• Got e ke mel’eg. “Kug tay e pilung rog . . . mu gu pi’ urngin e nam ngom; ma re fayleng ney ni polo’ e bayi mil suwon ngom.”​—Psalm 2:6, 8.

• Be’ ni ke yib ko tabinaw rok David ni Pilung. “Ka ni gargeleg bochi tir ngodad! Ka ni pi’ bochi pagel ngodad! . . . Gelngin nib pilung e bay i ga’ i yan; gin ni bay i gagiyeg riy e yugu bay i par u fithik’ e gapas. Bay i gagiyeg ni ir e ke yan nga luwan David ni pilung.”​—Isaiah 9:6, 7.

• Kan gargeleg u Bethlehem. ‘Bethlehem . . . , gur e bay gu fek be’ rom nge mang ir e i gagiyeg . . . Girdi’ u gubin yang u fayleng e bay ra nanged feni sorok.’​—Mikah 5:2, 4.

• I togopuluw e girdi’ ngak min li’ nge yim’. “Dariy be’ ni adag ni nge changar ngak, da feked yathin ni gowa be’ nib m’ay fan. . . . Ni maad’ad ngak ni bochan e denen rodad, min toy ni bochan e kireb ni kad ngongliyed.”​—Isaiah 53:3, 5.

• Kan faseg ko yam’ min tolangnag. “Dabiyog ni ngam pageg nggu par u fithik’ e piin ni kar m’ad, ya dab mpag e en nib t’uf rom nge mel. . . . Ayuw ni ga be tay ngog e bay i pi’ e felfelan’ ngog ndariy n’umngin nap’an.”​—Psalm 16:10, 11.

Ka aram ko tabolngin keb i mada’ ko chiney, ma kemus ni yigoo taabe’ e ir e ke m’ug ni Ir e en th’abi fel’ ni nge Gagiyeg. Cha’nem e aram Jesus Kristus. Bin riyul’ riy e, yog reb e engel ngak Maria ni chitiningin Jesus ni gaar: “Got e bayi pilungnag; ni bod rogon David ni ir e ga’ rok, . . . ma gagiyeg ni nge tay e dariy n’umngin nap’an ma dabi math biid!”​—Luke 1:31-33.

De mang Jesus pilung u nap’an ni immoy u fayleng. Machane ra par u tharmiy ni ir e Pilung u Gil’ilungun Got me gagiyegnag e girdi’ nu fayleng. Mang fan ni Ir e en th’abi fel’ ni nge Gagiyeg? Am lemnag e pi n’en ni i rin’ Jesus u nap’an ni immoy u fayleng.

•   I ayuweg Jesus e girdi’. I ayuweg Jesus e pumoon nge ppin ni tabab ko piin kab fel’ yangarrad nge mada’ ko piin ke pilibthir, ndemtrug e gin kar bad riy ara liw ni yad bay riy. (Matthew 9:36; Mark 10:16) Nap’an ni wenig be’ nib moon nib daraw ni gaar: “Faanra mm’agan’um ngay ni ngam chuweg e daraw rog ma ga chuweg,” ma aram me runguy Jesus e re moon nem me golnag.​—Mark 1:40-42.

• Ke fil Jesus ngodad rogon ni ngad fel’gad u wan’ Got. I yog ni gaar: “Dabiyog ni ngam manged tapigpig rok Got ma ki gimed e tapigpig rok e salpiy.” Ki yog ni ngad ngongolgad ngak yugu boch e girdi’ ni bod rogon ni gad baadag ni ngan ngongol ngodad. Maku reb e, ki dag ni gathi kemus ni ma lemnag Got e pi n’en gad ma rin’, ya ku ma lemnag e pi n’en bay u lanin’dad nge gum’ircha’dad. Ere faanra ngad fel’gad u wan’ Got, ma thingar da gagiyegnaged e pi n’en bay u gum’ircha’dad. (Matthew 5:28; 6:24; 7:12) Ki tamilangnag ni faanra nge yag e bin riyul’ e felfelan’ ngodad, ma thingar da nanged e tin baadag Got ni ngad rin’ed ma gad rin’ e pi n’em.​—Luke 11:28.

• I fil Jesus ko girdi’ rogon ni ngan dag e t’ufeg. Thin nge ngongol rok Jesus e rib gel gelngin, ma i taw nga gum’irchaen e piin ur motoyilgad ngak. “Me gin fapi girdi’ ni aram urngirad nga rogon e machib ni ke tay; . . . Ya i machib ni bay gelngin e thin rok.” (Matthew 7:28, 29) I fil ngorad ni gaar: “Nge t’uf romed e pi toogor romed.” Ki yibilay boch u fithik’ e piin nra lied nge yim’ ni gaar: “Chitamag, mu n’ag fan u wun’um e n’en ni yad be rin’! Ya dar nanged e n’en ni yad be rin’.”​—Matthew 5:44; Luke 23:34.

Jesus e Ir e en th’abi fel’ ni nge Gagiyegnag e fayleng, ya ir be’ ni ma ayuweg e girdi’ mab gol. Machane mingiyal’ e ra tabab ko gagiyeg?