Historia 97

Jesús zeeda casi Rey

XCAADXI dxi despué de bisianda Jesús guiropaʼ hombre nacheepaʼ lú que la? riebe ti guidxihuiiniʼ nuu gaxha de Jerusalén. Rábibe chupa de ca discípulo stibe: Laché ndaaniʼ guidxihuiiniʼ ca ne zadxélatu ti burruhuiiniʼ. Laguxhadxeʼ laame ne latané laame ra nuaa.

Ora redanécabe burruhuiiniʼ que la? Jesús riguiʼbaʼ laame ne riebe Jerusalén ti guidxi nuu gaxha de raqué. Ora ridxíñabe guidxi que, stale binni riree ridxagalú laabe. Stale de ca binni que ruchiaacaʼ xhábacaʼ lu neza zidíʼdibe. Xcaadxi la? ribáʼquicaʼ rama ziña ne riniʼcaʼ: ¡Dios uguu ndaayaʼ rey ni zeeda lu lá Jiobá!

Dxiqué ndaaniʼ guidxi Israel, cani chigaca rey riuucaʼ ndaaniʼ guidxi Jerusalén dxíʼbacaʼ ti burruhuiiniʼ para guluiʼcaʼ laacaʼ ca binni guidxi que. Ndiʼ nga ni runi Jesús. Ne ca binni riʼ cusihuínnicaʼ de que racaláʼdxicaʼ gaca Jesús rey sticaʼ. Peru cadi guiráʼ diʼ ca binni que racaláʼdxicaʼ gaca Jesús rey. Zanda gúʼyanuni pur ni rácabe ora riebe ndaaniʼ yuʼduʼ que.

Jesús rusianda stale binni nacheepaʼ lú ne ni nabidxi naʼ ne ñee ndaaniʼ yuʼduʼ que. Ora biiyaʼ ca hombrehuiiniʼ que ndiʼ la? bizulú biindacabe nadipaʼ ne bisisácacabe Jesús. Peru ni guca riʼ, ruchiichi ni ca ni ruzaaquiʼ guʼxhuʼ que ne rábicabe Jesús: Cayunadiágaluʼ ni caníʼ ca hombrehuiiniʼ ca la?

Cayunadiaʼgaʼ, na Jesús rabi laacabe. Ñee qué huayuundatu ndaaniʼ Biblia ra caníʼ de que: Dios zabee guendarusisaca de ruaa ca hombrehuiiniʼ ca la? Nga runi ca hombrehuiiniʼ ca cusisácacabe rey ni zeeda de Dios.

Laanu laaca racaláʼdxinu gácanu casi ca hombrehuiiniʼ ca njaʼ. Zándaca chuʼ tuuxa gacalaʼdxiʼ gusaananu de guininu de reinu stiʼ Dios. Peru laanu zaníʼnerunu binni de ca guendaridxagayaa ni chiguni Jesús para laacaʼ.

Ora Jesús guyuu lu Guidxilayú la? cadi dxiqué diʼ nga para guzulú guni reinarbe. Padxí yaʼ. Ca discípulo que gucaláʼdxicaʼ ñánnacaʼ padxí. Guidúʼndanu ndiʼ yanna.

Mateo 21:1-17; Juan 12:12-16.