«Kanáanteʼex [...] u tamanoʼob Jajal Dios kʼubéentaʼanteʼexoʼ»

«Kanáanteʼex jeʼel bix kanan tamanoʼobeʼ le u tamanoʼob Jajal Dios kʼubéentaʼanteʼexoʼ; beeteʼex yéetel maʼalob óolal.» (1 PED. 5:2)

1. ¿Baʼax talamil ku aktáantik le sukuʼunoʼob le ka túuxtaʼab le yáax carta tiʼob tumen Pedrooʼ?

LE KA tu tsʼíibtaj u yáax carta Pedrooʼ, jach taʼaytak u káajal u chʼaʼpachtaʼal le sukuʼunoʼob yanoʼob Roma tumen le emperador Neronoʼ. Pedroeʼ taak kaʼach u muʼukʼaʼankúuntik u fe le sukuʼunoʼoboʼ, tumen taak u xuʼulsaʼaltiʼob tumen le Kʼaasilbaʼal, jeʼex juntúul león jach taak u jaantik máakeʼ. Utiaʼal u chúukpajal u yóoloʼobeʼ unaj u yilkoʼob «maʼalob baʼax [ku beetkoʼob]» yéetel u tsʼáaikubaʼob yáanal «u páajtalil u kʼab Jajal Dios» (1 Ped. 5:6, 8). Yéetel unaj u múuchʼ meyajtikoʼob Dios. Maʼ unaj u paklan «chiʼik[ubaʼob] yéetel [u] jaant[kubaʼobiʼ]». Wa maʼeʼ yaan u «xuʼuls[kubaʼob] [tu] baatsil[oʼob]» (Gal. 5:15).

2, 3. ¿Máax contra unaj k-baʼateʼel, yéetel baʼax kʼáatchiʼiloʼob ken núuk teʼ xookaʼ yéetel teʼ tuláakʼoʼ?

² Le kʼiinoʼob kuxlikoʼonaʼ chíikaʼan tiʼ le tu yilaj le yáax cristianoʼoboʼ. Le Kʼaasilbaʼaloʼ táan xan u kaxtik u súutukil utiaʼal u xuʼulsik toʼon (Apo. 12:12). Tsʼoʼoleʼ táan u náatsʼal le «táaj yaʼab muʼyaj jeʼel bix mix juntéen yanak káajik yóokʼol kaab[eʼ]» (Mat. 24:21). Yéetel jeʼex le sukuʼunoʼob teʼ yáax siglooʼ, kʼaʼabéet k-kanáantik maʼ k-paklan baʼateʼel. Utiaʼal lelaʼ, yaʼab u téenel ku kʼaʼabéettal u yáantkoʼon le ancianoʼob teʼ múuchʼuliloʼ.

³ ¿Baʼax jeʼel u yáantik le ancianoʼob u yiloʼob junpʼéel jatsʼuts meyaj u kanáantkoʼob «u tamanoʼob Jajal Dios kʼubéentaʼan[tiʼoboʼ]»? (1 Ped. 5:2.) ¿Bix unaj u beetkoʼob le meyajoʼ? Teʼ xookaʼ yaan k-ilik u núukil le kʼáatchiʼobaʼ. Yéetel teʼ tuláakʼoʼ yaan k-ilik bix jeʼel u beetik tuláakal le múuchʼulil le baʼax ku yaʼalik le tekstoaʼ: «Tsikeʼex le máaxoʼob ku meyajoʼob ichileʼexoʼ yéetel ku nuʼuktikoʼob a beeleʼex[oʼ]» (1 Tes. 5:12). Le xookoʼobaʼ yaan u yáantkoʼon utiaʼal maʼ k-chaʼik k-lúuʼsaʼal tumen le Kʼaasilbaʼaloʼ yéetel utiaʼal maʼ u tuʼubultoʼon tu contra letiʼ k-baʼateʼel (Efe. 6:12).

«Kanáanteʼex [...] u tamanoʼob Jajal Dios»

4, 5. ¿Bix unaj u yilaʼal le tamanoʼob tumen le ancianoʼoboʼ? Tsol yéetel junpʼéel kettʼaan.

⁴ Pedroeʼ tu yaʼalaj tiʼ le ancianoʼob teʼ yáax siglo bix unaj u yilkoʼob le tamanoʼob kʼubéentaʼantiʼoboʼ (xokaʼak 1 Pedro 5:1, 2). Tiʼ le baʼax tu yaʼalaj Pedrooʼ, k-ilkeʼ maʼ tu taasuba maas nojchil teʼ múuchʼulil, kex apóstol kaʼachoʼ, baʼaxeʼ tʼaanaj chéen bey juntúul ancianoeʼ (Gal. 2:9). Lelaʼ bey le tuukul ku yeʼesik le Cuerpo Gobernante ken u yaʼaloʼob tiʼ tuláakal le ancianoʼob ka u yil u kanáantkoʼob tubeel u tamanoʼob Diosoʼ.

⁵ Le apostoloʼ tu yaʼaleʼ kʼubéentaʼan tiʼ le ancianoʼob «u tamanoʼob Jajal Dios[oʼ]». Unaj u naʼatkoʼobeʼ le tamanoʼoboʼ utiaʼal Jéeoba yéetel Jesucristo, yéetel yaan u kʼubkoʼob cuenta tiʼob yoʼolal bix u kanáantkoʼob. Lelaʼ jeʼel u páajtal k-ketik yéetel juntúul k-amigo ku kʼubéentiktoʼon u paalal utiaʼal ka k-kanáantoʼobeʼ. ¿Máasaʼ yaan k-ilik k-kanáantikoʼob tubeel yéetel k-tsʼáaik baʼal u jaantoʼob? Yéetel wa ku kʼojaʼantal juntúuleʼ, yaan k-bin tu séebaʼanil k-chʼaʼ u tsʼaak. Le ancianoʼob xanoʼ u yojloʼob kʼubéentaʼantiʼob «u [múuchʼulil] Yuumtsil, le tu manaj yéetel u kʼiʼikʼel» u Hijooʼ (Hch. 20:28). Maʼatech u tuʼubultiʼobeʼ cada juntúul tiʼ le tamanoʼoboʼ manaʼab yéetel u kʼiʼikʼel Jesucristo. Tumen u yojloʼob yaan u kʼubkoʼob cuenta tiʼ Jéeobaeʼ, ku yilik u tséentkoʼob yéetel u kanáantkoʼob tubeel le tamanoʼoboʼ.

6. ¿Baʼax táakaʼan ichil le meyaj ku beetik le kanan tamanoʼob úuchjeakiloʼ?

⁶ Le meyaj ku beetkoʼoboʼ chíikaʼan tiʼ le meyaj  ku beetik le kanan tamanoʼob úuchjeakiloʼ. Ken u bis u yaalakʼoʼob jaanleʼ, ku muʼyajtikoʼob u yooxol kʼiin, yéetel ken áakʼabchajkeʼ ku muʼyajtikoʼob keʼel (Gén. 31:40). Tsʼoʼoleʼ yaan kʼiineʼ ku tsʼáaik u kuxtaloʼob tu táan kíimil yoʼolal u tamanoʼob. Davideʼ bey tu beetil kaʼachoʼ, tu táankelmileʼ tu kíimsaj juntúul león yéetel juntúul oso utiaʼal maʼ u jaantaʼal u tamanoʼob. Letiʼeʼ tu tsikbalteʼ tu machoʼob tu tsoʼotsel u pooloʼob, tu lúuʼsoʼob luʼum ka tu kíimsoʼob (1 Sam. 17:34, 35). Maʼ sajakchaj u natsʼuba yiknaloʼobiʼ. Leloʼ ku yeʼesikeʼ, ka kʼaʼabéetchaj u salvartik u tamanoʼobeʼ maʼ tu chʼaʼaj saajkil tiʼ mix baʼaliʼ.

7. ¿Baʼax ku beetik le ancianoʼob ken lúubuk juntúul taman tu kʼab Satanasoʼ?

⁷ Le ancianoʼob teʼ kʼiinoʼobaʼ, jach ku yilik u kanáantkoʼob le múuchʼulil tiʼ le léechoʼob ku tsʼáaik Satanasoʼ. Wa ku lúubul juntúul taman tu kʼab le tsʼíitsʼik leonoʼ, ku yeʼeskoʼob maʼatech u chʼaʼikoʼob saajkil u yáantoʼob, jeʼex tu beetil Davideʼ. Ken u yiloʼob lubaʼan u yóol juntúul sukuʼun yéetel taʼaytak u lúubul tu léech le Kʼaasilbaʼaloʼ, tu séebaʼanil ku tʼaanoʼob tu yéetel (xokaʼak Judas 22, 23). Yéetel wa uchaʼan loob tiʼ juntúul tamaneʼ, ku yáantkoʼob yéetel le Bibliaoʼ, lelaʼ bey ka u kʼaxoʼob yéetel ka u tsʼaʼob bálsamo tiʼ utiaʼal u yutstaleʼ. Tuláakal lelaʼ maʼ tu páajtal u beetkoʼob wa maʼ u yáantaʼaloʼob tumen Jéeoba.

8. ¿Tuʼux ku nuʼuktaʼal le tamanoʼob tumen le ancianoʼoboʼ, yéetel bix u beetkoʼob?

⁸ Jeʼex le kanan tamanoʼob ku bisik u yaalakʼoʼob tuʼux yaan baʼal u jaantoʼob yéetel jaʼ u yukʼoʼobeʼ, le ancianoʼoboʼ ku nuʼuktikoʼob le tamanoʼob teʼ múuchʼuliloʼ. ¿Bix u beetkoʼob? Ku líiʼskoʼob u yóoloʼob utiaʼal ka xiʼikoʼob mantatsʼ teʼ muchʼtáambal tuʼux ku tsʼaʼabal «janal tiʼob tu yorailoʼ» (Mat. 24:45). Tsʼoʼoleʼ ku jóoʼskoʼob u tiempoil utiaʼal u yáantkoʼob le sukuʼunoʼob tsʼoʼok u xuʼulul u tsʼáaik u yóol u meyajtoʼob Diosoʼ, yéetel ku líiʼskoʼob u yóol ka u tséentubaʼob yéetel le baʼax ku kaʼansik le Bibliaoʼ. Baʼaleʼ ¿baʼax ku beetkoʼob ken u yiloʼob juntúul taman náachchajaʼaneʼ táan u joʼopʼol u suut teʼ múuchʼuliloʼ? Maʼatech u sajakkúuntkoʼob, baʼaxeʼ ku yeʼeskoʼob yaabilaj tiʼ yéetel ku yáantkoʼob u yil bix jeʼel u tsʼáaik ichil u kuxtal le baʼax ku yaʼalik le Bibliaoʼ.

9, 10. ¿Bix unaj u yáantaʼal le sukuʼunoʼob lubaʼan u yóoloʼob tumen le ancianoʼoboʼ?

⁹ Wa ka kʼojaʼanchajkoʼoneʼ, ¿yiknal máax  doctoril k-kʼáat ka bisaʼakoʼon? ¿Yiknal wa juntúul chéen ku yuʼubik kʼojaʼanoʼon yéetel ku jáajan aʼalik baʼax tsʼaakil unaj k-manik utiaʼal ka máanak uláakʼ kʼojaʼan tu yiknal? ¿Wa yiknal juntúul ku yuʼubik tubeel baʼax ku yúuchultoʼon, ku tsolik baʼax kʼojaʼanil yaantoʼon yéetel bix jeʼel k-kanáantikbaeʼ? ¿Máasaʼ yiknal le u tsʼook juntúul jeʼel k-binoʼ?

¹⁰ Lelaʼ ku kaʼansik junpʼéel baʼax tiʼ le ancianoʼoboʼ. Ken tʼaanakoʼob yéetel juntúul máax lubaʼan u yóoleʼ, unaj u yuʼubikoʼob baʼax ku yaʼalik yéetel u yáantkoʼob utiaʼal u tsʼáa u yóol tu kaʼatéen u meyajt Dios, lelaʼ bey ka u jiʼikʼabtoʼob u wíinklil yéetel «aceite tu kʼaabaʼ Yuumtsil[eʼ]» (xokaʼak Santiago 5:14, 15). Beyoʼ le tsolnuʼukoʼob ku tsʼáaik le Bibliaoʼ yaan u beetik u yuʼubikuba maʼalobil, jeʼex u balsamoil Galaad ku beetik u jeʼelel u wíinklil máak kaʼacheʼ (Jer. 8:22; Eze. 34:16). Ken u beet le baʼax ku yaʼalik le Bibliaoʼ, le kʼojaʼanoʼ yaan u líikʼil u yóol. ¿Máasaʼ jach maʼalob ka uʼuyaʼak tumen le ancianoʼob baʼax ku yaʼalik le tamanoʼob táan u muʼyajoʼob yéetel ka payalchiʼinakoʼob tu yéeteloʼob?

«Yéetel maʼalob óolal [...] maʼ tumen táan u tsaʼabalteʼexiʼ»

11. ¿Baʼax péeksik le ancianoʼob u yáantoʼob le tamanoʼob yéetel kiʼimak óolaloʼ?

¹¹ Ka tsʼoʼokeʼ, Pedroeʼ tu kʼaʼajsaj tiʼ le ancianoʼob yanoʼob teʼ múuchʼulil baʼax unaj u beetkoʼob yéetel baʼax maʼ unaj beetkoʼob ken u nuʼuktoʼob u tamanoʼob Diosoʼ. Utiaʼal u káajbaleʼ tu yaʼaleʼ unaj u meyajoʼob «yéetel maʼalob óolal [...] maʼ tumen táan u tsaʼabal[tiʼobiʼ]». ¿Baʼax unaj u péeksik le ancianoʼob u meyajtoʼob u sukuʼunoʼoboʼ? ¿Baʼax péeks Pedro u kanáant yéetel u tséent u tamanoʼob Jesús? Letiʼe yaabilaj ku yuʼubik yoʼolal Jesusoʼ (Juan 21:15-17). Yoʼolal u yaabilaj le ancianoʼob tiʼ Jesusoʼ, maʼatech u kuxtaloʼob chéen jeʼel bix u kʼáatoʼobeʼ, baʼaxeʼ ku kuxtaloʼob jeʼel bix uts tu tʼaan le «máax kíim yéetel kaʼapúut kuxlaj tu yoʼolaloʼob[oʼ]» (2 Cor. 5:14, 15). Le yaabilaj ku yuʼubikoʼob yoʼolal Jesús, yoʼolal Dios yéetel yoʼolal u sukuʼunoʼobeʼ, le péekskoʼob u xup u muukʼoʼob, u taakʼinoʼob yéetel u tiempoʼob utiaʼal u yáantkoʼob le tamanoʼoboʼ (Mat. 22:37-39). Tsʼoʼoleʼ ku beetkoʼob yéetel kiʼimak óolal, maʼ tumen ku sen aʼalaʼaltiʼob ka u beetoʼobiʼ.

12. ¿Bix úuchik u yáantik Pablo le sukuʼunoʼob úuchjeakiloʼ?

¹² ¿Tak baʼax ku beetik le ancianoʼob utiaʼal u yáantkoʼob le sukuʼunoʼoboʼ? Letiʼobeʼ ku kanáantkoʼob le tamanoʼob jeʼex beetaʼabik tumen Pabloeʼ, letiʼeʼ jach tu yilaj u beetik jeʼex Jesuseʼ (1 Cor. 11:1). Letiʼ yéetel uláakʼ sukuʼunoʼobeʼ jach u yaabiltmoʼob le sukuʼunoʼob yanoʼob kaʼach Tesalónicaoʼ, le oʼolal kʼuch tak u yaʼaloʼob: «[T-]tsʼáaj tiʼ teʼex maʼ chéen u maʼalob péektsilil Jajal Diosiʼ, baʼaleʼ tak k-kuxtal». Letiʼobeʼ mantatsʼ tu yeʼesoʼob yaabilaj «jeʼel bix juntúul maamatsil ku tséentik yéetel ku kanáantik u mejen paalaloʼobeʼ» (1 Tes. 2:7, 8). Le apostoloʼ u yojel juntúul maamatsil jach u yaabiltmaj u chaambaleʼ, ku beetik tuláakal le ku páajtal utiaʼal u kanáantik, le oʼolal jeʼel tak u líikʼil chúumuk áakʼab utiaʼal u tséenteʼ.

13. ¿Baʼax unaj u yilik u beetik le ancianoʼoboʼ?

¹³ Baʼaleʼ le ancianoʼoboʼ unaj u jatskoʼob u tiempoʼob utiaʼal u kanáantkoʼob le múuchʼulil yéetel u kanáantkoʼob u familiaʼoboʼ (1 Tim. 5:8). Tumen le tiempo ku máanskoʼob teʼ múuchʼuliloʼ, letiʼe tiempo maʼatech u máanskoʼob yéetel u yatanoʼob bey xan yéetel u paalaloʼoboʼ. Junpʼéel baʼax jeʼel u yáantkoʼobeʼ letiʼe u invitarkoʼob cada wa baʼax kʼiin uláakʼ sukuʼunoʼob ken yanaktiʼob le Adoración ich Familiailoʼ. Lelaʼ bey u beetik Masanao, juntúul anciano, yéetel u familia, kajaʼanoʼob Japón. Letiʼeʼ úuch joʼopʼok u invitartik le sukuʼunoʼob maʼ tsʼokaʼan u beeloʼob yéetel le familiaʼob maʼ j-Jaajkunaj le taatatsiloʼ. Jujuntúul tiʼ le sukuʼunoʼobaʼ, tsʼoʼok u beetik u ancianoiloʼob yéetel ku yilik u beetkoʼob jeʼex Masanaoʼ.

«Mix tumen táan a tsʼíiboltkeʼex taakʼiniʼ.» Baʼaxeʼ yéetel maʼalob tuukul

14, 15. ¿Baʼaxten kʼaʼabéet u kanáantik le ancianoʼob maʼ u tsʼíiboltkoʼob taakʼinoʼ, yéetel bix jeʼel u beetkoʼob jeʼex Pabloeʼ?

¹⁴ Pedro xaneʼ tu yaʼaleʼ le ancianoʼoboʼ maʼ unaj u nuʼuktikoʼob le múuchʼulil «tumen táan [u] tsʼíiboltk[oʼob] taakʼiniʼ», baʼaxeʼ unaj u beetkoʼob yéetel maʼalob tuukul. Kex yaʼab tiempo  ku máanskoʼob utiaʼal u beetkoʼob le meyaj tsʼaʼantiʼoboʼ maʼatech u páaʼtkoʼob ka boʼotaʼakoʼob tu yoʼolal. Baʼaleʼ le apostoloʼ tu yilaj maʼalob ka u yaʼal maʼ u «tsʼíiboltk[oʼob] taakʼin». Le baʼax tu yaʼaloʼ jach jeʼel u yúuchleʼ, lelaʼ bey u beetaʼal tumen u nuuktakil le religionoʼob yanoʼob ichil «le nojoch Babiloniaoʼ», le oʼolal yaʼab baʼaloʼob yaantiʼob, baʼaleʼ yaʼab tiʼ le máaxoʼob ku nuʼuktikoʼoboʼ jach óotsiloʼob (Apo. 18:2, 3). Le ancianoʼoboʼ unaj u kanáantkoʼob maʼ u beetkoʼob beyoʼ.

¹⁵ Letiʼobeʼ unaj u yilik u beetkoʼob jeʼex Pabloeʼ. Tumen letiʼ apóstol kaʼacheʼ, jeʼel u béeytal u maas «tsʼáaik u kuuch» le sukuʼunoʼob yanoʼob Tesalónicaoʼ. Baʼaleʼ «yéetel kʼiin bey xan yéetel áakʼab» meyajnaj utiaʼal maʼ u jaantik «u yoʼoch mix máak wa maʼ» u boʼotik (2 Tes. 3:8). Teʼ kʼiinoʼob xanaʼ, le ancianoʼob, jeʼex le superintendente viajanteʼoboʼ ku yilik u beetkoʼob xan beyoʼ. Kex ku kʼamkoʼob le baʼax ku tsʼaʼabaltiʼob tumen le sukuʼunoʼoboʼ maʼatech u tsʼáaikoʼob «u kuuch» mix máak (1 Tes. 2:9).

16. ¿Baʼax táakaʼan ichil u nuʼuktaʼal le múuchʼulil yéetel maʼalob tuukuloʼ?

¹⁶ Le ancianoʼoboʼ ku yilik u beetik u meyajoʼob yéetel maʼalob tuukul. Ku tsʼáaik u yóol u beet u meyajoʼob yéetel ku yilik u xupkubaʼob yoʼolal le sukuʼunoʼoboʼ. Baʼaleʼ kex tumen u kʼáat u yáantoʼobeʼ, maʼatech u yaʼalikoʼobtiʼob ka u beetoʼob tak baʼaxoʼob maʼ tu páajtal u beetkoʼob mix ka u ket baʼax ku beetkoʼob yéetel u maasil (Gal. 5:26). U yojloʼob maʼ junpʼéeliliʼ baʼax ku páajtal u beetik cada juntúul sukuʼuniʼ yéetel ku yilkoʼob ka u meyajtoʼob Jéeoba yéetel kiʼimak óolal.

«Maʼ bey teʼex u yuumil[oʼobeʼ], [...] [eʼeseʼex] maʼalob bej tiʼ le tamanoʼoboʼ»

17, 18. 1) ¿Baʼaxten talamchaj u yeʼesik kabal óolal le apostoloʼoboʼ? 2) ¿Baʼax k-kanik tiʼ le baʼax úuchtiʼoboʼ?

¹⁷ Maʼ unaj u tuʼubul tiʼ le ancianoʼoboʼ le tamanoʼoboʼ u tiaʼal Jéeoba, maʼ u tiaʼaloʼob letiʼobiʼ. Le oʼolal maʼ unaj u nojbaʼalkúuntkubaʼob «tu yóokʼol le máaxoʼob u tiaʼaloʼob Diosoʼ» (1 Pedro 5:3, NM). Le apostoloʼob kaʼachoʼ ka káajeʼ joʼopʼ u tsʼíiboltkoʼob u beetik u nojchiloʼob ichil u maasil chéen utiaʼal u kaxtik u yutsiloʼob. Maʼ xaaneʼ, joʼopʼ u tuukuloʼob jeʼex le gobernanteʼob teʼ kʼiinoʼob jeʼeloʼ, joʼopʼ u tsʼíiboltkoʼob u yantal páajtalil tiʼob (xokaʼak Marcos 10:42-45).

¹⁸ Bejlaʼeʼ le sukuʼun «ku tsʼíiboltik u beet[ik] u [ancianoiloʼ]» maʼalob ka u tukult baʼaxten taak u beetik (1 Tim. 3:1). Bey xan le sukuʼunoʼob táan u beetik u ancianoiloʼoboʼ maʼalob ka u tukloʼob: «¿Tsʼoʼok wa u joʼopʼol in tuukul jeʼex le apostoloʼob kaʼachoʼ?». Wa le apostoloʼob talam úuchik u yilkoʼob maʼ u tsʼíiboltkoʼob u yantaltiʼob páajtalileʼ, bey xan jeʼel u yúuchul tiʼ le ancianoʼoboʼ. Lelaʼ ku yeʼesikeʼ mantatsʼ unaj k-kanáantikba.

19. ¿Baʼax maʼ unaj u tuʼubul tiʼ le ancianoʼob ken kʼaʼabéetchajak u kanáantkoʼob le tamanoʼoboʼ?

¹⁹ Baʼaleʼ yaan horaeʼ le ancianoʼoboʼ kʼaʼabéet u tʼaanoʼob yéetel páajtalil. Lelaʼ maases bey unaj u beetkoʼob ken yanak «tsʼíitsʼik baʼalcheʼob» u kʼáat u beetoʼob loob tiʼ le tamanoʼoboʼ (Hch. 20:28-30). Baʼaleʼ unaj u yilik u beetkoʼob le baʼax tu yaʼalaj Pablo tiʼ Titooʼ: «Tsolxikinnen yéetel kʼeyajnen yéetel tuláakal páajtalil» (Tito 2:15). Baʼaleʼ tak teʼ súutukiloʼob beyoʼ ku yilik u tʼaanoʼob yéetel tsiikil bey xan yéetel yaabilaj. ¿Baʼaxten? Tumen u yojloʼobeʼ, utiaʼal u kʼuchloʼob tu puksiʼikʼaloʼobeʼ, maʼ unaj u yaʼalikoʼob baʼaloʼob tiʼobiʼ, baʼaxeʼ unaj u tsolkoʼob u nuʼuk tiʼob yéetel yaabilaj.

20. ¿Baʼaxten le ancianoʼoboʼ jach maʼalob ka u xakʼalxoktoʼob le baʼaxoʼob tu beetaj Jesusoʼ?

²⁰ Le ancianoʼoboʼ jach yaʼab baʼax jeʼel u kankoʼob tiʼ Jesuseʼ. Ken joʼopʼok u xokikoʼob le baʼax ku yaʼalik le Evangelioʼoboʼ, ku taaktal u  yeʼeskoʼob yaabilaj tiʼ le tamanoʼoboʼ (Juan 13:12-15). Ken k-il bix úuchik u kaʼansik u disipuloʼobeʼ ku péeksik k-puksiʼikʼal. Letiʼobeʼ jach kaanbalnajoʼob tiʼ le kabal óolal tiʼ yeʼesaj Jesusoʼ, le oʼolal joʼopʼ u yilkoʼob u maasil «bey [maas] maʼaloboʼob tiʼ le[tiʼobeʼ]» (Fili. 2:3). Le ancianoʼob xan bejlaʼaʼ ku yilik u beetkoʼob jeʼex Jesuseʼ, beyoʼ ku «[yeʼeskoʼob] maʼalob bej tiʼ le tamanoʼoboʼ».

21. ¿Baʼax ku páaʼtik u kʼamik le ancianoʼoboʼ?

²¹ Pedroeʼ tu yaʼalaj junpʼéel jatsʼuts baʼax ku taal u kʼiin tu tsʼoʼokbal le baʼax tu yaʼaloʼ (xokaʼak 1 Pedro 5:4). Le ancianoʼob yéeyaʼanoʼob utiaʼal u binoʼob kaʼanoʼ yaan u kʼamikoʼob «junpʼéel nojbeʼen [corona] maʼatech u kʼastal», tumen yaan u yantaltiʼob junpʼéel kuxtal minaʼan u xuul yéetel Cristo teʼ kaʼanoʼ. Yéetel le ancianoʼob yanoʼob ichil le «uláakʼ tamanoʼob[oʼ]» yaan u kuxtaloʼob way Luʼum utiaʼal u nuʼuktikoʼob u tamanoʼob Dios yáanal u gobierno le «nojoch kanan tamanoʼ» (Juan 10:16). Teʼ tuláakʼ xookoʼ yaan k-ilik le jejeláas bix jeʼel u béeytal k-múuchʼ meyaj yéetel le ancianoʼob nuʼuktik le múuchʼuliloʼ.

Kʼaʼajsaj

• ¿Baʼaxten maʼalob úuchik u yaʼalik Pedro tiʼ le ancianoʼob ka u nuʼuktoʼob u tamanoʼob Dios kʼubéentaʼantiʼoboʼ?

• ¿Bix unaj u yáantaʼal le tamanoʼob kʼojaʼanoʼob tumen le ancianoʼoboʼ?

• ¿Baʼax péeksik le ancianoʼob utiaʼal u kanáantkoʼob u tamanoʼob Dios kʼubéentaʼantiʼoboʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 21]

Le ancianoʼoboʼ ku kanáantkoʼob le tamanoʼob kʼubéentaʼantiʼob jeʼex u beetik le kanan tamanoʼob úuchjeakiloʼ