Nuuruʼ Jesús gaxha de Jerusalén ora bidxiña caadxi judíu laa. Racalaʼdxiʼ caadxi judíu guiziidiʼ de laabe ne xcaadxi racalaʼdxiʼ gutiidiʼ laabe prueba. Óraque gunabadiidxaʼ ti maestru de Ley Jesús: «Maestru, ¿xi naquiiñeʼ guneʼ para gapaʼ guendanabani ni qué zaluxe?» (Lucas 10:25).

Bidii Jesús cuenta qué racalaʼdxiʼ hombre que ganna respuesta stiʼ pregunta que. Ni nuu hombre que nga guiníʼ Jesús xiixa ni guchiichi ca judíu que. Cumu maʼ nanna Jesús xii ngue caníʼ ique hombre que la? ngue runi bíʼnibe laa caadxi pregunta ti guiníʼ hombre que xi nuu ndaaniʼ ladxidóʼ.

Gunabadiidxaʼ Jesús laabe: «¿Xi cá lu Ley? ¿Xi ruundaluʼ luni?». Cumu runi estudiar hombre que ni cá lu Ley stiʼ Dios la? ngue runi bicabi ni cá lu Deuteronomio 6:5 ne Levítico 19:18 ra ná: «“Gunnaxhii Jehová Dios stiluʼ de guidubi ladxidoʼloʼ, de guidubi xhiálmaluʼ, ne guiráʼ stipa stiluʼ ne guidubi xquendabiaaniluʼ” ne “gunnaxhii prójimo stiluʼ cásica nadxiiluʼ lii”» (Lucas 10:26, 27). ¿Ñee biaʼsi ni bicabi hombre que la?

Para bicabi Jesús laabe: «Jneza bicábiluʼ; cadi gusaana de guʼnuʼ zacá ne zápaluʼ guendanabani». Peru qué ñuu diʼ hombre que conforme né ni gudxi Jesús laa. Ni racalaʼdxiʼ hombre que nga gusihuinni naca nachaʼhuiʼ ne gabi Jesús laa biaʼsi modo riníʼ ique ne jneza runi tratar binni. Ngue runi gunabadiidxabe Jesús: «¿Tu peʼ nga prójimo stinneʼ yaʼ?» (Lucas 10:28, 29). Ruluíʼ fácil pregunta riʼ, peru nagana ni. ¿Xiñee yaʼ?

Purtiʼ riníʼ ique ca judíu prójimo sticaʼ nga ca binni ni rinanda ca costumbre sticaʼ ne zándaca ruluíʼ zacá ruzeeteʼ Levítico 19:18 ni. Dede zándaca pur nga guiníʼ íquecabe cucheenécabe ley pa guidxaagacabe binni de sti guidxi (Hechos 10:28). Ne pur nga riníʼ ique hombre que naca ti binni nachaʼhuiʼ purtiʼ racané xcaadxi judíu ne zándaca zacaca riníʼ ique caadxi de ca discípulo stiʼ Jesús. Cumu riníʼ ique ca judíu cadi prójimo sticaʼ ca binni ni cadi naca judíu la? ngue runi nacaʼ zanda guni tratarcaʼ laacabe mal.

¿Ximodo zanda gabi Jesús hombre riʼ cadi jneza modo riníʼ ique sin guniná laabe ninca guniná xcaadxi judíu yaʼ? Biquiiñeʼ Jesús ejemplu riʼ: «Zedayete ti hombre de Jerusalén zeʼ Jericó ne biree caadxi gubaanaʼ lú, dede gúxhacaʼ xhábabe ne gudíñecaʼ laabe, peru biaʼ qué ñuutisicaʼ laabe ne zecaʼ. Málasi zedayete ti sacerdote neza que; peru, ora biʼyaʼ laabe, gudiʼdiʼ sti ladu. Zaqueca biʼniʼ ti levita, ora yendá raqué ne biʼyaʼ laabe, gudiʼdiʼ sti ladu. Peru yendá ti samaritanu ni zidiʼdiʼ lu neza que ra nuube, ne ora biʼyaʼ laabe, biá laabe» (Lucas 10:30-33).

Nanna hombre ni caniʼné Jesús que nabeza stale de ca sacerdote ne ca levita ni runi dxiiñaʼ ndaaniʼ templu guidxi Jericó. Naquiiñeʼ saʼ ca hombre riʼ 23 kilómetru para chindacaʼ ra lídxicaʼ. Zándaca peligroso neza riʼ purtiʼ riree gubaanaʼ lú binni. Pa ñuuyaʼ ti sacerdote o ti levita nuu ti judíu ra nagana, ¿cadi dxandíʼ ñacanécabe laa la? Peru lu ejemplu guníʼ Jesús, nin tobi de laacabe qué ñacanécabe judíu que. Ni gucané judíu que nga ti samaritanu, ti hombre ni naca de ti guidxi ni runi ca judíu menu (Juan 8:48).

¿Ximodo gucané samaritanu que judíu ni gucaná que yaʼ? Jesús guníʼ: «Para bidxiña laabe, bichá aceite ne vinu lu ca herida stibe ne bichenda ni venda. De raqué bidxiibaʼ laabe deche burru stiʼ ne yené laabe ti ra yoo ne gupa laabe. Sti dxi que gulee samaritanu que chupa denariu, bidii ni dueñu stiʼ yoo que ne gúdxibe laa: “Gupa laabe, ne pa gunítiluʼ jma que ni bidieeʼ lii la? zaguixeʼ ni lii ora ibiguetaʼ”» (Lucas 10:34, 35).

Guníʼ si Jesús, Maestru ni jma nanna gusiidiʼ, ejemplu que, biʼniʼ ti pregunta hombre que para  gucaa laabe guiníʼ íquebe: «Lade guionnaʼ hombre riʼ, ¿tu laa raʼbuʼ guca prójimo stiʼ hombre ni biree gubaanaʼ lu que yaʼ?». Zándaca qué naʼ hombre que guiníʼ «samaritanu», ngue runi bicabi: «Ni biá laabe que». De raqué bisiene Jesús xii ngue racalaʼdxiʼ gusiidiʼ: «Guyé ne biʼniʼ zacá» (Lucas 10:36, 37).

¡Galán modo bisiidiʼ Jesús! Pa qué niquiiñeʼ Jesús ejemplu riʼ para nusiene hombre que laaca prójimo stiʼ nga ca binni de sti guidxi, ¿ñee ñuni cré hombre que ne ca judíu nuu raqué ni guníʼ Jesús la? Zándaca coʼ. Peru cumu biquiiñeʼ Jesús ti ejemplu ni cadi nagana la? biene ca binni que respuesta stiʼ pregunta «¿tu peʼ nga prójimo stinneʼ yaʼ?». Biblia runi mandar laanu gannaxhiinu ne gácanu nachaʼhuiʼ né xcaadxi binni, pa gúninu zacá zusihuínninu nácanu ti buen prójimo.