa ino mi Yekova ima sa gimi raka si du na rogo yo ti ni.”

Kina rengo ngaha nga, anga gu ndupai aboro araka ti ni nga gu yangara bakabangirise du dungu aboro na ni te. Wa apai agberã kina kumbatayo rogo zegino, badungu aboro natona ka gbiatiyo na gu kura fudifudi apai be gu kura nyanyakipa apai kia.

Tipagine Gbegberẽ Apai Amanga Ti Ni?

Ho gbegberẽ apai amanga ni, dedede, gu boro si namangi ni ni nagbeberã ni kuriipa sanahe sa: Tipagine si namangi ti ni? Pa du boro na rengba ka diabe agu akpakarapai nga ga fuda berãseyo naru ni bakerehe gbe kuriipa gbia ni ndikidi karagapai kuti gu sanahe re. Ka si du nga boro agbianga wene akaragapai te, gani arungo ni kaa ndu kina kumbatayo kindi na ni ima rengba ka da zaatu ni zingizingi boro. Ni kpiapai, ani dinga gu kpiapai nga ga Bruni.

Bruni agumba gupai nga, “Bete agarã kusayo, tooni wire ni degude akpi ho mi adu ni ni gu nagude naanyakanga gbe ya. Mi aima ida kuti Mbori, sidu, mi agbata wasa be gu bavugahe naadu rogo gu rago re. Ko agumba gupai fere nga Mbori ima dia Susanne ku ngbangbaturũ yo, yo du ri ni awere ni maraika. Anga kina pa kpio ri sa nasa gupai nga apai nyasi tire dunduko te, ono mi aima soga Mbori a tipa gupai nga ko adi ri.” Ga Bruni imisiri gbiati rungo andu kumbatayo tipa dungu agarã. “Fuoho, Dezire Yekova sa ayugu gupai fere rogo Baibiri nga, ndupai ho fere tipa mi sogo Mbori te. Yekova aadianga Susanne ku ngbangbaturũ yo te na ri awere nga maraika a te. Gari kaza angia sangbana gu zanga rengba nga ga aboro. Susanne naraara rogo kpioyo, ri napido gu regbo Yekova nika zingisa ri. Mi awiriki gupai a nga, ko akusi aboro i raki nyeanye kindi rogo Paradizo auru kpotosende, na gipai re nika da ti rengo barambeda. Nibasa, mi atona ka rugatire nzunzu na pa gini ngbatunga boro nga Yekova, mi atona kaa mbeda na ko gbe na gimi aimisiri ki tona kaa zereda.”—Atambuahe 37:29; Amokedi 24:15; ARomo 5:12.

Dungu amirioni aboro nagbia tiyo na kere akpakarapai ngba arikoho ni bakiakia, agu akpakarapai nga ga fuda berãseyo boro agbia tini na ni, avura, angbongi, gbiati gu gberãngo naye be ome zegino. Bruni agbia wasa nibasa tingbafuo bi ri gupai rogo Baibiri nga, anga Yekova si adia i birako tipa gu kere kpakaraapai namanga te, anga gako ringbisapai nga ha fu aboro i nirungo te na barambeda, ko nika nyasa riipa gbegberẽ apai dunduko kusayo. Gu rengo pai nga gbegberẽ apai nakio kina kumbatayo, nayugo gupai nga ani naraka awere “rogo kusa rago” nga ga gi sino raka re. Gu wene aariapai ani adigi ni pidihe nika manga awere barambeda.—2 Timoteo 3:1-5; Matayo 24:7, 8.

Ye ka Ino Mbori

Hans na Bruni aduadu na bete inohe tipa Mbori. I aima ida kuti ko zanga i ini dungu apai tipa ko. Ho i adi regbo ni ka ino Mbori wenengai nzunzu, i aima gbia amosoro. I agbia ndikidi akaragapai kuti gu nyanyakipa asanahe du ti gi gaani regbo re. Gipai re asayo i du na gu zereda nga ga berãseyo na kidu na wene maabangirise tipa ku kumbatayo. Amirioni ga Yekova amoyambu ima gbiatiyo na kina gu bangisa pai re a.

Ye ka ino Yekova natona na dia regbo ka wisigo Baibiri wenengai nga gu nagumba apai furani tipa ko gbiati agu apai ko aidaha berani. Na gere nga kina gu bangisapai kura bete aboro amangihe rogo bambata sakama agarã. Ruka nangia bakeke apangbanga na kidu ni munganga a, agumba gupai nga, agu awirina ni aYudo nadu rogo gu dungurati naadu beroya yo rogo ringara aGiriki, “adi pai [ngba aPauro na Sira] wenengaĩ ka berã ha, niwisigi Ziazia Kekeapai na uru, si ngia agi apai wo re.”—Amokedi 17:10, 11.

Agu awirina nadu rogo bambata sakama agarã a anaadunguratiyo adungura kurogo adungurati. Amokedi 2:41, 42, 46; 1 AKorindo 1:1, 2; AGaratio 1:1, 2; 2 ATesaroniko 1:1) Kina gu bangisapai re du areme a. Agu awirina du rogo agu adungurati nga ga aDezire Yekova, nadunguratiyo tipa adunguratise nga gu i ambakadaha gbe tipa si undo aboro nibasasa i du mbembedi na Yekova na kini gbia ngbarago ti ngba irisoko. Koda ani tirani na agu awirina du rogo gaani dagbarago na kina kura aundo ti ni. Wadu he nga yeeye, aboro naye kada wakina gu Mbori i airiso ni, aDezire Yekova nayugo agu asino ayugo du ti Mbori, wa vura duhe vurũ nga i arengbanga ka yugoho nzunzu kina boro wai ko ayugoho te. Sidu, kodatise na aDezire Yekova naundo rani ani ini Yekova berewe wenengai gbe.—AEbere 10:24, 25.

Ya mo gure nangera wa manga bakere asadatise gbua ka ino bangisa Boro? Si naida ani mangi ome amanga nzunzu. Ono ya mo anga gure nga kina gu bangisapai du rogo raka yo tipa gupai mo aida ka da ti ni te? Mo berẽnga pa gu ome kere baoro oto abaangirã amangaha ho ni araba ti ni ni. Ni kpiapai, kere baoro oto abaangirã nga gu ko nagbe he bara biata rogo gu oto abaangirã namangi France yo nga Jean-Claude Killy, agumba gupai si aidaha tipa boro du na diabese rogo gu oto abaangirã yo aboro andu ka mangaha rogo kura ringara: “Si naida mo tonaha mbu agarã kumbatayo 10 mbata fu regbo, na kini mangi mbakadapai tipaha na agarã na agarã, na kini berẽkuriihe na a’uru dunduko. Si nga gu sunge boro amangaha tipa arame 365 vuru garã yo sa, rogo berãyo na ti kpotose.” Gu bagizo regbo re dunduko gbiati gu ome boro amangaha, ni namangaha ka manga mbaro oto abaangirã nga gu rengbe ka dia aminiti gbua bawe! Nairiwo gu bakere apai rengbe ani ka gbiaha ka ani mangi ome wa gure ka ino Yekova.

Gu Pagume Nasona ki du ni Mbembedi he Gbe

Da du naida ka zanga nyanyakipa pai rogo gani raka yo? Boro te. Kurigure, ka sidu nga mo nabihe nga ga raka na ndikidi rogo yo ti ni te, watadu mo nangera kumbatayo tipa wene saka rogopai yo nibipa gu ndupai fudifudiapai amanga ti ni, sidu, mo diberã ka ino Yekova nga gu Mbori nga ga Baibiri ko. Wirikapai tipa ko ima rengba ka aria gamo raka awere ni bawenehe na nyeanye kindi.

Ya mo regbo adu ho ani ka mbu wirikapai tipa Yekova? Agu aboro naima iriso Yekova tipa dungu bawe agarã, ngbayo nazera kindi be agu apai i awirikihe tipa ko na gu vovo apai i andu kumbatayo kindi kaa wirikaha tipa ko. Wirika ani ngbatunga agu apai re nasarani ani du na ngbarago na kini sarani ani du mbembedi na ko gbe. Ani dunga adu na kina gu bangisa berãpai gu mokedi nangia Pauro adu na ni ho ko ake gupai ni nga, “Ako gu dungura nga ga gu ũkumuko nga ga Mbori tatamana na inahe! Na gasi wisiga gako andika, na gasi rugatise na gako mangaapai! ‘Bambiko da ini nga ga Gbia berã? Da nadu nga ni barugupai fu ko?’”—ARomo 11:33, 34.

[Gu rukutu kekeapai du bandu kpewaraga yo]

 

Aboro nibasasa nasana kina gu bangisa nyanyakipa asanahe nga: ‘Tipagine du mi ane ti ni? Wari mi andu kuo ni? Gini ndupai aboro araka ti ni?’

 

“Ho mi atona ka rugatire ni nzunzu na gini ngbatunga boro nga Yekova, mi atona ka mbeda na ko gbe.”

“Iriso Yekova nga gu wene gene raka ngba kisusi.

He ho rengbe yo ka ringbisaha kuti ni te. Ino Yekova ima sa gimi raka si du na ndikidi rogoyo ti ni”