LE ÚUCHIK u kaʼa kuxtal Jesusoʼ junpʼéel baʼal jach kʼaʼanaʼan k-tiaʼal. Apóstol Pabloeʼ bey tu yaʼalilaʼ: «Cristoeʼ kaʼapúut kuxlaj ichil le kimenoʼoboʼ, letiʼ u yáaxil ichil le kimenoʼob yaan u kaʼapúut kuxtaloʼoboʼ. Tumen bey jeʼel bix tu yoʼolal juntúul máak taal le kíimil way yóokʼol kaaboʼ, bey xan tu yoʼolal juntúul máakeʼ le kaʼapúut kuxtaloʼ. Bey jeʼel bix tuláakal ku kíimil tu yoʼolal Adaneʼ, bey xan tiʼ tuláakal kun yantal kuxtal tu yoʼolal Cristo» (1 Corintoiloʼob 15:20-22).

Jesuseʼ kaʼa kuxkíintaʼab 16 tiʼ Nisán tu jaʼabil 33 tsʼ.t.J., u kʼiinil u kʼuʼubul u yáax ichoʼob le paakʼal tu táan Jéeoba tu temploil Jerusalenoʼ. Úuchik u yaʼalik Pablo tiʼ Jesús letiʼ u «yáaxileʼ» ku tsʼáaik naʼatbileʼ yaan uláakʼ máaxoʼob kun kaʼa kuxkíintbiloʼob.

Pabloeʼ ku tsolik xan baʼax utsil ku taasik úuchik u kaʼa kuxkíintaʼal Jesús. «Jeʼel bix tu yoʼolal juntúul máak taal le kíimil way yóokʼol kaaboʼ —ku yaʼalik Pablo—, bey xan tu yoʼolal juntúul máakeʼ le kaʼapúut kuxtaloʼ.» Toʼoneʼ k-kíimil, tumen Adán máanstoʼon le kʼebanoʼ. Baʼaleʼ úuchik u kʼubik u kuxtal x-maʼ kʼebanileʼ, Jesuseʼ tu tsʼáaj tuʼux u kaʼa kuxkíintaʼal wíinik utiaʼal u jáalkʼabtaʼal tiʼ le kʼeban yéetel tiʼ le kíimiloʼ. Pabloeʼ jatsʼuts úuchik u tsolik teʼ Romailoʼob 6:23: «Tumen u boʼolil le kʼebanoʼ kíimil, baʼaleʼ le siibal ku tsʼáaik Jajal Diosoʼ kuxtal minaʼan u xuul tu yoʼolal Cristo Jesús k-Yuumtsil».

Tak Jesús aʼal baʼax utsil ken u taastoʼon u kíimil yéetel u kaʼa kuxkíintaʼal. Tu yaʼalaj: «U Paal Máa[keʼ] yaan u líiʼsaʼal, utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ. Tumen Jajal Dioseʼ tu sen yaabiltaj le yóokʼol kaabaʼ, ka tu tsʼáaj u juntúuliliʼ Paal, utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ» (Juan 3:14-16).

¡Chéen tukle! ¡Kuxtal minaʼan u xuul, tuʼux maʼ kun antal yaj óolal, muʼyajil, mix kʼiʼinamil! (Apocalipsis 21:3, 4.) ¡Bukaʼaj maʼalobil! Juntúul máak kaʼanchajaʼan u xookeʼ bey tu yaʼalilaʼ: «Le cementeriooʼ ku kʼaʼajsiktoʼon séeb u máan le kuxtaloʼ, baʼaleʼ le kaʼa kuxtaloʼ ku kʼaʼajsiktoʼon séeb u máan le kíimiloʼ». Jach beyoʼ, úuchik u kaʼa kuxtal Jesuseʼ yaʼab máak kun kaʼa kuxtal.