1. 1) ¿Bix u kʼamik máak ken aʼalaʼaktiʼ baʼax unaj u beetik, yéetel baʼaxten? 2) Yoʼolal le kaʼanal ichiloʼ, ¿bix jeʼel u kʼamik máak ken tsoʼolok u nuʼuk tiʼeʼ?

MÁAKEʼ maʼ junpʼéeliliʼ bix u kʼamik ken aʼalaʼak baʼax unaj u beetkiʼ. Maʼ xaaneʼ ku beetik baʼax ku yaʼalik juntúul máax maas yaan u páajtalil, baʼaleʼ jach junpuliʼ maʼ tu beetik baʼax ku yaʼalik juntúul máax igual u páajtalil tu yéetel wa juntúul máax maas minaʼan u páajtalil tiʼ letiʼ. Yaan máaxeʼ ken aʼalaʼak baʼax unaj u beetkeʼ ku lúubul u yóol wa ku suʼlaktal. Baʼaleʼ uláakʼ máakoʼobeʼ ku taaktal u beetkoʼob baʼax ku yaʼalaʼaltiʼob yéetel ku tsʼoʼokbeskoʼob. ¿Baʼaxten maʼ junpʼéeliliʼ bix u kʼamik máak baʼax ku yaʼalaʼaltiʼiʼ? Junpʼéel baʼax beetkeʼ letiʼe kaʼanal ichiloʼ. Le kaʼanal ichiloʼ jeʼel u beetik maʼ u kʼamik máak junpʼéel tsolnuʼuk wa junpʼéel maʼalob kaʼansajeʼ (Pro. 16:18).

2. ¿Baʼaxten toʼoneʼ kiʼimak k-óol yoʼolal le tsolnuʼukoʼob yaan teʼ Bibliaoʼ?

² Baʼaleʼ toʼon k-meyajtik Jéeobaeʼ kiʼimak k-óol k-tsolnuʼuktaʼal, maases wa teʼ Biblia u taaloʼ. Le baʼaxoʼob ku yaʼaliktoʼon Jéeoba mantatsʼoʼ ku beetik u yantal k-naʼat. Ku kaʼanskoʼon yéetel ku yáantkoʼon utiaʼal maʼ k-bin tu paach ayikʼalil, maʼ k-lúubul tiʼ núupkʼeban, maʼ u píit máan k-ukʼik baʼax ku káalkunaj yéetel maʼ k-drogartikba (Pro. 20:1; 2 Cor. 7:1; 1 Tes. 4:3-5; 1 Tim. 6:6-11). Tsʼoʼoleʼ ‹kiʼimak u yóol k-puksiʼikʼal› tumen k-beetik baʼax ku yaʼalik Dios (Isa. 65:14).

3. ¿Baʼax tuukulil anchaj tiʼ le salmista unaj u yantaltoʼon xanoʼ?

³ Utiaʼal maʼ u xuʼulul k-bisikba yéetel k-Taata yaan  teʼ kaʼanoʼ, kʼaʼabéet k-beetik mantatsʼ baʼax ku yaʼaliktoʼon. Unaj k-tuukul jeʼex le Salmista tu yaʼalaj: «A aʼalmajtʼaanoʼobeʼ kin tiaʼalintik tak minaʼan u xuul, tumen letiʼobeʼ ku kiʼimakkúuntkoʼob u yóol in puksiʼikʼal» (Sal. 119:111). ¿Kiʼimak k-óol wa xan k-beetik baʼax ku yaʼalik Jéeoba, wa yaan kʼiin maʼ jach taak k-beetkiʼ? Kex yaan kʼiin maʼ jach taak k-kʼamik junpʼéel tsolnuʼukeʼ, maʼ unaj u lúubul k-óoliʼ. Maʼ u tuʼubultoʼoneʼ maas jeʼel u bintoʼon utsil wa k-beetik baʼax ku yaʼaliktoʼon Jéeobaeʼ. Koʼoneʼex ilik óoxpʼéel baʼaloʼob jeʼel u yáantkoʼon k-maas kʼub óol tiʼ Jéeobaeʼ.

4. ¿Baʼax tu beetaj mantatsʼ David ichil u kuxtal?

⁴ Davideʼ jejeláas baʼax úuchtiʼ ichil u kuxtal, baʼaleʼ mantatsʼ tu kʼubaj u yóol tiʼ le Máax beetmiloʼ. Letiʼeʼ tu yaʼalaj: «Yuumtsil, tiʼ teech kin payalchiʼ; in [Dios], tiʼ teech in kʼubmaj in wóol» (Sal. 25:1, 2). ¿Baʼax áant David utiaʼal u jach kʼubik u yóol tiʼ u Taata yaan teʼ kaʼanoʼ?

5, 6. Jeʼex u yeʼesik le Bibliaoʼ, ¿bix u biskuba kaʼach David yéetel Jéeoba?

⁵ Yaʼab máakeʼ chéen pʼis yaan talamil tiʼ ku payalchiʼ tiʼ Dios. Wa juntúul a amigo ku tʼankech chéen pʼis kʼaʼabéet taakʼin tiʼ wa utiaʼal a beetik junpʼéel uts tiʼeʼ, ¿máasaʼ ken máanak kʼiineʼ jeʼel a tuklik maʼ wa tumen u amigoech le oʼolal ku tʼankechiʼ? Davideʼ maʼ bey tu beetiliʼ. Letiʼeʼ kex táan u bin utsil tiʼ wa maʼeʼ, mantatsʼ tu yeʼesaj u yaabiltmaj Jéeoba yéetel u kʼubmaj u yóol tiʼ letiʼ (Sal. 40:8).

⁶ Ilawil baʼax tu yaʼalaj utiaʼal u kiʼikiʼtʼantik Dios: «Yuumtsil, sen nojoch a jalaʼachil t-óokʼol; ¡a kʼaabaʼeʼ kiʼichkelem tu yóokʼol tuláakal le luʼumaʼ! ¡[a] nojbeʼenileʼ ku píitmáan náachil tiʼ le kaʼanoʼ!» (Sal. 8:1). ¿Máasaʼ chíikaʼan jach ku biskuba kaʼach yéetel u Taata yaan teʼ kaʼanoʼ? Tumen tu yilaj bukaʼaj u páajtalil Jéeobaeʼ, taakchaj u kiʼikiʼtʼantik «mantatsʼ» (Sal. 35:28).

7. ¿Bix u yáantkoʼon le payalchiʼoʼ?

⁷ Toʼon xaneʼ utiaʼal k-maas k-kʼubik k-óol tiʼ Jéeobaeʼ unaj k-payalchiʼ mantatsʼ tiʼ letiʼ, jeʼex tu beetil Davideʼ. Le Bibliaoʼ ku yaʼalik: «Natsʼabaʼex tiʼ Dios, letiʼ túuneʼ bíin u natsʼuba tiʼ teʼex» (Sant. 4:8). Le payalchiʼoʼ ku natsʼkoʼon tiʼ Dios yéetel junpʼéel bix k-kʼamik kiliʼich muukʼ (xok 1 Juan 3:22).

8. ¿Baʼaxten maʼ unaj k-babal aʼalik junpʼéeliliʼ baʼal ken payalchiʼinakoʼoniʼ?

⁸ Ken payalchiʼinakech tiʼ Dioseʼ, ¿junpʼéeliliʼ wa baʼax ka babal aʼalik? Wa beyoʼ táanil tiʼ a payalchiʼeʼ, jóoʼs u súutukil utiaʼal a tuklik baʼax ken a waʼale. Juntúul k-amigo wa k-láakʼtsileʼ, ¿jeʼel wa u yutstal tu tʼaan ka k-aʼaltiʼ chéen junpʼéeliliʼ baʼal jeʼel baʼaxak kʼiin ka k-ileʼ? Maʼ xaaneʼ yaan u kʼuchul u kʼiinil maʼ ken u yuʼub baʼax ken k-aʼale. Baʼaleʼ Jéeobaeʼ mix bikʼin kun pʼáatal maʼ u yuʼubik u payalchiʼ juntúul máax chúukaʼan u yóol, le oʼolal unaj k-ilik maʼ k-babal aʼalik chéen junpʼéeliliʼ baʼal.

9, 10. 1) ¿Baʼax jeʼel u páajtal k-kʼáatik ich payalchiʼeʼ? 2) ¿Baʼax jeʼel u yáantkoʼon k-maas maʼalobkíint le payalchiʼob k-beetik tiʼ Jéeobaoʼ?

⁹ Jeʼex k-ilkoʼ wa k-kʼáat náatsʼal tiʼ Jéeobaeʼ ken payalchiʼinakoʼoneʼ maʼ unaj k-aʼalik chéen baʼax ku jáan taal t-tuukuliʼ. Wa k-jeʼekʼabtik k-puksiʼikʼal tiʼ Jéeobaeʼ yaan k-maas náatsʼal tiʼ letiʼ yéetel yaan k-maas k-kʼubik k-óol tiʼ. ¿Baʼax jeʼel u páajtal k-kʼáatik ken payalchiʼinakoʼoneʼ? Le Bibliaoʼ ku yaʼalik: «Tiʼ tuláakal baʼaleʼ, ich oración bey xan ich kʼáat óolal junmúuchʼ yéetel a tsʼáaikeʼex graciaseʼ, aʼaleʼex tiʼ Dios baʼax a kʼáateʼex» (Fili. 4:6). U jaajileʼ jeʼel u béeytal k-kʼáatik tiʼ Jéeoba ka u yáantoʼon tiʼ jeʼel baʼaxak  ichil k-kuxtaleʼ, bey xan tiʼ jeʼel baʼaxak utiaʼal u béeytal k-bisikba tu yéeteleʼ.

¹⁰ Jach jeʼel u yáantkoʼon ka k-il le payalchiʼ tu beetaj le máaxoʼob meyajt Dios úuchjeakil ku yaʼalik le Bibliaoʼ (1 Sam. 1:10, 11; Bax. 4:24-31). Tu libroil Salmoseʼ yaʼab payalchiʼob yéetel kʼaayoʼob beetaʼan utiaʼal Jéeoba. Ku tʼaanoʼob tiʼ bix u yuʼubikuba maak ken yaachajak u yóol wa ken jach kiʼimakchajak u yóol. Wa k-xakʼaltikoʼobeʼ yaan k-maas maʼalobkíintik le payalchiʼob k-beetik tiʼ Jéeobaoʼ.

11. ¿Baʼaxten unaj k-jóoʼsik u súutukil k-tuukul tiʼ baʼax ku yaʼalik Dios?

¹¹ Davideʼ tu yaʼalaj: «U tusbeltʼaan le Yuumtsiloʼ jach maʼalob, tumen ku beetik u yantal naʼat tiʼ le máax óotsil u naʼateʼ» (Sal. 19:7). Kex maʼ yaʼab baʼax k-ojleʼ jeʼel u yantal k-naʼat wa k-beetik baʼax ku yaʼalik Dioseʼ. Baʼaleʼ yaan baʼax ku yaʼalaʼaltoʼoneʼ unaj k-jóoʼsik u súutukil k-tuukul tu yoʼolal utiaʼal k-maas jóoʼsik u yutsil. ¿Baʼaxten? Tumen wa k-beetkeʼ yaan u béeytal k-aktáantik le nukuch talamiloʼob jeʼel u yantaloʼ. Ku yáantkoʼon k-aktáant le túuntaj óoloʼob ku yantal tuʼux k-xook yéetel tuʼux k-meyajoʼ. Ku yáantkoʼon xan utiaʼal maʼ k-kʼamik kʼiʼikʼ, maʼ k-oksikba tiʼ política yéetel utiaʼal k-vestirtikba jeʼex u yaʼalik le Bibliaoʼ. Wa k-naʼatik baʼax uts tu tʼaan Dios tiʼ le baʼaloʼob tsʼoʼok k-ilkaʼ, ku yáantkoʼon k-il baʼax jeʼel k-beetik wa ka yanak junpʼéel talamil yoʼolaloʼobeʼ. Wa k-jóoʼsik u súutukil utiaʼal k-tuklik baʼax jeʼel k-beetkeʼ maʼ ken k-sen muʼyaj (Pro. 15:28).

12. ¿Tiʼ baʼax kʼáatchiʼob unaj k-tuukul utiaʼal k-beetik mantatsʼ baʼax ku yaʼaliktoʼon Jéeoba?

¹² Le táan k-páaʼtik u béeykuntik Dios le baʼax u yaʼalmoʼ, ¿k-eʼesik wa k-kʼubik k-óol tiʼ letiʼ yéetel k-tsʼaamaj k-óol k-beet baʼax uts tu tʼaan? ¿Jach wa tu jaajil k-creertik taʼaytak u xuʼulsaʼal tiʼ le Nojoch Babiloniaoʼ? ¿Láayliʼ wa k-creertik taʼaytak k-kuxtal tiʼ junpʼéel paraíso way Luʼum, jeʼex le táant k-kʼaj óoltik u jaajiloʼ? ¿Láayliʼ wa k-tsʼaamaj k-óol kʼaʼaytaj yéetel maʼ t-chaʼik tiʼ mix baʼal ka u beet u xuʼulul k-meyajtik Dioseʼ? ¿Láayliʼ wa jach táan k-páaʼtik u kaʼa kuxkíintaʼal le kimenoʼob, u kiliʼichkúuntaʼal u kʼaabaʼ Jéeoba yéetel u yeʼesaʼal chéen tiʼ letiʼ yaan u derechoil u gobernar? Wa k-tuukul tiʼ le kʼáatchiʼobaʼ yaan ‹k-tiaʼalintik tak kʼiinoʼob minaʼan u xuul› le baʼaxoʼob mantatsʼ ku yaʼaliktoʼon Jéeobaoʼ (Sal. 119:111).

13. ¿Baʼaxten yaan baʼax maʼ tu naʼataj le disipuloʼob teʼ yáax siglooʼ? Tsikbalt junpʼéel baʼax uchaʼan.

¹³ Maʼ xaaneʼ maʼ t-jach naʼatik junpʼéel baʼax ku yaʼalik le Bibliaoʼ, tumen maʼ kʼuchuk u kʼiinil u sáasilkuntik Jéeobaiʼ. Jesuseʼ yaʼab u téenel tu yaʼalaj tiʼ u apostoloʼob yaan u kʼuchul u kʼiinil u muʼyaj yéetel u kíimil (xok Mateo 12:40 yéetel 16:21). Baʼaleʼ maʼ tu naʼatoʼob baʼax taak u yaʼalikiʼ. Tu naʼatoʼob pʼis kuxkíintaʼabik Jesús yéetel ka tu «jeʼekʼabtaj u tuukuloʼob utiaʼal ka u naʼatoʼob baʼax u kʼáat u yaʼal le Kiliʼich Tsʼíiboʼoboʼ» (Luc. 24:44-46; Bax. 1:3). Le máaxoʼob xan tsaypachtik Cristooʼ pʼis weʼekik kiliʼich muukʼ tu yóokʼoloʼob teʼ Pentecostés tu jaʼabil 33, ka tu naʼatoʼob u Reino Dioseʼ teʼ kaʼan kun káajal u gobernaroʼ (Bax. 1:6-8).

14. Tu káajbal le siglo 20, ¿baʼax tu beetaj yaʼab sukuʼunoʼob ka tu yiloʼob maʼ béeychaj baʼax ku páaʼtkoʼob, unaj k-beetik xan?

¹⁴ Tu káajbal le siglo 20 xanoʼ u jaajil cristianoʼobeʼ yaan baʼaloʼob tu tukloʼob kun úuchul «tu tsʼook kʼiinoʼob» maʼ béeychajiʼ (2 Tim. 3:1). Jeʼex tu jaʼabil 1914, yaneʼ tu tuklaj taʼaytak u bisaʼal kaʼan. Ka tu yiloʼob maʼ béeychaj le baʼax ku páaʼtkoʼoboʼ tu kaʼa xakʼalxoktoʼob le Bibliaoʼ ka tu yiloʼob yaan baʼax jach kʼaʼabéet  u kʼaʼaytaʼal (Mar. 13:10). Le oʼolal tu jaʼabil 1922, Joseph F. Rutherford, máax nuʼuktik kaʼach le kʼaʼaytaj ku beetaʼaloʼ, tu yaʼalaj teʼ asamblea anchaj Cedar Point (Ohio, Estados Unidos): «¡Ileʼex, le Reyoʼ táan u gobernar! Teʼex unaj a kʼaʼaytikeʼex. Le oʼolal kʼaʼayteʼex, kʼaʼayteʼex, kʼaʼayteʼex le Rey yéetel u reinooʼ». Desde teʼ kʼiinoʼ le máaxoʼob meyajtik Jéeobaoʼ jach kʼaj óoltaʼanoʼob tumen ku kʼaʼaytikoʼob «u maʼalob péektsilil le Reinooʼ» (Mat. 4:23; 24:14).

15. ¿Bix u yáantkoʼon ken tuukulnakoʼon tiʼ baʼax u beetmaj Jéeoba yoʼolal u kaajal?

¹⁵ Wa k-tuukul tiʼ le baʼaloʼob tsʼoʼok u beetik Jéeoba yoʼolal u kaajal úuchjeakil bey xan teʼ kʼiinoʼobaʼ yaan k-kʼubik k-óol jeʼel u béeykuntik baʼax u yaʼalmeʼ. Tsʼoʼoleʼ le baʼaloʼob ku kʼaʼajsiktoʼon mantatsʼoʼ ku yáantkoʼon utiaʼal u taaktal k-ilik bix kun béeytal le baʼaxoʼob u yaʼalmoʼ yéetel utiaʼal k-kʼubik k-óol tiʼ baʼax ku yaʼalik.

16. ¿Baʼax kiʼikiʼtʼaanil k-kʼamik ikil k-tsʼaamil k-óol k-meyajt Dios?

¹⁶ Jéeoba, le Máax beetmiloʼonoʼ, jach yaan u páajtalil yéetel maʼ tu xuʼulul u meyaj. Le salmistaoʼ tu yaʼalaj: «[Dios] tiʼ máax yaan tuláakal páajtalil». Tu yaʼalaj xan: «A x-noʼoj kʼabeʼ muʼukʼaʼan» (Sal. 89:8, 13). Tumen juntúul Dios maʼ tu xuʼulul u meyajeʼ, ku kiʼikiʼtʼantik tuláakal baʼax k-beetik yoʼolal u Reino. Ku yilkeʼ le xiiboʼob, le koʼoleloʼob, le táankelmoʼob yéetel le tsʼoʼok u yantal u jaʼabiloʼoboʼ ‹mix juntéen ku jaantkoʼob waaj maʼ u náajalmoʼobiʼ›, wa maʼatech u chéen méekʼik u kʼaboʼob (Pro. 31:27). Jeʼex Jéeobaeʼ u tsʼaamaj u yóoloʼob meyaj. Jach kiʼimak u yóol u meyajtikoʼob Dios yéetel tuláakal u puksiʼikʼaloʼob, Jéeoba xaneʼ jach kiʼimak u yóol u kiʼikiʼtʼantik le baʼax ku beetkoʼoboʼ (xok Salmo 62:12).

17, 18. ¿Baʼaxten k-aʼalik ken k-beet baʼax ku yaʼalik Jéeobaeʼ ku yáantkoʼon utiaʼal k-maas kʼubik k-óol tiʼ letiʼ? Tsikbalt junpʼéel baʼax uchaʼan.

 ¹⁷ Ken k-beet baʼax ku yaʼalik Jéeobaeʼ, ¿bix u yáantkoʼon utiaʼal k-maas kʼubik k-óol tiʼ letiʼ? Tuukulnakoʼon tiʼ le baʼax úuch tiʼ le israelitaʼob ka ookoʼob teʼ luʼum aʼalaʼan u tsʼaʼabaltiʼoboʼ. Jéeobaeʼ tu yaʼalaj tiʼ le sacerdoteʼob kuchmil u arcail le núuptʼaan ka ookkoʼob tu áalkab jaʼil Jordán. Baʼaleʼ ka kʼuchoʼob tu jáaleʼ tu yiloʼob kaʼanchajaʼan u jaʼil yoʼolal le cháakoʼob tsʼoʼok u taaloʼ. ¿Baʼax tu beetoʼob? ¿Tu chʼaʼtuklaj wa u pʼáatloʼob tu jáal tak ken éemek le jaʼoʼ? Maʼatech, baʼaxeʼ tu kʼubaj u yóoloʼob tiʼ Jéeoba yéetel tu beetoʼob baʼax tu yaʼalaj. ¿Baʼax úuchi? Le Bibliaoʼ ku yaʼalik: ‹Ka ook le j-kʼiinoʼob ichil le áalkab jaʼ ka chʼuʼul u yookoʼobeʼ le jaʼ ku taal kaʼanaloʼ xuʼuli. Tuláakal le kaajoʼ chʼaakatnaj teʼ Jordanoʼ, kaʼalikil le j-kʼiinoʼoboʼ pʼáatoʼob tu chúumuk le Jordanoʼ, maʼalob waʼalikoʼob tiʼ tikin luʼum› (Jos. 3:12-17). ¡Chéen tukult bix tu yuʼubilubaʼob ka tu yiloʼob bix u xuʼulul u taal le jaʼoʼ! ¡Tu maas kʼubaj wal u yóoloʼob tiʼ Jéeobaeʼ! Tuláakal lelaʼ béeychaj tumen tu kʼubaj u yóoloʼob tiʼ baʼax ku yaʼalik.

¹⁸ Bejlaʼeʼ Jéeobaeʼ maʼ tu beetik t-oʼolal baʼaloʼob beyoʼ, baʼaleʼ ku kiʼikiʼtʼantkoʼon ken k-beet baʼax ku yaʼalik. Yéetel u kiliʼich muukʼeʼ ku yáantkoʼon utiaʼal k-kʼaʼaytik le Reino tiʼ tuláakal yóokʼol kaaboʼ. Tsʼoʼoleʼ Jesucristoeʼ tu yaʼalaj yaan u yáantik máaxoʼob tsaypachtik utiaʼal u beetkoʼob le nojoch meyajaʼ. Ka tsʼoʼok u kaʼa kuxkíintaʼaleʼ, tu yaʼalaj: «Xeeneʼex tu yiknal u máakiloʼob tuláakal kaajoʼobeʼ ka a beeteʼexoʼob disipuloʼob [...].Yéetel, ¡ileʼex!, tiʼ yanen ta wéeteleʼex tak teʼ kʼiinoʼob táan u kʼuchul u xuul yóokʼol kaaboʼ» (Mateo 28:19, 20). Yaʼab j-Jaajkunajoʼob suʼlakoʼob wa saajkoʼobeʼ tsʼoʼok u yilkoʼob bix u yáantaʼaloʼob tumen le kiliʼich muukʼ utiaʼal u kʼaʼaytajoʼob tiʼ jeʼel máaxakeʼ (xok Salmo 119:46 yéetel 2 Corintoiloʼob 4:7).

19. ¿Baʼax maʼ unaj u tuʼubultoʼon kex yaan baʼax maʼ tu páajtal k-beetkiʼ?

¹⁹ Yaan sukuʼunoʼobeʼ jach kʼojaʼanoʼob wa tsʼoʼok u chʼíijloʼob. Baʼaleʼ maʼ unaj u tuʼubultiʼobeʼ «le Taatatsil jach nojoch u chʼaʼ óotsilaloʼ yéetel le Dios mantatsʼ ku líiʼsaj óoloʼ» ku naʼatik bix u yuʼubikuba cada juntúul (2 Cor. 1:3). Nojoch baʼal u yilik tuláakal baʼax k-beetik utiaʼal k-meyajtik. Maʼ u tuʼubultoʼoneʼ utiaʼal k-salvartikbaeʼ unaj k-tsʼáaik fe tiʼ u kuxtal Jesús tu kʼuboʼ yéetel k-beetik tuláakal le ku páajtal utiaʼal k-meyajtik Dioseʼ (Heb. 10:39).

20, 21. ¿Bix jeʼel k-eʼesik k-kʼubik k-óol tiʼ Jéeobaeʼ?

²⁰ Utiaʼal k-adorartik Jéeobaeʼ unaj u meyajtoʼon tuláakal le tiempo ku páajtaloʼ bey xan le muukʼ yéetel uláakʼ baʼaxoʼob yaantoʼonoʼ. Yéetel tuláakal k-puksiʼikʼal k-kʼáat kʼaʼayt «le maʼalob péektsiloʼ» (2 Tim. 4:5). Kiʼimak k-óol tumen k-áantik k-éet máakil «ka kʼuchuk u chúukaʼan kʼaj óoltoʼob le jaajoʼ» (1 Tim. 2:4). Ken k-nojbeʼenkúunt Jéeobaeʼ ku bintoʼon utsil (Pro. 10:22). Tsʼoʼoleʼ k-maas kʼubik k-óol tiʼ le Máax beetmiloʼonoʼ (Rom. 8:35-39).

²¹ Jeʼex tsʼoʼok k-ilkoʼ yaan baʼax unaj k-beetik utiaʼal k-kʼub óoltik maʼalob bix u nuʼuktikoʼon Jéeoba. Le oʼolaleʼ payalchiʼinen tiʼ Dios, tuukulnen tiʼ bix tsʼoʼok u beetik yéetel bix ken u beetil baʼaxoʼob u yaʼalmaj yéetel kʼub a wóol a beet baʼax ku yaʼalik. Wa ka beetik le baʼax tsʼoʼok k-ilkoʼ yaan a «tiaʼalintik tak minaʼan u xuul» le baʼaxoʼob ku yaʼalik Jéeobaoʼ, tumen yaan a kuxtal mantatsʼ.