Biblia ruzeeteʼ guca Job «ti hombre ni qué gapa donda ne runi ni jneza» (Job 1:1). Ne Lot guca ti hombre biʼniʼ ni jneza (2 Pedro 2:8). Ne laaca ruzeeteʼ ni biʼniʼ David «ni jneza» nezalú Dios (1 Reyes 14:8). Guidúʼyanu ximodo bibani ca hombre bizéʼtenu riʼ. Zudiʼnu cuenta laaca bicheecabe, ne pa chinándanu ejemplu stícabe zanda gusiéchenu Dios, neca binni ruchee laanu.

Gudiʼdiʼ Job lu caadxi desgracia ne para laabe cadi jneza cani bizaacabe que dede guníʼ íquebe qué rizaalaʼdxiʼ Dios pa cayúnibe ni jneza, peru cadi jneza modo guníʼ íquebe (Job 9:20-22). Ne laaca bisihuínnibe nácabe ti hombre nachaʼhuiʼ. Zaqué bisihuínnibe casi ora jma nacháʼhuibe que Dios (Job 32:1, 2; 35:1, 2).

 Qué niná ga Lot nuzuubaʼ stiidxaʼ Dios. Ca binni de Sodoma ne Gomorra nabé bíʼnicaʼ cosa dxabaʼ ne maʼ bixhacalaʼdxiʼ Lot cani rúnicabe. Ngue runi, Biblia na «racaná ladxidóʼ be ora guʼya be» guiráʼ ni runi ca binni que (2 Pedro 2:8). Gudxi Dios laabe chigunitilú guiráʼ ca binni nabeza raqué ne pa racaláʼdxibe gulabe familia stibe la? napa xidé cueebe laacaʼ de raqué. Ni jma jneza ñuni Lot nga nuzuubaʼ diidxaʼ nagueenda, peru qué ninágabe nireebe ra lídxibe. Últimu la? gudapi ca ángel biseendaʼ Dios que nabe ne naʼ familia stibe ne guleecaʼ laacabe de raqué (Génesis 19:15, 16).

David biʼniʼ ni biquiinde beela ladi laa, ngue runi guyuuné ti gunaa ni maʼ bichaganáʼ. Peru cadi ngue si bíʼnibe, sínuque biseendaʼ guutibe xheelaʼ gunaa que para cadi ganna xi bíʼnibe (2 Samuel, capítulo 11). Biblia ruzeeteʼ «qué ñuulaʼdxiʼ Jiobá ni biʼniʼ David» (2 Samuel 11:27).

Guionnaʼ hombre ni bizéʼtenu riʼ guyuu biaje bicheecabe, nuu de cani bíʼnicabe nabé naxoo. Peru casi chiguidúʼyanu, ndaaniʼ ladxidóʼcabe nuucabe guzuubacabe stiidxaʼ Dios. Bisihuínnicabe dxandíʼ guca arrepentírcabe ne bichaacabe xquendanabánicabe, ne ni bíʼnicabe que bisiéchecabe Dios. Nga runi, neca bicheecabe, Biblia na nácacabe hombre ni gupa fe.

Rihuinni dxíchica guiranu rucheʼnu (Romanos 3:23). Peru ni zanda gúninu nga gaca arrepentirnu ne gúninu stipa pur chuʼnu galán né Dios.

 Xi biʼniʼ Job, Lot ne David para guyuucaʼ galán né Dios neca bicheecaʼ yaʼ. Cumu nachaʼhuiʼ Job la? guca arrepentir pur cani guníʼ ne bichaa modo guníʼ ique despué de guniʼné Dios laa (Job 42:6). Cásica biʼyaʼ Dios ca guendaquéiquiiñeʼ guca Sodoma ne Gomorra zaqueca biʼyaʼ Lot cani. Ni bizaacabe nga qué ninagabe nireebe de guidxi que. Peru despué bizuubabe diidxaʼ. Bireebe de raqué ne qué nudxiguetalube para gúʼyabe xi bisaanabe. Neca bicheené David Ley stiʼ Dios, bisihuinni nachaʼhuiʼ, guca arrepentir ne gunabaʼ Dios gutiidilaʼdxiʼ stonda (Salmo 51).

Nanna Dios binni ruchee laanu. Nga runi, neca bichee ca hombre riʼ, qué nuchaa diʼ Dios ni riníʼ ique de laacabe. Qué rinábabe laanu xiixa ni qué zanda gúninu «purtiʼ nanna dxíchibe ximodo guyanu, ne rietenaláʼdxibe de yu laanu» (Salmo 103:14). Yanna, xi ribézabe gúninu yaʼ.

Zanda gánnanu ni ra guidúʼyanu xi gudxi David xiiñiʼ: «Ne lii, Salomón, xiiñehuiineʼ, binibiáʼ Dios stiʼ bixhózeluʼ ne biʼniʼ ni nabe de guidubi ladxidoʼloʼ» (1 Crónicas 28:9). Ximodo zanda gúninu ni ná Dios de guidubi ladxidoʼno yaʼ. Rúninu ni ora gannaxhiinu laabe ne ora gánnanu xi canábabe laanu gúninu ne chinándanu cani. Cadi cayábibe laanu cadi lica gucheʼnu. Ti binni runi ni ná Dios de guidubi ladxidóʼ la? riuulaʼdxiʼ chinanda ni gábibe laa ne rudii lugar uguu jnézabe laa. Cumu biʼniʼ ca hombre riʼ ni ná Dios sicaríʼ la? guniʼbe guca Job «ti hombre ni qué gapa donda ne runi ni jneza», Lot guca ti hombre biʼniʼ ni jneza ne laaca guniʼbe zaqueca biʼniʼ David. Neca bicheecabe, bisiéchecabe Dios.

Pa guiníʼ íquenu cosa ni cadi jneza, guininu xiixa ni gusituí lunu despué o gúninu xiixa ne despué gudiʼnu cuenta cadi jneza ni la? cadi guireʼnu gana. Guietenaláʼdxinu ejemplu stiʼ guionnaʼ xpinni Dios riʼ. Nanna Dios guiranu rucheʼnu. Peru ribézabe gúninu ni nabe de guidubi ladxidoʼno, o gannaxhiinu laabe ne gúninu stipa pur guzúʼbanu stiidxabe. Pa gúninu ni la? zanda gusiéchenu ladxidóʼ Dios.