Suuk u yaʼalaʼaleʼ le Navidadoʼ junpʼéel kʼiinbesaj ku beetik le cristianoʼob utiaʼal u kʼaʼajsikoʼob le kʼiin ka síij Jesusoʼ. Baʼaleʼ yaʼab tiʼ le baʼaxoʼob ku beetaʼal teʼ kʼiinbesajaʼ mix baʼal yaan yil yéetel Jesucristo. ¿Baʼaxten?

Yáaxeʼ teʼ Navidadoʼ ku yaʼalaʼaleʼ suuk u taal bin Santa Claus u taas regaloʼob tiʼ le mejen paalaloʼoboʼ. Yoʼolal u anuncioil junpʼéel refresco beetaʼab tu jaʼabil 1931, tak bejlaʼa ku tuklaʼaleʼ Santa Clauseʼ juntúul polok máak puro cheʼej ku beetik, chak u nookʼ, sak u meʼex yéetel chak u pʼuʼukoʼob. Tu jaʼabiloʼob 1950, teʼ Brasiloʼ óotaʼab kʼexbil Santa Claus yéetel juntúul máasewáal brasilil tsʼaʼab u kʼaabaʼ Vovô Índio (Abuelo Indio). ¿Béeychaj wa u kʼeʼexel? Según le profesor Carlos Fantinatioʼ, Santa Clauseʼ maʼ chéen tu pʼataj paachil Abuelo Indioiʼ baʼaxeʼ «tu ganartaj chan Jesús, tumen letiʼ ku maas kʼaʼajsaʼal teʼ kʼiinbesaj ku beetaʼal 25 tiʼ diciembreoʼ». Santa Clauseʼ maʼ chéen letiʼe baʼax jelaʼan inventartaʼab utiaʼal Navidadoʼ. Utiaʼal k-ojéeltik baʼax uláakʼ inventartaʼabeʼ koʼox tuukul tiʼ u kʼiinil le yáax cristianoʼoboʼ.

Le Encyclopedia Britannicaoʼ ku yaʼalik: «Teʼ yáax kaʼapʼéel sigloʼoboʼ le yáax cristianoʼoboʼ maʼ tu yóotaj u beetoʼob u kʼiin u kʼaabaʼ u yéet cristianoiloʼobiʼ, mix u kʼiin u kʼaabaʼ Jesús». ¿Baʼaxten? Tumen letiʼobeʼ u yojloʼobeʼ tiʼ yaanal religión u taal le kʼiinbesajaʼ yéetel junpuliʼ maʼ unaj u táakpajloʼobiʼ. Tsʼoʼoleʼ le Bibliaoʼ maʼ tu yaʼalik le fecha ka síij Jesusoʼ.

Kex maʼatech u beetaʼal kʼiin kʼaabaʼ tumen le cristianoʼoboʼ, teʼ siglo 4, le Iglesia Catolicaoʼ tu yaʼaleʼ kʼaʼabéet u kʼiinbesaʼal Navidad. Utiaʼal u yaʼabtal le catolicoʼoboʼ le Iglesiaoʼ tu aprovechartaj le yaʼabkach romanoʼob yaanal u religionoʼob suuk u kʼiinbeskoʼob u káajal le keʼeloʼ. Cada jaʼabeʼ desde 17 tiʼ diciembre tak 1 tiʼ eneroeʼ «u maas yaʼabil le romanoʼoboʼ chéen patan janal ku beetkoʼob, ku apostaroʼob, ku jóokʼloʼob káaltal yéetel ku beetkoʼob uláakʼ kʼiinbesajoʼob utiaʼal u adorartikoʼob u diosoʼob», bey u yaʼalik le escritora P. Restad tu libro Christmas in America (Le Navidad teʼ Américaoʼ). Tsʼoʼoleʼ 25 tiʼ diciembreeʼ suuk u kʼiinbeskoʼob u síijil le Kʼiinoʼ. Úuchik u yaʼalikoʼob unaj u festejartaʼal le Navidad teʼ fecha jeʼeloʼ, u nuuktakil le catolicoʼoboʼ jóokʼoʼob yéetel baʼax u kʼáatoʼob: le romanoʼoboʼ káaj u kʼiinbeskoʼob u síijil Cristo tu lugar u kʼiinbeskoʼob u síijil le Kʼiinoʼ. Teʼ libro tu tsʼíibtaj Gerry Bowleroʼ tu yaʼalaj: «Le romanoʼoboʼ seguernaj u festejaroʼob tu kʼiiniloʼob keʼel jeʼex suuk u beetkoʼoboʼ». U jaajileʼ káaj u beetkoʼob «túumben kʼiinbesajoʼob pero yéetel baʼaxoʼob úuch suukak u beetkoʼob» (Santa Claus, a Biography).

Jeʼex k-ilkoʼ u kʼaasil le kʼiinbesajaʼ letiʼe bix káajikoʼ. Tiʼ junpʼéel libro tu tsʼíibtaj Stephen Nissenbaumeʼ, tu yaʼalaj: «Le Navidadoʼ junpʼéel kʼiinbesaj tiʼ le maʼ jaajil religionoʼob u taaloʼ, chéen disfrazartaʼan bey cristianoeʼ». Le oʼolal ku ofendertik Dios yéetel Jesucristo, u Hijo. ¿Máasaʼ jach unaj u chʼaʼabal en cuenta lelaʼ? Le Bibliaoʼ ku yaʼalik: «Maʼ a nupkabaʼex yéetel máaxoʼob maʼatech u meyajtikoʼob Dios. Tumen, ¿baʼax yaan yil le tojil yéetel le kʼasaʼaniloʼ? Wa, ¿baʼax yaan yil le sáasil yéetel le éeʼjochʼeʼeniloʼ?» (2 Corintoiloʼob 6:14). Jeʼex junkúul cheʼ looloch maʼ tu páajtal u tojkíintaʼaleʼ, le Navidad xanoʼ junpuliʼ «maʼ tu páajtal u tojkíintaʼal» tu táan Dios (Eclesiastés 1:15).