Acinangolo ŵetu ŵandanda, Adamu ni Hawa nganampikanila Mlungu, yayayikasisye ulemwa ni ciwa, nambo yeleyi nganiyicenga cakulinga ca Mlungu kwa ŵandu wosope. Kupitila m’Baibulo, Mlungu akusatusimicisyaga kuti cakulinga cakweci nganicicenga.

• “Ŵandu ŵambone tacipocela cilambo, ni tacitama mwelemo kwa yaka yosope.”—Salimo 37:29.

• “Ambuje tacicimasya ciwa mpaka ndaŵi jangali mbesi. Tacipukuta misosi m’meso mwa jwalijose.”—Yesaya 25:8.

• “M’magongo jwakumalisya kum’masya macili taciŵa ciwa.”—1 Akolinto 15:26.

• “Ngasipapagwa ciwa, canasa, kulila, kapena kupikana yipwetesi.”—Ciwunukuko 21:4.

Ana Mlungu cacimasya camtuli ciwa? Baibulo jikusati, “ŵandu ŵambone . . . tacitama mwelemo kwa yaka yosope.” Jikusasalasoni kuti “pacilambo capasi pangali mundu jwakusatenda yindu yambonepe ni ngalemwa.” (Jwakulalicila 7:20) Pakumasya ciwa, ana Mlungu cacikasa malamusi gakwe gambone? Yeleyi yili yangapikanika, ligongo “Mlungu . . . jwangalambusya.” (Tito 1:2) Nambi Mlungu cacitenda cici pakusaka kwanilisya cakulinga cakwe kwa ŵandu?

Yehofa Mlungu jwapelece mwanace jwakwe kuti ŵawombole ŵandu ku ciwa. Pacijonasice cindu, pakusasosekwa kulipila cinecakwe cakamulana ni mtengo wa cindu cacijonasiceco. Ligongo lyakuti ŵandu wosope ŵaliji ŵakulemwa soni ŵasosekwaga kuwa, Baibulo jikusati, ‘Pangali mundu jwakuliwombola msyene, kapena kumpa Mlungu mtengo wa umi wakwe, (ligongo kuwuwombola umi wa mundu kuli kwa mtengo mnope).’—Salimo 49:7, 8.

Naga mundu jwangali umlama akuwa, nikuti akusaŵa apocele yakuyicisya ya ulemwa wakwe, soni nganaŵa aliwombwele msyene kapena kuwombola yakulemwa ya ŵane. (Aloma 6:7) Twasosekwaga mundu jwamlama soni jwangalemwa kuti apelece umi wakwe, ligongo lya yakulemwa yetu.—Ahebeli 10:1-4.

Yeleyi ni yaŵalinganyisye Mlungu kuti yitendekwe. Ŵamtumisye Mwanagwe, Yesu, kutyocela kwinani kuti apagwe pacilambo capasi mpela mundu jwamlama. (1 Petulo 2:22) Yesu jwatite jwayice pacilambo capasi ‘kukupeleka umi wakwe kuti ŵawombole ŵandu ŵajinji.’ (Maliko 10:45) Jwawile pakusaka kulipilila yakulemwa yetu soni kutugopola ku ciwa kuti tupate umi wangamala.—Yohane 3:16.

Payikukwanilicikwa yakulocesya ya m’Baibulo, yikusalosya kuti tuli mu “ndaŵi ja yakusawusya,” soni ‘m’masiku gambesi’ ga cilambo ca Satanaci. (2 Timoteo 3:1) Masiku gambesi, gacimala “pa lisiku litacilamula ni kwajonanga ŵandu wosope ŵangakusamala ya jwalakwejo [Mlungu].” (2 Petulo 3:3, 7) Nambo ŵandu ŵakusamnonyela Mlungu, cacikulupuka soni cacipocela “umi wangamala.”—Mateyu 25:46.

Ŵandu ŵane ŵajinji cacikola upile wakupata umi wangamala pandaŵi jicacijimukaga kuŵawe. Yesu jwajimwisye mundu ku ŵawe, pandaŵi jiŵapite  mumsinda wa Naini. Pajwawile mwanace jwamlume jwajwamkongwe jwamasije, Yesu ŵamkolele canasa mwakumjimusya kuŵaŵe. (Luka 7:11-15) Nambosoni ndumetume Paulo jwatite, “Ngwete cikulupi cicoco mwa Mlungu . . . cakuti ŵandu wosope, ŵaswela mtima ni ŵakusakala, tacijimuka kuŵawe.” Cembeceyo cakudalilicikaci cikulosya kuti Mlungu akusiŵanonyela ŵandu ŵakwe.—Masengo 24:15.

Ŵandu ŵajinji akwembeceya mwalung’wanu kutama ni umi wangamala mpaka kalakala. Baibulo jikusati, “Ŵandu ŵambone tacipocela cilambo, ni tacitama mwelemo kwa yaka yosope.” (Salimo 37:29) Pandaŵijo, cacisangalala ni kwanilicikwa kwa maloŵe ga m’Baibulo m’yaka 2,000 yipiteyo kuti, “M’mwe ciwa, kupunda kwenu kuli kwapi? M’mwe ciwa ana ululu wenu uli kwapi?” (1 Akolinto 15:55) Ciwa cacikwalagasya ŵandu masiku aganoci cicimala.