Ke Chuw Boch Ban’en ni Yima Gafgow Riy!

FAANRA gaar be’ ngom, “Dabki n’uw nap’an me chuw e yoko’, nge durru’, nge ku boch ban’en ni ma buch ni yima gafgow riy,” ma mang e ga ra rin’? Dabisiy nra lungum, “Sana ga be lik’ay. Ya yoko’, nge durru’, nge ku boch ban’en ni ma buch ni yima gafgow riy e ka bogi ban’en ni ka ma buch.” Ma reb e sana ga ra gaar u wan’um, ‘Mini’ e be lemnag e cha’ney ni be bannag?’

Yugu aram rogon ni gowa dariy ba ngiyal’ nra m’ay e yoko’, nge durru’, nge ku boch ban’en ni ma buch ni yima gafgow riy, ma bay fan ni ngad athapeged ni nge thil e pi n’ey. Machane dabiyog ko girdi’ ni ngar rin’ed. Girdi’ e dabiyog ni ngar nanged rogon nge fan ni ma buch e pi n’ey, maku dabiyog ni ngar taleged ara ra thilyeged. Solomon ni Pilung ni yimanang ko gonop rok ma ma fal’eg i yaliy boch ban’en e yoloy ni gaar: “Dabi chugur ni ngam nang fan ko mang e be rin’ Got. Demtrug feni elmerin ni ga ra guy rogon ni ngam nang ma ri dab mu nang. Piin yad ba gonop e bay ra gaargad e yad manang, machane dar nanged.”​—Eklesiastes 8:17, BT.

Faanra dabiyog ko girdi’ ni ngar taleged e yoko’, nge durru’, nge ku boch ban’en ni ma buch ni yima gafgow riy, ma mini’ e rayog rok? Be yog e Bible ni En ni Ke Sunmiydad e ir e rayog ni nge rin’ e re n’ey. Gubin ban’en ni bay u toobdad ni bay rogon nga rogon ni ma maruwel e ran nge yog ni sum e n’uw e gubin ni ir e ke fal’eg rogon ke tay. (Eklesiastes 1:7) Got e ba thil ko girdi’, ya dariy e gin nra mus gelngin riy, ma demtrug e ngiyal’ nrayog ni nge maruwel ngay. I micheg Jeremiah nriyul’ e re n’ey ni gaar: “Somol, Nth’abi Tolang, I gur e mu sunumiy e fayleng nge lan e lang nga gelngim nib gel; ya dariy ban’en nib mo’maw’ ngom.” (Jeremiah 32:17, BT) Bochan ni Got e ke sunmiy e fayleng nge gubin ban’en riy, mab mutrug ni manang rogon ni nge gagiyegnag gubin ban’en ya nge yog ni par e girdi’ u fithik’ e gapas nge pagan’.​—Psalm 3:11; 115:16.

Ere uw rogon nra thilyeg Got e pi n’en nib t’uf ni nge thilyeg? Boor ban’en nib kireb ni be buch u fayleng e ngiyal’ ney ni aram bang ko fare “pow” ni be dag ni gad be par u “tungun e re m’ag ney.” I gaar Jesus: “Ngiyal’ ni gimed ra guy e pi n’ey ni be m’ug, ma aram e ngam nanged ni gagiyeg rok Got e ke chugur ni nge taw.” (Matthew 24:3, NW; Luke 21:31) Gagiyeg rok Got ara Gil’ilungun nreb e am ni bay u tharmiy e ir e ra thilyeg boor ban’en u fayleng me gagiyegnag urngin ban’en. Yugu aram rogon ni bay gelngin Jehovah Got ni nge rin’ urngin e pi n’ey, machane ke dugliy Fak ni nge rin’ e re maruwel ney. I weliy Daniel ni profet murung’agen ni gaar: “Min pi’ mat’awun ko gagiyeg ni nge tay ma ngan tay fan, ma nge par ni ir e pilung, ya girdi’ u urngin e pi nam, nge pi racha’, nge pi thin e nguur folgad rok. Ma mat’awun ko gagiyeg ni nge tay e bay i par ndariy n’umngin nap’an, ma gagiyeg rok e dabi mus.”​—Daniel 7:14.

Kan pi’ gelngin Jesus Kristus ni Fak Got ni nge thilyeg urngin ban’en nib t’uf ni ngan thilyeg u fayleng nge par ni ke manigil. L’agruw biyu’ e duw kafram u nap’an ni immoy Jesus u fayleng  me dag nrayog ni nge gagiyegnag e yafang. Immoy bayay u nap’an ni yad bay pi gachalpen u lan reb e bowoch ko fare lipath nu Galile, me “yib e nifeng nrib gel ngorad ma be t’ar e n’ew nga lan e bowoch, nge chugur i sug e ran u lan e bowoch.” Kari rus pi gachalpen ma aram mar ninged e ayuw ngak Jesus. Ere mang e rin’? Ke mus ni “non ko nifeng ni gaar, ‘Mmocha’!’ Me gaar ngak e n’ew, ‘Mu gapas!’ Me mocha’ e nifeng, me aw e cho’.” Kari gin pi gachalpen me lungurad rorad: “Mini’ e cha’ney? Ni mus ko nifeng nge n’ew ma be fol rok!”​—Mark 4:37-41.

Chiney e bay Jesus u tharmiy ma kan pi’ gelngin nge mat’awun. Ba milfan ngak maku rayog rok ni nge thilyeg e pi n’en nib t’uf ni nge thilyeg ya nge yog ni par e girdi’ u fayleng u fithik’ e gapas nge pagan’.

Machane, rogon ni kad guyed e yooren e magawon nge pi n’en ni yibe gafgow riy e ku girdi’ e yad be k’aring, ma be gel e kireb riy i yan ni bochan e ngongol ni fel’ ngak nge chogow. Mang e ra rin’ Gil’ilungun Got ngak e piin ni yad be rin’ e pi n’ey ma dubrad ni ngar thilgad? Be yog e Bible murung’agen Jesus nra yib u “tharmiy ni yad e pi engel rok nib yargel, nge nifiy ni be daramram, ni nge gechignag e piin nde t’uf rorad ni ngar nanged murung’agen Got nge piin ndarir folgad ko Thin nib Fel’ ni yib rok Got ni murung’agen e Somol rodad i Jesus.” Arrogon, ra “kirebnag e piin ni kar kirebniged e fayleng.”​—2 Thessalonika 1:7, 8; Revelation 11:18.

Tomuren e re n’ey, ma fare “Pilung ko pi pilung” ni aram Jesus Kristus e ra gagiyegnag urngin ban’en u fayleng. (Revelation 19:16) Ra guy rogon ni nge dabki gafgow e girdi’ u tan Gil’ilungun. Ma ra maruwel nga gelngin nge fal’eg e yafang nge manigil me sul nga rogon ya nge yog ni fel’ rogon e girdi’ riy. Angin e re n’ey e ra lebguy e n’en ni ke micheg Jehovah ngak e girdi’ rok kakrom ni gaar: “Bay u gu pag e n’uw nge yib ngomed ko ngiyal’ nib t’uf, ya ngi i tugul e woldug ko but’ mi i yib e ma k’uf ko gek’iy.” (Levitikus 26:4, BT) Rayog ni nge toy e girdi’ e naun ndab kur rusnaged nri kireb ko yoko’, ara durru’, ara ku boch ban’en ni yima gafgow riy, ya: “Bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.”​—Isaiah 65:21.

Mang e Thingar Mu Rin’?

Dariy e maruwar riy ntaareb rogom ngak boch e girdi’ ni yad baadag ni ngar pared u bang ndariy e yoko’ riy, nge durru’, nge ku boch ban’en ni yima gafgow riy. Machane, mang e thingar mu rin’ ma ga un e ngaram? Bochan ni “piin nde t’uf rorad ni ngar nanged murung’agen Got” nge “piin ndarir folgad ko Thin nib Fel’ ni yib rok Got” e dabiyog ni ngar uned ko par u reb e fayleng ndariy boch ban’en ni yima gafgow riy mab tamilang nra be’ ma thingari fil murung’agen Got me fol ko yaram rok ni fan ko re fayleng ney. Baadag Got ni ngad filed murung’agen ma gad fol ko fare thin nib fel’ u murung’agen Gil’ilungun ni ke ngongliy u daken Fak.

Bin th’abi fel’ e kanawo’ ni ngad rin’ed e re n’ey riy e aram e ngad filed e Bible nib fel’ rogon ya bay riy e pi n’en nib t’uf ni ngad rin’ed ya nge yog nda pared u bang ni bay e pagan’ riy u tan e gagiyeg ko fare Gil’ilungun. Ere mang ndab mog ngak e Pi Mich Rok Jehovah ni ngar ayuweged gur ngam nang e n’en ni be fil e Bible? Ya aram fan ni yad bay. Machane, reb e ban’en nrayog ni nge pagan’um ngay, e aram e rayog ni nge buch rom e n’en ni bay ko Proverbs 1:33 ni gaar: “En nra i rung’ag e tin ni gu be yog e dabi buch ban’en rok. Ra i par nib pagan’ ndariy rogon ni nge rus.”