Bilácabe ne bidxíñacabe lu ti isla
Historia 112
Bilácabe ne bidxíñacabe lu ti isla
¡BIIYAʼ, barcu ca ziyaaziʼ! ¡Cabiá ni! Ñee ruuyuʼ ca binni ni nuu ndaaniʼ nisa ca la? Caadxi de laacabe maʼ zidxiña guriá nisadóʼ ca. Ñee nuu Pablu racá la? Guidúʼyanu xi zeeda guizaaca Pablu.
Bietenalaʼdxiʼ, chupa iza nuseguyoocabe Pablu Cesarea. Despué rudxiibacabe Pablu ne xcaadxi de cani deguyoo que lu ti barcu ni cheʼ Roma. Gaxha de ti isla ni láʼ Creta bidxagalúcabe ti bi yooxhoʼ ne ca hombre que, qué ganda chinécabe barcu riʼ. Ne qué ganda gúʼyacabe Gubidxa que ridxíʼ, ninla huaxhinni qué ganda gúʼyacabe ca beleguí que. Despué de stale dxi de nuucabe zaqué la? cani zeʼ ndaaniʼ barcu que riníʼ íquecaʼ de que maʼ qué zaládicaʼ.
Óraque riasa Pablu ne riníʼ: Nin tobi de laatu qué zátidiʼ; barcu riʼ si zanitilú. Purtiʼ nuchiʼ ti ángel stiʼ Dios beeda ranuaa ne gudxi naa: Cadi idxibi lu, Pablu, purti naquiiñe chi uzuhuaa lu lu César. Ne pur lii zulá Dios irá cani zinéu ca.
Dede dxi bizulú bi yooxhoʼ que, biaʼ galaa gueelaʼ stiʼ dxi catorce, ca hombre runi dxiiñaʼ lu barcu que bidiicabe cuenta de que nisa que cadi ziaʼ diʼ ni. Laacabe cadxíbicabe pa guidxelasaani xiixa guié lu guelacahui que, nga runi rusábacabe ancla para guinaazeni. Sti siadóʼ que la? ruuyacabe ra nabidxi. Óraque ruyúbicabe modo guchíñacabe barcu que dede guriá nisadóʼ que.
Ora ridxíñacabe guriá nisadóʼ que la? barcu que rudxiga ique ni ndaaniʼ ti loma yuxi ne qué liica ñándaruʼ niniibi ni. De raqué ridxelasaa ca ola que barcu que ne laani racadé ni. Hombre ziné cani deguyoo que riníʼ: Cani nanna xhuʼbaʼ la? guiábacaʼ ndaaniʼ nisa dede guireecaʼ ra nabidxi, ne xcaadxi ca iquiiñecaʼ yaga ndahui stiʼ barcu ca ti ganda guireecaʼ. Ne nga nga ni rúnicabe, ca 276 binni zeʼ ndaaniʼ barcu que ridxíñacaʼ guriá nisadóʼ que nabánicaʼ, cásipeʼ guníʼ ángel que.
Isla que láʼ Malta. Ca binni de raqué guizáʼ nacháʼhuicaʼ ne racanecaʼ cani zeeda lu barcu que. Riuu si tiempu que xcaadxi galán la? rudxiibacabe Pablu lu sti barcu ne rinécabe laa Roma.
