1. 1) Ximodo ruuyaʼ Jiobá dxiiñaʼ ni runi. 2) Xi maʼ bidiibe lugar guni ca xpínnibe.

NABÉ riecheʼ Jiobá ora guni xhiiñaʼ (Sal. 135:6; Juan 5:17). Laabe riuuláʼdxibe guiecheʼ ca ángel ne binni guidxilayú pur dxiiñaʼ sticaʼ, nga runi rudiibe laacaʼ dxiiñaʼ ni gusiecheʼ laacaʼ ne ni guchá tipa ladxidoʼcaʼ. Bidiibe lugar gacané tobi lucha Xiiñibe laabe para guyáʼ guiráʼ cosa (biindaʼ Colosenses 1:15, 16). Nga runi Biblia rabi laanu ante gueeda Jesús lu Guidxilayú, guyuunebe Dios guibáʼ «casi tobi ni runi xhiiñabe jnézapeʼ» (Prov. 8:30).

2. Ximodo nánnanu rudii Jiobá dxiiñaʼ risaca ca ángel stiʼ ni rusiecheʼ laacaʼ ne ruchá tipa ladxidoʼcaʼ.

² De Génesis hasta Apocalipsis, rieeteʼ rudii Jiobá dxiiñaʼ ca ángel stiʼ. Dxi bichee Adán ne Eva guladxi Dios laacabe de ndaaniʼ jardín ni guyuu Edén que ne «bizuhuaabe querubín [...], ne guluube ti espada naze bele ni cudii bieque ti cadi guidxiña guirutiʼ ra nuu yaga ni rudii guendanabani» que (Gén. 3:24). Lu Apocalipsis 22:6 na: «Biseenda [Jiobá] ángel stiʼ beda uluíʼ ca xpinni xi ma zeda dxiña dxi gacaʼ».

3. Ximodo biʼniʼ Jesús cásica biʼniʼ Bixhoze dxi bibani lu Guidxilayú riʼ.

³ Dxi bibani Jesús lu Guidxilayú, nabé nayecheʼ bíʼnibe dxiiñaʼ ni bisaanané Bixhózebe laabe. Ne bíʼnibe casi biʼniʼ Bixhózebe, laaca bidiibe dxiiñaʼ ca discípulo stibe. Laabe guluube gana laacaʼ pur dxiiñaʼ ni bidiibe laacaʼ gúnicaʼ. Laabe guniʼbe: «Irá cani runi cre naa zuni cani rune ca. Ne jma que nga zuni caʼ purti chaa ra nuu Bixhozeʼ» (Juan 14:12). Gucané Jesús ca discípulo stiʼ gúʼyacaʼ caquiiñeʼ gaca dxiiñaʼ riʼ nagueenda, ngue runi guniʼbe ca diidxaʼ riʼ: «Naquiiñe gune xhiiña ni biseenda naa laga caʼru ixhinni. Purti ma caxhinni, ne óraque ma iruti zanda guni dxiiñaʼ» (Juan 9:4).

4-6. 1) Xiñee zanda chuʼnu nayecheʼ pur bizuubaʼ Noé stiidxaʼ Jiobá. 2) Xi ribeendunu pur biʼniʼ Moisés ni biʼniʼ mandar Jiobá laa. 3) Xi zanda guininu de ca dxiiñaʼ ni rudii Dios binni.

⁴ Ante gueeda Jesús lu Guidxilayú, maca bidii Jiobá binni dxiiñaʼ ni gusiecheʼ laa. Neca qué ñuni Adán ne Eva dxiiñaʼ ni bisaanané Dios laacaʼ, guyuu binni bíʼnini (Gén. 1:28). Casi Noé la? gúdxibe laa ximódopeʼ guzáʼ ti arca, ngue runi gunda bilá ne binnilidxi ora beeda nisaguié naroʼbaʼ que. Ne nabáninu purtiʼ bíʼnibe módopeʼ gudxi Jiobá laabe (Gén. 6:14-16, 22; 2 Ped. 2:5).

⁵ Zaqueca biʼniʼ Moisés guiráʼ ni gudxi Jiobá laa para gunda bizáʼ tabernáculo que ne para gunda gudixhe chaahuiʼ dxiiñaʼ ni runi ca sacerdote (Éx. 39:32; 40:12-16). Yanna, xi ribeendunu pur bizuubaʼ Moisés stiidxaʼ Jiobá yaʼ. Casi bisiene apóstol Pablu, tabernáculo que ne dxiiñaʼ biʼniʼ ca sacerdote rusihuínnicani zaca xcaadxi cosa galán despué (Heb. 9:1-5, 9; 10:1).

⁶ Cumu ziyaca guiráʼ ni na Jiobá la? ngue runi gadxé gadxé dxiiñaʼ rudiibe ca xpínnibe, peru intiica dxiiñaʼ gudiibe laacaʼ rusisácacani laabe ne ribeendú binni stale cosa galán. Ne zacapeʼ nga guiráʼ ni biʼniʼ Jesús ante gueeda lu Guidxilayú ne dxi bibánibe luni (Juan 4:34; 17:4). Zacaca nga dxiiñaʼ ni rúninu yanna (Mat. 5:16; biindaʼ 1 Corintios 15:58). Ximodo rusisaca dxiiñaʼ riʼ Jiobá yaʼ.

7, 8. 1) Bisiene xi dxiiñaʼ runi ca xpinni Cristu yanna. 2) Xi naquiiñeʼ gúninu ora gabi Jiobá laanu gúninu xiixa.

⁷ Ñee cadi riéchenu gánnanu rudii Jiobá lugar guninenu laa dxiiñaʼ neca nácanu binni ruchee la? (1 Cor. 3:9.) Cani rucuí yoo ra raca guendaridagulisaa roʼ, yoo stiʼ Reinu ne yoo Betel, cayúnicaʼ ti dxiiñaʼ casi biʼniʼ Noé ne Moisés. Zándaca cayacanenu para cuí tobi de ca yoo riʼ, o zándaca para gaca chaahuiʼ ti yoo stiʼ Reinu o cayacanenu ra cabí Betel ni cayaca Warwick (Nueva York) (biiyaʼ dibuju stini ni zeeda ra ruzulú tema riʼ). Pa cayúniluʼ tobi de ca dxiiñaʼ riʼ, bisisácani purtiʼ para Dios ni. Laga nuu caadxi binni ni runi ca dxiiñaʼ ni maʼ bizéʼtenu riʼ, guiranu rúninu sti clase dxiiñaʼ. Xi laani yaʼ. Gucheechenu diidxaʼ, ne ndiʼ rusisácani Jiobá ne racané ni binni ni guzuubaʼ diidxaʼ (Hech. 13:47-49). Racané xquidxi Dios laanu para ganda gúninu dxiiñaʼ riʼ jma jneza. Nga runi nuu biaje rudii xquidxi Dios laanu sti clase dxiiñaʼ.

⁸ Ca xpinni Cristu ni ruzuubaʼ diidxaʼ rúnicaʼ guiráʼ ni gabi xquidxi Jiobá laacaʼ de guidubi ladxidoʼcaʼ (biindaʼ Hebreos 13:7, 17). Neca nuu biaje qué guiene chaahuinu xiñee cayábicabe laanu gúninu xiixa dxiiñaʼ sti modo, zabeendunu ni galán purtiʼ cayuninenu Jiobá dxiiñaʼ ne cuzúʼbanu diidxaʼ.

9. Xi ejemplu galán rudii ca binnigola ca binni ridagulisaa.

 ⁹ Dxiiñaʼ ni runi ca binnigola lade ca binni ridagulisaa, rusihuínnini riuuláʼdxicabe gúnicabe ni na Dios de guidubi ladxidóʼcabe (2 Cor. 1:24; 1 Tes. 5:12, 13). Rusihuínnicabe riuuláʼdxicabe gúnicabe dxiiñaʼ nadipaʼ ne rinándacabe ni gabi xquidxi Dios laacabe. Nagueenda riziidicabe xcaadxi modo gucheechecabe stiidxaʼ Reinu. Neca raca nagana para laacabe guzulú gucheechecabe diidxaʼ pur teléfono, ca lugar ra redandá barcu, lugar ra riuu stale binni, peru despué ruuyacabe xi guiráʼ cosa galán ribeendúcabe. Guzéʼtenu ti ejemplu, tapa precursor de Alemania, ládecabe zeeda ti binnigola ni láʼ Michael, gudixhe íquecabe gucheechecabe diidxaʼ ti lugar ra nuu puru negocio ni maʼ xadxí de qué huagánnacabe. Michael guníʼ: «Maʼ napa chupa chonna iza de qué huacheechedu diidxaʼ lugar ra nuu negocio, ngue runi guizáʼ bidxíbidu ora guníʼ íquedu gúnidu ni. Cumu biiyaʼ Jiobá modo nuudu que la? ngue runi gucanebe laadu siadóʼ que, ne qué ziuu dxi guiaandaʼ laadu pabiáʼ sicarú bicheechedu diidxaʼ dxi que. ¡Guizáʼ nayecheʼ guyuʼdu, purtiʼ gúpadu confianza laabe ne pur yenándadu ni na Xhiiñaʼ Reinu ni Rúninu!». Ñee zanda guininu zacaca la? Ñee riuuláʼdxinu gucheechenu diidxaʼ xcaadxi modo la?

10. Xi huadxaa ndaaniʼ xquidxi Jiobá ca iza ni maʼ gudiʼdiʼ ca.

¹⁰ Nuu biaje, naquiiñeʼ guidxaa caadxi cosa ndaaniʼ ca yoo Betel. Lu ca iza ni maʼ gudiʼdiʼ ca, chupa chonna Betel ni jma nahuiiniʼ maʼ gúcacaʼ tobi si né xcaadxi Betel ni jma naroʼbaʼ. Neca guca nagana para chupa chonna hermanu ni biʼniʼ dxiiñaʼ ndaaniʼ ca Betel ni bidaaguʼ ca, qué nindaa biiyacabe jneza ngue ni guca que (Ecl. 7:8). ¡Guizáʼ nayecheʼ nuu ca xpinni Cristu purtiʼ cayuuyacaʼ xi guiráʼ cayaca ndaaniʼ xquidxi Jiobá ca dxi riʼ!

11-13. Xi stipa huayuni chupa chonna xpinni Cristu pur guiráʼ ni cadxaa ndaaniʼ xquidxi Dios.

¹¹ Zanda guizíʼdinu stale de ca hermanu ni biʼniʼ dxiiñaʼ ndaaniʼ ca yoo Betel ni maʼ bidaaguʼ ca. Nuu tu maʼ xadxí de cayuni dxiiñaʼ ndaaniʼ ca Betel ca. Ti guendaxheelaʼ ni guyuu ndaaniʼ tobi de ca Betel nahuiiniʼ stiʼ Centroamérica gúdxicabe laacaʼ checaʼ Méjicu ne chuʼcaʼ ndaaniʼ ti Betel jma naroʼbaʼ que ra guyuucaʼ. Rogelio guníʼ: «Nabé nagana guca para laadu guixéledu de ca binnilídxidu ne ca xhamígudu». Ne Juan, sti hermanu ni biseendacabe laa Méjicu, guníʼ: «Zeeda gácani casi ora nuzuludu sti biaje; naquiiñeʼ guyubi binni xcaadxi xhamigu ne guiaa sti costumbre ne modo riníʼ ique ca binni que».

¹² Laaca gúcani nagana para ca betelita ni guyuu ndaaniʼ chupa chonna guidxi stiʼ Europa ora guyecaʼ Betel stiʼ Alemania. Para ca binni ni nabeza Suiza ne riuuláʼdxicaʼ ca dani naroʼbaʼ la? guca nagana para laacaʼ gusaanacaʼ ca lugar sicarú ni nuu Alpes. Ca hermanu ni zeeda de Austria bibánacaʼ xquídxicaʼ purtiʼ raqué jma huaxieʼcaʼ.

¹³ Ca binni ni yendeza sti guidxi gupa xidé biaacaʼ cuézacaʼ sti lugar, guninecaʼ ca hermanu ni qué runibiaʼcaʼ dxiiñaʼ, ne stale hermanu gupa xidé biziidiʼ sti dxiiñaʼ. Ne laaca biaacabe guidagulisaanécabe xcaadxi hermanu ne gucheechecabe diidxaʼ ti lugar ra qué runibiáʼcabe ne zándaca ra riníʼ binni sti diidxaʼ. Neca nagana huayácani para stale betelita, peru ruzuubacabe diidxaʼ de guidubi ladxidóʼcabe. Xiñee rúnicabe ni yaʼ.

14, 15. 1) Ximodo maʼ bisihuinni stale hermanu rusisácacaʼ guenda ni nápacaʼ de guninecaʼ Jiobá dxiiñaʼ ra tiica si. 2) Ximodo zanda chinándanu ejemplu stícabe.

 ¹⁴ Grethel guníʼ: «Guyaaʼ ra gúdxicabe naa purtiʼ zacá bisihuinneʼ nadxieeʼ Jiobá ne cadi ti guidxi diʼ, ti edificiu o pur xiixa guenda». Dayska guníʼ: «Cumu invitación que zeeda ni de Jiobá la? nagueendaca gucuaaʼ ni». Zacaca nga riníʼ ique André ne Gabriela. Laacaʼ guniʼcaʼ: «Bidúʼyadu ni casi ti modo para gúnidu jma lu xhiiñaʼ Jiobá ne cadi para gúnidu ni riuuláʼdxidu. Guníʼ íquedu: “Ora ridxaa xiixa ndaaniʼ xquidxi Jiobá la? zeeda gácani casi ora nundubi ti bi lu nisadóʼ ne pa zineluʼ ti barcu la? jma galán gúniluʼ guchiaaluʼ ca vela stini que guindísaluʼ ti lindaa”».

¹⁵ Ora ridaaguʼ ca Betel ca, nuu betelita raca invitarcaʼ para gácacaʼ precursor. Nga nga bizaaca chupa chonna de laacaʼ dxi bidaaguʼ Betel ni nuu Dinamarca, Noruega ne Suecia ne beeda gácacani tobi si né Betel ni nuu Escandinavia. Lade cani guca invitar para gaca precursor zeeda Florian ne Anja, laacaʼ guniʼcaʼ: «Gúcani nagana para laadu, peru nabé nayecheʼ guyuʼdu ora bínidu ni. Nabé nayecheʼ runi sentirdu ora riquiiñeʼ Jiobá laadu ra tiica. Dxandipeʼ zanda guinidu maʼ gucuaadu stale ndaayaʼ». Neca stale de laanu qué ziuu dxi guizaacanu ni bizaaca ca hermanu riʼ, cadi dxandíʼ galán chinándanu ejemplu stícabe ne gúninu ni na Reinu stiʼ Dios primé lu xquendanabáninu la? (Is. 6:8.) Nabé riguu Jiobá ndaayaʼ cani rusisaca guenda ni napa de guniné laabe dxiiñaʼ ra tiica si.

16. 1) Xi conseju ridxélanu lu Gálatas 6:4. 2) Gunáʼ nga ndaayaʼ ni jma risaca nápanu.

¹⁶ Cumu nácanu binni ruchee la? nabé nga ruchaaganu dxiiñaʼ ni cayúninu né ni cayuni stobi. Peru Stiidxaʼ Dios rabi laanu jma galán guidúʼyanu xi zanda guni cada tobi de laanu (biindaʼ Gálatas 6:4). Stale de laanu qué gápanu xiixa guenda lade ca binni ridagulisaa.  Ne cadi guiranu zanda gácanu precursor, misioneru o betelita. Peru qué chuʼ dxi guiaandaʼ laanu guiranu maʼ gucuaanu ti ndaayaʼ ni jma risaca: guninenu Jiobá dxiiñaʼ ra gucheechenu ca diidxaʼ nacubi ne galán stiʼ Reinu. Cadi ti ndaayaʼ naroʼbaʼ nga la?

17. 1) Xi qué zanda gúninu ndaaniʼ guidxilayú stiʼ Binidxabaʼ riʼ. 2) Xiñee cadi naquiiñeʼ cuee nga gana laanu.

¹⁷ Ndaaniʼ guidxilayú stiʼ Binidxabaʼ riʼ, qué zanda gúninu xhiiñaʼ Jiobá biaʼ ñuuláʼdxinu. Peru cadi naquiiñeʼ guireʼnu gana. Neca nuu xiixa ni zanda gucueeza laanu de gúninu xhiiñaʼ Jiobá, casi gápanu de ca binnilídxinu, guendahuará o sti guendanagana, zanda guninenu Dios dxiiñaʼ ra gusíʼdinu binni labe o xlabe ne guininu de Reinu stibe ora tiica. ¡Cadi guiníʼ íquenu qué risaca dxiiñaʼ riʼ! Ni risaca nga gúninu biaʼ gándatiʼ lu xhiiñabe. Ne guinábanu Jiobá uguu ndaayaʼ ca hermanu ni zanda guni jma que laanu lu xhiiñabe. Qué chuʼ dxi guiaandaʼ laanu, nabé nadxii Jiobá guiráʼ cani rusisaca lá.

18. Xi naquiiñeʼ gúninu lu ca últimu dxi riʼ, ne xiñee.

¹⁸ Guizáʼ riecheʼ Jiobá guninenu laa dxiiñaʼ neca nácanu binni ruchee. Yanna laanu, ñee rusisácanu guenda ni nápanu de guninenu Jiobá dxiiñaʼ lu ca últimu dxi riʼ la? Pa zacá ni, zabézanu dede ora gueedanebe guidxilayú cubi stibe para gúninu cani riuuláʼdxinu. Ora guedandá dxi ca, ziuʼnu nayecheʼ ra gápanu ti guendanabani ni qué zaluxe, ne ra chuʼ guendariuudxi (1 Tim. 6:18, 19).

19. Xi cabézanu gudii Jiobá laanu.

¹⁹ Cumu jma maʼ gaxha para guedané Dios guidxilayú cubi stiʼ la? guiníʼ íquenu lu ca diidxaʼ ni gudxi Moisés ca israelita ante chuʼcaʼ lu Layú ni Bizabiruaa Dios gudii laacaʼ: «Jiobá, Dios stiluʼ zudii lii jma que ni caquiiñeluʼ lu guiráʼ ni gúniluʼ» (Deut. 30:9). Tiidiʼ si Armagedón, zudii Jiobá Guidxilayú stiʼ cani guniné laabe dxiiñaʼ. De racá zacaanu sti dxiiñaʼ: gúninu Guidxilayú riʼ ti paraísu sicarú.