Tatitry Baka amy Pitory Vaovao Tsara

Nahita Raha Kindren̈a amy Fiain̈ana Izy

JESOSY nivolan̈a fa ondrikondrikinany hainy. (Jaona 10:14) Ho loso pan̈aradia Jesosy olo araiky izikoa izy manan̈a fô tsara, tia fihavan̈ana ndreky fahamarin̈ana. Karaha man̈angy araiky ta Belziky ty, olo io koa hahay dikany fiain̈ana. Ty tantarany man̈angy io:

“Sendra zaho kivy mare ndreky efa nieritreritry hamono ten̈a in̈y, nisy Vavolombelon̈o Jehovah nikonkon̈o varavaran̈anaka. Iro nivolan̈a taminaka fa mbala ho afaka zen̈y problemo jiaby amy donia efa marary ty. Tiako mare raha zen̈y. Fa tsy dia tiako ndraiky izio misy hidirany amy Zan̈ahary. Efa valo taon̈o baka tsy nandihanako leglizy, fotony nampahinihiny zaho nahita fihatsarambelatsihindro tao. Fa hitako ndraiky fa iro Vavolombelon̈o Jehovah aby io ten̈a man̈ano ny marin̈y amy raha volan̈indro. Ke tontohitry zaho baka tio fa sarotro miain̈y tsisy Zan̈ahary zen̈y.

“Nitsidiky zaho hely antsendriky iro Vavolombelon̈o aby io, fa mampalahelo fa baka tio tapaka fifandraisan̈anay. Kivy mare zaho. Tan̈atiny andra araiky zaho nahalany sigarety pake aroe, avio zaho nihina jamala koa. Tihikoran̈a tamy dadilahibe efa naty an̈y koa zaho, ke nifandray tamy fan̈ahy ratsy. Koa fa alin̈y andra, zaho fa navozo mare izikoa fa tsisy naman̈a, fotony iro demony aby io nikotran̈a zaho fo. Nahadin̈y fanjava fanjava izio. Ke isaka ariva, navozo mare zaho izikoa fa tsisy naman̈a.

“Tandraraiky, zaho nandeha nitsangatsangana fa lalan̈a hafa ndraiky nimboako taminio, ke zaho nahita olo nan̈amboatra tran̈o. Gaga zaho nahita olo maro be tiô. Zaho koa fa nan̈aton̈o marikitry, hitako fa izio kaiky Vavolombelon̈o Jehovah aby io niasa Tran̈o Fivorian̈a. Azoko onon̈o amy zay taminiro Vavolombelon̈o nitsidiky zaho in̈y, ke ho zaho, misaora tsara mare izikoa karaha ataondro io ataonolo jiaby miain̈y.

“Tiako izikoa mba misy Vavolombelon̈o avy antran̈onaka an̈y ndraiky, ke zaho nikoran̈a taminolo sasany niasa tiô. Nivavaka tamy Zan̈ahary zaho, avio folo andra tafara tatỳ, navy tambaravaran̈anaka tiô lelahy araiky voanalohany nikoran̈a taminaka zay. Izy nan̈amia hevitry sitrany tohizan̈a fianaran̈anay, ke zaho nan̈eky. Izy amy zay direkty nitaon̈o zaho hivory amy Tran̈o Fivorian̈a. Zaho nan̈eky. Sambako nahita raha karaha zen̈y! Efa ela baka nan̈iriako hahita olo mba mifankatia ndreky sambatra. Io eky iro!

“Naton̈iko fivorian̈a jiaby. Avio afaka telo fanjava, zaho vôly nifima. Nariako tan̈y bokiny mazỳ jiaby taminaka in̈y, ndreky sede misy hirany demony. Nahatsapa amy zay zaho fa tsy mahazo vahan̈a aminaka eky demony aby io. Fiain̈ananaka nataoko nifan̈araka tamy fitsipikiny Baiboly. Afaka telo fanjava, zaho nanomboko nitory vaovao tsara. Afaka tsiôta fanjava, natao batisa zaho. Andra aroe nivitany batisanaka, zaho nan̈ano pisavalalan̈a pan̈ampy.

“Man̈ano mersy Jehovah zaho tamy raha tsara jiaby nataony taminaka. Mba misy raha kindren̈y eky fiain̈ananaka ziô. An̈arany Jehovah io ten̈a mira lakoro vato fatatra in̈y ankitin̈y. Tao nahitako fialofan̈a ndreky fiarovan̈a. (Ohabolana 18:10) Mitovy amy raha tsapany pan̈ano salamo ty raha tsapako, hoizy amy Salamo 84:10: ‘Fa andra araiky andakoronao, tsaratsara mandilatra arivo andra antany hafa! Sitrany zaho mitsangana ambaravaran̈any tran̈ony Zan̈aharinaka, tozay hipetraka amy tran̈olainy ratsy fan̈ahy.’”

Nahita raha kindren̈a amy fiain̈ana man̈angy malemy fan̈ahy io. Ke afaka man̈ano karaha zen̈y koa lan̈iany olo mitady Jehovah amy fô tsara.