ORA ruzuubaʼ cani nahuiiniʼ ca diidxaʼ la? nabé rusiéchecabe ca binni ni rapa laacabe. Pa ti hombrehuiiniʼ o ti dxaapahuiiniʼ guni xiixa ni galán la? guizáʼ riecheʼ bixhózebe dede rabi stuudxi: «Ndiʼ nga xiiñeʼ».

Jesús nabé rúnibe ni riulaʼdxiʼ Bixhózebe, ne pur nga riechené Bixhózebe laabe. Rietenaláʼdxiluʼ xi biʼniʼ Bixhózebe ti dxi ora nuunebe chonna de ca discípulo stibe la?... Dios guníʼ dede guibáʼ ne na: «Ndi nga Xiiñe ni nadxiee ne ni rusieche naa» (Mateo 17:5).

Jesús nabé riulaʼdxiʼ guni ni rusiecheʼ Bixhoze. Ñee nannuʼ xiñee la? Purtiʼ dxandíʼ nadxiibe laa. Ora gucaacabe binni guni xiixa la? nagana raca para laa guni ni, peru ni riulaʼdxiʼ binni guni la? jma nagueenda runi ni.

Dede ante gueeda Jesús lu Guidxilayú riʼ, maca riuláʼdxibe gúnibe guiráʼ ni guinabaʼ Jiobá Dios laabe. Ne bíʼnibe ni purtiʼ gunnaxhiibe laa. Ñee nannuʼ xi rusihuinni binni ora riná guni xiixa la?... Rusihuínnicabe dxandipeʼ nga nápacabe gana gúnicabe ni guinabaʼ binni laacabe. Nécapeʼ dxiiñaʼ ni gupa Jesús guibáʼ que nabé galán ni, peru Bixhózebe gupa sti dxiiñaʼ risaca para laabe. Para nga la? biquiiñeʼ gusaana Jesús guibáʼ ne gueeda gale lu Guidxilayú riʼ. Gunabe gueedabe purtiʼ nguepeʼ nga ni gucalaʼdxiʼ Jiobá.

Para gueeda gale Jesús lu Guidxilayú la? caquiiñeʼ gápabe ti jñaabe. Nannuʼ tu beeda gaca jñaabe la?... Nga nga María. Dede guibáʼ Jiobá biseendabe ángel Gabriel para gueeda tidxi María  zapa ti hombrehuiiniʼ, ne baʼduhuiiniʼ que zaree lá Jesús. Yanna, tu gaca bixhózebe yaʼ.... Ángel que gudxi laabe Jiobá Dios nga zaca Bixhózebe. Nga runi zábicabe Jesús Xiiñiʼ Dios.

Xi raʼbuʼ guníʼ María yaʼ.... Nouʼ guniʼbe: «Qué gapaʼ gana gacaʼ jñaa Jesús la?». Coʼ, laabe bíʼnibe ni na Dios. Peru, ximodo ndiʼ gale Xiiñiʼ Dios lu Guidxilayú riʼ pa nuube guibáʼ yaʼ. Xiñee gadxepeʼ modo gule Jesús de modo rale stuudxi baʼduhuiiniʼ ya. Nannuʼ xiñee la?...

Biaa, ora bizáʼ Dios primé bixhózenu Adán ne primé jñaanu Eva la? bizaʼbe Eva para ganda gacaxiiñiʼ ora guidaagunebe xheelabe, ne zacá ziáʼ ti baʼduhuiiniʼ ni zaniisi ndaaniʼ jñaa chaahuidugá. Binni na ti milagru ni, ne zándaca guiníʼ íqueluʼ zacaca.

Peru nuu sti milagru jma sicarú ni biʼniʼ Dios. Gucuaabe xquendanabani Xiiñibe ni nuu guibáʼ ne guluube ni ndaaniʼ María. Qué huayuu dxi guibiguetaʼ guni Dios xiixa zacá. Pur milagru riʼ, Jesús biniisibe ndaaniʼ María cásica ti baʼduhuiiniʼ. Despué María bichaganabe José.

Dxi bidxiña dxi gale Jesús la? María ne José guyecaʼ Belén. Peru qué nidxélacabe paraa ñaanacabe purtiʼ nuu stálepeʼ binni raqué, ngue runi biaanacabe ndaaniʼ ti currá. Raqué gupa María xiiñiʼ, casi ruuyuʼ lu dibuju riʼ, ne gudíxhebe Jesús ra ró yuze guixi ne stuudxi maniʼ.

 Gueelaʼ gule Jesús que guca stale guendaridxagayaa. Bihuinni ti ángel nezalú tuudxi hombre cayapa dendxuʼ gaxha de Belén ne gúdxibe laacaʼ nabé risaca Jesús. Ángel que guníʼ: «Cadi idxibi tu. Nia caadxi diidxa cubi gabe laatu, ni gusieche de irá xixé binni guidxilayú. Yanadxí gule tobi ni ulá laatu» (Lucas 2:10, 11).

Ángel que gudxi ca hombre cayapa dendxuʼ que zadxélacabe Jesús ndaaniʼ guidxi Belén nexheʼ ra ró maniʼ guixi. Málasi bizulú stuudxi ángel de guibáʼ bisisácacaʼ Dios ne primé ángel que, ne biindacaʼ sicaríʼ: Gusisácanu Dios ni nuu guibáʼ, ne ndaaniʼ Guidxilayú gatadxí ladxidóʼ ca hombre ni nápacaʼ favor stiʼ Dios (Lucas 2:12-14).

 Zeʼ si ca ángel que la? ca ni rapa dendxuʼ que guyecaʼ Belén ne bidxélacaʼ Jesús. Raqué gúdxicabe María ne José ca diidxaʼ galán ni binadiágacabe que. Riníʼ íqueluʼ pabiáʼ biecheʼ María purtiʼ guná guca jñaa Jesús la?

Despué, José ne María yenécabe Jesús guidxi Nazaret ne raqué biniisibe. Ora biniisibe la? bizulú bisiidibe. Nga nga tobi de ca dxiiñaʼ ni gudxi Jiobá laabe gúnibe lu Guidxilayú riʼ. Ne Jesús biʼniʼ ni purtiʼ nadxiibe stálepeʼ Bixhózebe ni nuu guibáʼ.

 Ante guzulú Jesús dxiiñaʼ stiʼ casi ti Maestru Ni Jma Nanna Gusiidiʼ la? guluunisa Juan laabe ndaaniʼ guiiguʼ Jordán. Ne raqué guca xiixa para guidxagayaa binni. Ora biree Jesús ndaaniʼ nisa que Jiobá guníʼ dede guibáʼ: «Ndi nga Xiiñe ni nadxiee ne ni rusieche naa» (Mateo 3:17). Cadi dxandíʼ nga riécheluʼ ora bixhózeluʼ o jñaaluʼ guiniʼcaʼ nadxiicaʼ lii la?... Nga runi nannadxíchinu zaqueca nga biʼniʼ sentir Jesús.

Jesús qué nusaanabe de ñúnibe ni jneza. Bisihuínnibe tu laapebe ne qué niníʼdibe nácabe Dios. Ángel Gabriel gúdxibe María zábicabe Jesús Xiiñiʼ Dios. Dede Jesús guníʼ Xiiñiʼ Dios laa. Ne qué ñuu dxi ñábibe binni jma nánnabe que Bixhózebe, sínuque guniʼbe: «Jma nandxóʼ Bixhoze que naa» (Juan 14:28).

Ne maca de dxi bibani Jesús guibáʼ bíʼnibe guiráʼ ni gudxi Bixhózebe laabe. Bicaadiágabe Bixhózebe purtiʼ gunnaxhiibe laa. Ngue runi ora beedabe lu Guidxilayú la? bíʼnibe guiráʼ ni biʼniʼ mandar Bixhózebe laabe. Ne qué nunítibe tiempu lu sti cosa. Pur nga qué ridxagayaanu guiechené Jiobá Xiiñiʼ.

Laanu laaca riuláʼdxinu gusiéchenu Jiobá, njaʼ.... Pa zacá ni la? naquiiñeʼ gusihuínninu dxandíʼ rucaadiáganu Dios, casi biʼniʼ Jesús. Dios caniʼné laanu lu Biblia. Cadi galán diʼ guluísinu rucaadiáganu laabe ne despué guni crenu o gúninu xiixa ni na Biblia cadi jneza, cadi dxandíʼ nga la?... Ne bietenalaʼdxiʼ, pa dxandipeʼ nadxiinu Jiobá la? ziéchenu ora gúninu ni nabe.