MTWE 1
“Aju ni Mlungu Jwetu”
1, 2. (a) Ana ni yiwusyo yapi yampaka tusache kumwusya Mlungu? (b) Ana Mose jwamwusisye Mlungu chichi?
ALIWANICHISYE ali mkuŵechetana ni Mlungu. Kundanda mpaka atendeje woga ligongo lyakuti Jwakulamulila Jwamkulungwa jwa chilambo chosope akuŵechetana ni wawojo nambo kaneko akutanda kuŵechetana najo. Jwalakwe akwapikanila, akwajanga soni akwatendekasya wawojo kuŵa ŵagopoka kuwusya chiwusyo chilichose chakusaka. Sambano, ana ni chiwusyo chapi champaka asache kuwusya?
2 Yindu yeleyi yamtendechele mundu jwine kalakalako. Munduju jwaliji Mose. Nambo chiwusyo chiŵasagwile kumwusya Mlungu mwine mpaka chasimonjesye. Jwalakwe nganawusya yakwamba msyene, sogolo jakwe, kapena yakusawusya ya mtundu wa ŵandu. Mmalo mwakwe jwalakwe jwawusisye ya lina lya Mlungu. Mwine yeleyi mpaka yiŵe yakusimonjesya ligongo Mose jwaliji ali mkulimanyilila kala lina lya Mlungu. Pelepa nikuti yaŵawusisyeyi yakwete ngopolelo jekulungwa. Kusala yisyene yaŵawusisyeyi yaliji yakusosekwa mnope. Yeleyi yili myoyo ligongo kwanga kwakwe kukutukwaya wosope. Mpaka kutukamuchisye kutenda chindu chakusosekwa mnope champaka chitukamuchisye kumŵandichila Mlungu. Chamtuli? Kwende tulole mwakwajendele kukambilanaku.
3, 4. Ana chichi chichatendekasisye Mose kutanda kukambilana ni Mlungu, soni ana chiwundo chekulungwa pakukambilanaku chaliji chichi?
3 Mose jwakwete yaka 80. Jwalakwe jwalekangene ni Aisalaeli achimijakwe ŵaŵaliji achikapolo ku Iguputo ni kuja kutama kwajika kwa yaka 40. Lisiku line ali mkulisya yilango ya akwegwe ŵakwe, ŵachiweni chindu chakusimonjesya mnope. Ŵaliweni liwukutu lili mkukolela moto nambo lili ngalikutinika. Lyagambaga kukolela mnope mungulugulu litumbi. Mose jwapite kuti akalolechesye. Komboleka kuti wamkamwile woga paŵapikene maloŵe kutyochela pasikati paliwukutulyo. Kupitila mwa lilayika, Mlungu ŵaŵechetene ni Mose kwa ndaŵi jelewu. Soni mpela mwatukumanyililila, Mlungu pelepa ŵamtumaga Mose juŵatendaga woga, kuti aleche umi wambone ni kuwujila ku Iguputo kukwakulupusya Aisalaeli mu ukapolo.—Ekisodo 3:1-12.
4 Sambano Mose jwakwete upile wakumwusya Mlungu chiwusyo chilichose chiŵakwete. Nambo alole chiwusyo chiŵasagwile kuwusya. Jwalakwe jwawusisye kuti, “Sambano une patinjawule kwa Aisalaeli kukwasalila kuti Mlungu jwa achatati ŵenu andumile kwa jemanja, naga jemanjajo akambusye une kuti, ‘Lina lyakwe ŵani?’ Ana uneji ngajanje kuti uli?”—Ekisodo 3:13.
5, 6. (a) Ana chiwusyo chiŵawusisye Mose chikutujiganya usyesyene wakupikanika wapi? (b) Ana ni chindu chakusakala mnope chapi chachitendekwe ni lina lya Mlungu? (c) Ana ligongo chichi yatesile Mlungu pakulimanyikasya lina lyakwe ku mtundu wa ŵandu yili yakusosekwa?
5 Chandanda, chiwusyochi chikutujiganya kuti Mlungu akwete lina. Ngatukusosekwa kuwuwona usyesyene wakupikanikawu mpela ngani jamwana. Nambope yeleyi ni yakutenda ŵandu ŵajinji. M’Mabaibulo gejinji, lina lya Mlungu alityosisyemo, mmalo mwakwe aŵisile mena ga udindo mpela “Ambuje” soni “Mlungu.” Chelechi chili chindu chimo chakutesya chanasa soni chakusakala mnope chachitendekwe mu lina lya dini. Nambope, ana ni chindu chapi chandanda chatukusatenda patusimene ni mundu? Ana ngaŵa tukusamwusya lina lyakwe? Ni yatukusosekwa kutenda naga tukusaka kummanyilila Mlungu. Jwalakwe nganaŵa mundu jwangali lina, jwangakola lung’wanu ni ŵandu. Soni nganaŵa mundu jwakuti nganituŵa tummanyilile kapena kumpikanichisya. Atamose kuti nganituŵa tum’weni, nambo jwalakwe ali mundu soni akwete lina. Lina lyakwe ali Yehofa.
6 Nambosoni Mlungu pakulimanyikasya lina lyakwe, pakusaŵa kuti pana yine yakwe yakusangalasya yatukusosekwa kuyimanyilila. Akutuŵenda kuti tummanyilile jwalakwe. Akusaka kuti tutende chisagula chambone mnope paumi wetu chachili kumŵandichila jwalakwe. Nambope Yehofa atesile yejinji kupunda pagamba kutusalila lina lyakwe. Atujiganyisyesoni yalikwimila linali.
Ngopolelo ja Lina lya Mlungu
7. (a) Ana yikuwoneka kuti lina lya Mlungu likusagopolela chichi? (b) Ana Mose jwasakaga kumanyilila chichi kusyesyene pajwamwusyaga Mlungu lina lyakwe?
7 Yehofa ŵasagwile lina lyakwe lyalikwete ngopolelo jakusosekwa mnope. Lina lyakuti “Yehofa” yikuwoneka kuti likusagopolela “Akusatendekasya.” Jwalakwe ali jwapenani mnope pachilambo chosope, ligongo ni juŵapanganyisye yindu yosope soni akusakwanilisya yakulinga yakwe yosope. Yeleyi yili yakutesya lung’wanu mnope. Nambope, ana ngopolelo ja lina lya Mlunguji jikwamba kulosya kuti jwalakwe agambile kuŵa jwakupanganya yindu basi? Mwangakayichila, Mose jwasachile kumanyilila yejinji. Jwalakwe jwamanyililaga kuti Yehofa ni juŵapanganyisye chilichose, soni jwalimanyililaga lina lya Mlungu. Lina lya Mlungu nganiliŵa lyachilendo. Ŵandu aŵele ali mkulikamulichisya masengo kwa yaka yejinji. Myoyo, Mose pajwawusyaga lina lya Mlungu, jwalakwe jwawusyaga ya mundu juŵajimilaga linalyo. Mwalitala line, jwawusyaga kuti, ‘Ana chingasalile chichi Aisalaeli yakwamba wawojo yachiyikalimbikasye chikulupi chawo soni yachiyikasimichisye kuti wawojo yisyene chiŵakulupusye?’
8, 9. (a) Ana Yehofa ŵajanjile chamtuli chiwusyo cha Mose soni ana ŵandu agopolele yaŵajanjileyi m’litala lyakulemwecheka lyapi? (b) Ana maloŵe gakuti “Chinjiŵa jwachinjisaka kuŵa” gakusagopolela chichi?
8 Pakwanga, Yehofa jwasasile mbali jakusangalasya ja ndamo syakwe, jajikukamulana ni ngopolelo ja lina lyakwe. Jwalakwe jwamsalile Mose kuti, “Chinjiŵa jwachinjisaka kuŵa.” (Ekisodo 3:14, NWT) M’Mabaibulo gejinji akusagopolela kuti, “Une ndili.” Nambo Mabaibulo gaŵagopolele mwakusamala gakusalosya kuti Mlungu nganagambaga kusimichisyape kuti jwalakwe apali. Mmalo mwakwe, Yehofa jwamjiganyaga Mose soni ŵandu wosope kuti Jwalakwe ‘Chachiŵa’ kapena kuti chachisagula kuŵa chilichose chachikusosekwa kuti akwanilisye yilanga Yakwe. Baibulo jiŵalembile J. B. Rotherham, pa lilembali ŵagopolele kuti, “Chinjiŵa chilichose changusaka.” Jwamlijiganye mnope ya Malemba ga Chihebeli jwine pakulondesya ya maloŵega jwalembile kuti, “Mulimose mwampaka yiŵele yindu kapena pachakusosekwa chilichose . . . , Mlungu ‘chachiŵa’ chachikusosechelacho.”
9 Ana yeleyi yagopolelaga chichi kwa Aisalaeli? Mwangasamala kandu pa yakusawusya yakasimene nayo, kapena ndamo jakusawusya jakaliji, Yehofa akaŵele chilichose chachikasosekwe kuti ŵakoposye mu ukapolo ni kwajinjisya m’Chilambo Chelaguchisye. Kusala yisyene linali lyakamuchisye kuti amdalileje Mlungu. Mpaka litukamuchisyesoni m’weji masiku agano. (Salimo 9:10) Ligongo chichi tukuŵecheta myoyo?
10, 11. Ana lina lya Yehofa likusatukamuchisya chamtuli kumwona jwalakwe kuŵa Mtati jwakusakombola kuŵa chilichose pakusaka kwakamuchisya ŵandu? Apeleche chisyasyo.
10 Kuti tupikanichisye yeleyi kwende tuganichisye mwayikusaŵela ni achinangolo. Achinangolo akusamanyilila kuti akusosekwa kuchengachengaga pakwalela ŵanache. Mwambone, pa lisiku, nangolo mpaka akamule masengo mpela dokotala, jwakuteleka, tichala, jwakwamuka soni mbali sine syejinji. Ŵajinji akusamala lunda pakuganichisya ya winji wa maudindoga. Akusamanyilila kuti ŵanache ŵawo akwete chikulupi chakuti Baba kapena Mama ŵawo chiŵakamuchisye pawulele, kumasya ungapikanganana, kulinganya yidole yayijonasiche soni kwanga yiwusyo yiliyose yampaka akole munganisyo. Achinangolo ŵane akusalipikana kuti nganaŵa ŵakuŵajilwa kuti ŵanache ŵawo ŵadalileje chamti myoyo. Soni ndaŵi sine akusatenguka ligongo lyakulepela kutenda yindu yine. Jemanjaji akusalipikana kuti nganaŵa akombwele kutenda maudindo gane mwa gelega.
11 Yehofa nombe najo ali nangolo jwachinonyelo. Nambope jwalakwe mpaka akombole kuŵa chilichose kuti ŵakamuchisye mwakuŵajilwa ŵanache ŵakwe ŵa pachilambo chapasi. Mpaka atende yeleyi mwangasokonasya ndamo syakwe syamlama. Myoyo, lina lyakwe lyakuti Yehofa likutukamuchisya kumwona jwalakwe kuŵa Mtati jwetu jwambone mnope kupunda jwine jwalijose. (Yakobo 1:17) Mose ni Aisalaeli ŵakulupichika achimjakwe ŵawuweni umboni wakuti Yehofa ali jwakulupichika mwakamulana ni lina lyakwe. Ŵam’weni Yehofa ali mkuŵa Jwamkulungwa jwa Ngondo jwangagomechedwa, Jwamkulungwa jwakumalana ni ngosi sya chilengedwe, Jwakupeleka Malamusi jwambone mnope, Jwakuwelusya, Jwakulemba Mapulani, Jwakupeleka yakulya soni mesi, Jwakukamuchisya kuti yakuwala soni sapato sikamala nambosoni ni yine yejinji.
12. Ana kaganisye ka Falao kalekanganaga chamtuli ni ka Mose pakwamba ya Yehofa?
12 Mlungu alitendekasisye lina lyakwe kumanyika soni alosisye yindu yakusangalasya yakwamba ndamo syakwe yayikwimila lina lyakweli. Apeleche umboni wakuti yakusasala yakwamba msyene yili yakuwona. Pelepa yikuwonechela chenene kuti jwalakwe akusaka kuti tummanyilile. Ana tuli ŵakusachilila kummanyilila? Mose jwaliji jwakusachilila kummanyilila Mlungu. Kusachilila kwakweku kwamkamuchisye kuchenga umi wakwe yayamkamuchisye kuti amŵandichile mnope Mlungu. (Numeli 12:6-8; Ahebeli 11:27) Nambo yakutesya chanasa yili yakuti achimjikwe ŵakuŵalanjikape ŵa mundaŵi jakwe ni ŵaŵakwete nganisyo syakulandanasi. Mose pajwasasile ya lina lya Yehofa kwa Falao, mwenye jwakulikwesya jwa Iguputoju jwawusisye kuti, “Ana Yehofa ni ŵani?” (Ekisodo 5:2, NWT) Falao nganasaka kumanyilila yejinji yakwamba ya Yehofa. Mmalo mwakwe jwalakwe jwamwonaga Mlungu jwa Aisalaeli kuŵa jwangasosekwa. Masiku aganosoni kaganisye keleka kali kakuwanda. Kaŵisile m’chipi ŵandu kuti akamanyilila usyesyene wakusosekwa mnope wakuti Yehofa ali Ambuje Mlungu Ŵamachiligosope.
Ambuje Mlungu Ŵamachiligosope
13, 14. (a) Ana ligongo chichi Yehofa akwete mena ga uchimbichimbi gejinji m’Baibulo, soni gane mwa menaga ni gapi? (Alole libokosi pa peji 14.) (b) Ligongo chichi Yehofa mwapajika ali jwakuŵajilwa kolanjidwa kuti “Ambuje Mlungu Ŵamachiligosope”?
13 Yehofa akwete mena gawuchimbichimbi gejinji gatukusagasimana m’Baibulo. Menaga nganigaŵa galandene ni lina lyakwe lisyesyene. Nambo gakusatujiganya yejinji pakwamba yalikusajimila linalyo. Mwachisyasyo, jwalakwe akusakolanjidwa kuti “Ambuje Mlungu Ŵamachiligosope.” (2 Samuele 7:22) Lina lyauchimbichimbili, lyalikusasimanikwa maulendo gejinji m’Baibulo, likusatusalila ya udindo wakwete Yehofa. Jwalakwe jika ni jwali jwakuŵajilwa kuŵa Jwakulamulila jwa chilambo chosope. Kwende tulole magongo gakwe.
14 Yehofa ali jwapajika ligongo ni Juŵapanganyisye yosope. Pa Chiwunukuko 4:11 pakusati, “Ambuje Mlungu jwetu, ŵalakwe ali ŵakwenela kupochela lumbili, uchimbichimbi ni machili. Ŵalakwe ŵapanganyisye yindu yosope, mwa lisosa lya ŵalakwe, ŵasachile kuti yosopeyi yiŵe yana umi.” Maloŵe gauchimbichimbiga ngaŵa mkwawula ku chakupanganyidwa chine chilichose. Chilichose chachili pachilambopa chapanganyidwe ni Yehofa. Myoyo, Yehofa ali jwakwenela kupochela uchimbichimbi, machili soni lumbili ligongo ali Ambuje Mlungu Ŵamachiligosope soni ni Juŵapanganyisye yindu yosope.
15. Ligongo cici Yehofa akusamanyika ni lina lyakuti, “Mwenye jwa mpaka kalakala”?
15 Lina line lyaudindo lyakusamanyika nalyosoni Yehofa jika lili “Mwenye jwa mpaka kalakala.” (1 Timoteo 1:17) Ana linali likugopolela chichi? Yili yakusawusya kupikanichisya yeleyi ligongo lyakuti nganisyo syetu sili syakupelembela. Nambope patukulola yatesile munyuma soni yachatende msogolo, tukusayiwona kuti Yehofa chachitama mpaka kalakala. Lilemba lya Salimo 90:2 likusati, “Ŵalakwe ali Mlungu kutandilila kwa yaka mpaka yaka yosope.” Myoyo, Yehofa pangali pajwatandile. Jwalakwe apali ndaŵi syosope. Ni ligongo lyakwe yili yakupikanika kusala kuti jwalakwe ali, ‘Jwachitamile Mpaka Kalakala.’ Jwalakwe jwapali pandaŵi janganituŵa tukombwele kujimanyilila soni mundu jwalijose kapena chindu chilichose mkanichipagwe. (Daniele 7:9, 13, 22) Ana ŵani ŵampaka akayicile kuti jwalakwe akwete ufulu wakuŵa Ambuje Ŵamachiligosope?
16, 17. (a) Ligongo chichi nganituŵa tum’weni Yehofa, soni ligongo chichi ngatukusosekwa kusimonga nayo yeleyi? (b) Ana Yehofa ali jusyesyene m’litala lyamtuli kupunda yosope ya mpaka tuyiwone soni kuyikamula?
16 Nambope, mpela mwaŵatendele Falao, ŵandu ŵane akusakayicila yakuti jwalakwe akwete ufuluwu. Yili myoyo ligongo lyakuti ŵandu ŵangali umlama, akusadalila mnope yindu yakuyiwona ni meso. Nganituŵa twaweni Ambuje Ŵamachiligosope. Ŵalakwe ali msimu, ŵanganituŵa twaweni ni meso getu. (Yohane 4:24) Nambosoni naga mundu jwachilu ni miyasi ali ajimi pali Yehofa Mlungu, mundujo mpaka awe. Yehofa ŵamsalile Mose kuti, “Ngasimjiwona ngope jangu, ligongo pangali mundu jwampaka ambone une, ni kutama ni umi.”—Ekisodo 33:20; Yohane 1:18.
17 Ngatukusosekwa kusimonga ni yeleyi. Kupitila mwa lilayika lyakumjimila Yehofa, Mose jwagambile kujiwona mbali jamnono jauchimbichimbi wa Yehofa. Ana yakuyichisya yakwe yaliji yamtuli? Ngope ja Mose ‘janyesimile’ kwa kandaŵi panyuma pakwe. Mwamti Aisalaeli ŵatesile woga kuti alole ngope ja Mose. (Ekisodo 33:21-23; 34:5-7, 29, 30) Yisyene, pangali mundu jwampaka ajiwone ngope ja Ambuje Mlungu Ŵamachiligosope mu uchimbichimbi wakwe wosope. Ana yeleyi yikugopolela kuti jwalakwe nganaŵa jusyesyene kulekangana ni yindu yatukusayiwona kapena kuyikamula? Iyayi. Pana yindu yejinji yatukusajitichisya kuti yipali atamose kuti ngatukusayiwona. Mwachisyasyo, tukusajitichisya kuti kwana mbungo, nganisyo soni kajende ka maloŵe gatukusapikana mu wailesi. Nambosoni Yehofa ali jwachitamile, jwangachenga mkupita kwa ndaŵi, atamose pali pamasile yaka mabiliyoni gejinji. Yeleyi yikulosya kuti jwalakwe ali jusyesyene kupunda chindu champaka tuchiwone kapena kuchikamula. Yeleyi yili myoyo, ligongo yindu ya pachilambopa yikusakalambala soni kuwola. (Mateyu 6:19) Ana tukusosekwa kuganichisya kuti agambile kuŵa machili wamba gangamanyika chenene kapena Jwakutandikasya Yindu jwangapikanichika kose? Kwende tulole.
Ndamo sya Mlungu
18. Ana Esekiele jwagaweni mesomkulola gamtuli, soni ana ngope mcheche sya yindu “yaumi” sikwimila chichi kwa Yehofa?
18 Atamose kuti nganituŵa tum’weni Mlungu, nambo m’Baibulo mwana ngani syasikusatukamuchisya kumanyilila panandipe yindu ya kwinani. Jimo mwa nganisi jikusimanikwa mu chaputala chandanda cha buku ja Esekiele. Esekiele ŵagaweni mesomkulola gakwamba ya likuga lyakwinani lya Yehofa. Likugali lyawonekaga mpela ligaleta lyekulungwa mnope. Nambo chakusangalasya mnope ni mesomkulolaga chili yaŵatite pakuyilondesya yakupanganyikwa yausimu yamachili mnope yayamsyungulile Yehofa. (Esekiele 1:4-10) Yindu “yaumi” yeleyi yili yakamulana mnope ni Yehofa, soni kawoneche kakwe kakusatusalila chindu chine chakusosekwa mnope chakwamba Mlungu jwayikusatumichila. Chaumi chilichose chana ngope mcheche, ngope ja ng’ombe, lisimba, ngwasi soni ja mundu. Yeleyi yikwimila ndamo syekulungwa mnope mcheche sya Yehofa.—Chiwunukuko 4:6-8, 10.
19. Ana ni ndamo japi jajikusajimila (a) ngope ja ng’ombe? (b) ngope ja lisimba? (c) ngope ja ngwasi? (d) ngope ja mundu?
19 M’Baibulo, ng’ombe jikusajimila machili. Yili yakupikanika ng’ombe kwimila ndamo ja Yehofa ligongo jili nyama jamachili mnope. Lisimba likwimila chilungamo ligongo lili lyakulimba mtima. Kuti mundu alosye chilungamo akusasosekwa kulimba mtima. Ngwasi jikusamanyika ni machili gakulolechesya mnope mwamti jikusakombola kulola tuyindu twamwanamwana twatuli pakutalichila mnope. Myoyo, ngope ja ngwasi jikwimila chenene lunda lwa Mlungu lwakulola yindu ya msogolo. Nambi uli pakwamba ya ngope ja mundu? Mundu jwapanganyidwe m’chiwanichisyo cha Mlungu. Myoyo, mundupe ni jwali jwapajika pakulosya ndamo jekulungwa mnope ja Mlungu jajili chinonyelo. (Genesesi 1:26) Ndamo sya Yehofa syelesi, machili, chilungamo, lunda, soni chinonyelo akusasigombelechesya kaŵilikaŵili m’Baibulo kuŵa ndamo syekulungwa mnope sya Mlungu.
20. Ana tukusosekwa kudandawula kuti mwine ndamo sya Yehofa syachenjile, soni ligongo chichi tukwanga myoyo?
20 Ana tukusosekwa kudandawula kuti mwine Mlungu achenjile mu yaka yejinji kutyochela pa ndaŵi jele Baibulo jatandite kulondesya ya jwalakwe? Iyayi, ndamo sya Yehofa syangachenga. Jwalakwe akutusalila kuti, “Pakuti une ndili Ambuje, jwangachenga.” (Malaki 3:6) Jwalakwe jwangatenda yindu mwakujigalika nganisyo. Mwakusatendela yindu Yehofa pachakutendekwa chilichose, akusalosya kuti ali Mtati jwambone. Jwalakwe akusalosya ndamo syakwe syasili syakusosekwa mnopesi. Pa ndamo mchechesi, ndamo jekulungwa mnope jili chinonyelo. Ndamoji jikusakwaya chilichose chakusatendaga. Jwalakwe akusakamulichisya masengo machili, chilungamo soni lunda lwakwe m’litala lya chinonyelo. Baibulo jikusasalasoni chindu chine chakutesya lung’wanu mnope pakwamba ya ndamoji. Baibulo jikusati, “Mlungu ali chinonyelo.” (1 Yohane 4:8) Chayiwone kuti lilembali ngalikusala kuti Mlungu akwete chinonyelo kapena kuti Mlungu akusanonyela. Nambo likusala kuti Mlungu ali chinonyelo. Chinonyelo chachili ndamo jakwe jekulungwa mnope chikusamlongolela pa chilichose chakusatenda.
“Aju ni Mlungu Jwetu”
21. Ana tukusapikana uli mumtima patumanyilile chenene ndamo sya Yehofa?
21 Mwanache akusangalala soni kunyadila pakwalanjila babagwe kwa achimijakwe kuti, “Awo ali baba ŵangu.” Mwakulandana ni yeleyi ŵakulambila ŵa Mlungu akwetesoni ligongo lyakwatendekasya kukola nganisyo syakulandanasi pakwamba ya Yehofa. Baibulo jikusasala ya ndaŵi jele ŵandu ŵakulupichika chachisala mwakusangalala kuti, “Aju ni Mlungu jwetu.” (Yesaya 25:8, 9) Pakusimanyilila chenene ndamo sya Yehofa, ni pakusasimichisya kuti akwete Mtati jwambone mnope kupunda jwine jwalijose.
22, 23. Ana Baibulo jikusasala kuti Atati ŵetu ŵakwinani ali ŵamtuli, soni ana tukumanyilila chamtuli kuti ŵalakwe akusaka kuti twaŵndichile?
22 Mwangasamala kandu yakusajiganya ŵadini soni ŵalijiganye ŵane, Atatiŵa ngaŵa kuti ali ŵangaganichisya ŵane kapena ŵangasangalala. Yikaŵe kuti Atatiŵa ali myoyo, yikaliji yakusawusya kwaŵandichila. Konjechesya pelepa, Baibulo jangasala kuti mwelemu ni mwaŵelele Atati ŵetu ŵakwinani. Mwakulekangana ni yeleyi, Baibulo jikusasala kuti jwalakwe ali “Mlungu jwakusangalala.” (1 Timoteo 1:11, NWT) Jwalakwe akusatumbila soni akusapikana chanasa. Mlungu jwayipele yakupanganyikwa yakwe ya lunda malamusi kuti yipakomboleje kutama ni umi. Myoyo, payikasile malamusiga, ‘yikusamsakalisya mumtima.’ (Genesesi 6:6; Salimo 78:41) Nambo patutesile yindu ya lunda mwakamulana ni Maloŵe gakwe, ‘tukusasangalasya mtima’ wakwe.—Misyungu 27:11.
23 Atate ŵetu akusasaka kuti twaŵandichileje. Maloŵe gakwe gakusatulimbikasya kuti ‘tumsoseje jwalakwe, kuti mwine ni kumsimana. Nambope Mlungu nganaŵa kose pakutalika ni jwalijose mwa jwetuwe.’ (Masengo 17:27) Nambo ana mpaka yikomboleche chamtuli kuti ŵandu ŵaŵandichile Ambuje Ŵamachiligosope ŵaŵapanganyisye chilambo chosope?
