¿BAʼAX u kʼáat u yaʼal u creertkuba máak? ¿A wojel wa?... Máans ta tuukul lelaʼ. ¿Tsʼoʼok wa a tuklik a beetik junpʼéel baʼal kex maʼ a jach ojel a beetiʼ? ¿Maʼ xaaneʼ a kóochaʼtik u balonil fútbol wa a natʼik bicicleta? ¿Pʼaʼastaʼabech wa tumen wa máax yéetel tu yaʼalaj: «Teneʼ maas in wojel tiʼ teech»?... Wa beyoʼ táan u creertkuba.

² ¿Bix a wuʼuyikaba ken beetaʼak bey tumen wa máaxoʼ? ¿Uts ta tʼaan wa?... Chéen a tuklikeʼ, ¿bix túun u yuʼubikuba wa teech ka creertkaba?... ¿Maʼalob wa ka k-aʼaltiʼ wa máax: «Teneʼ maas in wojel tiʼ teech»?... ¿Bix u yilik Jéeoba le máaxoʼob aʼalik baʼaloʼob beyoʼ?...

³ Jesús, le Maʼalob j-Kaʼansajoʼ, tu kʼaj óoltaj máaxoʼob jach ku creertkubaʼob tiʼ u maasil. Ku creertkubaʼob yoʼolal le baʼaxoʼob ku beetkoʼoboʼ yéetel ku taaskoʼob mix baʼalil u maasil. Le oʼolal juntéenjeakileʼ Jesuseʼ tu tsikbaltaj junpʼéel baʼax eʼesik maʼ maʼalob u creertkuba máakiʼ. Koʼox ilik le baʼax tu yaʼaloʼ.

⁴ Letiʼeʼ tʼaanaj tiʼ juntúul fariseo yéetel tiʼ juntúul máax ku cobrartik impuestoʼob. Le fariseoʼob kaʼansik le leyoʼ u suukileʼ ku tuklikoʼob maas maʼalob baʼax ku beetkoʼob tiʼ u maasil. Le fariseo tu chʼaʼchiʼitaj Jesusoʼ bin teʼ templo yaan Jerusalén oraroʼ.

⁵ Jesuseʼ tu yaʼaleʼ juntúul máax ku cobrartik impuestoʼobeʼ bin xan teʼ templo oraroʼ. U maas yaʼabil le máakoʼoboʼ u pʼekmoʼob le máaxoʼob ku cobrar impuestoʼoboʼ, tumen ku tuklikoʼobeʼ ku yoklaʼaloʼob. U jaajileʼ yaʼab tiʼ letiʼobeʼ ku yookoloʼob xan kaʼachi.

 ⁶ Ka kʼuch le fariseo teʼ templooʼ joʼopʼ u orar táan u yaʼalik: ‹In Dios, kin tsʼáaiktech gracias tumen maʼ beyen jeʼex le uláakʼ máakoʼob ku yookoloʼoboʼ, le maʼ toj u kuxtaloʼoboʼ, le ku lúubloʼob tiʼ adulteriooʼ, mix tak jeʼex le j-kʼam impuestoaʼ. Kin ayunar kaʼatéen tiʼ junpʼéel semana yéetel kin tsʼáaik u diezmoil tuláakal le baʼaxoʼob ku yantaltenoʼ›. Le fariseooʼ ku taaskuba maas maʼalobil tiʼ u maasil, ¿máasaʼ?... Tsʼoʼoleʼ tu yaʼalaj tiʼ Dios.

⁷ Baʼaleʼ le máax ku cobrar impuestoʼoboʼ maʼ bey u tuukuliʼ. Mix tu líiʼsaj u yich kaʼan ka orarnajiʼ. Waʼalaj náach yéetel u chinmaj u pool. Jach arrepentirnajaʼan yoʼolal u kʼebanoʼob yéetel táan u loxik u tseem utiaʼal u yeʼesik jach yaachajaʼan u yóol. Maʼ tu yaʼalaj tiʼ Dios wa jach utsiʼ. Baʼaxeʼ tu yaʼalaj: «In Dios, chʼaʼten óotsilil, tumen j-kʼeban máaken».

⁸ ¿Máakalmáak tiʼ le kaʼatúul máakoʼob lúub utsil tiʼ Diosoʼ? ¿Letiʼ wa le fariseo ku taaskuba jach utsiloʼ? ¿Wa letiʼe máax cobrartik impuestoʼob arrepentirnajaʼanoʼ?...

⁹ Jesuseʼ tu yaʼaleʼ letiʼe máax cobrartik impuestoʼob lúub utsil tiʼ Diosoʼ. ¿Baʼaxten? Jesuseʼ tu yaʼaleʼ le máax ku nojbaʼalkúuntkubaeʼ yaan u paʼajal u suʼtal, baʼaleʼ le máax kabal u yóoleʼ yaan u nojbaʼalkúuntaʼal (Lucas 18:9-14).

¹⁰ ¿Baʼax tu kaʼansaj Jesús yéetel lelaʼ?... Tu yeʼeseʼ maʼ maʼalob ka k-creert  maas maʼaloboʼon tiʼ u maasiliʼ. Maʼ xaaneʼ maʼatech k-aʼalik, baʼaleʼ k-eʼesik yéetel le baʼaxoʼob k-beetkoʼ. Techeʼ, ¿yaan kʼiin wa ka wuʼuyikaba beyoʼ?... Tuukulnen tiʼ le baʼax úuch tiʼ apóstol Pedrooʼ.

¹¹ Ka aʼalaʼab tumen Jesús yaan u pʼaʼatal tumen tuláakal u apostoloʼob le ken maʼachakeʼ, Pedroeʼ tu yaʼalaj: ‹Kex tuláakal ka u pʼatecheʼ, ¡teneʼ mix bikʼin ken in pʼatech!›. Baʼaleʼ maʼ u yojel baʼax tu yaʼaliʼ. Letiʼeʼ jach ku yuʼubik kaʼach jeʼel u beetik le baʼax tu yaʼaloʼ. Ka tsʼoʼokeʼ tu pʼataj Jesús. Baʼaleʼ kaʼa suunaj jeʼex ken k-il teʼ xookil 30 tiʼ le libroaʼ (Mateo 26:31-33).

¹² Tuukulnakoʼon tiʼ lelaʼ. Maʼ xaaneʼ tiʼ teech yéetel tiʼ a wéet xookeʼ ku beetaʼalteʼex kʼáatchiʼob teʼ escuelaoʼ. ¿Baʼax jeʼel u yúuchul wa ka núukik le kʼáatchiʼ táanil tiʼ u núukaʼal tumen a wéet xookoʼ? U jaajileʼ wa a wojel u núukil le kʼáatchiʼoboʼ yaan u kiʼimaktal a wóol. Baʼaleʼ ¿maʼalob wa ka a creert maas yaʼab baʼal a wojel tiʼ a wéet xookoʼ?... ¿Maʼalob wa ka a paj u suʼtal tumen maʼ tu séeb núukaj le kʼáatchiʼoboʼ?...

¹³ Lelaʼ letiʼe baʼax tu beetaj le fariseooʼ. Tu yeʼesaj bey maas maʼalob yanil tiʼ le máax cobrartik le impuestoʼoboʼ. Baʼaleʼ Jesuseʼ tu yaʼaleʼ maʼ maʼalob baʼax tu beetiʼ. Kex maas maʼalob k-beetik jujunpʼéel baʼaloʼobeʼ, maʼ u kʼáat u yaʼal wa maas maʼaloboʼon tiʼ letiʼobiʼ.

¹⁴ Le oʼolaleʼ, wa maas yaʼab baʼaloʼob k-ojel tiʼ u láakʼ máakeʼ, ¿maʼalob wa ka k-creertba?... Tukult lelaʼ: ¿toʼon wa beet k-tsʼoʼomel?... Maʼatech, Dios beete. Yéetel u maas yaʼabil le baʼaxoʼob k-ojloʼ tiʼ u maasil t-kanaj. Maʼ xaaneʼ tiʼ junpʼéel libro t-xokaj wa yaan máax kaʼanstoʼon. Kex yaan baʼax t-juunal k-kanikeʼ, ¿baʼax áantkoʼon k-kane?... Letiʼe tsʼoʼomel u tsʼaamajtoʼon Diosoʼ.

¹⁵ Ken a wil wa máax ku xachkuba u beet wa baʼaxeʼ, unaj a waʼaliktiʼ maʼalob bix u beetik. Aʼaltiʼ jatsʼuts a wilik le baʼax tu beetoʼ. Maʼ xaaneʼ jeʼel u páajtal a wáantik utiaʼal u beetik maas maʼalobeʼ.  ¿Maʼ wa uts ta tʼaan ka áantaʼakech xan beyoʼ?...

¹⁶ Yaan máakoʼobeʼ maas yaan u muukʼoʼob tiʼ u maasil. ¿Kux túun wa maas yaan a muukʼ tiʼ a sukuʼun wa tiʼ a kiik? ¿Maʼalob wa ka a creertaba tu yoʼolal?... Maʼatech. Tumen le baʼax beetik u yantal k-muukʼoʼ letiʼe baʼaxoʼob k-jaantikoʼ. ¿Máasaʼ Dios tsʼáaiktoʼon u sáasil le Kʼiinoʼ, ku beetik u kʼáaxal jaʼ yéetel ku tsʼáaik tuláakal baʼax kʼaʼabéet utiaʼal ka yanak baʼal k-jaante?... Le oʼolal wa yaan k-muukʼeʼ unaj k-tsʼáaik u graciasil tiʼ Dios (Baʼaxoʼob 14:16, 17).

¹⁷ ¿Máasaʼ mix máak uts tu tʼaan u yuʼubik baʼax ku yaʼalik le máaxoʼob ku creerkubaʼoboʼ?... Kʼaʼajaktoʼon baʼax tu yaʼalaj Jesús: «Jeʼex a kʼáateʼex ka beetaʼakteʼex tumen le máakoʼoboʼ, teʼex xaneʼ bey kʼaʼabéet a beetkeʼextiʼoboʼ». Wa k-beetik le baʼax tu yaʼalaʼ, maʼ ken k-beet jeʼex úuchik u beetik le fariseo ku creertkuba tsikbaltaʼab tumen Jesusoʼ (Lucas 6:31).

¹⁸ Juntéenjeakileʼ aʼalaʼab tiʼ Jesuseʼ uts. ¿Tu yaʼalaj wa Jesús: «Beyoʼ, jach utsen»?... Maʼatech, maʼ tu yaʼaliʼ. Baʼaxeʼ  tu yaʼalaj: «Mix máak uts, chéen Dios» (Marcos 10:18). Kex Jesús minaʼan u kʼebaneʼ, maʼ tu creertubaiʼ. Baʼaxeʼ tu tsʼáaj nojbeʼenil tiʼ Jéeoba, u Taata.

¹⁹ Baʼaleʼ ¿yaan wa baʼax oʼolal u creertkuba máak?... Yaan. Jeʼel u páajtal k-noj baʼalkúuntikba yoʼolal Jéeoba Dios, le Máax beetoʼonoʼ. Ken k-il bix jatsʼutsil u tʼúubul le Kʼiin wa uláakʼ baʼax beetaʼanoʼ, jeʼel u páajtal k-aʼalik tiʼ u maasileʼ: «Jéeoba, le Dios k-adorartik, beetoʼ». Mantatsʼ unaj k-tʼaan tiʼ le jatsʼuts baʼaxoʼob beetaʼaboʼob tumen Jéeobaoʼ bey xan tiʼ le baʼaxoʼob ken u beet maʼ kun xáantaloʼ.