KUXLAKOʼON JEʼEX CRISTOEʼ

Junpʼéel túumben baʼax kun ilbil teʼ muchʼtáambalil yáam semanaoʼ

PAX ICH

Desde enero tiʼ 2018, teʼ muchʼtáambal ku beetaʼal yáam semanaoʼ, yaan k-ilik jujunpʼéel notaʼob, fotoʼob yéetel videoʼob chʼaʼan tiʼ le Traducción del Nuevo Mundo de las Santas Escrituras (nwtsty) beetaʼan utiaʼal xakʼalxookoʼ. Lelaʼ tiaʼan teʼ sitio ich inglesoʼ. Kex minaʼan ichil k-idiomaeʼ yaan u yáantkoʼon k-maas líiʼsba utiaʼal le muchʼtáambaloʼ. Yaan xan u yáantkoʼon utiaʼal k-maas natsʼikba tiʼ Jéeoba, le Taatatsil jach u yaabiltmoʼonoʼ.

NOTAʼOB UTIAʼAL XAKʼALXOOK

Yaan u yeʼeskoʼob baʼaxoʼob suukaʼan wa tuʼux, baʼaxoʼob yaniʼ, yéetel baʼax u kʼáat u yaʼal le tʼaanoʼob ku chíikpajal teʼ Bibliaoʼ.

Mateo 12:20

Meecha ku butsʼilankil: Le lamparaʼob suuk u meyajoʼob kaʼach utiaʼal u sáasilkuntaʼal le najoʼoboʼ, mejen nuʼukuloʼob beetaʼan yéetel kʼat ku tóokikoʼob aceite de oliva. U meechail le lamparaoʼ ku tsʼuʼutsʼik le aceiteoʼ le oʼolal mantatsʼ tʼabaʼan. Le tʼaan ich griego ku suʼutul ‹meecha ku butsʼilankiloʼ› ku tsʼáaik naʼatbil táant u tuʼupul u kʼáakʼileʼ yéetel táan u butsʼilankil tumen láayliʼ chokoeʼ. Jeʼex u yaʼalik u profecíail Isaías 42:3, Jesuseʼ yaan u chʼaʼik óotsilil tiʼ le máaxoʼob kabal u yóoloʼob yéetel táan u muʼyajoʼoboʼ. Letiʼeʼ mix bikʼin ken u tup wa ken u luʼs le u tsʼook esperanza yaan tiʼ le máakoʼoboʼ.

Mateo 26:13

Tu jaajil kin waʼalikteʼex: Ich griegoeʼ le tʼaanaʼ bey u yaʼalaʼalaʼ: amén. Lelaʼ chʼaʼan xan tiʼ le tʼaan ich hebreo amenoʼ, u kʼáat u yaʼaleʼ, «ka béeyak» wa «beyoʼ». Jesuseʼ cada ken tʼaanak tiʼ junpʼéel profecía wa junpʼéel baʼax ku prometertikeʼ ku yaʼalik kaʼach le tʼaanaʼ, beyoʼ ku yeʼesik yaan u béeytal. Ichil le Bibliaoʼ chéen tiʼ Jesús meyajnaj le tʼaanaʼ. Tu Evangelioil Juaneʼ, tiʼ Jesuseʼ yaan tuʼuxoʼob meyajnaj kaʼatéen le tʼaanoʼ (amén amén), utiaʼal u maas eʼesik jach jaaj le baʼax ku yaʼalikoʼ.

FOTOʼOB YÉETEL VIDEOʼOB

Fotoʼob, dibujoʼob, videoʼob minaʼan u paaxil yéetel uláakʼ videoʼob ku yeʼeskoʼob jujunpʼéel baʼaloʼob ku yaʼalaʼal teʼ Bibliaoʼ.

Betfagué, u puʼukil le Olivoʼoboʼ yéetel Jerusalén

Le videoaʼ ku yeʼesik junpʼéel bej tuʼux jeʼel u kʼuchul máak Jerusalén desde tu lakʼinileʼ, u kʼáat u yaʼaleʼ desde tu kaajil et-Tur (Betfagué jeʼex kʼaj óolaʼanil úuchjeakiloʼ) tak u maas kaʼanlil u puʼukil le Olivoʼoboʼ. Betaniaeʼ tiaʼan tu lakʼinil Betfagueeʼ, le kaajaʼ tiaʼan tu tojil tuʼux ku naʼakal máak tu lakʼinil u puʼukil le Olivoʼoboʼ. Jesús yéetel u disipuloʼobeʼ suuk u máanoʼob jeʼelel Betania, bejlaʼeʼ le kaajaʼ kʼaj óolaʼan bey el-Ázariyeh (El Éizariya), le kʼaabaʼaʼ ich árabe yanik yéetel u kʼáat u yaʼal «tuʼux anchaj Lázaro». Lelaʼ ku yeʼesikeʼ Jesuseʼ uts tu tʼaan u pʼáatal kaʼach tu yotoch Marta, María yéetel Lázaro (Mt 21:17; Mr 11:11; Lu 21:37; Jn 11:1). Maʼ xaaneʼ ken lukʼuk Jesús Betania utiaʼal u binbal Jerusaleneʼ suuk u máan teʼ bej ku yeʼesaʼal teʼ videooʼ. Tu kʼiinil 9 tiʼ nisán teʼ año 33, Jesuseʼ tu kʼáatmáansaj u puʼukil le Olivo utiaʼal u yokol tu kaajil Jerusalén yóokʼol juntúul chan burro. Maʼ xaaneʼ Betfagué lukʼeʼ ka bin Jerusalén.

Betania tak Betfagué
Betfagué
U puʼukil le Olivoʼoboʼ
U táax luʼumil Cedrón
U kʼáaxil le Templooʼ

Clavo kʼáatmáansaʼan tu tuunkuy juntúul máak

Lelaʼ junpʼéel copia ku yeʼesik junxéetʼ u tuunkuy juntúul máak kʼáatmáansaʼan tumen junpʼéel clavo. Le clavooʼ 11,5 centimetros u chowakil tsʼoʼoleʼ de hierro. Le baakoʼ kaxtaʼab tu añoil 1968, le táan u páanaʼal baʼaxoʼob úuchbentak tu xamanil Jerusalenoʼ. Ku tuklaʼaleʼ le baakaʼ utiaʼal juntúul máak kíimsaʼab tumen le romanoʼob úuchjeakiloʼ. Maʼ xaaneʼ le clavoaʼ bey jeʼex le meyajnaj tiʼ le romanoʼob ka tu kíimsoʼob Jesusoʼ. Le baakaʼ kaxtaʼab tiʼ junpʼéel tuʼux suuk u tsʼaʼabal u baakel le kimenoʼoboʼ (osario). Lelaʼ ku yeʼesikeʼ le máaxoʼob ku chʼuykíintaʼaloʼoboʼ jeʼel u páajtal kaʼach u muʼukloʼobeʼ (Mt 27:35).

U JUʼUNIL XOOK