KENGGIN E RE KE BABYOR NEY | MANG FAN NI NGAN YUL’YUL’?
Rogon Nrayog ni nge Magawonnagem e Ngongol Ndariy e Yul’yul’ Riy
“Bay boch e magawon nib ga’ nrayog ni ngan pithig ni faanra dab ni yul’yul’.”—Samantha, South Africa.
Ba puluw e re thin ney u wan’um, fa? Gad gubin ni bay bayay ni kad mada’naged reb e magawon nib ga’ ni bod rogon Samantha. Machane, n’en ni gad ma rin’ u nap’an ni yira waliydad ni ngad uned nga boch e ngongol ndariy e yul’yul’ riy e ra dag ko mang e ba ga’ fan u wan’dad. Bod ni faanra thidad u wan’ e girdi’ e aram e n’en nib ga’ fan u wan’dad, mab mudugil ni gad ra lemnag ni kab ga’ fan ni ngad rin’ed boch ban’en ndariy e yul’yul’ riy ya nge yag ni par thidad nib fel’ u wan’ e girdi’. Machane, bin riyul’ riy e nap’an nra gagiyel e tin riyul’ ko tomur, ma rayog ni nge yib wenegan e re ngongol ney ngodad. Am lemnag e pi n’en ni baaray.
DABIYOG NI NGE PAGAN’UY NGAK BE’ NDE YUL’YUL’
Rayog ni nge fel’ e tha’ u thilin l’agruw ni’ ni faanra be pagan’row ngorow. Faanra be pagan’ l’agruw ni’ ngorow, ma rayog ni ngar parew ndariy ban’en ni be magafan’row ngay. Machane, dabiyog ni nga yigi sum e re n’ey nib tomgin. Faanra i rin’ e girdi’ boch ban’en u taabang, mu ur nonad ara ur ngongolgad ngorad u fithik’ e yul’yul’ ma aram e rayog ni nge gel e pagan’ u thilrad. Machane, nap’an ni yug ra dab ki yul’yul’ be’ ma aram e dabkiyog ni nge pagan’uy ngak. Ma ra dakir pagan’uy ngak be’ ma ke mo’maw’ ni ngkun pagan’uy ngak bayay.
Bay bayay ni ke bannagem be’ ni ga be lemnag ni ir reb e fager rom nib manigil, fa? Faanra bay, ma mang e mu lemnag u nap’an nim pirieg ni ke bannagem? Dabisiy nri kireban’um nib gel, mag lemnag ni ke darifannagem. Mab puluw ni ngam lem ni aray rogon. Ya ngongol ndariy e yul’yul’ riy e rayog ni nge kirebnag e def ko fager nib manigil.
NGONGOL NDARIY E YUL’YUL’ RIY E MA K’ARING E GIRDI’ NI NGE DAB KUR YUL’YUL’GAD
Bay reb e sensey u reb e skul nib tolang ni ka nog e University of California ngay ni ma fil murung’agen rogon ni ngan maruwel ko salpiy ni ka nog Robert Innes ngak ni gay murung’agen boch ban’en ni yima rin’ ni bay rogon ko re n’ey me pirieg ni “ngongol ndariy e yul’yul’ riy e rayog ni nge af rok be’ ngak be’.” Ere, rayog ni ngan taarebrogonnag e re ngongol ney nga ba mit e m’ar nib machreg ni be af, ya faanra um par ma ga be chag ngak be’ nde yul’yul’, mab mom nrayog ni nge “af” e re ngongol ney ngom.
Ere, uw rogon ni ngam siyeg e ngongol ndariy e yul’yul’ riy? Bible e aram e n’en nrayog ni nge ayuwegem. Chiney e ngad weliyed boch e pi kenggin e motochiyel u Bible nrayog ni nge ayuwegey.
