Yaâ votôo-ŋai káa gɔlɔ-kpua ŋí su, berei Ziova Ŋɔsêre-faa kɛ́-ɓelai da dímaa-ɣiri la a nɛ́lɛɛ dakɛ liî díkoyâŋ-ŋai sui? Lé mɛni ɓé kwa kúmaa-ɣiri la a nɛ́lɛɛi? Nyaŋ lé mɛni ɓé kwa ŋɔ́nɔ kúŋuŋ ɓô kpaa kú kúŋuŋ láa la a nɛ́lɛɛi?

A ɓaa-kɛ-maa tɛɛ Ɣâla pɔ́. Gáa a tɔ̃yâ à gɛ́ɛ kúmaa-ɣiri pere fêi Ɣâla a gáa kwa kɛ vɛlîi. (1 Samia 16:7) Kɛ́ɛ, kwa kú ŋá-tɛ gîe ma kúkoyâŋ-ŋai su à gɛ́ɛ kú kúfɛli wooi tɛɛ Ɣâla pɔ́, gáa a sɛŋ kú ɓaa-kɛ-maa tɛɛ bɔ́ da kúɓarâŋ kôrai-ɓelai. À kɛ̀ gáa a sɛŋ à gɛ́ɛ I lí kpɔŋ ta su nyii pɛsɛlɛŋ nɔii mɛ́i íkaa zui è dooi, ya pâi íŋuŋ ɓôi kpaa I íŋuŋ láa I ŋɔ́nɔ ímaa-ɣiri kpɔ́ a nɛ́lɛɛ, kpɛ́ni fêi gáa a núu kɛ́tɛ, kɛrɛ-ee? Bere nɔ́ ɓé kwa kúŋuŋ kpɛtɛ la kú kúmaa-ɣiri la a nɛ́lɛɛ kwa kɛ liî kúkoyâŋ-ŋai su, kpɛ́ni fêi, kwa liî ǹúui ŋɛ́i nyii gáa a “ŋwɔlɔ-wɔlɔ kâloŋ” nɔii kélee mɛi, Ziova Ɣâla. Nyíŋi a ɓaa kɛ Ɣâla ma da ɓɛ́i kwa vɛli naai.—1 Temete 1:17.

A nɛ̀ à gɛ́ɛ kwa m̀ɛni-ŋai kɛ́ kwa maa-kɔ́ri Ŋâla-kɔlɔi su. Ŋâla-kɔlɔi è mò à gɛ́ɛ Kôrai-ɓela dí dímaa-ɣiri a “ɓaa-kɛ-maa pere da táre” yɛ̂ɛ berei gáa la “Ɣâla-ɓela” mɛni mai. (1 Temete 2:9,10) Núu maa-ɣiriɛ a ɓaa-kɛ-maa pere sukulai ɓa, kúfe maa-ɣiri nyɔ́mɔɔ kɛ, kúfe seɣe too kwa nyii pâi nûa ŋɛ́i kɛ́i kwa kpaa máŋ kú kúkpono lɛ́ seɣe too kwa. Kwa ŋɔ́nɔ kúmaa-ɣiri a “táre pere” à kɛ̀ kwa seɣe waa nyii vé liɓi nii pu kwa. Nyíŋi sukulai fa à gɛ́ɛ kú kélee kú kúmaa-ɣiri a bere sîi tɔnɔi. Kwa pɔri kúmaa-ɣiri a pere sîi takpɛ́ni-takpɛni. Kɛ́lɛ, à kɛ̀ kwa kúmaa-ɣiri a nɛ́lɛɛ a “Ɣâla ŋɔfolo-laai maa tɛ” e gɛ ŋɔ́nɔ nûa dí díwoli tɔ́ɔ kúɣâla-woo-ɓoɔi ma dí dûa kɛ. (Taitɔ 2:10; 1 Pitɛ 2:12) À kɛ̀ kwa kúmaa-ɣiri a nɛ́lɛɛ kwa kɛ liî kúkoyâŋ-ŋai su, a gɛ̀ nûa dí Ziova láa maa tɛ.

Ífe nɛ̀ɛ naa maa-ɣiri-sɛŋ mɛni e I kpera pâi kúkoyâŋ-ŋai su. Kpɛ́ni fêi, seɣe lɛ́lɛɛ fé nɔ́ a seɣe nyii zɔ̃ɔ kɛ́tɛi kpaa gáa a ninai, kɛ́ɛ, maa nɛ̂̃ɛi e kɛ́ a ŋwaa gɛ ɓó ŋɔ́nɔ a ɓaa-kɛ-maa seɣe.

• Lé mɛni ɓé kwa kúmaa-ɣiri la a nɛ́lɛɛi kwa kɛ liî kúkoyâŋ-ŋai sui?

• Lé ɓé Ŋâla-kɔlɔi è mò é pîlaŋ kúmaa-ɣiri pere mai?