Jéeobaeʼ ku yilik tuláakal baʼax k-beetik
Jéeobaeʼ ku yilik tuláakal baʼax k-beetik
«Yéetel u yichoʼob maʼalob pʼilaʼanileʼ [Jéeobaeʼ] ku maʼalob kanan ichtik le máakoʼoboʼ.» (SAL. 11:4, LSM.)
1. ¿Bix utúul máak maʼalob u lúubultoʼon?
¿BIX a wuʼuyikaba wa yaan máax ku kaxtik a wutsil, ku yáantkech yéetel ku tsolnuʼuktikech tumen u yaabilmech? (Sal. 141:5; Gal. 6:1.) ¿Máasaʼ jach maʼalob u lúubultoʼon utúul máak beyaʼ? Jéeoba yéetel Jesuseʼ beyoʼoboʼ. Letiʼobeʼ jach tu jaajil u yaabilmoʼonoʼob yéetel u kʼáatoʼob ka k-kʼam «le kuxtal minaʼan u xuuloʼ» (1 Tim. 6:19; Apo. 3:19).
2. ¿Bix u yeʼesik Jéeoba jach u yaabilmaj máaxoʼob meyajtik?
2 Utiaʼal u yeʼesik bukaʼaj u yaabilmoʼon Dioseʼ, le rey Davidoʼ tu yaʼalaj: «Yéetel u yichoʼob maʼalob pʼilaʼanileʼ [Jéeobaeʼ] ku maʼalob kanan ichtik le máakoʼoboʼ» (Sal. 11:4). Jeʼex k-ilkoʼ, Jéeobaeʼ maʼ chéen ku paktikoʼoniʼ, baʼaxeʼ ku maʼalob pʼilik u yich utiaʼal u yilik baʼax táan k-beetik. Davideʼ tu yaʼalaj xan: «Techeʼ a wojel tuláakal baʼaxoʼob kin tukultik; yéetel áakʼabeʼ taaljaʼanech a wil baʼax kin beetik; [...] baʼaleʼ maʼ ta wilaj kʼasaʼanil tiʼ in kuxtaliʼ» (Sal. 17:3). Lelaʼ ku yeʼesiktoʼoneʼ Davideʼ u yojel kaʼach táan u yilaʼal baʼax ku beetik, yéetel u yojel xan wa ku tuklik u beetik upʼéel baʼax maʼ maʼalobeʼ Jéeobaeʼ jach yaan u yaatal u yóol. Jeʼex Davideʼ, ¿jach wa ka creertik Jéeobaeʼ táan u yilik tuláakal baʼax ka beetik?
Jéeobaeʼ jach ku yilik baʼax yaan t-puksiʼikʼal
3. ¿Baʼaxoʼob eʼesik Jéeobaeʼ maʼ tu chʼíikil u yil le baʼaloʼob maʼ jach tubeel k-beetkoʼ?
3 Tumen jach u yaabilmoʼoneʼ Jéeobaeʼ ku yilik le baʼaxoʼob maʼalobtak yaan t-puksiʼikʼaloʼ (Sal. 19:14; 26:2). Le oʼolal maʼatech u chʼíikil u yil le baʼaloʼob maʼ jach tubeel k-beetkoʼ. Koʼox ilik baʼax úuch tiʼ Sara, u yatan Abraham. Utéenjeakil le ka tsikbalnaj yéetel utúul angeleʼ, Saraeʼ tuusnaji, baʼaleʼ le angeloʼ maʼ tu kʼeyiʼ tumen tu yilaj sajak yéetel suʼlakchaji (Gén. 18:12-15). Job xaneʼ kex «táan u sen aʼalik maʼ [kʼebanchajaʼan]» yéetel «chéen táan u jaʼatsʼal tumen [Dioseʼ]», Jéeobaeʼ tu tsʼáaj yaʼab utsiloʼob tiʼ, tumen u yojel jach beetaʼab u muʼyaj tumen Satanás le oʼolal tʼaanaj beyoʼ (Job 32:2; 42:12). Bey xan úuchik tiʼ le koʼolel kimen u yíicham kajaʼan kaʼach Sareptaoʼ. Kex kʼaas úuchik u tʼaan tu contra le profeta Elíasoʼ, Jéeobaeʼ maʼ pʼuʼujiʼ tumen u yojel jach yaachajaʼan u yóol úuchik u kíimil u hijooʼ (1 Rey. 17:8-24).
4, 5. ¿Bix tu yeʼesil chʼaʼa óotsilil Jéeoba tiʼ Abimelec?
4 Tumen Jéeoba ku páajtal u yilik jach baʼax yaan tu puksiʼikʼal máakeʼ ku chʼaʼik óotsilil tak tiʼ le máaxoʼob maʼatech u meyajtkoʼ. Koʼox ilik baʼax úuch tiʼ Abimelec, u reyil Gerar (Guerar), upʼéel u kaajil le filisteoʼoboʼ. Tumen maʼ u yojel kaʼach wa Sara u yatan Abrahameʼ, tu bisaj utiaʼal u tsʼoʼokol u beel tu yéetel. Baʼaleʼ táanil tiʼ u beetkeʼ, Jéeobaeʼ tu yaʼalajtiʼ ichil upʼéel wayakʼ: «Teneʼ jach in wojel techeʼ ta beetaj yéetel maʼalob tuukul. Le oʼolal maʼ tin chaʼaj a nupikaba yéeteliʼ utiaʼal maʼ a kʼebantal tin táan. Baʼaleʼ bejelaʼeʼ sut u yatan le máakoʼ, tumen letiʼeʼ juntúul [profeta] jeʼel u kʼáat óol ta woʼolal utiaʼal maʼ a kíimil» (Gén. 20:1-7).
5 U jaajileʼ wa Jéeoba u kʼáat kaʼacheʼ jeʼel u castigartik Abimelec, máax ku adorartik maʼ jaajil diosoʼobiʼ. Baʼaleʼ Dioseʼ tu tsʼáaj cuentaeʼ le reyoʼ maʼ u yojel wa tsʼokaʼan u beel Saraiʼ. Le oʼolaleʼ utiaʼal maʼ u kíimil le reyaʼ, Jéeobaeʼ tu yaʼalajtiʼ baʼax unaj u beetik. ¿Máasaʼ ku kiʼimaktal k-óol k-adorartik utúul Dios beyaʼ?
6. Jeʼex Jéeobaeʼ, ¿baʼax jatsʼuts modos tu yeʼesaj Jesús?
6 Jesuseʼ tu yeʼesaj xan le jatsʼuts modos yaan tiʼ Jéeobaoʼ. Le oʼolal maʼ chʼíik u yil le baʼaloʼob maʼ maʼalobtak tu beetaj u disipuloʼoboʼ yéetel tu perdonartoʼob (Mar. 10:35-45; 14:66-72; Luc. 22:31, 32; Juan 15:15). Lelaʼ bey tu yeʼesil le ka tu yaʼalaj baʼaxten túuxtaʼab way Luʼumeʼ: «Jajal Dioseʼ tu túuxtaj u Paal yóokʼol kaab maʼ utiaʼal u xotʼkʼiintiʼ, baʼaleʼ utiaʼal u [salvarte]» (Juan 3:17). U jaajileʼ tumen Jéeoba yéetel Jesús jach u yaabilmoʼoneʼ u kʼáatoʼob ka yanaktoʼon le kuxtal minaʼan u xuuloʼ (Job 14:15). Wa mantatsʼ k-kʼaʼajsik u yaabilmoʼon Jéeobaeʼ maʼ chéen yaan k-naʼatik baʼaxten ku yilik le baʼaxoʼob k-beetkoʼ, yaan xan k-naʼatik bix u paktikoʼon yéetel baʼax ku beetik utiaʼal u kanáantkoʼon (xokaʼak 1 Juan 4:8, 19).
Ku yilik baʼaxoʼob k-beetikutiaʼal ka u yáantoʼon
7. ¿Baʼaxten ku yilik Jéeoba le baʼaxoʼob k-beetkoʼ?
7 Maʼ unaj k-tuklik wa Jéeobaeʼ chéen táan u yilik baʼax hora ken kʼebanchajkoʼon utiaʼal u castigarkoʼoniʼ. U jaajileʼ, Satanaseʼ letiʼe máax chéen táan u páaʼtik ka kʼebanchajkoʼon utiaʼal u takik k-pool (Apo. 12:10). Letiʼeʼ ku yaʼalik maʼ maʼalob le baʼax ku beetik tak le máaxoʼob utsoʼoboʼ (Job 1:9-11; 2:4, 5). Baʼaleʼ Jéeobaeʼ maʼatech u beetik leloʼ. Le oʼolal le salmistaoʼ tu yaʼalaj: «Yuumtsil, Yuumtsil, wa ka tsʼáa a wich tiʼ le kʼasaʼaniloʼ, ¿máax jeʼel u pʼáatal waʼalakbal ta táaneʼ?» (Sal. 130:3). U jaajileʼ mix máak (Ecl. 7:20). Jéeobaeʼ maʼatech u chʼíikil u yil le baʼaxoʼob maʼ maʼalobtak k-beetkoʼ, baʼaxeʼ ku chʼaʼiktoʼon óotsilil, ku yaabilkoʼon yéetel ku kanáantkoʼon jeʼex u beetik utúul taatatsil yéetel u mejen paalaleʼ. Utiaʼal maʼ u yúuchultoʼon mix upʼéel loobeʼ ku yaʼaliktoʼon baʼaxoʼob jeʼel u beetik k-lúubul tiʼ kʼebaneʼ (Sal. 103:10-14; Mat. 26:41).
8. Jéeobaeʼ, ¿bix u tsolnuʼuktik yéetel u kaʼansik le máaxoʼob meyajtikoʼ?
8 Jéeobaeʼ ku yeʼesik u yaabilmoʼon ken u tsolnuʼuktoʼon yéetel le Bibliaoʼ bey xan yéetel le kaʼansajoʼob ku tsʼáaik «le palitsil chúukpajaʼan u yóol yéetel yaan u naʼat[oʼ]» (Mat. 24:45; Heb. 12:5, 6). Ku tsʼáaiktoʼon xan áantaj teʼ múuchʼulil yéetel le ancianoʼob ku keʼeteloʼob yéetel «siibaloʼob tiʼ máakoʼo[boʼ]» (Efe. 4:8). Tsʼoʼoleʼ ku yilik bix k-kʼamik le tsolnuʼukoʼob ku tsʼáaiktoʼonoʼ yéetel ku yilik bix jeʼel u maas áantkoʼoneʼ. Le oʼolal teʼ Salmo 32:8, Jéeobaeʼ ku yaʼalik: «In wichoʼobeʼ táan u [sen] paktikechoʼob. Bíin in tsʼáatech kaʼambesajiloʼob; bíin in tsʼáatech tsolxikinoʼob; bíin in weʼestech le bej unaj a bisikoʼ». ¿Máasaʼ jach maʼalob ka k-chʼenxikint mantatsʼ le tsolnuʼukoʼob ku tsʼáaiktoʼon Jéeobaoʼ? Utiaʼal k-beetkeʼ maʼ u xuʼulul k-eʼesik kabal óolal, mix u xuʼulul k-ilik bey utúul J-kaʼansaj yéetel Taatatsil jach u yaabilmoʼoneʼ (xokaʼak Mateo 18:4).
9. ¿Tiʼ baʼaxoʼob unaj k-kanáantik maʼ k-lúubul, yéetel baʼaxten?
9 Maʼ unaj k-chaʼik u kʼastal k-puksiʼikʼal tumen k-taasikba noj baʼaliliʼ, tumen minaʼantoʼon fe wa «tu yoʼolal tusaʼani[loʼon] tumen le kʼebanoʼ» (Heb. 3:13; Sant. 4:6). Le máax ku lúubul tiʼ le baʼaloʼobaʼ ku joʼopʼol u máansik tu tuukul baʼaloʼob kʼaastak. Tsʼoʼoleʼ, maʼ xaaneʼ maʼ tu yóotik u beet le baʼaxoʼob ku yaʼalik le Bibliaoʼ, wa maʼ taak u pʼatik le baʼaloʼob kʼaastak ku beetkoʼ ka tak náachchajak tiʼ Dios. ¿Máasaʼ jach yaj ka úuchuk tiʼ máak beyaʼ? (Pro. 1:22-31.) Koʼox ilik baʼax úuch tiʼ Caín, u yáax paal Adán yéetel Eva.
Jéeobaeʼ maʼ chéen ku yilikle baʼaxoʼob k-beetkoʼ
10. ¿Baʼaxten maʼ kʼaʼam u siibal Cainiʼ, yéetel baʼax tu beetaj?
10 Utéenjeakileʼ, Caín yéetel Abeleʼ tu bisoʼob upʼéel siibal tiʼ Jéeoba. Letiʼeʼ maʼ chéen tu yilaj le siibaloʼ, baʼaxeʼ tu yilaj baʼax péeks u beetoʼob, le beetkeʼ tu kʼamaj chéen u siibal Abel, tumen Caineʼ minaʼan u fe jeʼex le yaan kaʼach tiʼ u yíitsʼinoʼ (Gén. 4:4, 5; Heb. 11:4). Baʼaleʼ Caineʼ maʼ tu kʼexaj u tuukuliʼ, baʼaxeʼ jach tu pʼektaj Abel (Gén. 4:6).
11. ¿Bix tu yeʼesil Caín tsʼoʼok kaʼach u kʼastal u puksiʼikʼal, yéetel baʼax k-kanik tiʼ le baʼax úuchtiʼoʼ?
11 Jéeobaeʼ tu tsʼáaj cuenta maʼ maʼalob le baʼax ku beetik Cainoʼ. Le oʼolal yéetel yaabilaj tu yaʼalajtiʼ baʼax unaj u beetik utiaʼal maʼ u lúubul tiʼ baʼax kʼaas. Baʼaleʼ Caineʼ maʼ tu beetaj u cuentai le baʼax aʼalaʼabtiʼoʼ ka tu kíimsaj u yíitsʼin. Tumen tsʼoʼok u jach kʼastal u puksiʼikʼaleʼ, le ka kʼáataʼab tiʼ tumen Jéeoba: «¿Tuʼux yaan Abel a wíitsʼin?», letiʼeʼ tu kʼáatnúuktaj: «¿Teen wa u najmal in kanáantik?» (Gén. 4:7-9). ¿Máasaʼ jach séeb jeʼel u tuskoʼon k-puksiʼikʼal ka tak pʼáatak maʼ k-uʼuyik u tʼaan Jéeobaeʼ? (Jer. 17:9.) Utiaʼal maʼ u yúuchultoʼon jeʼex Caineʼ, tu séebaʼanil unaj k-lúuʼsik tiʼ k-tuukul le baʼaloʼob jeʼel u túulchʼintkoʼon k-beet baʼax kʼaaseʼ yéetel maʼ unaj k-chaʼik u yantaltoʼon kʼaakʼas tsʼíibolaloʼobiʼ (xokaʼak Santiago 1:14, 15). Tsʼoʼoleʼ wa ku tsʼaʼabaltoʼon tsolnuʼukoʼob yéetel le Bibliaoʼ unaj k-kʼamkoʼob yéetel kiʼimak óolal, tumen leloʼ upʼéel bix u yeʼesiktoʼon u yaabilaj Jéeoba.
Mix upʼéel kʼeban ku páajtal u taʼakaʼaltiʼ
12. ¿Baʼax ku beetik Jéeoba ken kʼebanchajak máak?
12 Yaan máakeʼ ku tuklikeʼ wa maʼ tu yojéeltaʼal le baʼax kʼaas tu beetoʼ maʼ kun beetbil mix baʼal tiʼ (Sal. 19:12). Baʼaleʼ, u jaajileʼ mix upʼéel kʼeban ku páajtal u taʼakaʼal, tumen «tuláakal jechkab yéetel jeʼekʼab tiʼ u yich le máax tiʼ unaj k-tsolik baʼax k-beetikoʼ» (Heb. 4:13). Jéeobaeʼ ku yilik jach baʼax yaan t-puksiʼikʼal yéetel ku juzgarkoʼon yéetel tojil ken kʼebanchajkoʼon. Wa k-arrepentireʼ Jéeobaeʼ ku perdonarkoʼon tumen letiʼeʼ «muun u puksiʼikʼal[,] ku chʼaʼa óotsilil, chúukaʼan yóol, nojoch u yaakunaj bey xan u jaajil». Baʼaleʼ «wa tu juunal k-óol táan k-kʼebanchajal» yéetel k-beetik tuláakal le ku páajtal utiaʼal maʼ u yojéeltaʼaleʼ, Dioseʼ «maʼ bíin u pʼat maʼ jaatsʼil le máax [kʼebanchajoʼ]» (Éxo. 34:6, 7; Heb. 10:26). Lelaʼ bey u yeʼesik le baʼax tu beetaj Jéeoba tiʼ Acán, Ananías yéetel Safira.
13. ¿Baʼax túulchʼint Acán utiaʼal ka kʼebanchajak?
13 Acaneʼ maʼ tu yóotaj u tsʼoʼokbes le baʼax tu yaʼalaj Diosoʼ, ka tu yokoltaj u jaats tiʼ le baʼaxoʼob chʼaʼab Jericooʼ yéetel tu chʼaʼatuklaj yéetel u familia u taʼakikoʼob tu pasel najiloʼob. Tu beetaj kex u yojel kaʼach upʼéel nojoch kʼeban tu táan Dios, tumen le ka ojéeltaʼab baʼax tu beeteʼ tu yaʼalaj: «Kʼebanchajen tu táan Yuumtsil» (Jos. 7:20). Jeʼex Caineʼ, u puksiʼikʼal Acaneʼ kʼaschaji. Le u tsʼíiboltik baʼax maʼ utiaʼaleʼ tu túulchʼintaj utiaʼal ka ookolnak yéetel ka tuusnak. Tumen le baʼax chʼaʼab Jericó utiaʼal tsʼaabil tiʼ Jéeobaoʼ, u jaajileʼ Dios tu yokoltaj, le oʼolal Acán yéetel u familiaeʼ kíimsaʼaboʼob (Jos. 7:25).
14, 15. ¿Baʼaxten castigartaʼab Ananías yéetel Safira, yéetel baʼax k-kanik tiʼ leloʼ?
14 Ananías yéetel Safira, u yatneʼ, tiʼ yanoʼob kaʼach tu múuchʼulil Jerusaleneʼ. Maʼ sen úuch tiʼ le Pentecostés tu jaʼabil 33 teʼ yáax siglooʼ le sukuʼunoʼoboʼ tu síijoʼob taakʼin utiaʼal u yáantaʼal le túumben disipuloʼob náach u taaloʼoboʼ. Ananías túun yéetel u yatneʼ tu konoʼob upʼéel solar, tsʼoʼoleʼ ka tu síijoʼob u jaats u tojol, baʼaleʼ letiʼobeʼ tu yaʼaloʼob tu síijoʼob tuláakal. Maʼ xaaneʼ u kʼáatoʼob pʼáatal utsil kaʼach tu táan le sukuʼunoʼoboʼ. Baʼaleʼ chéen tuusnajoʼob. Jéeobaeʼ tu tsʼáaj u yojéelt Pedro le baʼax tu beetoʼoboʼ. Ka tsʼoʼokeʼ Ananíaseʼ kíimi yéetel maʼ sáam tiʼ leloʼ kíim xan u yatan (Hch. 5:1-11).
15 Ananías yéetel Safiraeʼ u yóoliliʼob úuchik u kʼebanchajloʼob. Tu tukloʼob bix ken u tusiloʼob kaʼach le apostoloʼoboʼ. Yéetel u maas kʼaasileʼ tu yóotaj u tusoʼob Dios bey xan u «Kiliʼich [muukʼ]». Le baʼax tu beetaj Jéeobaoʼ tu yeʼesaj jach yaan u kanáantik le múuchʼulil tiʼ le máaxoʼob ku beetkoʼob baʼaloʼob kʼaastakoʼ, yéetel ku yeʼesiktoʼoneʼ «¡yaayaj baʼal u lúubul máak tu kʼab le kuxaʼan Jajal Diosoʼ!» (Heb. 10:31).
Mantatsʼ unaj k-beetik baʼax maʼalob
16. 1) ¿Baʼax ku beetik Satanás utiaʼal ka kʼebanchajkoʼon? 2) Teʼ tuʼux kajaʼanechoʼ, ¿baʼax ku meyaj tiʼ Satanás utiaʼal u táabsik le máakoʼoboʼ?
16 Satanaseʼ ku beetik tuláakal le ku páajtal utiaʼal ka kʼebanchajkoʼon yéetel ka náachchajkoʼon tiʼ Jéeoba (Apo. 12:12, 17). Utiaʼal u jóokʼol yéetel le baʼax u kʼáatoʼ, ku túulchʼintik le máakoʼob utiaʼal maʼ u yilkoʼob wa kʼaas le núupkʼebanoʼ yéetel le u beetaʼal looboʼ. Bejlaʼeʼ maʼ chéen tiʼ computadora jeʼel u chaʼantaʼal chaknuuliliʼ baʼaxeʼ tak tiʼ televisión wa tiʼ uláakʼ baʼaloʼob. Baʼaleʼ unaj k-kanáantik maʼ k-lúubul tiʼ u táabsajiloʼob le Kʼaasilbaʼaloʼ, baʼaxeʼ unaj k-beetik le baʼax tu yaʼalaj Davidaʼ: «In kʼáat kuxtal yéetel tojil. [...] Mix baʼal kʼaas ku bin yantal tiʼ in kuxtal tak ichil in jalaʼach naj» (Sal. 101:2).
17. 1) ¿Baʼaxten ku chíikbesik Jéeoba le máax tsʼoʼok u kʼebantaloʼ? 2) ¿Baʼax jach kʼaʼanan ka k-chʼaʼatukult k-beetik?
17 Bejlaʼeʼ Jéeobaeʼ maʼ tu yaʼalik tiʼ le ancianoʼob máax tsʼoʼok u kʼebanchajal jeʼex tu beetil úuchjeakileʼ. Baʼaleʼ láayliʼ ku yilik baʼax ku beetaʼaleʼ yéetel tu kʼiinileʼ ku chíikbesik máax tsʼoʼok u kʼebantal. Le oʼolal apóstol Pabloeʼ tu yaʼalaj: «U kʼeban tsʼeʼetsʼek máakoʼobeʼ ku yilaʼal jach tʼáalkab maʼiliʼ xiʼikoʼob utiaʼal ka pʼis óoltaʼakoʼobiʼ, baʼaleʼ tiʼ uláakʼoʼobeʼ maʼ tu yilaʼal pʼis u tsʼoʼokol u pʼis óoltaʼaloʼobeʼ» (1 Tim. 5:24). Tumen jach nojoch u yaabilajeʼ, Jéeobaeʼ ku chíikbesik máax tsʼoʼok u kʼebantal. Yoʼolal u yaabilaj tiʼ le múuchʼuliloʼ ku yilik maʼ u beetaʼal mix baʼal kʼaasiʼ. Tsʼoʼoleʼ ku chʼaʼik óotsilil xan tiʼ le máaxoʼob tsʼoʼok u kʼebantaloʼob yéetel ku arrepentiroʼoboʼ (Pro. 28:13). Le oʼolaleʼ, ¿máasaʼ jach kʼaʼanan ka k-beet tuláakal le ku páajtal utiaʼal k-meyajtik Dios yéetel u jaajil k-óol, bey xan k-kanáantikba tiʼ le baʼaxoʼob jeʼel u beetik k-lúubul tiʼ le kʼebaniloʼ?
Unaj k-meyajtik Jéeobayéetel tuláakal k-puksiʼikʼal
18. ¿Baʼax tu yaʼalaj David tiʼ u hijo ka u beete?
18 Le rey Davidoʼ tu yaʼalaj tiʼ Salomón, u hijo: «Táan óolt u [Dios] a taata, meyajt yéetel tuláakal a puksiʼikʼal yéetel jaaj óolal, tumen [Jéeobaeʼ] ku xakʼal ilik tuláakal tuukuloʼob yéetel tuláakal baʼaxoʼob ku yóoltaʼal beetbil» (1 Cró. 28:9). Davideʼ maʼ chéen tu yaʼalaj tiʼ u hijo yaan Diosiʼ, baʼaxeʼ tu yaʼalajtiʼ ka u yil le nojoch yaabilaj ku yeʼesik Jéeoba tiʼ le máaxoʼob meyajtikoʼ. ¿K-tuukul wa jeʼex Davidoʼ?
19, 20. Jeʼex u yaʼalik Salmo 19:7-11, ¿baʼax áant David utiaʼal ka u natsʼuba tiʼ Dios, yéetel bix jeʼel k-beetik jeʼex letiʼeʼ?
19 Jéeobaeʼ u yojleʼ le máaxoʼob uts u puksiʼikʼaloʼoboʼ yaan u natsʼkubaʼob tu yiknal yéetel yaan u kiʼimaktal u yóoloʼob yoʼolal le jatsʼuts modos yantiʼoʼ. Le oʼolal letiʼeʼ jach u kʼáat ka k-kʼaj óolte. Baʼaleʼ ¿bix jeʼel k-beetkeʼ? Letiʼe ken k-xok le Bibliaoʼ yéetel le ken k-il bukaʼaj utsiloʼob tsʼoʼok k-kʼamik tiʼ Diosoʼ (Pro. 10:22; Juan 14:9).
20 ¿Jach wa nojoch baʼal k-ilik k-xokik sáamsamal le Biblia yéetel k-payalchiʼ utiaʼal k-naʼatikoʼ? ¿K-ilik wa jach kʼaʼanan k-tsʼáaik ichil k-kuxtal le baʼax ku yaʼalikoʼ? (Xokaʼak Salmo 19:7-11.) Wa beyoʼ, jujumpʼíitil kun bin u maas muʼukʼaʼantal k-fe yéetel k-yaabilaj tiʼ Jéeoba. Letiʼ túuneʼ yaan u natsʼikuba t-iknal yéetel yaan u kanáantkoʼon (Isa. 42:6; Sant. 4:8). Jach beyoʼ, Jéeobaeʼ yaan u yeʼesiktoʼon u yaabilaj le ken u tsʼáatoʼon yaʼab utsiloʼob yéetel le ken u kanáantoʼon utiaʼal maʼ k-náachtaltiʼ, le táan k-bisik le u bejil le kuxtaloʼ (Sal. 91:1, 2; Mat. 7:13, 14).
¿Baʼax jeʼel k-núukikeʼ?
• ¿Baʼaxten ku yilik Jéeoba le baʼaxoʼob k-beetkoʼ?
• ¿Baʼaxten yaan máakoʼob náachchajoʼob tiʼ Dios?
• ¿Bix jeʼel k-eʼesik Jéeobaeʼ jach tu jaajil ku yilik baʼax k-beetik?
• ¿Bix jeʼel u páajtal k-meyajtik Jéeoba mantatsʼ yéetel tuláakal k-puksiʼikʼaleʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 4]
Jeʼex utúul taatatsileʼ, ¿baʼaxten ku yilikJéeoba le baʼaxoʼob k-beetkoʼ?
[U tsolajil le oochel teʼ táan juʼun 5]
¿Baʼax k-kanik tiʼ le baʼax úuch tiʼ Ananíasoʼ?
[U tsolajil le oochel teʼ táan juʼun 6]
¿Baʼax ken u yáantoʼon utiaʼal maʼ u xuʼulul k-meyajtik Jéeoba yéetel tuláakal k-puksiʼikʼal?