Jesuseʼ tiaʼan tu kaajil Betaniaeʼ, tu laakʼin u puʼukil le Olivoʼoboʼ yéetel kex óoliʼ junpʼéel legua (maas tiʼ 3 kilómetros) tiʼ u kaajil Jerusalén (Juan 11:18). Ka kʼuch Jesuseʼ bin tu yotoch Marta yéetel María. Letiʼob yéetel Lázaro, u sukuʼunoʼobeʼ, ku biskubaʼob yéetel Jesús, le oʼolal tu kʼamoʼob yéetel kiʼimak óolal.

Jach uts tu tʼaanoʼob úuchik u bin le Mesías xíimbaltikoʼoboʼ. Martaeʼ u kʼáat ka u yuʼububa maʼalobil Jesús, ka joʼopʼ u beetik yaʼab baʼaloʼob utiaʼal u tsʼáaik baʼal u jaante. Baʼaleʼ le táan u meyaj Martaoʼ, María, u yíitsʼineʼ, kulaj yiknal Jesús u yuʼub u kaʼansaj. Ka taal Martaeʼ ka tu yaʼalaj tiʼ Jesús: «Yuumtsil, ¿baʼaxten techeʼ mix baʼal ka waʼalik kex in wíitsʼineʼ tsʼoʼok u pʼatken tin juunal in beet tuláakal le baʼaloʼobaʼ? Much aʼaltiʼ ka taalak u yáanten» (Lucas 10:40).

Jesuseʼ maʼ tu yaʼalaj wa maʼ maʼalob baʼax ku beetik Maríaiʼ, baʼaxeʼ tu yaʼalaj tiʼ Marta jach chiʼichnak u beet yaʼab baʼaloʼob utiaʼal jaantbil. Tu yaʼalajtiʼ: «Marta, Marta, jach chiʼichnakech yéetel jach chʼiikilech a beet yaʼab baʼaloʼob. U jaajileʼ maʼ yaʼab baʼaxoʼob kʼaʼabéetiʼ, maʼ xaaneʼ chéen junpʼéel. Baʼaleʼ Maríaeʼ tu yéeyaj u maas maʼalobil yéetel maʼ kun luʼsbil tiʼ letiʼ» (Lucas 10:41, 42). Le oʼolal Jesuseʼ tu yaʼaleʼ maʼ tsaaj u beetik Marta yaʼab baʼaloʼob jaantbiliʼ. Chéen junpʼéel janal maʼ yaʼab tiempo ku bisik unaj u beetkiʼ.

Le baʼax ku tuklik u beetik Martaoʼ maʼ kʼaasiʼ. Letiʼeʼ u kʼáat u kʼam tubeel u yuʼulab. Ikil u beetik yaʼab baʼaloʼob utiaʼal jaantbileʼ tu luʼsaj u tiempoil u yuʼubik u kaʼansaj u Hijo Dios. Jesuseʼ tu yaʼaleʼ le baʼax tu beetaj Maríaoʼ maas maʼalob, tumen yaan u jóoʼsik u yutsil mantatsʼ. Le baʼax tu beetoʼ jach yaʼab baʼax ku kaʼansiktoʼon bejlaʼeʼ.

Uláakʼ juntéeneʼ Jesuseʼ tu kaʼansaj uláakʼ junpʼéel baʼal jach kʼaʼanaʼan. Kʼáataʼabtiʼ tumen juntúul u disipulo: «Yuumtsil, kaʼansoʼon orar, jeʼex Juan tu kaʼansaj xan u disipuloʼobeʼ» (Lucas 11:1). Jesuseʼ tsʼoʼok u yáax kaʼanskoʼob kex junpʼéel jaʼab yéetel táanchumuk, le ka kaʼansajnaj teʼ puʼukeʼ (Mateo 6:9-13). Baʼaleʼ le disipulo kʼáattiʼaʼ minaʼan tu yiknal teʼ kʼiin jeʼeloʼ, le oʼolal tu kaʼa aʼalaj le baʼaxoʼob maas kʼaʼanaʼantakoʼ. Tsʼoʼoleʼ ka tu yaʼalaj junpʼéel kettʼaan utiaʼal u yeʼesik u kʼaʼabéetil u orar máak mantatsʼ.

Tu yaʼalaj: «Koʼox aʼalikeʼ juntúul tiʼ teʼexeʼ yaan juntúul u amigo, yéetel chúumuk áakʼabeʼ ku bin tu yiknal utiaʼal u yaʼaliktiʼ: ‹Amigo, tsʼáaten óoxpʼéel waaj in páaye, tumen táant u kʼuchul tin wiknal juntúul in amigo jokʼaʼan viajeeʼ yéetel mix baʼal yaanten utiaʼal in tsʼáatiʼ›. Le máak túunoʼ desde ich najeʼ ku yaʼaliktiʼ: ‹Xuʼuluk a molestarken. Tsʼoʼok in chʼotik le jooloʼ, yéetel in mejen paalaloʼobeʼ chilikbaloʼob tin wéetel teʼ camaoʼ; maʼ tu páajtal in líikʼil in tsʼáatech mix baʼal›. Kin waʼalikteʼex: Le máakoʼ kex maʼ u líikʼil u tsʼáa wa baʼax tiʼ tumen u amigoeʼ, u jaajileʼ tumen maʼ suʼlak u amigo yéetel tumen maʼ tu xuʼulul u sen kʼáatkeʼ, le máakoʼ yaan u líikʼil yéetel yaan u tsʼáaiktiʼ le bukaʼaj baʼaxoʼob kʼaʼabéettiʼoʼ» (Lucas 11:5-8).

Jesuseʼ maʼ táan u yaʼalik wa Jéeobaeʼ maʼ u kʼáat u yuʼub u oración máak, jeʼex beetaʼabik tumen u amigo le máakoʼ. Baʼaxeʼ táan u yaʼalikeʼ wa juntúul máak ku beetik baʼax ku sen kʼáatik u amigoeʼ, Jéeobaeʼ maas ku tsʼáaik baʼaxoʼob ku kʼáatik le máaxoʼob meyajtik yéetel chúukaʼan óolaloʼ. Jesuseʼ ku yaʼalik: «Kin waʼalikteʼex: Maʼ u xuʼulul a kʼáatkeʼex wa baʼax, tumen yaan u tsʼaʼabalteʼex; maʼ u xuʼulul a kaxaneʼex, tumen yaan a kaxtikeʼex; maʼ u xuʼulul a kʼoopeʼex, tumen yaan u jeʼebelteʼex joonaj. Tumen tuláakal máax ku kʼáatajeʼ ku tsʼaʼabaltiʼ, tuláakal máax ku kaxaneʼ ku kaxtik yéetel tuláakal máax ku kʼoopeʼ ku jeʼebel joonaj tiʼ» (Lucas 11:9, 10).

 Utiaʼal u maas tsʼáaik naʼatbil Jesús lelaʼ, tʼaanaj tiʼ baʼax ku beetik juntúul taatatsil u yaabiltmaj u paalal. Tu yaʼalaj: «¿Máax taatatsilil ichileʼex ku tsʼáaik juntúul kaan tiʼ u hijo ken u kʼáat juntúul kay? ¿Wa ku kʼáatik xan junpʼéel jeʼeʼ, jeʼel wa u tsʼáaik juntúul síinaʼan tiʼeʼ? Le oʼolaleʼ, wa teʼex kex kʼasaʼaneʼex a wojel a tsʼáaʼex maʼalob baʼaloʼob tiʼ a paalaleʼexeʼ, ¿kux túun le Taata yaan teʼ kaʼanoʼ?, ¿maʼ wa maas jeʼel u tsʼáaik kiliʼich muukʼ tiʼ le máaxoʼob kʼáatiktiʼoʼ?» (Lucas 11:11-13). Lelaʼ ku yeʼesikeʼ Jéeobaeʼ ku yuʼubik yéetel ku tsʼáaik le baʼaxoʼob k-kʼáatiktiʼoʼ.