Got e ma motoyil ko meybil rok e girdi’ u gubin e nam. (Psalm 145:18, 19) Thin rok u Bible e be pi’ e athamgil ngodad ni ngad meybilgad ngak u murung’agen e pi n’en ni be magafan’dad ngay. (Filippi 4:6, 7) Machane, bay boch e meybil ni dabun Got. Ni bod e meybil ni ke mit ngodad ni yima sul u daken.​—Mu beeg e Matthew 6:7.

Maku ma fanenikay Jehovah e meybil rok e piin ni dubrad ni ngar folgad ko motochiyel rok. (Proverbs 28:9) Ni bod nnap’an piyu Israel, ma dabun Got ni nge motoyil ko meybil rok e piin ni yad ma thang e fan ko girdi’. Ere, ba tamilang ni bay boch ban’en ni thingar da rin’ed ya nge yag ni nge motoyil ko meybil rodad.​—Mu beeg e Isaiah 1:15.

Dabiyog ni ngad meybilgad ngak Got nfaanra dariy e michan’ rodad. (James 1:5, 6) Ma nge mich u wan’dad nriyul’ ni bay, ma ma lemnag rarogodad. Rayog ni ngad gelniged e michan’ rodad u daken e fol Bible ni gad ma tay, ya bochan ni def ko michan’ rodad e aram e tamilangan’ rodad u murung’agen e tin ni ke micheg Got ni bay ko Thin Rok.​—Mu beeg e Hebrews 11:1, 6.

Thingar da meybilgad u fithik’ e yul’yul’ nge sobut’an’. Mus ngak Jesus ni fak Got ni dag nib sobut’an’ u nap’an ni meybil. (Luke 22:41, 42) Thingar da beeged e Bible ya ngad gayed rogon ni ngad nanged e n’en nib m’agan’ ngay, ko bin ni nga dogned ngak e n’en ni nge rin’. Ma aram e rayog ni ngad meybilgad ngak Got nrogon nib m’agan’ ngay.​—Mu beeg e 1 John 5:14.