1. Wa vura duhe nga Yekova nga Bakerepa Boro kisusi, ginipai ko ayamba kura aboro i mangihe?

YEKOVA nga Bakerepa Boro kisusi, na ni Bakusiahe dunduko, Ko na gu tatamana na ome adunga digidoho ti ni ya. Eyobo aima ye ka ino gipai re. Ho Yekova asasana Eyobo ni tipa agu ahe ko akusihe, Eyobo akaragapai nga: “Mi ini he ni rengo ya mo rengbe ka manga apai dunduko, a nga pai ho mo aberã pa manga ha, ka i dingisa ha te.” (Eyo. 42:2) Wa vura duhe nga Yekova rengbe arengba ka manga gupai ko aidaha zanga boro undoko, natona bakuru kusayo ko aima digo ni yambu kura aboro i mangisunge na ko tipa ka digiso gako ringbisapai.

2. Gini nyanyakipa sunge Yekova ayambu Yesu i mangihe na ko?

² Ga Mbori bambata kusikusihe angia bangisa Wiriko ni toro. Yekova ambu gene fu gu Wiriko re ko mangisunge na ko i kusi ahe dunduko, agu aboro nga atoro gbiati agu ahe ani abihe abi. (Yo. 1:1-3, 18) Gu mokedi nangia Pauro akepai tipa Yesu nga: “I afu ahe dũ rogo ko yo; watadu ku ngbangbaturũ yo na auru kpotosende, gu i abi na gu i abi nga ya, watadu ambataabakindo, na  aasiapapai, na azogoaboro na atandu; i afu ahe dũ rogo ko yo, na tipa ko a.” (Koro. 1:15-17) Rogo gi gene re, Yekova akiisipa gu Wiriko re ni koda ko ku rogo sunge kusaahe na ni peko pa gu nyanyakipa sunge fu aboro gu Wiriko re aamangaha.

3. Ginihe Yekova ambugene fu Adamu ko mangihe, na tipagine?

³ Yekova ayambu aboro a i mangisunge na ko. Ni kpiapai, ko ambugene fu Adamu ko yambu rimo anya. (Bam. P. 2:19, 20) Nairiwo gu ngbarago Adamu agbiaha ho ko aabi gi kusikusiahe re ni, kini wiriki asino ra, na kini sia gu rimo narẽarẽ tipa ra! Yekova aima rengba ka yamba rimo agu anya re nitiko mbiko ko nakusi ra. Wa si avura du wo, mbiko gako nyemuse, ko ambugene fu Adamu ko yambu rimora. Mbori afu gu momu a fu Adamu nga ko kiisi Paradizo angianga si du kina Edene yo sa ya. (Bam. P. 1:27, 28) Si nafu kina gberãrago tie nga, niyangaraha, Adamu asia ka zanga mangasunge na Mbori na si ki ye na gberãngo kuriko na awiriko.​—Bam. P. 3:17-19, 23.

4. Wai du kura aboro amangisunge sa na Mbori tipa ka digiso gako ringbisapai?

⁴ Kusa, Mbori ayambu kura aboro i mangisunge na ko tipa ka digiso gako ringbisapai. Noa ambakadi kurungba nga gu naabatasi ko na gako aborokporo ti regbo gu Ime Akangbii naadu auru kpotosende dũ. Moize akusi gu rikaaboro nangia aYisaraere Ezipeta yo. Yosua aye na gu rikaaboro re ku rogo Ringara Mokido. Soromo adua gu yekaru naadu Yerusarema yo. Maria avungu Yesu. Gi ruru aboro re na agu akurayo amangisunge sa na Yekova tipa ka digiso gako ringbisapai.

5. Gini sunge rengbe ani ka mangaha, na ya mo ka Yekova arengbenga ka mangaha nisako te? (Oni bi gu sura duti tonatonaha.)

⁵ Areme, Yekova nayamba rani ani songodi gu Kindo nga ga Masiya na omerani dunduko. Dungu abangiriaba duho nga ga ziazia sunge. Anga si dunduko rengbe aKristano dũ ka mangaha te, ono ani dunduko rengbe arengba ka tungusa gu wene pangbanga nga ga Kindo. Rengo ngaha nga, anga ka Yekova amangingo gi sunge re nitiko te te. Ko aima rengba ka fura kina ngbangbaturũ yo fu aboro ku auru kpotosende ane. Yesu aya Yekova aima rengba ka mangasunge na ambia si takipande pa gu Bakindo nga Masiya. (Rk. 19:37-40) Ono wa si avura duwo, Yekova ambugene furani ani du ni gako “abadiasunge.” (1 Kor. 3:9) Gu mokedi nangia Pauro akepai nga: ‘Wa ani namanga pai na ko ani nazungadi roni a ya ka oni adianga ga Mbori undahe gbua ya.’ (2 Kor. 6:1) Mangasunge sa na Mbori nga gu irisa ani arẽnga na ni ya, na si naye na bakere ngbarago furani. Ani bingo gu bete nduapai duhe ti ni wo.

6. Wai du bambata Wiri Mbori afura tipa wai ko adu mbiko mangako sunge sa na Bako?

⁶ Natona bakuru kusayo, ga Yekova amoyambu aima digo nigbia ngbarago ti mangasunge na ko. Bambata Wiri Mbori nga toro i nafura tipa ko ya ko nga tatamana aya: ‘Yekova afu re ti tonatona rago gako sunge, mi adu kina pati ko, wa bangbasia boro sunge; rago angba ti ko mbiko re na aˈuru dunduko, mi ki ningi na auru bara bangiriko.’ (Snz. 8:22, 30) Yesu amangisunge na ngbarago sa na Bako, ko adu na ngbarago mbiko gupai ko aamangaha na pa inoko gupai nga rago aangbati Yekova na ko. Na ginipai du tipa rani?

7. Tipagine du sunge tungusapai asa ngbarago ti ni tirani?

⁷ Yesu aya boro nagbia ngbarago agbia ti gamahe na ti diaha. (Amo. 20:35) Ani adu na ngbarago ka dia rengo kugume na si nafu ngbarago furani a ka tungusa gu rengo re fu  kura aboro. Wa ani atungusa gu rengo nga ga Ziazia Kekeapai fu kura aboro, ani nabi agu aboro du na gomoro rogo toro yo rago ni ngbatiyo wa i atona ka ino gaani Mbori na kini udi ko gbiati gu nyanyakipa arengo du rogo Fugoko yo. Rago nangba tirani ka biyo i nimangi ariapai angianga kina rogo gayo aberã yo sa ya ono rogo gayo generaka yo a. Ani ima inoho nga sunge tungusapai nga nyanyakipa sunge. Si nazaka gene fu agu aboro nambakadapai dagbayo na Mbori i gbia nyenye unga. (2 Kor. 5:20) Gini sunge berewe rengbe ani ka mangaha nga gu rengbe ka sa ngbarago tirani susi gu nga ka undo aboro i sia gu gene raka nika sayo i raki nyeanye kindi?

8. Ginipai kura aboro nagumbaha tipa gu ngbarago i agbiaha ti mangasunge na Yekova?

⁸ Wa vura duhe nga ani nagbia ngbarago ho aboro amangapai ni kuti gu pangbanga ani atungusaha, ani na ngbarago a ka inoho nga rago nangba ti Yekova na ani na ko nabi gu bakere asadatise ani amangaha ka mangasunge fuko na nyanyakipaha. (Oni gedi 1 AKorindo 15:58.) Marco naraka Italy yo aya: “Mi na bakere ngbarago ka inoho nga mi namangasunge na omere dũ fu Yekova angianga fu gu boro bangirini nika go ago barambeda ti gupai mi namangihe ya.” Wakina gure a, Franco namangasunge Italy yo aya: “Yekova natingida rani na aˈuru dunduko rogo Fugoko yo na vurube gako ambakadapai nga ga toro nga, ko nakpinyemu rani na ko nabi agu apai dunduko ani amangaha fuko na nyanyakipaha, wa vura duhe nga ani rengbe kaa bi gaani asadatise nga sunge ti ni te. Gere nga ndu gupai rago angba tire ti ni na mangasunge na Mbori na si nasa raka re si du na rogoyo ti ni.”

9. Gini pagume naadu dagba Yekova na Yesu, na tipagine?

⁹ Ho ani amangasunge ni na agu aboro ani akpinyemuyo, ani nambeda na yo na ki ini gu ngbatunga boro nga yo gbiati asinoyo. Ani nawirikapai tipa gupai i aida ka mangaha na gu gene i aida ka mangaha ngbaha. Yesu amangisunge na Yekova isoke tipa abirioni agarã, na i asonosi nyanyaki pagume nga ga nyemuse dagbatiyo ka paha agberẽnga ya. Ho Yesu afura ni tipa gu mbembedi pagume naadu dagbayo, ko aya: “Ani na Buba sa.” (Yo. 10:30) I agbia ngbarago ti gu wene kodatise naadu dagbayo, na i kini mangisunge kina sa.

10. Tipagine tungusapai ambedisa rani ti ni na Mbori gbiati kura aboro?

¹⁰ Yesu asana Yekova rogo gako kparakpee yo nga ko banda gako abawiriki. Ni gini ndue? Ko akpari ki ya: “I du adu sa wa kina rani.” (Yo. 17:11) Ho ani amangapai ni kuti ga Mbori arugute na kini tungusipai, ani na ino gako wene asino. Ani nawirika gu ndupai duhe ti ni ni patatamana ka kido kutiko na ka pekafuo gako rugapai. Wa ani kaa mbeda na Mbori, ko nikaa mbeda na ani a. (Oni gedi Yakoba 4:8.) Ani nambeda na awirinarani nga ga toro yo a mbiko ani  nagbia kina ngisa akpakarapai na yo gbiati ngbarago na mbiko gaani asasa nayo sa. Nirengo, ani namangasunge kina sa, kini ngi kina sa, na kini hipai kina sa. Octavia naraka Britain yo aya: “Mangasunge na Yekova nambedisa re na kura aboro mbiko gimi pabakure na pagume arunga rii kungbo inotise te ono si mbiko gaani asasa kina sa na arugapai.” Ya mo anga kina gu bipai re du mo na ni te?

11. Tipagine du ani nika mbeda ti ni na Yekova gbiati awirinarani rogo vovo zegino kisusi?

¹¹ Gu pagume nga ga nyemuse du dagbarani na Mbori gbiati kura aboro rengbe arengba kadu ni nyanyakihe awere, ono si nika nyaka berewe kisusi rogo vovo zegino. Mo berẽnga pa gu sunge du furani kumbatayo! Agu aboro i nika zingisayo, si nika ida i di yo kugume na ki yugu ga Yekova pai fuyo. Si nika ida i sa gi kpotosende re ni paradizo. Taata sunge nga agi asunge re te, ono nairiwo gu ngbarago ani nika du na ni ka mangasunge kina sa na ki da ni rengberengbe rani tii gu Kindo nga ga Masiya! Aboro nika mbeda na akurayo gbiati gayo Mbori nga guko nika za beko “ki nimbisi gu nyemuhe nga ga unga ahe dunduko.”​—Tam. 145:16.

12. Wai du du sunge tungusapai ni bandahe?

¹² Si naida ani bandatirani rogo toro yo. Si taata furani ani di gu iraira berãpai na mangapai nga ga gi zegino re mbiko ani naraka rogo gi zegino du kutiibe Satana Bakitingbanga re na mbiko ani nga kpakpa aboro. Ani rengbe ka ringbisa gu toro nga ga gi zegino re kuti gu ime nafu na ani ku rogo gu ba ani aidanga ka ndu ku rogoho ya. Tipa ka si funga na ani ku beberehe yo ya, si naida ani guzo na ome ku rogo gu ba si nika funga na ani rogoho ya. Wakina gure a, si naida ani mangi bakere ome tipa ka ka gu sino nga ga ga Satana zegino funga na ani ya. Ho ani atungusapai ni fu kura aboro, ani naberãkurii gu nyanyakipa apai nga ga toro nga gu nafu undo, angianga ka berãkurii agu apai rengbe ka gbarasapa gaani idapase ya. (Frp. 4:8) Tungusapai nanyakasa gaani kido, kini tingidi rani na ga Mbori akidohe gbiati gako wene arugute. Si nabanda gaani aũvura nga ga toro ka si gberẽnga ya.​—Oni gedi AEfeso 6:14-17.

13. Wai du kura wirinarani sa Australia yo abi tungusapai?

¹³ Ho ani atungusapai ni kakaka na kini mangi gu kura apai nga ga toro, regbo berani tipa kaa bakabangirani ni bakerehe na pa gaani akpakarapai te, na gure nabanda rani a. Joel naraka Australia yo aya: “Tungusapai naundo re ka mi bingo agu apai namanga na taatapaha ya. Si natingida re na gu kpakaraapai aboro agbiatiyo na ni gbiati gu undo mi agbiaha ti mangaapai kuti gu bangua rugute nga ga Ziazia Kekeapai rogo gimi raka. Tungusapai naundo re mi nye na umbasitise; si nafu momu fere mi kido kuti Yekova na kuti awirinami.”

14. Tipagine pa kpatagara ani kuti tungusapai ayugoho ti ni nga ga Mbori toro namangasunge na ani?

¹⁴ Tungusapai nanyakasa gaani kido a nga ga Mbori toro na kina rani. Oni bingo gi kpiapai re: Ani ya i fu gu sunge foro nga mo ni gamu gu kpakuto du na wene ahe rogoho tipa kpotoboro fu agu aboro du rogo gamo dagbarago. I atumongo ro tipa gu sunge re te na zavura gu marã mo agbarasa ru i agasanga ru a te. Kurigure, mo kuru bara gupai nga badungu aboro aidanga na gu kpakuto re te na agu akurayo nasoga ro asoga mbikopa kparaka mo ho. Bagizo regbo wai ka mo dihe kutingba gu sunge re? Pa ino mo gu gbegberẽ bipai du aboro na ni tipa gamo sunge, si rengbe ka sa gberãrago tiro na  ka mo adunga na ome ka ndu kumbatayo na ni tipa gbanga regbo ya. Ono wa vura duhe wo, dungu rani ima kpatagara kuti tungusapai tipa dungu agarã na kini songodihe na kina gaani marã wa vura duhe nga aboro nasoga rani na kini sawia rani vurũ. Ya mo gure ayugongo ho nga ga Mbori toro namangasunge na ani te?

15. Wai du rẽ sunge tungusa wene pangbanga na ga Mbori ringbisapai tipa aboro?

¹⁵ Oni berẽnga pa wai tungusa wene pangbanga narẽ na ga Yekova ringbisapai tipa aboro. Gako ringbisapai adu nga Adamu raki auru kpotosende zanga ko kpi; wa vura duhe nga Adamu aingipai, Yekova aˈarianga berãko te. (Yes. 55:11) Kuba gure, ko amangi mbakadapai ka batasa aboro be ingapai na kpio. Yesu amangipai ringbisihe na gu mbakadapai re, si du ko aye ti ni ku auru kpotosende no ki tumo raka ko tipa aboro giasangba. Ono tie, tipa gupai nga i nye ni aboro giasangba, i ima ino gupai Mbori aidaha beyo. Sidu, Yesu ayugu agu apai a fu aboro Mbori aidaha, na ko afu zinahe fu gako abawiriki i mangi kina gu ngisapai re. Ho ani aundo aboro ni i mbakadipai dagbayo na Mbori, gure nga ani nakoda tirani na ko rogo gako mbakadapai du tipa ka batasa aboro be ingapai na kpio.

16. Wai du gaani tungusapai ni kodikodihe na ga Mbori bakere rugute?

¹⁶ Ho ani aundo aboro ni tipa i gbia nyenye unga, gure nayugo gaani nyemuse tipa yo na tipa Yekova “nga gu ko nakpi nyemu aboro bati dunduko, ki ye sa gu inahe nga ga rengo.” (1 Tim. 2:4) Ho aboro asana Yesu ni nga gini rugute nyakipaha kisusi dagba agu arugute yo Mbori afuhe fu aYisaraere, ko akaragapai nga: “Mo kpí nyemu Gbia nga ga Mbori [na] kpotoro yo dunduko, na mbisimoro dũ, na ga berã dũ. Gu rugute nga bakumba ha susi si nga gere. Kura ha wa kina ha nga gere, nga, Mo nikpí nyemu kuaro wa mo akpi nyemu tiro.” (Mt. 22:37-39) Ho ani atungusapai ni, gure nayugo gaani giasangba kuti agi arugute re.​—Oni gedi Amokedi 10:42.

17. Wai du mo abi gu momu nga ga tungusa wene pangbanga?

¹⁷ Aboro maku nga ani! Yekova fu gu sunge furani nasa ngbarago tirani, nambedisa rani na ko gbiati kura aboro, na nga gu nabanda rani rogo toro yo. Si nafu momu furani a tipa ani yugu gaani nyemuse fu Mbori na fu kura aboro. Agu apai du tipa ga Mbori aboro rogo zegino dunduko si ni bakiakia, ono singia paranga, watadu gbinza boro, irakumuko watadu irarungo, nyanyaki boro watadu rurungbura ni, badungu mirioni aboro natungusapa gayo idapase fu akurayo. Si nawira wa mo ima rengba ka ida kuti gupai Chantel du France yo agumbaha. Ri aya: “Gu Boro kii pani rogo zegino dunduko, nga Bakusiahe dũ, nga Mbori ngbarago, naya fere: ‘Mo ndu! Mo fura! Mo fura kuba re, kina boro ngbaduroyo. Mi fu gimi ome foro, Fugo re nga Ziazia Kekeapai, gu undo nga ga amaraika, awirinamo auru kpotosende ane, rabahe, na wene arugapai ti wene regbo.’ Nairiwo gu bakere momu re nga ka manga gupai Yekova aidaha berani na ka mangasunge kina sa na gaani Mbori!”