Hermanu caʼ ni nadxiidu:

Guendarannaxhii ni runi sentirnu pur Dios ne pur binni nga ni rucaa laanu gúninu ni ná ca diidxaʼ riʼ: «Laché ne lagacané binni de guiráʼ guidxi gaca discípulo stinneʼ. Lacuunisa laacaʼ» (Mat. 28:​19, 20; Mar. 12:​28-31). Ora dxandíʼ peʼ nadxiinu binni la? ruyúbinu modo chindanu ndaaniʼ ladxidóʼ ca binni nachaʼhuiʼ «ni maʼ nuu para guicaa guendanabani ni qué zaluxe» (Hech. 13:48).

Dxiqué la? jma bicaa íquenu guizíʼdinu presentación de memoria ne gusaananenu binni revista ne libru. Peru yanna jma naquiiñeʼ guizíʼdinu modo gácanu binni ni nanna güíʼ diidxaʼ. Rusihuínninu nadxiinu binni ora rinínenu laacabe de ca cosa ni riuuláʼdxicabe. Gadxé gadxé nga cada binni, nga runi naquiiñeʼ guyúbinu ne guiníʼ íquenu xi riuulaʼdxiʼ ne xi riguu xizaa binni ni caninenu ca. ¡Para nga peʼ nga guca folletu riʼ!

Napa folletu riʼ 12 lección ni zusiene chaahuiʼ 12 cualidad ni caquiiñeʼ gápanu para gannaxhiinu binni ne gúninu discípulo. Biree cada lección stiʼ folletu riʼ lu ti relatu stiʼ Biblia. Ne zadúʼyanu xi zanda gusiidiʼ ejemplu stiʼ Jesús o ti xpinni Cristu ni bibani lu primé siglu laanu. Yanna riʼ maʼ cadi naquiiñeʼ gucaa íquenu guizíʼdinu xiixa presentación de memoria, sínuque guyúbinu modo gusihuínninu nadxiinu binni. Caquíʼñenu guiráʼ cualidad ni riete lu folletu riʼ ora maʼ cayuni predicarnu, peru zuuyaluʼ nuu chupa chonna de laacani nabé zacané ca ni laanu ora guzulú guinínenu binni, ora gúninu revisita ne ora gudiʼnu estudiu.

Ora guni estudiarluʼ cada lección, guníʼ ique chaahuiʼ ximodo gusihuínniluʼ cualidad riʼ ora guni predicarluʼ ca binni ni nabeza neza ra lídxiluʼ. Ni jma risaca nga gannaxhiinu Jehová ne binni, ne cadi ca habilidad ni nápanu. Nga runi biʼniʼ stipa guiráʼ dxi jma gannaxhiiluʼ Jehová ne binni. Nga nga ni zacané lii ugaandaluʼ ni cá íqueluʼ: gúniluʼ discípulo.

Nayecheʼ runi sentirdu guninedu laatu dxiiñaʼ tobi si (Sof. 3:9). ¡Rinábadu Jehová cuʼ ndaayaʼ laatu ti cadi gusaana de gúnitu discípulo, ti dxiiñaʼ ni rusihuinni nadxiinu binni!