LE MÁAK yaan táaniloʼ apóstol Pedro, le yanoʼob paachil tiʼoʼ u yéet máanoʼob. Baʼaleʼ, ¿baʼaxten ku xoltaj le máak tu táan Pedrooʼ? ¿Maʼalob wa baʼax ku beetik? ¿A wojel wa máaxiʼ?

U kʼaabaʼeʼ Cornelio. U nojchil u soldadoiloʼob Roma. Aʼalaʼab tiʼ Cornelio: Kex maʼ kʼaj óol Pedroeʼ aʼaltiʼ ka taalak ta wotoch. Koʼox ilik bix úuchik leloʼ.

U yáax j-tsaypachoʼob Jesuseʼ judíoʼob, baʼaleʼ Cornelioeʼ maʼ judíoiʼ. Baʼaleʼ jach u yaabilma Dios, ku payalchiʼ tiʼ yéetel jach ku yáantik le máakoʼoboʼ. Utéenjeakil táan u chíinil kʼiineʼ tu chíikbesuba utúul ángel tiʼ Cornelioeʼ, ka tiaʼalaj: Jach ka lúubul utsil tiʼ Dios, yaan u núukik a payalchiʼob. Túuxt chʼaʼabil utúul máak ku kʼaabaʼtik Pedro. Tu kaajil Jope, tu yotoch Simón le kajaʼan jáal kʼáaʼnáabeʼ.

Cornelioeʼ tu séebaʼanil tu beetaj le baʼax aʼalaʼabtiʼoʼ. Ku sáastal uláakʼ kʼiineʼ, Pedroeʼ naʼak tu yóokʼol u yotoch Simón. Teʼ túunoʼ Dioseʼ tu beetaj u yilik Pedro táan u yéemel upʼéel baʼal bey nojoch nookʼ teʼ kaʼanoʼ. Teʼ nookʼaʼ yaan u jejeláasil baʼalcheʼobiʼ. Le baʼalcheʼobaʼ jeʼex u yeʼesik u ley Dioseʼ maʼ uts u jaantaʼaloʼobiʼ, baʼaleʼ Pedroeʼ tu yuʼubaj upʼéel tʼaan táan u yaʼalik: Líikʼen, Pedro, kíims utiaʼal a jaantiʼiʼ.

Pedro túuneʼ tu núukaj: ¡Maʼatan! Mix juntéen in jaantmaj baʼax maʼ uts u jaantaʼaliʼiʼ. Baʼaleʼ le tʼaanoʼ tiaʼalaj: Maʼ waʼalik maʼ uts u jaantaʼal le baʼax kiaʼalik Dios uts u jaantaʼaloʼ. Lelaʼ óoxtéen aʼalaʼabiktiʼ. Le táan u máansik tu tuukul baʼax u kʼáat u yaʼal lelaʼ, ka kʼuch le máakoʼob túuxtaʼaboʼob tumen Cornelioeʼ.

Ka éem Pedroeʼ tiaʼalaj: Ten le máak ka kaxkeʼexoʼ. ¿Baʼax beet a taaleʼex? Ka tsʼoʼok u yaʼalik le máakoʼob utúul ángel aʼal ka xiʼik Pedro xíimbal tu yotoch Cornelioeʼ, Pedroeʼ tiaʼalaj jeʼel u bin yéeteloʼobeʼ. Ka sáaschaj tuláakʼ kʼiineʼ, Pedro yéetel uláakʼ judíoʼobeʼ binoʼob tu kaajil Cesarea u xíimbaltoʼob Cornelio.

Cornelioeʼ tsʼoʼok u muchʼik tu yotoch u láakʼtsiloʼob yéetel le máaxoʼob ku biskubaʼob yéeteloʼ. Ka kʼuch Pedro jeʼex a wilik teʼelaʼ, Cornelioeʼ xolaj tu táan. Baʼaleʼ Pedroeʼ tiaʼalajtiʼ: Waʼalen, tumen ten xaneʼ chéen máaken. Le Bibliaoʼ kiaʼalik maʼ maʼalob u xoltal máak u adorart u yéet máakiliʼ. Chéen Jéeoba unaj k-adorartik.

Pedro túuneʼ tiaʼalaj tiʼe máaxoʼob yanoʼoboʼ: Bejlaʼeʼ kin kʼuchul in naʼateʼ Dioseʼ ku kʼamik tuláakal le máaxoʼob yaabiltmailoʼ. Le táan túun u tʼaanoʼ, Dioseʼ tu túuxtaj u kiliʼich muukʼ yóokʼol le máakoʼoboʼ, letiʼob túuneʼ joʼopʼ u tʼaanoʼob ich jejeláas tʼaanoʼob. Lelaʼ tu beetaj u jaʼakʼal u yóol le j-kaambaloʼob judíoʼob taaljaʼanoʼob yéetel Pedrooʼ, tumen ku tuklikoʼob kaʼacheʼ chéen le judíoʼob ku kʼaʼamloʼob tumen Diosoʼ. Lelaʼ tu kaʼansajtiʼobeʼ, Dioseʼ u yaabilma tuláakal máak jeʼel bixak u chʼiʼibaleʼ. ¿Máasaʼ lelaʼ maʼ unaj u tuʼubultoʼoniʼ?