¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

¿Maʼalob wa ka tóokaʼak u wíinklil juntúul sukuʼun ken kíimik?

Cada máak unaj u chʼaʼtuklik tu juunal wa yaan u tóokaʼal u wíinklil ken kíimik wa maʼ. Le Bibliaoʼ maʼatech u yaʼalik wa maʼ maʼalob ka beetaʼakiʼ, baʼaleʼ ku yaʼalikeʼ le ka kíim Saúl yéetel Jonatán, u hijoeʼ, le israelitaʼoboʼ tu tóokoʼob yéetel tu mukoʼob u baakeloʼob (1 Sam. 31:2, 8-13) (15/6, táan juʼun 7).

¿Bix k-ojéeltik maʼ Dios beetik u yúuchul baʼaloʼob kʼaastakiʼ?

Jéeobaeʼ toj tuláakal u beeloʼob, tuláakal baʼax ku beetkeʼ maʼalobtak, nojoch u yaabilaj yéetel ku chʼaʼik óotsilil (Deu. 32:4; Sal. 145:17; Sant. 5:11) (1/7, táan juʼun 4).

¿Baʼax ku aktáantik le sukuʼunoʼob ku binoʼob áantaj táanxel luʼumiloʼoboʼ?

Maʼ xaaneʼ: 1) u kuxtaloʼob yéetel junpʼíit baʼal, 2) u tuklik u láakʼtsiloʼob, yéetel 3) u kanik u bisubaʼob yéetel le sukuʼunoʼob yanoʼob teʼ tuʼux ku binoʼoboʼ. Le sukuʼunoʼob ku kanik u aktáantoʼob lelaʼ ku kʼamkoʼob yaʼabkach bendicionoʼob (15/7, táan juʼun 4 yéetel 5).

¿Baʼaxten pʼektaʼab José tumen u sukuʼunoʼob?

Jacobeʼ jach tu yaabiltaj José, hasta tu síiaj tiʼ junpʼéel nookʼ especial. U sukuʼunoʼobeʼ celosochajoʼob, le oʼolal tu konoʼob utiaʼal ka palitsiltaʼak (1/8, táan juʼun 11 tak 13).

¿Baʼaxten le túumben tratadoʼoboʼ jach maʼalobtak utiaʼal u yúuchul kʼaʼaytaj?

Tuláakal le tratadoʼoboʼ junpʼéeliliʼ bix beetaʼaniloʼob. Cada tratadoeʼ ku yáantkoʼon xok junpʼéel teksto yéetel ku beetik junpʼéel kʼáatchiʼ. Kex jeʼel bix ka u núuk u yuumil naj le óoxpʼéel kʼáatchiʼoboʼ jeʼel u páajtal k-jeʼekʼabtik le tratado utiaʼal k-xokik le teksto ku taaskoʼ. Tsʼoʼoleʼ jeʼel u páajtal k-yéeyik junpʼéel tiʼ le kʼáatchiʼob ku taasik utiaʼal k-núuk tiʼ u yuumil naj ken kaʼa xiʼikoʼon xíimbalteʼ (15/8, táan juʼun 13 yéetel 14).

¿Baʼax le Peshitta siriacaoʼ?

Le siriacooʼ junpʼéel bix u tʼaʼanal le arameo teʼ siglo 2 wa 3. Maʼ xaaneʼ ich siríaco yáax suʼut jujunpʼéel jaatsoʼob tiʼ le Kiliʼich Tsʼíiboʼob ich Griegooʼ. Le Biblia suʼut ich siriacooʼ kʼuch kʼaj óoltbil bey Peshittaeʼ (1/9, táan juʼun 13 yéetel 14).

¿Baʼax unaj u beetik le taatatsiloʼob utiaʼal u kanáantik u paalaloʼoboʼ?

Kʼaʼabéet u chʼenxikintik u paalaloʼob utiaʼal ka u kʼaj óoltoʼob. Le taatatsiloʼoboʼ kʼaʼabéet u kaʼanskoʼob tiʼ u paalaloʼob u yaabiltoʼob Jéeoba yéetel u nuʼuktoʼob, maases wa ku joʼopʼol u tuklikoʼob minaʼanoʼob ichil u jaajil religión (15/9, táan juʼun 18 tak 21).

¿Baʼaxoʼob ken u xuʼuls u Reino Dios?

Yaan u xuʼulsik le kʼojaʼaniloʼ, le kíimiloʼ, le baʼateltáambaloʼ yéetel maʼ kun antal óotsilil, tsʼoʼoleʼ yaan yantal meyaj yéetel baʼal jaantbil (1/10, táan juʼun 6 yéetel 7).

Le Bibliaoʼ, ¿baʼax pactoil ku yaʼalik beetaʼab utiaʼal u páajtal u reinar uláakʼ máakoʼob yéetel Cristo?

Ka tsʼoʼok u beetik u tsʼook Pascuaoʼ, Jesuseʼ tu beetaj u pactoil le Reino yéetel le 11 disipuloʼoboʼ (Luc. 22:28-30). Le pactoaʼ tu yeʼesaj tiʼ le disipuloʼoboʼ yaan u binoʼob gobernar yéetel Jesús teʼ kaʼanoʼ (15/10, táan juʼun 16 yéetel 17).

Aʼal kaʼapʼéel baʼax ku yaʼalik le Biblia ku yeʼesik yaan le Kʼaasilbaʼaloʼ.

Le Bibliaoʼ ku yaʼalikeʼ le Kʼaasilbaʼaloʼ tʼaanaj yéetel Jesús utiaʼal u túuntik u yóol. Le Kʼaasilbaʼaloʼ tʼaanaj xan yéetel Dios tu kʼiiniloʼob Job. Le baʼax ku yaʼalik le Bibliaaʼ ku yeʼesikeʼ jach tu jaajil yaan le Kʼaasilbaʼaloʼ (1/11, táan juʼun 4 yéetel 5).

¿Máaxoʼob táakaʼan ichil le «kaaj bisik u kʼaabaʼ» Dios tu yaʼalaj Santiago tiʼ Baʼaxoʼob 15:14?

Le máaxoʼob táakaʼan ichiloʼ letiʼe judíoʼob bey xan le maʼ judíoʼoboʼ. Letiʼobeʼ ‹junpʼéel chʼiʼibal yéeyaʼanoʼob tumen Dios utiaʼal ka u kʼaʼaytoʼob tu táan u maasil u jatsʼuts modos› (1 Ped. 2:9, 10) (15/11, táan juʼun 24 yéetel 25).

¿Tuʼux yaan kaʼach Timgad, yéetel bix u modos u kajnáaliloʼob?

Timgadeʼ junpʼéel nojoch kaaj yaan kaʼach Roma yéetel tiaʼan tu xamanil Africaeʼ (bejlaʼeʼ Argelia). Tiʼ junpʼéel tuunich kaxtaʼabeʼ tsʼíibtaʼan junpʼéel baʼal ku chíikbesik le bix u tuukul u kajnáaliloʼob kaʼachoʼ: «U bin máak tsʼoon, u yichkíil, u báaxal, u cheʼej. ¡Letiʼe maʼalob kuxtaloʼ!». Le bix u tuukuloʼob kaʼachaʼ chíikaʼan tiʼ le baʼax ku chʼaʼchiʼitaʼal teʼ Yáax tiʼ Corintoiloʼob 15:32 (1/12, táan juʼun 8 tak 10).