Tito 1:1-16
1 Teen Pabloeʼ u esclavoen Dios yéetel u apóstolen Jesucristo. In fejeʼ bey jeʼex le fe yaan tiʼ le máaxoʼob yéeyaʼanoʼob tumen Diosoʼ. Teneʼ in kʼaj óol tubeel le jaajoʼ yéetel kin weʼesik ikil in tsʼáaik in wóol in meyajt Dios.
2 Le baʼaloʼobaʼ ku chʼaʼik u muukʼoʼob tiʼ le kuxtal minaʼan u xuul+ u yaʼalmaj Dios u tsʼáaik desde úuchjeakiloʼ, tsʼoʼoleʼ letiʼeʼ maʼ tu páajtal u tuus.+
3 (Dioseʼ ka kʼuch u kʼiinileʼ tu tsʼáaj kʼaj óoltbil u tʼaan, lelaʼ letiʼe ka tu kʼubéentajten in tsikbalt le maʼalob baʼaloʼob ken u beetoʼ.+ Jach jeʼex u yaʼalmil Dios, le k-Salvadoroʼ, bey úuchikoʼ).
4 Le cartaaʼ a tiaʼal, Tito, tu yoʼolal le fe yaantoʼonoʼ techeʼ beyech in hijoeʼ. Teneʼ kin waʼaliktech:
Ka yanaktech le nojoch utsil yéetel le jeetsʼelil ku taal tiʼ Dios le Taataoʼ bey xan le ku taal tiʼ Cristo Jesús, le k-Salvadoroʼ.
5 Teneʼ tin pʼatech tu islail Creta utiaʼal ka a wutskíint le baʼaloʼob maʼ maʼalobtak ku beetaʼaloʼ yéetel utiaʼal ka a tsʼáa ancianoʼob tiʼ cada kaaj. Teneʼ tin waʼalajtech lelaʼ:
6 juntúul ancianoeʼ kʼaʼabéet minaʼan baʼax oʼolal u taʼakal u pool, chéen juntúul u yatan yaan, u paalaleʼ ku meyajtikoʼob Dios, ojéelaʼan maʼatech u beetkoʼob chéen jeʼel baʼalak u kʼáatoʼobeʼ yéetel maʼ tercoʼobiʼ.+
7 Le máax ku tsʼaʼabal u kanáant le múuchʼuliloʼ letiʼ kanáantik u ayikʼalil Dios, le oʼolaleʼ kʼaʼabéet minaʼan baʼax oʼolal u taʼakal u pool, maʼatech u chʼíikil u beet chéen baʼax u kʼáat,+ maʼ séeb u kʼuuxiliʼ,+ maʼ j-káaltal máakiʼ, maʼ kʼaas u pʼuʼujuliʼ* yéetel maʼ tu tsʼíiboltik taakʼin maʼ uts bix náajaltaʼaniliʼ.
8 Baʼaxeʼ ku utsul kʼamik u yuʼulaboʼob,+ ku yaabiltik baʼax uts, maʼalob u tuukul,+ toj u kuxtal, maʼatech u pʼatik u leyoʼob Dios,+ u yojel u controlartuba+
9 yéetel maʼatech u kʼéechel tiʼ baʼax ku yaʼalik u tʼaan Dios kéen kaʼansajnak.+ Le kéen u beet beyaʼ yaan u páajtal u líiʼsik u yóol u maasil yéetel le maʼalob kaʼansajoʼ+ yéetel yaan u páajtal u yaʼalik u nuʼuk+ tiʼ le máaxoʼob ku tʼaanoʼob tu contra le maʼalob kaʼansajoʼ.
10 Tumen yaʼab máakoʼobeʼ maʼatech u yuʼubikoʼob tʼaan, ku yaʼalikoʼob chéen kunel baʼaloʼob yéetel ku tuusoʼob, le jeʼeloʼobaʼ maases letiʼe máakoʼob ku yaʼalikoʼob kʼaʼabéet u circuncidarkuba* máakoʼ.+
11 Le máakoʼob beyaʼ unaj u maʼakal u chiʼob, tumen ikil u kaʼanskoʼob baʼaloʼob maʼ unajeʼ táan u kʼaskúuntikoʼob u tuukul tuláakal le máaxoʼob yanoʼob ichil le familiaʼoboʼ. Lelaʼ ku beetkoʼob utiaʼal u náajaltikoʼob taakʼin chéen beyoʼ.
12 Tak juntúul profeta u yéet kaajaloʼobeʼ tu yaʼalaj: «Le cretailoʼoboʼ mantatsʼ táan u tuusoʼob. Letiʼobeʼ beyoʼob tsʼíitsʼik baʼalcheʼob ku beetkoʼob loobeʼ, máakoʼob maʼakʼóoloʼob yéetel maʼatech u tsʼáaik u pʼiis u janaloʼob».
13 Le baʼax tu yaʼalaj le profetaoʼ jach jaaj. Le oʼolaleʼ seguernak a kʼeykoʼob utiaʼal ka yanaktiʼob junpʼéel fe muʼukʼaʼan
14 yéetel utiaʼal maʼ u chʼenxikintikoʼob le baʼaxoʼob chéen suukaʼan u tsikbaltaʼal ichil le judíoʼoboʼ yéetel utiaʼal maʼ u beetkoʼob le baʼax ku yaʼalik le máaxoʼob tsʼoʼok u náachtaloʼob tiʼ le jaajil kaʼansajoʼ.
15 Utiaʼal le máaxoʼob limpioʼob tu táan Diosoʼ tuláakal baʼal limpio.+ Chéen baʼaleʼ utiaʼal le máaxoʼob maʼ limpioʼob yéetel minaʼan u fejoʼoboʼ tuláakal baʼal maʼ maʼalob yaniliʼ, tumen maʼ limpio u tuukuloʼobiʼ mix u concienciaʼob.+
16 Letiʼobeʼ tu táan tuláakal máak ku yaʼalikoʼob u kʼaj óoloʼob Dios, chéen baʼaleʼ yéetel baʼax ku beetkoʼobeʼ ku yeʼeskoʼob maʼ beyiʼ.+ Letiʼobeʼ máakoʼob pʼektaʼanoʼob, maʼatech u yuʼubikoʼob tʼaan yéetel maʼ maʼaloboʼob utiaʼal u beetkoʼob mix junpʼéel maʼalob meyajiʼ.
