Thin nu Bible e be tamilangnag l’agruw i fan. Bin som’on e yugu aram rogon ni ke yoor ban’en ni ke yag ni nge ngongliy e girdi’ nib fel’, machane dan sunmiyrad ni ngar gagiyegniged yad. Bin l’agruw, e der yag ni nge lebguy e girdi’ e pi n’en ni yad ma lemnag ni ngar ngongliyed, ya bochan ni “girdi’ nu fayleng e ke suweyrad Faanem nib Kireb”, ni aram Satan ni Moonyan’. Aram fan ni pi n’en ni be rin’ e girdi’ e dabiyog ni nge yibnag e gapas nga fayleng.​—Mu beeg e Jeremiah 10:23; 1 John 5:19.

Fare lem nra be’ ma goo ir e be lemnag ir, ma ngari yag e n’en ni yibe nameg e ki mo’maw’nag rogon ni nge gapas e fayleng. Kemus nreb e am nrayog ni nge fil ngak e girdi’ rogon ni nge t’uf rorad e tin nib mat’aw, maku rayog ni nge ayuweg e girdi’ ni ngar t’ufeged yad e rayog ni nge yibnag e gapas nga fayleng.​—Mu beeg e Isaiah 32:17; 48:18, 22.

Ke micheg Got ni Gubin ma Rayog Rok nra sunumeg reb e am ni nge gagiyegnag e urngin e girdi’. Re am ney e ra yan nga lon e pi am ko girdi’. (Daniel 2:44) Fak Got, ni aram Jesus e ra gagiyeg ni ir e pilung ko gapas. Ma ir e ra chuweg e tin nib kireb ban’en u fayleng, maku ir e ra fil ngak e girdi’ rogon ni ngar pared ni yad ba gapas.​—Mu beeg e Isaiah 9:6, 7; 11:4, 9.

Ngiyal’ ney u ga’ngin yang u fayleng, ma bokum milyon e girdi’ e yad be fanay e Thin rok Got u Bible ni ngar filed ko girdi’ rogon ni ngar pared ni yad ba gapas ma yad ba taareb. Dabki n’uw nap’an ma ra riyul’ e re n’ey.​—Mu beeg e Isaiah 2:3, 4; 54:13.