YAʼABACH máakoʼob jóokʼoʼob Babilonia utiaʼal ka xiʼikoʼob tu kaajil Jerusalén. Chéen baʼaleʼ ka kʼuchoʼobeʼ chéen jutul pakʼoʼob tu yiloʼobiʼ, mix máak kajaʼaniʼ. Le israelitaʼoboʼ jach yaʼab meyaj yaan u beetoʼobiʼ.

Upʼéel tiʼ le baʼaxoʼob tu yáax beetoʼob ka kʼuchoʼoboʼ letiʼe altaroʼ. Lelaʼ upʼéel kúuchil tuʼux ku kʼubkoʼob kíimsbil baʼalcheʼob tiʼ Jéeoba. Maʼ jach úuch u tsʼoʼoksoʼob le altaroʼ ka káaj u líiʼskoʼob xan le templooʼ. Baʼaleʼ, le máaxoʼob kajaʼanoʼob naatsʼ tiʼ Jerusalén pʼekmiloʼoboʼ, tu yóotoʼob u sajakkúunt le israelitaʼob utiaʼal ka u pʼatoʼob le meyajoʼ. Ka tsʼoʼokeʼ, le máakoʼob pʼekmiloʼoboʼ tu beetoʼob u tsʼaʼabal upʼéel ley tumen u reyil Persia tuʼux kiaʼalik ka xuʼulsaʼak le meyajoʼ.

Tsʼoʼok u máan diecisiete jaʼaboʼob jóokʼok le israelitaʼob tu kaajil Babiloniaoʼ. Dioseʼ tu túuxtaj Ageo yéetel Zacarías, u profetaʼob, utiaʼal ku yaʼaloʼob tiʼe israelitaʼob ka u chʼaʼajoʼoltoʼob le meyaj tu kaʼatéenoʼ. Letiʼob túuneʼ tu kʼubaj yóoloʼob yaan u yáantaʼaloʼob tumen Dios, ka tu beetoʼob le baʼax aʼalaʼabtiʼoboʼ. Tu chʼaʼajoʼoltoʼob le meyajoʼ, kex yaan upʼéel ley aʼalik kaʼach maʼ u beetkoʼob.

Baʼaleʼ Tatnai, utúul u jalaʼachil Persiaeʼ, tu kʼáatajtiʼob máax aʼaltiʼob ka u jel líiʼsoʼob le templooʼ. Le israelitaʼob túunoʼ tiaʼaloʼobtiʼ baʼax u yaʼalmaj rey Ciro le tiaʼanoʼob kaʼach Babiloniaoʼ: Xeeneʼex Jerusalén utiaʼal ka jel beeteʼex u templo a Dioseʼexiʼ.

Tatnai túuneʼ tu túuxtaj upʼéel tsʼíibil juʼun Babilonia utiaʼal u kʼáatik wa jach jaaj Ciro aʼalmij ka beetaʼak le meyajoʼ. Maʼ xáanchaj ka núukaʼab tumen u túumben reyil Persiaiʼ. Letiʼeʼ tiaʼaleʼ jaaj baʼax kiaʼalik le israelitaʼoboʼ. Tsʼoʼoleʼ tiaʼalaj xan: Chaʼex u beetaʼal le templo tumen le israelitaʼoboʼ. Yéetel áanteʼexoʼob. Bey túunoʼ, le templooʼ tsʼoʼoksaʼab ichil kampʼéel jaʼab, lelaʼ tu beetaj u jach kiʼimaktal u yóol le israelitaʼoboʼ.

Beooraaʼ tsʼoʼok óoliʼ cuarentai ocho jaʼaboʼob tsʼoʼoksaʼak le templooʼ. U kajnáaliloʼob Jerusaleneʼ jach óotsiloʼob, le noj kaaj yéetel le templooʼ tsʼoʼok u káajal u kʼastaloʼob. Esdras, utúul israelita kajaʼan Babiloniaeʼ, tu yojéeltaj kʼaʼabéet u yutskíintaʼal u templo Jéeoba. Le oʼolaleʼ, ¿a wojel wa baʼax tu beetaj?

Esdraseʼ bin u yil Artajerjes u reyil Persia, le rey jach utsaʼ tu síiaj yaʼab baʼaloʼob tiʼ Esdras utiaʼal u bis Jerusalén. Esdraseʼ tiaʼalaj tiʼe israelitaʼob kajaʼanoʼob Babiloniaoʼ ka áantaʼak u bis le baʼaloʼobaʼ, óoliʼ seis mil tiʼ letiʼobeʼ tiaʼalaj jeʼel u binoʼobeʼ. Yaʼab plata, oro yéetel uláakʼ jatsʼuts baʼaloʼob tu bisoʼob.

Esdraseʼ chiʼichnakchaji tumen yaʼab j-ookoloʼob yaan teʼ bejoʼ. Le máakoʼobaʼ jeʼel u kíimskoʼob le israelitaʼoboʼ ka u yokloʼob le baʼaxoʼob ku biskoʼoboʼ. Le beetkeʼ Esdraseʼ tu muchʼaj le israelitaʼob jeʼex a wilik teʼ dibujoaʼ. Ka túun payalchiʼinajoʼob tiʼ Jéeoba utiaʼal u kʼáatkoʼob ka kanáantaʼakoʼob yoʼolal u kʼuchloʼob yéetel uts tu kaajil Jerusalén.

Jéeoba túuneʼ tu kanáantoʼob. Ku tsʼoʼokol u máan kampʼéel mes káajak u binoʼobeʼ kʼuchoʼob yéetel uts tu kaajil Jerusalén. Lelaʼ, ku yeʼesikeʼ Jéeobaeʼ ku kanáantik le máaxoʼob ku kʼubik u yóoloʼob tiʼoʼ