Kóraŋ támaa wɔlɔ-wɔlɔ tí kɛ́i, Ziova Ŋɔsêre-faa kɛ́-ɓelai da káa tíi kɛ́ a Ɣâla-kɔlɔ sîi takpɛ́ni-takpɛni-ŋa, da káa díprint kɛ díkɛ dí ŋá kɔlɛ máŋ. Kɛ́ɛ, kú gáa à gɛ́ɛ maa nɛ̂̃ɛi kú Ŋâla-kɔlɔi su woo pɔ̃yɛ a pere sîi nyii a pɔri kpɔŋ maa tɛɛi nûa pɔ́ dí “dɔ̃yâi maa-tare kɔ́lɔŋ” nyii gáa a Ɣâla nî̃a-mɛni núu kélee mɛni ma. (1 Temete 2:3, 4) Mɛni ma, góraŋ 1950 su kú pɛlɛ Ŋâla-kɔlɔi su woo pɔ̃yɛi kwii-woo su a gbua-kpua kúkɛ ŋá kɔlɛ. Ŋâla-kɔlɔi kpîŋ láa ɓai New World Translation. Dí Ŋâla-kɔlɔi su woo pɔ̃yɛ New World Translation su a tɔ̃yâ pere, nyaŋ kwaâ nâa bɔ̃yɛ é tɛɛ sîi-woo ŋɔŋdɔ tɔnɔ pôlu buu saaɓa (130) su.

Gáa a Ɣâla-kɔlɔ nyii ŋá káa la nɛ̃ɛi. Kóraŋ támaa a tɛɛ, sîi-woo ɓó pere maa a fáleŋ, à kɛ̀ tí, gɛ̀ ní, wóo tani-ŋa dakɛ Ɣâla-kɔlɔ támaa su nyii ŋá káai ma à kɛ́ a gbanaŋɔɔ. E tee nyíti ma, dí wɔlɔ-wɔlɔ ɣâla-kɔlɔ kpua-ŋa da kɔlɔ pɔlɔ-ŋa támaa káa nyii a pɔri kpɔnîi nûa dîa à gɛ́ɛ dí zîi-woo-ŋai dí Ŋâla-kɔlɔi pɔ̃yɛ zui ŋá káa—Ibulu-woo, Aramé-woo da Gurîi-woo.

Gáa a Ɣâla-kɔlɔ nyii dí Ɣâla wóo pɔ̃yɛ zu a tɔ̃yâ pere. Maa nɛ̂̃ɛi Ŋâla-kɔlɔi su woo pɔ̃yɛ-ɓela díkɛ a teniŋ-ɓo-ɓela; dí Ŋâla-kɔlɔi su woo pɔ̃yɛ a tɔ̃yâ pere berei dí bɔ̃yɛ lai a màa-ŋuŋ. Kɛ́ɛ Ɣâla-kɔlɔ támaa su, bɔ̃yɛ-ɓela dí Ɣâla láa, Ziova kula zu.

Gáa a Ɣâla-kɔlɔ nyii a Ɣâla ŋɔfólo-laai maa tɛ́. (2 Samia 23:2) New World Translation pɔ̃yɛ-ɓelai dí Ɣâla láa Ziova pɔ̃yɛ pôlu ɓɛ́i kélee Ɣâla láa, Ziova káa naa ŋwɔlɔ-wɔlɔ Ɣâla-kɔlɔ pɔlɔ-ŋai su. Nyaŋ Ziova láa káa New World Translation su a wála lɔ́ɔlu mɛi feerɛ (7,000) yɛ̂ɛ berei gáa la ŋwɔlɔ-wɔlɔ Ɣâla-kɔlɔ pɔlɔ-ŋai sui. Gɔɔŋ maa ɓa votôoi ŋí gɔlɔ-laai kwára perei. (Wule-woo-ŋa 83:18, NW) Ǹûai New World Translation Ɣâla-kɔlɔi pɔ̃yɛi, dí tíi kɛ́ kpɔ́ a gbanaŋɔɔ a kóraŋ támaa à gɛ́ɛ dí Ɣâla wóo pɔ̃yɛ a zu ponoɔ lɛ́lɛɛ; nyii gɛ nûa da pɔri Ŋâla-kɔlɔi lónoi dí ŋá káa ma dí ŋá-nɛ̃ɛ kula. À kɛ̀ New World Translation Ɣâla-kɔlɔi káa ísîi-wooi su kpaa máŋ vé zu, a pâi kɛ́i a nɛ́lɛɛ I Ŋâla-kɔlɔi lóno a ɣele kélee.—Zasua 1:8; Wule-woo-ŋa 1:2, 3.

• Lé mɛni ɓé kú Ŋâla-kɔlɔi su woo pɔ̃yɛ lai?

• Lé ɓé nɛ́lɛɛi ǹûai ŋwɛ̂lii dí Ɣâla mɛni kɔ́lɔŋ dí gɛ a ɣele kélee?