Beet jeʼex Jesuseʼ yéetel adorart Dios jeʼex u kʼáateʼ

Dioseʼ ku yaʼalik tiʼ u máakiloʼob «tuláakal múuchʼkabil kaajoʼob, chʼiʼibaloʼob, jejeláas tʼaanoʼob yéetel jejeláas kaajoʼob» ka u adorartoʼob chéen letiʼ (Apo. 7:9, 10; 15:3, 4). Le máaxoʼob ku beetkoʼob le baʼax ku yaʼalaʼaltiʼobaʼ ku yilkoʼob u nojoch utsil Jéeoba (Sal. 27:4; 90:17). Jeʼex le salmistaoʼ, ku kʼaʼam aʼalikoʼob: «[Adorarnakoʼon] xolokbaloʼon; koneʼex xoltal tu táan [Jéeoba] le Yuumtsiloʼ, tumen letiʼ tu beetajoʼon» (Sal. 95:6).

Upʼéel adoración jach lúub utsil tiʼ Jéeoba

Jesús, u juntúuliliʼ Hijo Dioseʼ kʼuch u jach kʼaj óolt bix u tuukul u Taata, baʼax utstutʼaan yéetel baʼax u kʼáat ka beetaʼak. Jesuseʼ jach u yojel kaʼach bix u kʼáat Dios ka adorartaʼak. Le oʼolal tu yaʼalaj: «Teen le bejoʼ, teen le jaajoʼ yéetel teen le kuxtaloʼ. Chéen tin woʼolaleʼ ku páajtal u taal máak tiʼ le Taataoʼ» (Juan 1:14; 14:6).

Jesuseʼ tu yeʼesaj jach bix unaj u yantal kabal óolal tiʼ máak yéetel bix unaj u yuʼubaʼal u tʼaan Jéeoba, letiʼeʼ tu yaʼalaj: «Maʼ tin beetik mix baʼal chéen tu juunal in wóolal. Baʼaleʼ kin waʼalik chéen le baʼax tu kaʼansajten le Taataoʼ. [...] Teneʼ mantatsʼ kin beetik le baʼax utstutʼaanoʼ» (Juan 8:28, 29). ¿Baʼaxten Jesuseʼ lúub utsil tiʼ u Taata?

Yáaxeʼ, tumen jach tu kʼubaj u yóol u meyajt Dios, lelaʼ bey xan unaj u beetik le máaxoʼob jach tu jaajil u yaabilmoʼob Jéeobaoʼ. Tumen  jach u yaabilmaj u Taataeʼ, Jesuseʼ tu pʼataj yaʼab baʼaloʼob utiaʼal u tsʼoʼokbesik le baʼax utstutʼaan Diosoʼ (Fili. 2:7, 8). Jesuseʼ tu yileʼ, le u kʼaʼaytik mantatsʼ le maʼalob péektsiloʼ upʼéel baʼal jach kʼaʼanan ichil le adoración ku tsʼáaik tiʼ Jéeobaoʼ. Tumen jach kʼaʼaytajnajeʼ, tak le máaxoʼob maʼ u disipuloʼoboʼ tu yaʼaloʼobtiʼ J-kaʼambesaj (Mat. 22:23, 24; Juan 3:2). Tsʼoʼoleʼ tumen maʼ tu kʼububa u kaxt chéen ayikʼalileʼ béeychaj u xupkuba utiaʼal u yáantik u maasil. Yéetel kex tumen minaʼan kaʼach u súutukil utiaʼal u jeʼeleleʼ yéetel kiʼimak óolal tu yáantaj le máakoʼoboʼ (Mat. 14:13, 14; 20:28). Letiʼeʼ mantatsʼ tu jóoʼsaj u súutukil utiaʼal u payalchiʼ tiʼ u Taata kex tumen yaʼab baʼaxoʼob ku beetik kaʼachi (Luc. 6:12). Le oʼolal jeʼel u páajtal k-aʼalik jach lúub utsil tiʼ Jéeoba le adoración tu tsʼáaj Jesusoʼ.

Kex túuntaʼab u yóoleʼ tu yilaj u lúubul utsil tiʼ Dios

Tumen tu yilaj Jéeoba jach chúukpaj u yóol u Hijo u meyajteʼ, tu yaʼalaj jach kiʼimak u yóol tu yéetel (Mat. 17:5). Baʼaleʼ, Satanás xaneʼ tu yilaj bix u kʼubmil kaʼach u yóol Jesús, le oʼolal jach tu yilaj u túuntik u yóol. ¿Baʼaxten tu beetaj leloʼ? Teʼ kʼiinoʼob jeʼeloʼ mix máak páajchajak u beetik tuláakal baʼax jeʼex u kʼáat Dioseʼ mix u adorartik jeʼex utstutʼaaneʼ. Baʼaleʼ tumen chéen Jesús kun beetikeʼ, Satanaseʼ tu yilaj maʼ u béeykuntik kaʼachi (Apo. 4:11).

Satanaseʼ tu túuntaj u yóol Jesús utiaʼal ka xuʼuluk u chúukpajal u yóol u meyajt Dios. Le Bibliaoʼ ku yaʼalik bix úuchik: «Bisaʼab [...] tu yóokʼol jumpʼéel kaʼanal puʼuk ka [eʼesaʼabtiʼ] tuláakal u nukuch kaajiloʼob yóokʼol kaab, bey xan u ayikʼaliloʼob, ka aʼalaʼabtiʼ: Tiʼ teech bíin in tsʼáa tuláakal le baʼaloʼobaʼ wa ka xoltal a [adorarten]. Ka túun aʼalaʼabtiʼ tumen Jesús: Xeen, Satanás, tumen ku yaʼalik le Kiliʼich Tsʼíiboʼ: [Adorart] Yuumtsil a Jajal Dios, meyajt xan chéen letiʼ» (Mat. 4:8-10). Jeʼel baʼalak ka aʼalaʼak u tsʼaʼabaltiʼeʼ, Jesuseʼ u yojleʼ wa ku xoltal tu táan Satanaseʼ táan kaʼach u tsʼáaikuba tu contra Dios. Tsʼoʼoleʼ, Jesuseʼ u chʼaʼatukulmaj u adorartik chéen Jéeoba.

Bejlaʼeʼ, maʼ xaaneʼ Satanaseʼ maʼ tu yaʼalik u tsʼáaiktoʼon tuláakal u gobiernoiloʼob yóokʼol kaab wa ka k-adorarte. Baʼaleʼ, mantatsʼ ku túuntik k-óol utiaʼal ka xuʼuluk k-adorartik Dios (2 Cor. 4:4).

Cristoeʼ jach chúukpaj u yóol u meyajt Jéeoba tak ka kíimi. Beyoʼ tu nojbeʼenkúuntaj Jéeoba jeʼex mix utéen beetaʼak tumen wíinikeʼ. Toʼon xaneʼ k-ilik tsʼáaik táanil ichil k-kuxtal k-adorartik chéen Jéeoba jeʼex tu beetil Jesusoʼ. ¿Máasaʼ jach nojoch baʼal k-ilik k-bisikba maʼalob yéetel Dios?

Le utsiloʼob k-kʼamik ikil k-adorartik Dios jeʼex u kʼáatoʼ

«Le [adoración, NM] kiliʼich yéetel minaʼan u kʼasaʼanil» k-tsʼáaik tiʼ Diosoʼ ku taasik yaʼab utsiloʼob (Sant. 1:27). Bejlaʼeʼ jach yaʼab  máakoʼob tsʼuʼutoʼob, u yaabilmoʼob taakʼin, kaʼanal u yichoʼob yéetel ku pʼektikoʼob tuláakal baʼax maʼalob (2 Tim. 3:1-5). Baʼaleʼ, ichil u kaajal Dioseʼ k-bisikba yéetel máaxoʼob limpio u kuxtaloʼob, utstakoʼob yéetel ku yilik u adorarkoʼob Dios jeʼex u kʼáatoʼ. ¿Maʼ wa tu taasiktoʼon kiʼimak óolal leloʼ?

Wa k-ilik maʼ k-beetik le baʼaloʼob kʼaastak ku beetaʼal teʼ kʼasaʼan yóokʼol kaabaʼ yaan k-kuxtal ich jeetsʼelil. Lelaʼ ku béeychajal ken k-tsʼoʼokbes baʼax utstutʼaan Dios yéetel ken k-tsʼoʼokbes baʼax ku yaʼalik le gobiernoʼob wa maʼ tu bin tu contra baʼax ku yaʼalik le Bibliaoʼ (Mar. 12:17; Hch. 5:27-29).

Baʼaleʼ yaan uláakʼ utsiloʼob jeʼel k-kʼamik wa k-adorartik Dios yéetel u jaajil k-óoleʼ. Ken k-tsʼaatáant k-tsʼoʼokbesik baʼax u kʼáat Jéeobaeʼ, ku maas yantal u beelal k-kuxtal yéetel ku yantaltoʼon kiʼimak óolal ke ka k-beet chéen baʼax k-kʼáat. Maʼatech k-aʼalik, «jaankoʼon yéetel ukʼulnakoʼon tumen sáamal bíin kíimikoʼon», tumen k-ojel wa ku chúukpajal k-óoleʼ yaan k-kuxtal utiaʼal mantatsʼ tiʼ upʼéel paraíso way Luʼumeʼ (1 Cor. 15:32).

U libroi Apocalipsiseʼ ku yaʼalikeʼ, le máaxoʼob kun chúukpajal u yóol u adorartoʼob Jéeobaoʼ yaan u salvartaʼaloʼob tiʼ le «nojoch yaayaj óolaloʼ». Yéetel ku yaʼalik xaneʼ «le máax kulukbal teʼ jalaʼach kʼáancheʼoʼ letiʼ kanáantikoʼob tumen tiʼ yaan tu yéeteloʼobeʼ» (Apo. 7:13-15). Le máax kulukbal teʼ jalaʼach kʼáancheʼoʼ Jéeoba, le máax sen yaan páajtalil tiʼoʼ. ¡Chéen tukult bukaʼaj wal kun kiʼimaktal k-óol ken u kʼamoʼon yéetel ken u kanáantoʼon tiʼ jeʼel baʼalak loobileʼ! Tsʼoʼoleʼ, bejlaʼeʼ jejeláas xan bix u kanáantikoʼon.

U libroiʼ Apocalipsiseʼ ku yaʼalik xaneʼ le máaxoʼob adorartik Dios jeʼex u kʼáatoʼ yaan «u bi[saʼaloʼob ] tiʼ u sayabiloʼob u jaʼil kuxtal». Le jaʼaʼ letiʼe baʼaloʼob ku tsʼáaik Jéeoba utiaʼal ka yanaktoʼon kuxtal minaʼan u xuuloʼ. Ikil tu kʼubil u kuxtal Cristoeʼ, Dioseʼ yaan u «choʼik tuláakal u jaʼil u yich» le máakoʼobaʼ (Apo. 7:17). Yaan u luʼsaʼal le kʼebanoʼ yéetel leloʼ yaan u jach taasik kiʼimak óolal tiʼ le máaxoʼob kun kuxtaloʼob utiaʼal mantatsʼ way yóokʼol kaabeʼ. Bejlaʼeʼ, le máaxoʼob meyajtik Diosoʼ, tumen jach kiʼimak u yóoloʼobeʼ ku múul adorarkoʼob yéetel ku kʼaʼam aʼalikoʼob paʼteʼ yéetel le máaxoʼob meyajtik Jéeoba teʼ kaʼanoʼ: «Nojoch yéetel jakʼbeʼen tuláakal baʼax a beetmaj, [Jéeoba] tiʼ máax yaan tuláakal páajtalil; tojtak yéetel jaajtak a beeloʼob, u [Reyil] múuchʼ kaajoʼob. ¿Máax maʼ bíin u chʼaʼatech sajakilil, Yuumtsil? ¿Máax maʼ bíin u nojbeʼenkúunt a kʼaabaʼiʼ? Tumen chéen teech kiliʼichech; bíin taalak u [adorartech] tuláakal múuchʼ kaajoʼob, tumen tsʼoʼok u yilaʼal jach toj tuláakal baʼax ka beetik» (Apo. 15:3, 4).

[U tsolajil le oochel teʼ táan juʼun 27]

¿Baʼax ku yaʼalik Satanás u tsʼáaiktoʼon utiaʼal ka xuʼuluk k-adorartik Dios?