Yiwusyo Yakutyochela kwa Ŵakuŵalanga

Pakuŵa Baibulo jangaŵecheta chilichose pakwamba ya kugombanya matambula, nambi ligongo chichi Mboni sya Yehofa syangatenda nawo yeleyi?

Kugombanya matambula gagakwete finyo (kapena chakumwa chine champaka mundu akolelwe nacho) yili yakutendekwa yayatandilile kalakala. Soni yili yakuwanda mnope, atamose kuti katende kakwe kakusalekangana m’madela gejinji. Ndaŵi sine ŵandu akusagamba kwesya matambula gawo mwinani ngagagombanya. Mundu jwaŵechete kuti ŵandu agundanye matambula, ndaŵi syejinji akusasosela mundu jwine umi wakusangalala, chilu chambone, umi welewu, ni yine yejinji. Ŵandu ŵane ŵakutenda nawo yeleyi komboleka akusaŵecheta maloŵe gakwitichisyana ni mundujo kapena akusagamba kwesya mwinani matambula gawo ni kumwa finyo panandi. Ŵandu ŵajinji akusayiwona kuti welewu uli mwambo wanganiwukola futo jilijose soni kutenda yeleyi kuli kulosya ulemu. Nambope pana magongo gambone gele ŵa Mboni sya Yehofa ŵangatenda nawo mwambo welewu.

Aklistu ŵangatenda nawo mwambowu, ngaŵaga ligongo lyakuti ŵangasosela achimjawo umi wakusangalala kapena kuti akole chilu chambone. Chikalata chele Likuga Lyakulongolela lya Aklistu ŵandanda ŵajilembele mipingo, chamasile ni maloŵe gampaka gagopolele, “chilu chambone,” “tukwasosela yambone yosope,” kapena “sigalani chenene.” (Mase. 15:29) Sonitu ŵakulambila ŵasyesyene ŵane ŵagasalile mamwenye kuti, “Ambuje ŵangu … akole umi mpaka kalakala” kapena “Mwenye akole umi mpaka kalakala.”​—1 Ayi. 1:​31; Neh. 2:3.

Nambo, ana mwambo wagombanya matambula watandite wuli? Sanja ja Mlonda jachingelesi ja Januwale 1, 1968, jakamwile maloŵe buku ja The Encyclopædia Britannica (ja 1910), foliyumu 13, peji 121. Bukuji jikusati, “Mwambo wakumwa finyo pakwasosela ŵandu ŵachijumi kuti akole ‘chilu chambone’ mwine watyochele ku mwambo wakalakala wa dini wakumwa finyo pakusaka kujisangalasya milungu soni ŵandu ŵawe. Agiliki soni Aloma pakulya yakulya ŵatagaga finyo pasi mpela mbopesi kwa milungu jawo, nambosoni pakulya pa mwambo wapadela ŵamwaga finyo pakusaka kujisangalasya milungujo soni ŵandu ŵawe.” Bukuji japitilisye kuti, “Mwambo wakumwa finyo mpela mbopesi welewu, wakamulanaga mnope ni kumwa finyo pakwasosela ŵandu ŵachijumi chilu chambone.”

Ana yili myoyo mpaka masiku agano? Buku jakolanjikwa kuti International Handbook on Alcohol and Culture ja mu 1995, jikusati, “[Gombanya matambula] mwine jili mbali jajisigele pamwambo wadini wakala wakupeleka mbopesi kwa milungu pakutaga pasi miyasi kapena finyo. Pamwambo welewu ŵapelekaga mbopesisi pakutindanya ni lipopelo lyaŵaliŵechetaga mwachidule m’maloŵe aga, ‘Mkole umi welewu’ kapena ‘Mkole chilu chambone.’”

Yili yisyene kuti ŵakulambila ŵasyesyene ngakusachiwona chisyoŵe chinechakwe kapena yindu yineyakwe kuti yili yakusakala ligongo lyakuti yatandile ku dini syawunami syakala kapena yikusalandana ni yakutendekwa ya m’dinisi. Aganichisye ya chisogosi chakuwoneka mpela chimanga chachisungu. Buku jine jakumanyika chenene jakulondesya ya m’Baibulo jikusati, “Yikuwoneka kuti chisogosichi ŵachikamulichisyagasoni masengo mpela chimanyilo chapadela mu dini syejinji syachikusa.” Nambope, Mlungu ŵasasile kuti chakuwala cha jwamkulungwa jwa mbopesi chasosekwaga kukola maluŵa gakuwoneka mpela chisogosichi. Soni njalamila sya kopa sya nyumba jakulambilila jaŵataŵile Solomoni syasalalisidwe ni mtundu wa chisogosichi. (Ekisodo 28:33; 2 Ayimwene 25:17) Nambosoni, mbete ja paukwati pandaŵi jine jajimilaga chimanyilo cha dini syawunami. Nambo ŵajinji masiku agano ŵangamanyilila yeleyi, mwamti akusagamba kuyiwona kuti uli umboni wakuti mundujo ali paliŵasa.

Nambi wuli kukamulichisya masengo finyo payakutendekwa ya dini? Mwachisyasyo, pandaŵi jine achalume ŵa ku Shekemu, ŵaŵalambilaga Bala ŵajinjile “mnyumba ja mlungu jwawo, mwamti ŵalile, kumwa, soni kumtembelela Abimeleki,” mwanache jwa Gidiyoni. (Ŵakulamula 9:​22-​28) Ana akuganisya kuti mundu jwakulupichika kwa Yehofa akamwele nawo finyo jwelejo, mwine kuŵenda kuti mlungu jwawunami ŵakamuchisye kumalana ni Abimeleki? Pakulondesya ndaŵi jele ŵandu ŵajinji ku Isalaeli ŵasapwiche kwa Yehofa, Amosi jwatite kuti, “Ŵanduwo akusagona pambali pamalo galigose gakumlambila Mlungu, pa yakuwala yiŵasumwile kwa ŵakulaga mpela chikole. Akusamwela finyo m’ Nyumba ja AMBUJE jwawo, jwele jwamjigele kwa ŵandu ŵiŵakongwele jemanjajo mbiya.” (Amosi 2:8) Ana ŵakulambila ŵasyesyene akatesile nawo yeleyo, chinga finyojo ŵamkusulile pasi mpela mbopesi kwa milungujo kapena ŵagambile kumwa pa yakutendekwayo? (Yelemiya 7:​18) Kapena ana jwakulambila jusyesyene mpaka akwesye mwinani tambula jakwe ja finyo ni kuŵenda kuti mlungu jwinejwakwe amtendele mundu yineyakwe kapena kuti akole sogolo jambone?

Nambo ndaŵi sine, ŵakulambila ŵa Yehofa ŵakwesyaga makono gawo mwinani pakusaka kuŵenda kuti yindu yajendele chenene. Ŵakwesyaga makono gawo kwa Mlungu jusyesyene. Tukusaŵalanga kuti, “Solomoni ŵajimi pasogolo pa malo gakupelechela mbopesi . . . nipo ŵanyakwile makono gakwe kwinani. Nipo ŵapopesile kuti, ‘Ŵalakwe AMBUJE Mlungu jwa Aisalaeli, pangali mlungu jwine jwakulandana ni ŵalakwe . . . agapikane kwinani kwakutamako, nipo pitagapikanepo, chonde atukululuchile ulemwa wetu.’” (1 Ayimwene 8:​22, 23, 30) Mwakulandanamo, “Esala ŵamchimbichisye Yehofa . . . ŵandu wosope ŵanyakwile makono gawo mwinani ni ŵajanjile kuti, “Yiŵe myoyo! Yiŵe myoyo!” Kaneko ŵandu ŵala ŵatindiŵele ni gundisyaga ngope syawo pasi ni kwalambilaga AMBUJE.” (Nehemiya 8:6; 1 Timoteo 2:8) Ŵandu ŵakulupichikaŵatu nganakwesyaga makono gawo mwinani pakusaka kuti mlungu jwine jwakwe jwakupeleka upile ŵape upile.​—Yesaya 65:11.

Ŵandu ŵajinji ŵakusagundanya matambula masiku agano mwine ŵangaganisya kuti akuŵenda upile kwa mlungu jwine jwakwe. Nambo nganaŵa asasile ligongo lyakusakwechesya matambula mwinani. Nambo atamose kuti jemanjaji ŵangaganichisya mnope ya ngani jeleji, ŵakutumichila ŵa Mlungu ŵasyesyene nganaŵa ajigalile yeleyi.

Tukusamanyililasoni kuti ŵa Mboni sya Yehofa ŵangatendanawosoni yindu yine. Mwachisyasyo, ŵandu ŵajinji akusachimbichisya yimanyilo ya chilambo, kapena mbendela. Mwamti pakutenda yeleyi ŵangayiwona kuti kuli kulambila. Atamose Aklistu ŵasyesyene ŵangatenda nawo yeleyi, nambo ngakusiŵalekasya ŵane pakutenda. Mwamti pamanyilile masiku gampaka gatendekwe yeleyi akusaŵa ŵakusamala mnope kuti akakuŵasya ŵane. Jemanjaji ngakusatenda nawo yiliyose yakulosya kuti akusanonyela mnope chilambo chakusatama, ligongo yeleyi yili yakutindana ni yajikusasala Baibulo. (Ekisodo 20:​4, 5; 1 Yohane 5:​21) Komboleka kuti masiku agano ŵandu ŵajinji ŵangamanyilila kuti kugombanya matambula kuli mbali jakulambila. Atamose yili myoyo, pana magongo gejinji gele Aklistu akusaŵambala kugundanya matambula. Ndamojitu jatyochele ku dini jachikusa soni jikusawoneka kuti kuli kuŵenda mundu jwine jwakutama ‘kwinani’ kuti atupe upile. Kapenasoni kuŵenda jwinejwakwe jwamachili mnope kuti atukamuchisye.​—Ekisodo 23:2.