Le utsiloʼob ken u tsʼáa le Rey ku nuʼuktaʼal tumen Dios yéetel u kiliʼich muukʼoʼ
Le utsiloʼob ken u tsʼáa le Rey ku nuʼuktaʼal tumen Dios yéetel u kiliʼich muukʼoʼ
«U [kiliʼich muukʼ] Yuumtsileʼ, tiʼ bíin yanak mantatsʼ tu yóokʼoleʼ.» (ISA. 11:2)
1. ¿Baʼax ku yaʼalik jujuntúul máakoʼob yoʼolal le baʼaxoʼob ku yúuchul teʼ yóokʼol kaabaʼ?
STEPHEN HAWKING, juntúul máax ku xokik bix yanil le eekʼoʼoboʼ, tu yaʼalaj tu jaʼabil 2006: «¿Bix jeʼel u pʼáatal utiaʼal uláakʼ cien jaʼaboʼob junpʼéel yóokʼol kaab ku sen baʼateʼel yoʼolal política, chuup yéetel baʼaloʼob kʼaastak, yéetel jach ku kʼaskúuntkoʼob le Luʼumaʼ?». Junpʼéel periódico xaneʼ ku yaʼalik: «Maʼ béeyak k-xuʼulsik le óotsililoʼ, mix béeyak u yantal jeetsʼelil teʼ yóokʼol kʼaabaʼ. Baʼaxeʼ tsʼoʼok u maas kʼastal. Maʼ tumen wa maʼ k-beet mix baʼal utiaʼal k-utskíintkiʼ: tsʼoʼok k-beetik tuláakal, tsʼoʼok k-luʼsik u derechoil u sen úuchul koonol, yéetel tsʼoʼok k-chaʼik u yúuchul koonol yéetel u manik máak jeʼel baʼaxak u kʼáateʼ, tsʼoʼok xan k-tsʼáaik Sociedad de Naciones yéetel tsʼoʼok k-beetik yaʼab u nukuch nuʼukuliloʼob baʼateʼel. Baʼaleʼ yoʼolal le sen baʼateloʼob tsʼoʼok u yantal utiaʼal u xuʼulul le baʼalteltáambaloʼoboʼ, bejlaʼeʼ mix máak creertik wa jeʼel u xuʼulsaʼaleʼ (New Statesman).
2. Maʼ kun xáantaleʼ, ¿bix ken u yeʼesil Jéeoba chéen tiʼ letiʼ yaan u derechoil utiaʼal u gobernar?
2 Toʼon k-meyajtik Jéeobaeʼ maʼ tu jaʼakʼal k-óol yoʼolal le baʼaxoʼob ku yaʼalik le máakoʼobaʼ, tumen le Bibliaoʼ ku yaʼalikeʼ le wíinikoʼ maʼ beetaʼab utiaʼal u gobernartikuba chéen tu juunaliʼ (Jer. 10:23). Chéen tiʼ Jéeoba yaan u derechoil u gobernartikoʼon, u yaʼalik baʼax unaj k-beetik, baʼax oʼolal kuxaʼanoʼon yéetel u nuʼuktikoʼon utiaʼal k-ilik beetik beyoʼ. Maʼ kun xáantaleʼ, yaan u yeʼesik u páajtalil ken u xuʼuls tiʼ tuláakal le jejeláas gobierno tsʼoʼok u tsʼáaik wíinikoʼ. Tsʼoʼoleʼ yaan xan u xuʼulsik tiʼ le máaxoʼob ku tsʼáaikubaʼob tu contra u gobiernooʼ yéetel ku yaabiltikoʼob le yóokʼol kaab, tuʼux palitsiltaʼan wíinik tumen le kʼeban yéetel tumen Satanás, «u [diosil] le yóokʼol kaabaʼ» (2 Cor. 4:4).
3. ¿Baʼax tu yaʼalaj Isaías tu yoʼolal le Mesíasoʼ?
3 Teʼ túumben yóokʼol kaab, yáanal u Reino le Mesíasoʼ, Jéeobaeʼ yaan u yeʼesik maʼalob bix u gobernar (Dan. 7:13, 14). Profeta Isaíaseʼ ku yaʼalik tu yoʼolal: «Tiʼ u chuun kaaj ku kʼaabaʼintik [Jeseoʼ], ku jóokʼol junpʼéel kʼuʼukʼ; junpʼéel kʼuʼukʼ ku tóopʼol tu moots. U [kiliʼich muukʼ] Yuumtsileʼ, tiʼ bíin yanak mantatsʼ tu yóokʼoleʼ, utiaʼal ka u tsʼáatiʼeʼ, naʼatil, sáasil tuukul, ojéelajil, [...] maʼalob tuukul, muukʼ, kʼaj óolal yéetel u sajbeʼentsil Yuumtsil» (Isa. 11:1, 2). U «kʼuʼukʼ» le «u chuun kaaj ku kʼaabaʼintik [Jeseoʼ]» Cristo. Baʼaleʼ ¿bix u yáantaʼal tumen le kiliʼich muukʼ utiaʼal ka páajchajak u gobernartik tuláakal máakoʼ? ¿Baʼax utsiloʼob ken u taas ken káajak u reinar, yéetel baʼax unaj k-beetik utiaʼal k-kʼamik?
Kaʼansaʼab tumen Dios utiaʼal u beet u reyil
4-6. ¿Baʼaxten Jesuseʼ jach maʼalob utiaʼal u beet u Reyil, u Nojoch j-Kʼiinil yéetel u Juezil?
4 Jéeobaeʼ u kʼáat u luʼs u kʼeeban le máaxoʼob ken u gobernartoʼ. Utiaʼal lelaʼ kʼaʼabéet u yáantaʼaloʼob tumen juntúul Rey, juntúul Nojoch j-Kʼiin yéetel juntúul Juez jach yaan u naʼat yéetel ku chʼaʼik óotsilil. Le oʼolal Dioseʼ tu yéeyaj Jesús utiaʼal u beet u reyil, yéetel meyajnajtiʼ u kiliʼich muukʼ utiaʼal u kaʼansik u beet tubeel. Koʼoneʼex ilik baʼax oʼolal Cristoeʼ jeʼel u páajtal u beetik le meyajoʼob tsʼaʼantiʼ tumen u Taataoʼ.
5 Chéen Jesús kʼaj óolmil Dios jach tubeel. Letiʼeʼ úuch yanak tu tséel, maʼ xaaneʼ u millonesil jaʼaboʼob, mix máak uláakʼ kuxlak beyoʼ. Ichil le bukaʼaj jaʼaboʼoboʼ Jesuseʼ jach tu kʼaj óoltaj u Taata, le oʼolal jach maʼalob u yaʼalaʼaltiʼ «u yoochel le Dios maʼ tu páajtal u yilaʼaloʼ» (Col. 1:15, NM). Tak letiʼeʼ tu yaʼalaj: «Le máax ku yilken teneʼ ku yilik le Taataoʼ» (Juan 14:9).
6 Ken tsʼoʼokok Jéeobaeʼ, chéen Jesús jach kʼaj óolmil tuláakal baʼax yaan, ichil lelaʼ tiʼ yaan wíinikiʼ. Colosailoʼob 1:16 yéetel 17 ku yaʼalik yoʼolal u Hijo Dios: «Tu yoʼolal letiʼeʼ Jajal Dioseʼ tu beetaj tuláakal baʼax yaan teʼ kaʼanoʼ yéetel teʼ luʼumoʼ, le baʼaloʼob maʼ tu yilaʼaloʼoboʼ bey xan le baʼaloʼob ku yilaʼaloʼoboʼ [...]. Cristoeʼ yaniliʼeʼ maʼiliʼ yanak tuláakal baʼaleʼ». Chéen máans ta tuukul, letiʼeʼ tu yáantaj Jéeoba utiaʼal u beetaʼal tuláakal baʼal. Le oʼolal jach u kʼaj óol bix beetaʼanil cada junpʼéel baʼal, tak le bix beetaʼanil u tsʼoʼomel máakoʼ. Le Bibliaoʼ ku yaʼalikeʼ letiʼ le ojéelajoʼ (Pro. 8:12, 22, 30, 31).
7, 8. ¿Bix áantaʼabik Jesús tumen le kiliʼich muukʼ le tiaʼan way Luʼumaʼ?
7 Jesuseʼ tsʼaʼab u yokjaʼ yéetel le kiliʼich muukʼoʼ. Letiʼeʼ tu yaʼalaj: «U [kiliʼich muukʼ] Yuumtsileʼ tiʼ yaan tin wóokʼoleʼ, tumen u junpáaykunsmajen utiaʼal in tsʼáa maʼalob péektsil tiʼ le óotsiloʼoboʼ, u túuxtmajen in tsʼáa toj óolal tiʼ le ku mukʼyaj u puksiʼikʼaloʼoboʼ, utiaʼal in kʼaʼayt jáalkʼabil tiʼ le kʼalaʼanoʼoboʼ, utiaʼal in tsʼáa u sáasil le chʼóopoʼoboʼ, utiaʼal in jáalkʼabt le loobiltaʼanoʼoboʼ, yéetel utiaʼal in [kʼaʼayt] u maʼalob kʼiinil Yuumtsil» (Luc. 4:18, 19). Maʼ xaaneʼ, le ka okjaʼanaj Jesusoʼ, kʼaʼajsaʼabtiʼ tumen le kiliʼich muukʼ le baʼaxoʼob tu kanaj le tiaʼan teʼ kaʼanoʼ, jeʼex le baʼax u kʼáat Dios ka u beet way Luʼum le ken u beet u Mesíasiloʼ (Isa. 42:1; xokaʼak Lucas 3:21, 22 yéetel Juan 12:50).
8 Jesuseʼ minaʼan kʼeban kaʼach tu wíinklil yéetel áantaʼab tumen le kiliʼich muukʼoʼ. Le oʼolal maʼ chéen kʼaj óoltaʼab bey juntúul máak jach maʼalobeʼ, baʼaxeʼ kʼaj óoltaʼab tumen jach maʼalob bix úuchik u kaʼansaj. Le Bibliaoʼ ku yaʼalikeʼ le máakoʼoboʼ ku jaʼakʼal «u yóoloʼob tu yoʼolal u kaʼansaj» (Mat. 7:28). Letiʼeʼ páajchaj u naʼatik wíinikeʼ ku muʼyaj yoʼolal le baʼaxoʼob kʼaastak ku beetkoʼ, yoʼolal le kʼebanoʼ yéetel tumen náach yanil tiʼ Dios. Tsʼoʼoleʼ páajchaj u yilik jach baʼax yaan tu puksiʼikʼal le máakoʼoboʼ, le oʼolal tu tratartoʼob jeʼex úuchik u yilik kʼaʼabéetoʼ (Mat. 9:4; Juan 1:47).
9. Ken tuukulnakoʼon tiʼ le baʼaxoʼob tu beetaj Cristooʼ, ¿baʼaxten k-aʼalik jach maʼalob utiaʼal u beet u Reyil?
9 Jesuseʼ kuxlaj bey wíinikeʼ. Uláakʼ baʼax áantik Jesús utiaʼal u reinar tubeeleʼ letiʼe úuchik u kuxtal bey juntúul wíinik ichil le kʼeban máakoʼoboʼ. Apóstol Pabloeʼ tu yaʼaleʼ unaj u pʼáatal kaʼach «jeʼel bix u sukuʼunoʼobeʼ, utiaʼal ka kʼuchuk u beet u nojoch j-kʼiinil chúukaʼan u yóol bey xan chuup yéetel chʼaʼa óotsilil tu táan Jajal Dios, utiaʼal u lukʼesik u kʼeban máakoʼob. Letiʼeʼ tumen mukʼyajnaj yéetel túuntaʼab u yóoleʼ, [bejlaʼeʼ] ku páajtal u yáantik xan le máaxoʼob ku túuntaʼal u yóoloʼoboʼ» (Heb. 2:17, 18). Jeʼex túun k-ilkoʼ, tumen «túuntaʼab u yóoleʼ» ku béeytal u chʼaʼik óotsilil tiʼ le máaxoʼob ku muʼyajoʼoboʼ. Le tiaʼan way Luʼumoʼ tu yeʼesaj jach ku chʼaʼik óotsil tiʼ u maasil. Tuláakal máak tu natsʼuba tu yiknal: le kʼojaʼanoʼoboʼ, le móochoʼoboʼ, le ku pechʼ óoltaʼaloʼoboʼ yéetel tak le mejen paalaloʼoboʼ (Mar. 5:22-24, 38-42; 10:14-16). Le máaxoʼob xan u kʼáat u kʼaj óoltoʼob u jaajiloʼ tu natsʼubaʼob tu yiknal. Baʼaleʼ maʼ kʼaʼam tumen le máaxoʼob pʼekmiloʼ mix tumen le j-kaʼanal ichiloʼoboʼ, tumen maʼ u yaabiltmoʼob Diosiʼ (Juan 5:40-42; 11:47-53).
10. ¿Bix úuchik u yeʼesik Jesús jach u yaabiltmoʼon?
10 Jesuseʼ tu tsʼáaj u kuxtal t-oʼolal. Maʼ xaaneʼ, le baʼax maas eʼesik jach maʼalob kun reinaroʼ letiʼe úuchik u yóotik u kʼub u kuxtal t-oʼolaloʼ (xokaʼak Salmo 40:6-10). Letiʼeʼ tu yaʼalaj: «U maas nojochil yaakunaj ku páajtal u yantal tiʼ juntúul máakeʼ letiʼ lelaʼ: u tsʼáaik u kuxtal tu yoʼolal u amigoʼob» (Juan 15:13). U gobiernoiloʼob le yóokʼol kaabaʼ ku chʼaʼikoʼob le baʼaxoʼob yaan tiʼ le máaxoʼob ku gobernartikoʼoboʼ, baʼaleʼ Jesuseʼ tu yóotaj tak u tsʼáa u kuxtal tu yoʼolal wíinik (Mat. 20:28).
Kaʼansaʼab tumen Dios utiaʼal u tsʼáaik u yutsil u kuxtal tu kʼuboʼ
11. ¿Baʼaxten jeʼel u páajtal k-kʼubik k-óol tiʼ Jesuseʼ?
11 U jaajileʼ jach maʼalob yéeyaʼabik Jesús u beet u Nojoch j-Kʼiinil utiaʼal u tsʼáaiktoʼon u yutsil u kuxtal tu kʼuboʼ. Le baʼaxoʼob tu beetaj le tiaʼan way Luʼumoʼ ku yeʼesik le baʼaxoʼob ken u beet ken reinarnak ichil le Mil Jaʼaboʼoboʼ, tuláakal lelaʼ jeʼel k-ilik wa ku chúukpajal k-óoleʼ. Cristoeʼ tu tsʼakaj kʼojaʼanoʼob, móochoʼob, tu kaʼa kuxkíintaj kimenoʼob, tu tséentaj yaʼabkach máakoʼob yéetel tu jetsʼaj kʼaʼamkach iikʼoʼob (Mat. 8:26; 14:14-21; Luc. 7:14, 15). Baʼaleʼ maʼ tu beetaj chéen utiaʼal u yeʼesik le páajtalil yantiʼoʼ, baʼaxeʼ yoʼolal u yaabilaj yéetel u chʼaʼa óotsilal. Ka kʼáataʼabtiʼ tumen juntúul máak yaan lepra tiʼ wa u kʼáat u tsʼakeʼ, tu yaʼalajtiʼ: «In kʼáat» (Mar. 1:40, 41). Ken reinarnak ichil le Mil Jaʼaboʼoboʼ láayliʼ bey ken u yeʼes u yutsil tiʼ tuláakal máakoʼ.
12. ¿Bix kun béeychajal le baʼax ku yaʼalik Isaías 11:9?
12 Junmúuchʼ yéetel le máaxoʼob kun gobernaroʼ, yaan u seguer u kaʼansik le máakoʼob jeʼex tu beetil óoliʼ dos mil jaʼabjeakiloʼ. Beyoʼ yaan u béeychajal le baʼax ku yaʼalik Isaías 11:9: «Jeʼel bix u chuʼupul le kʼáaʼnáab yéetel le jaʼoʼ, bey bíin chuʼupuk le múuchʼ kaajoʼob yéetel u kʼaj óolal Yuumtsil». Maʼ xaaneʼ ichil le baʼaloʼob ken u kaʼansoʼ táakaʼan le bix unaj u kanáantaʼal le Luʼum yéetel tuláakal le baʼaxoʼob kuxaʼan, jeʼex kaʼansaʼabik tiʼ Adán tu káajbaleʼ. Ken tsʼoʼokok le Mil Jaʼaboʼob kun gobernaroʼ, tsʼoʼok xan u béeychajal le baʼax u tukulmaj Dios, jeʼex u yaʼalik Génesis 1:28, yéetel tsʼoʼok u tsʼaʼabal tuláakal le utsiloʼob ku taasik u kuxtal Cristo tu kʼuboʼ.
Kaʼansaʼab tumen Dios utiaʼal u beetik u juezil
13. ¿Bix tu yeʼesil Jesús u yaabilmaj le justiciaoʼ?
13 Le Bibliaoʼ ku yaʼalik: «Jajal Dioseʼ tsʼoʼok u tsʼáaik Jesús jeʼel bix juntúul j-pʼis óol tu yóokʼol kuxaʼanoʼob yéetel kimenoʼob[eʼ]» (Hch. 10:42). Jach ku kiʼimaktal k-óol k-ojéeltik letiʼ yéeyaʼan utiaʼal u beet u juezil, tumen letiʼeʼ maʼ tu kʼaskúuntaʼal u tuukul, yéetel maʼatech u pʼatik le justiciaoʼ, bey ka u kʼax u nakʼ yéeteleʼ (Isa. 11:5). Tsʼoʼoleʼ tu yeʼesaj maʼatech u tsʼíiboltik baʼax maʼ utiaʼaliʼ, u pʼekmaj tuláakal baʼax kʼaas yéetel maʼ maʼalob úuchik u yilik maʼ u chʼaʼabal óotsilil tiʼ le máaxoʼob ku muʼyajoʼoboʼ (Mat. 23:1-8, 25-28; Mar. 3:5). Yéetel mix máak tuse, tumen «u yojel baʼax yaan tu puksiʼikʼal máak» (Juan 2:25).
14. ¿Bix u yeʼesik Jesús u yaabilmaj le justicia teʼ kʼiinoʼobaʼ, yéetel baʼax kʼáatchiʼiloʼob unaj k-beetik?
14 Jesuseʼ maʼ xuʼuluk u yaabiltik le justiciaoʼ, lelaʼ bey u yeʼesik le bix u nuʼuktik le kʼaʼaytaj yéetel le kaʼansaj ku beetaʼal tuláakal tuʼuxoʼ. Mix máak, mix junpʼéel gobierno, mix u kʼasaʼan angeloʼob Satanás jeʼel u páajtal u beetkoʼob u xuʼulul le meyaj jeʼex u tukulmil Diosoʼ. Le oʼolal k-ojel Dioseʼ yaan u yeʼesik justicia teʼ Armagedonoʼ (xokaʼak Isaías 11:4 yéetel Mateo 16:27). Maʼalob ka k-tukulte: «Ken in xíimbalt le máakoʼob teʼ kʼaʼaytajoʼ, ¿kin tuukul wa jeʼex Jesuseʼ? ¿Kin beetik wa tuláakal le ku páajtal utiaʼal in meyajtik Jéeobaoʼ?».
15. ¿Baʼax jeʼel u yáantkoʼon utiaʼal k-tsʼáaik k-óol k-meyajt Dioseʼ?
15 ¿Baʼax jeʼel u yáantkoʼon utiaʼal k-tsʼáaik k-óol teʼ kʼaʼaytajoʼ? Letiʼe u kʼaʼajaltoʼon le meyajoʼ utiaʼal Jéeoba. Tumen letiʼ aʼal ka beetaʼak, u tsʼaamaj u Hijo utiaʼal nuʼuktik yéetel ku tsʼáaiktoʼon u kiliʼich muukʼ utiaʼal k-beetik. ¿K-ilik wa bey junpʼéel baʼal jach jatsʼuts k-múul meyaj yéetel Dios bey xan yéetel le Rey ku nuʼuktik yéetel u kiliʼich muukʼoʼ? Chéen Jéeoba jeʼel u páajtal u péeksik maas tiʼ siete millones máakoʼob u kʼaʼaytoʼob le maʼalob péektsil ich 236 luʼumiloʼob, kex tu táan u maasil «maʼ xooknajaʼanoʼobiʼ bey xan chéen ichil meyajil máakoʼob u taaloʼob» (Hch. 4:13).
Unaj k-beetik tuláakal utiaʼal k-kʼamik le utsiloʼob ken u tsʼáa Cristooʼ
16. ¿Baʼax ku yaʼalik Génesis 22:18 jach yaan u béeychajal?
16 Jéeobaeʼ tu yaʼalaj tiʼ Abraham: «Tuláakal xan u múuchʼ kaajiloʼob yóokʼol kaabeʼ bíin kiʼtʼantaʼakoʼob tu [yoʼolal a chʼiʼibal, tumen] ta wuʼuyajtʼantajen» (Gén. 22:18). Le baʼax aʼalaʼab tiʼ Abraham tumen Diosoʼ ku yeʼesik tiʼ le máaxoʼob meyajtik jach tu jaajil yaan u kʼamkoʼob le bendicionoʼob ken u tsʼáa le Mesías, wa le Chʼiʼibaloʼ. Le oʼolal jach ku tsʼáaik u yóol u meyajtoʼob Dios.
17, 18. ¿Baʼax ku yaʼalik Jéeoba teʼ Deuteronomio 28:2, yéetel bix jeʼel k-ilik le baʼax ku yaʼalikoʼ?
17 Dioseʼ tu yaʼalaj tiʼ u kaajil Israel, u chʼiʼibal Abraham: «Tuláakal xan le kiʼtʼaanoʼob [ku yaʼalik le Leyaʼ] bíin lúubukoʼob ta wóokʼol tumen ta wuʼuyajtʼantaj Yuumtsil a [Dios]» (Deu. 28:2). Lelaʼ láayliʼ bey xan u yaʼalaʼal tiʼ le máaxoʼob meyajtik Dios teʼ kʼiinoʼobaʼ. Le oʼolal wa k-kʼáat k-kʼam le utsiloʼobaʼ, unaj u seguer k-uʼuyik u tʼaan Dios. Beyoʼ jeʼel k-ilik u béeytal le baʼax tu yaʼalaj Jéeobaaʼ: «Le kiʼtʼaanoʼobaʼ bíin lúubukoʼob ta wóokʼol». Baʼaleʼ, ¿bix jeʼel k-eʼesik k-uʼuyik u tʼaaneʼ?
18 U yuʼubaʼal u tʼaan Dioseʼ u kʼáat u yaʼal u chʼaʼabal en cuentail baʼax ku yaʼalik le Bibliaoʼ bey xan le kaʼansajoʼob ku keʼetel yéetel janal ku tsʼáaikoʼ (Mat. 24:45). Tsʼoʼoleʼ unaj k-uʼuyajtʼantik baʼax ku yaʼalik Dios bey xan u Hijo. Jesuseʼ tu yaʼalaj: «Maʼ tuláakal le máaxoʼob ku yaʼalikoʼobten: Yuumtsil, Yuumtsil, bíin oojkoʼob tu [reinoil] kaʼan[iʼ], baʼaleʼ chéen le máaxoʼob ku beetikoʼob [baʼax ku yaʼalik] in Taata yaan teʼ kaʼanoʼ» (Mat. 7:21). U yuʼubaʼal u tʼaan Dioseʼ u kʼáat xan u yaʼal u tsʼáaikuba máak yáanal u nuʼuktaj le ancianoʼob teʼ múuchʼuliloʼ, tumen letiʼobeʼ «siibaloʼob tiʼ máakoʼob» tsʼaʼanoʼob tumen Dios (Efe. 4:8).
19. ¿Baʼax unaj k-beetik utiaʼal k-kʼamik u bendición Dios?
19 Ichil le «siibaloʼob tiʼ máakoʼob» u tsʼaamaj Diosoʼ táakaʼan le sukuʼunoʼob ku meyajoʼob ichil le Cuerpo Gobernante nuʼuktik tuláakal le múuchʼuliloʼob yaan ichil u kaajal Diosoʼ (Hch. 15:2, 6). Maʼ unaj u tuʼubultoʼoneʼ, le bix k-tratartikoʼoboʼ yaan u chʼaʼabal en cuentail ken juzgartaʼakoʼon tu kʼiinil le nojoch yaayaj óolaloʼ (Mat. 25:34-40). Jeʼex túun k-ilkoʼ, utiaʼal k-kʼamik le bendicionoʼob ken u tsʼáa Diosoʼ, jach unaj k-múul meyaj yéetel le sukuʼunoʼob yéeyaʼanoʼob utiaʼal u binoʼob kaʼanoʼ.
20. 1) ¿Baʼax meyajil ku beetik le «siibaloʼob tiʼ máakoʼob[oʼ]»? 2) ¿Bix jeʼel k-eʼesik k-yaabiltmoʼobeʼ?
20 Ichil le «siibaloʼob tiʼ máakoʼob» u tsʼaamaj Diosoʼ táakaʼan xan le sukuʼunoʼob ku meyajoʼob ichil u Comiteil u najiloʼob Beteloʼ, le superintendente viajanteʼoboʼ yéetel le ancianoʼob teʼ múuchʼuliloʼoboʼ, tuláakloʼobeʼ letiʼe kiliʼich muukʼ yéeymiloʼoboʼ (Hch. 20:28). Le sukuʼunoʼobaʼ ku yilik u yáantkoʼob u maasil u tsʼáa u yóol u meyajtoʼob Dios «tak ken kʼuchukoʼon k-núupul tuláakaloʼon tiʼ [k-fe] yéetel tiʼ u kʼaj óolalil u Paal Jajal Dios. Beyoʼ k-béeytal [jeʼex] máakoʼob tsʼoʼok u chúukaʼan chʼíijiloʼob, keet yéetel u chúukaʼan kaʼanlil Cristo» (Efe. 4:13). U jaajileʼ, tuláakal le sukuʼunoʼobaʼ kʼebanoʼob xan. Baʼaleʼ ken k-chaʼa u nuʼuktikoʼonoʼobeʼ, k-kʼamik yaʼab bendicionoʼob (Heb. 13:7, 17).
21. ¿Baʼaxten jach unaj k-uʼuyik u tʼaan u Hijo Dios?
21 Maʼ kun xáantaleʼ Jesuseʼ yaan u xuʼulsik le kʼasaʼan yóokʼol kaabaʼ. Ken u beeteʼ yaan u pʼáatal k-kuxtal tu kʼab, tumen tiʼ letiʼ tsʼaʼan u páajtalil u nuʼuktik le «yaʼabkach máakoʼob» tu «sayabiloʼob u jaʼil kuxtal» (Apo. 7:9, 16, 17). Le oʼolal unaj k-tsʼáaikba yáanal u nuʼuktaj Cristo, le Rey ku nuʼuktaʼal tumen Jéeoba yéetel u kiliʼich muukʼoʼ.
¿Baʼax t-kanaj teʼ tekstoʼobaʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 17]
Jesuseʼ tu yeʼesaj jach ku chʼaʼik óotsilil le ka tu kaʼa kuxkíintaj u hija Jairooʼ
[U tsolajil le oochel teʼ táan juʼun 18]
Jesucristoeʼ táan u nuʼuktik le kʼaʼaytaj ku beetaʼal tuláakal yóokʼol kaaboʼ