Zaho tombo tamy faritry araiky masikiny ta Montréal. Tamy zaho tsiota fanjava, papanay naty, ke mamanay fo nitarimy zahay. Zaho farany taminay valo mianadahy.

Zaho koa fa nahaibe, fiain̈ananaka nihodikodin̈y tamy jamala, loka ndreky hakafirianan̈a fo. Ary olo tsy manjary fo olo niarasako. Tamy zaho folo taon̈o, zaho loso irakirakandro makorely ndreky olo mpampindrambola aby io. Zaho raha niasa navandy fo, sady nitady tetiky fo zaho han̈anaovan̈a hafitsian̈a. Fikatramoen̈a olo io taminaka, efa mira jamala in̈y.

Tamy zaho 14 taon̈o, efa kaka mare tamy fikatramoen̈a olo. Ohatra ziô, zaho nivanga lamontra ndreky vangovango avio peratra maro. Nisoratiko tamindro tio ‘volamena 14 karà’, kanefa pitipitiny hely fo volamena tamizio tao. Avio izio nalafoko tamorondalan̈a ndreky tamy tany fidokoany tomôbily amindro labotiky maventy aby in̈y. Zen̈y kony vola malaky ay! Karaha tsara oe nan̈ano izio. Tandraraiky, 10 000 dolara vola nazoko tan̈atiny andra araiky.

Tamy zaho 15 taon̈o, zaho voaroaka baka tamy tany fitarimian̈a tsaiky maditry. Ke zaho nanjary tsisy tran̈o eky. Tamy lalan̈a foeky zaho natoro, na tamy zaridaimpanjakana, na taminiry kamaradiko.

Nataony lapolisy ankety matetiky zaho fotony hitandro asanaka io tsy normaly. Zaho fo mbala tsiary nigadra fotony entan̈a alafoko tsy halatra. Matetiky fo zaho nampan̈ifaindro lamandy be, fotony nikatramo sady namitaka olo, avio nivarotro kanefa tsy nahazo lalan̈a amy zen̈y. Tsisy olo navozoako foeky, ke zaho lastio nandeha nitaky taminolo volany pampindran̈a vola. Gidragidra asa io, ke nisy basy fo taminaka matetiky. Nisy fotoan̈a koa zaho niaraka niasa tamy fikambanan̈anolo pan̈ano asany dahalo.

Tamy zaho 17 taon̈o, sambany naharen̈y koran̈a momba Baiboly. Zaho tamy zen̈y niaraka nipetraka tamy tsaikinaka. Izy nianatra Baiboly tamy Vavolombelon̈o Jehovah. Tsy niady taminaka foeky raha volan̈iny Baiboly momba fitondranten̈a, ke nialako tan̈y tsaikinaka io, fa loso zaho nandeha tamy viavinaka hafa.

Loso nianatra Baiboly tamy Vavolombelon̈o Jehovah koa tsaikinaka faharoe io. Ten̈a rikian̈a mare zaho izikoa fa nahita izy nanjary nahaitsara fan̈ahy ndreky nandefitry. Zaho koa fa niainvitendro handeha hivory tamy Tran̈o Fivorian̈any Vavolombelon̈o Jehovah tan̈y, zaho nan̈eky. Zaho niraisindro tsara. Iro tsara fan̈ahy, madio ndreky milamin̈y avio mahalala fomba. Vaovao mare taminaka raha zen̈y! Zaho baka tsiary nahatsapa tian̈a zen̈y, kanefa zen̈y raha ten̈a nilaiko. Rango zaho mbala hely, zaho tsiary nahazo fitiavan̈a ndreky tambitamby baka tamy lafamiko. Fa zaho ndraiky izikoa fa niaraka tamy Vavolombelon̈o Jehovah, zaho nahatsapa tian̈a mare. Ke iro izikoa fa nikaiky zaho hianatra Baiboly, zaho direkty nan̈eky.

Zaho izikoa donko tsy nianatra Baiboly, otrizay mety efa naty. Azony zaho tia miloka in̈y baka, zaho nanan̈anolo vola be, mandeha 50 000 dolara. Ke zaho ndreky namako aroe zay nieritreritry handeha hamaky tran̈o. Nakiry izy fo zaho tapakevitry tsy handeha. Araiky tamindro baka navoasambotro, fa araiky ndraiky naty.

Izikoa fa nandeha fianaran̈a Baibolinaka in̈y, hitako fa ten̈a maro fiovan̈a mila ataoko. Hitako ohatra fa, 1 Korintianina 6:10 mivolan̈a: “Pangalatra, olo tsy afapo amy raha anan̈any, mamolava, panihitihy, pandrava, tsy handova Fanjakan̈any Zan̈ahary.” Izikoa fa nidinihiko fiain̈ananaka lera zaho fa baka namaky izio, latsaka ranomasonaka. Tontohitry baka zaho fa fiain̈ananaka jiaby foeky izy mila ovako io. (Romanina 12:2) Zaho baka olo kafiry sady ten̈a efa zatra navandy loatra.

Fa tamy fianaran̈a Baiboly nataoko io koa nahaizako fa Jehovah mamindra fô sady von̈ono han̈ambela hadisovan̈a. (Isaia 1:18) Zaho nivavaka mare taminany, niangavy izy han̈ampy zaho hiova. Nampiany zaho, ke tsihelihely, loso vitako fo niova. An̈isany dingana maventy nataoko ziô, nisoratra zahay roeny man̈angy niarahako in̈y.

Zaho tamy zen̈y 24 taon̈o, sady efa vita soratra avio efa babany tsaiky telo. Ke zaho mila mitady asa man̈aradalàn̈a. Problemo fo, zaho tsy olo nianatra firy sady tsisy olo mafatoky afaka hivolan̈a raha tsara momba zaho. Ke zaho nivavaka mare tamy Jehovah ndraiky. Avio zaho nandeha nitady asa. Nivolan̈iko tamindro patron aby io fa zaho efa tapakevitry hiova ndreky tihan̈ano ny marin̈y aminy asanaka. Ndraikindraiky aby, nazavaiko tamindro fa zaho mianatra Baiboly, sady mba tiako hanjary olo modely amy firenena. Fa maro tamindro tsy nangala zaho. Farany, zaho navy tamy sefo araiky zay. Nitantaraiko taminany fiain̈ananaka jiaby, ke ho izy: “Tsy haiko nan̈ino fa, karaha misy raha man̈iraka zaho hangala anao.” Zaho ten̈a mino fa in̈y valimbavakanaka. Zahay roe fivadiany baka tio natao batisa.

Izikoa zaho tsy nan̈araka toro lalan̈any Baiboly avio niezaka ho tsara fitondranten̈a, zaho otrizay efa naty. Zaho misy fianakavian̈a mampatsaratsara, vady ndreky zanaka. Loso madio koa eritreritrinaka fotony zaho matoky tsarabe fa Jehovah nan̈ambela hadisovan̈anaka.

Efa 14 taon̈o zaho pisava lalan̈a, ke man̈ampy olo hahay raha hampianariny Baiboly. Vo tsy ela, vadiko koa mba nan̈ano pisava lalan̈a. Ravoravo mare zaho fotony tan̈atiny 30 taon̈o zay, efa 22 piaramiasa taminaka nampiako loso panompony Jehovah. Zaho ziô mbala mandeha amy magazin fo fa, efa tsy handeha hikatramo eky ay! Zaho koa fa mandeha an̈y, zaho man̈araraotro mikoran̈a aminolo raha inoako. Zaho mba tihandrasa fan̈antinan̈a tsara amindro: Hiain̈y amy donia vaovao tsisy olo pikatramo eky.​—Salamo 37:10, 11.