Jehovah nivolan̈a tamindro Israelita aby io fa iro mila masin̈y. Akory nan̈ampiany Jehovah iro ho masin̈y? Karaha ty ho izy: “Aza mandehandeha mankaratsy olo amy firenenanao. Aza mitsangana handatsaka liony namanao. Zaho Jehovah.”​—Lev. 19:2, 16.

Fomba fivolan̈ana “mitsangana handatsaka” io mety tsara nandikan̈a volan̈a io baka tamy teny hebreo tamy voanalohany tan̈y. Ino ma raha tianizio havian̈a? Karaha ty nambarany manampahaizan̈a jiosy araiky momba bokiny Levitikosy: “Sarotro hazavain̈a tapany aminy andininy io, fotony tsy ten̈a hay ino marin̈y raha tafiditry amy volan̈a hebreo nadika ‘mitsangana’ io.”

Manampahaizan̈a sasany ndraiky mieritreritry fa volan̈a io mifandray aminy andininy faha-15, mivolan̈a karaha ty: “Anao koa fa mitsara olo, aza man̈ano raha tsy rariny. Aza miaro olo masikiny nohony izy masikiny, kanefa koa aza man̈amia ny marin̈y olo pan̈arivo nohony izy pan̈arivo. Tokony han̈ano ny rariny fo anao izikoa fa hitsara namanao.” (Lev. 19:15) Izikoa zen̈y edy, mety koran̈iny mitsangana handatsaka lionolo, karaha aminy andininy faha-16 io iro Israelita aby io, izikoa iro man̈ano raha tsy rariny lera iro mitsara, na lera iro mivarotro, na amy raha momba fianakavian̈a, na han̈ano raha tsy marin̈y baka amy fitiavanten̈a. Atsika koa tsy tokony han̈ano raha aby zen̈y. Misy fomba hafa koa mety han̈azavan̈a volan̈a aby amy Levitikosy 19:16 io.

Diniha hely baka tapany voanalohany aminy andininy io. Ao Jehovah mandraova vahoakanany tsy hankaratsy olo. Mety hiteraka problemo olo araiky izikoa mitsiko olo. Fa mankaratsy olo ndraiky mbala ratsy mandilatra mitsiko olo. (Ohab. 10:19; Mpito. 10:12-14; 1 Tim. 5:11-15; Jak. 3:6) Matetiky, olo araiky mankaratsy olo kinia mivolan̈a raha tsy marin̈y momba olo. Mandrobaka lazanolo raha zen̈y. Mety ho vitany koa hitsangana ho vavolombelon̈o hanohitry olo araiky, ndray efa hainy fa mety hahafaty olo io raha ataony zen̈y. Aleva onon̈o baka iro lelahy nankaratsy i Nabota in̈y. Iro namôron̈o vandy momba izy, ke nivonenolo tamy taorabato i Nabota. (1 Mpanj. 21:8-13) Hita baka amy zen̈y fa mety hitsangana handatsaka lionolo ankitin̈y olo araiky izikoa mankaratsy olo, karaha koran̈iny tapany faharoe amy Levitikosy 19:16 io.

Fan̈ampinizen̈y koa, mety baka amy tsy fitiavan̈a mahavy olo araiky hankaratsy naman̈a. Amy 1 Jaona 3:15 ao mivolan̈a: ‘Zay olo tsy tia rahalahiny, pamono olo. Hainaro tsarabe fa olo pamono olo zen̈y tsy manan̈a fiain̈ana tsisy farany aminany ao.’ Tsara alaintsika onon̈o, fa Jehovah koa fa baka nanon̈ono volan̈a amy Levitikosy 19:16 io, nivolan̈a koa izy fa mila adosontsika an̈atiny fôntsika ao fankahalan̈a rahalahintsika.​—Lev. 19:17.

Hitantsika baka amy zen̈y fa ten̈a matomboko didy namezany Jehovah atsika, amy Levitikosy 19:16 io. Mila miezaka atsika tsy hieritreritry raha ratsy momba olo ndreky tsy hankaratsy olo foeky. Miran̈a “mitsangana handatsaka liony” namantsika atsika, izikoa mankaratsy izy fotony atsika tsy tia izy na atsika be fô izy; mankahala izy atsika izikoa man̈ano zen̈y. Kristianin̈y zen̈y tsy tokony hankahala olo foeky, na azovy zen̈y na azovy.​—Mat. 12:36, 37.