1—3. ა) მუს ფიქრენს ხალხიშ უმენტაშ მუშ სამუშაშ გურშენ? ბ) მუ კითხვეფს გუვარჩიენთ თე დუდის?

ამდღა ხალხ ბრელს ხანდენს, ნამდა გეიჯუმუას მუშ დუდ დო ოჯახ. შილებე უმენტაშის ვა მოწონდას მუშ სამუშა დო ნამთინეს თიშ წარმოდგენა ხოლო ოშქურინუანდას, ნამდა ირ დღას აჸი ომუშებელ. სი ხოლო თაშ ქოფიქრენქ-და, მუშ კეთება შეილებ, სამუშაქ მეტ ხიოლ ქუმოიღას?

² იეჰოვა მირაგადნა: „არძა კოჩიქ ოკო ჭკუმას, შვას დო გემო ქოძირას მუშ ხანდას. თენა ღორონთშე მოჩამილ ძღვინ რე“ (ეკლესიასტე 3:13). იეჰოვაქ მუშებაშ სურვილ დო მოთხოვნილებათ გუმოჭყეს, ათეშენ თის ოკო, ნამდა გემო ქობძირათ ჩქინ ხანდას (წეკითხ ეკლესიასტე 2:24; 5:18).

³ მუ მიმეხვარებნა, სამუშაქ ხიოლ მომღან? მუნერ სამუშას ოკო აურიდუან ქრისტიანეფქ დუდ? მუჭო შემლებნა სამუშას დო იეჰოვაშ მსახურებას მუშ-მუშ ადგილ ქიმურჩქინათ? ნამ რე არძაშ უმოს მნიშვნელოვან საქმე, ნამუთ ოკო ვაკეთათ?

4, 5. მუნერ დამოკიდებულება უღჷ იეჰოვას ხანდაშე?

⁴ იეჰოვას უჸორს ხანდა. დაბადებაშ 1:1-ის ბკითხულენთ:  „დუდშე ღორონთიქ გაჭყჷ ცა დო დიხა“. თეშ უკულ თქუ, ნამდა ირფელ „გვალო ჯგირ“ რდუ (დაბადება 1:31). თავრეშე იძირე, ნამდა ჩქინ გუმაჭყაფალ კმაყოფილ რდუ მუშ ნახანდით (1 ტიმოთე 1:11).

⁵ იეჰოვას დღას ვემუტებ ხანდება. იესოქ თქუ: „ჩქიმ მუმა ამდღარშახ ხანდენს“ (იოანე 5:17). მართალ რე, ჩქი ირფელ ვამჩქუნა თი სარკო საქმეეფშე, მუდგას იეჰოვა ორთჷ, მარა ჭიჭე მუდგარენ იშენით ქუგმოგებაფეს. მაგალთო, ღორონთ გიშაგორუნს ხალხის, მიდგაქ იესო ქრისტეწკუმა ართო ოკო იმეფას (2 კორინთელები 5:17). თეს გეძინელ, იეჰოვა ხემძღვანელენს დო ყურადღებას ვარკენს ხალხის. მაგალთო, ქადაგებაშ შედეგო მთელ მსოფლიოს მილიონეფ იჩინებაფუანა იეჰოვას დო უღნა დედამიწას მარადიულ ცხოვრებაშ იმენდ (იოანე 6:44; რომაელები 6:23).

6, 7. მუნერ დამოკიდებულება უღჷ იესოს სამუშაშე?

⁶ იესოს ხოლო უჸორს ხანდა. დედამიწაშა მოულაშახ თინა მუშ მუმას ელურდჷ დო ოხვარუდ ირფელიშ გოჭყაფას ზეცას დო დედამიწას (იგავები 8:22—31; კოლოსელები 1:15—17). იესო დედამიწაშა მოულაშ უკულ ხოლო აგრძელენდჷ ხანდას. თინა ბაღანობაშე გურაფლენდჷ ხელობას დო შილებე, ამზადენდჷ შხვადოშხვა ავეჯის დო აშენენდჷ ჸუდეეფს. იესოქ თიცალ ჯგირო ქიდიგურუ თე საქმე, ნამდა თის ხალხ „ჯაშ მოხელეთ“ იჩინენდჷ (მარკოზი 6:3).

⁷ მარა იესოშო არძაშ უმოს მთავარ საქმე სახიოლო ამბეშ ქადაგება დო ხალხშა იეჰოვაშ გაჩინებაფა რდუ. თის სუმ წანა დო გვერდ უღუდ მსახურებაშო, ათეშენ გოთანაშე სერშახ დუც ვა ზოგენდჷ თე საქმეშ შეიოსრულებერო (ლუკა 21:37, 38; იოანე 3:2). იესო ოშობით  კილომეტრის გილეშ ტვერამ შარეფს, ნამდა სახიოლო ამბე, მუთ შილებე მეტ ხალხის გეგნოჩკო (ლუკა 8:1).

8, 9. მუშენ ახარენდჷ იესოს ღორონთიშ საქმეშ შესრულება?

⁸ იესოშო ღორონთიშ საქმეშ კეთება ოჭკუმალცალ რდუ. თე საქმე თის ძალას დო ენერგიას არზენდჷ. იესო თე საქმეს თიცალ გურგედვალირო ხანდენდჷ, ნამდა მინშა ოჭკუმშა ხოლო ვა ჩოდუდ (იოანე 4:31—38). თინა ირნერ საშვალებას გიმირინუანდჷ, ხალხის მუშ ზეციერ მუმა გაჩინებაფუკო. ათეშენ თამამას შეულებუდ უწუკო იეჰოვას: „მა განგადიდ დედამიწას, ბოლოშა ქიმიპჸუნ თი საქმე, ნამუშ კეთება დუმავალ“ (იოანე 17:4).

⁹ არგამა რე, იეჰოვა დო იესო ბრელს ხანდენა, მუდგას თინეფშა ხიოლ და კმაყოფილება მოუღ. ჩქი მოკონა, მივაჸუნათ იეჰოვაშ დო იესოშ მაგალითის (ეფესოელები 5:1; 1 პეტრე 2:21). ათეშენ ირნერო ვოცადუთ, ვორდათ ხანდაშ მოჸოროფე დო გურგედვალირო ვაკეთათ საქმე.

10, 11. მუ მიმეხვარებნა, დადებითო ვუჯინათ ჩქინ სამუშას?

¹⁰ იეჰოვაშ ხალხ გურგედვალირო ფხანდენთ, ნამდა გეიბჯუმუათ ჩქინ დუდ დო ოჯახ. არძას მოკონა, სამუშაქ ხიოლ მომღან, მარა შილებე თენა ადვილ ვა რდას. მუშ კეთება შემლებნა, სამუშას ჩქინდა ხიოლ ვა მოუღუნ-და?

¹¹ გიღდას დადებით განწყობა. შილებე ვეშემლებდან, დოფთირუათ ჩქინ სამუშა ადგილ ვარდა თი დრო, ნამდგას სამუშა ითხინს, მარა შემლებნა განწყობაშ თირუა. თეშო საჭირო რე, საკითხეფს იეჰოვაშ თოლით ვუჯინათ. მაგალთო, იეჰოვა ოჯახიშ დუდშე ელჷ, ნამდა ირფელს გაკეთენს მუშ ოჯახიშ ეიოჯუმალარო. ბიბლია იჩიებ,  ნამდა მით ოჯახიშ წევრეფს ვემკაჯინე, „ურწმუნოშე უფრაშ რე“ (1 ტიმოთე 5:8). ათეშენ ოჯახიშ დუდ ქორექ-და, გურგედვალირო იხანდ სქან ოჯახშო, ნამდა გეიჯუმუე თინა. ირიათო რშუდას, მორწონს დო ვარ სქან სამუშა, თინა გოხვარ, გეიჯუმუე სქან ოჯახ დო თეს გეძინელ, გურ გუხარე იეჰოვას.

12. მუ ჯგირობუას მომღანა ხანდაშ ჸოროფა დო პატიოსნება?

¹² რდა ხანდაშ მოჸოროფე დო პატიოსან. თაშ უმოსო იგინანქ ხიოლს სქან სამუშას (იგავები 12:24; 22:29). მაგალთო, დამსაქმებელს უმოსო აღვენუ სქან ნდობა. თინეფ აფასენა პატიოსან თანამშრომელეფს, მუშენდა უჩქნა, ნამდა ვემიოხირანა ფარას, ქონებას ვარდა სამუშა დროს (ეფესოელები 4:28). მარა, მუთ არძაშ უმოს მნიშვნელოვან რე, იეჰოვა ორწყე სქან ხანდას დო პატიოსნებას. შედეგო „სუფთა სინდის“ გაღვენუ, მუშენდა თეცალ საქციელით გურს უხარენქ ღორონთის, ნამუთ მთელ გურით გიჸორს (ებრაელები 13:18; კოლოსელები 3:22—24).

13. ხოლო მუ ჯგირობუა მოუღ პატიოსნებას?

¹³ რშუდას: ჯგირ საქციელით შეილებ, განადიდე იეჰოვა. თენა რე ხოლო ართ მიზეზ, ნამდა კმაყოფილ რდე სამუშათ (ტიტე 2:9, 10). სქან ჯგირ საქციელიშ მიმაჯინუ შილებე თანამშრომელეფქ ბიბლიაშ გურაფა ხოლო ქიდიჭყან (წეკითხ იგავები 27:11; 1 პეტრე 2:12).

14—16. მუ საკითხეფშე ოკო დეფიფქრათ სამუშაშ გიშაგორუაშ დროს?

¹⁴ ბიბლიას ვა რე მოჩამილ კონკრეტულ სია ნამ სამუშას ოკო დიჭყას მუშება ქრისტიანქ დო ნამუს ვარ. მარა თექ მოჩამილ რე პრინციპეფ, ნამუთ მიმეხვარებნა სწორ არჩევანიშ კეთებას (იგავები 2:6). მორთ გუვარჩუათ მუსხირენ  პრინციპ დო ქუპასუხათ თუდო მოჩამილ კითხვეფს.

¹⁵ ხომ ვეთხინს თე სამუშა თიცალ მუდგარენიშ კეთებას, მუთ იეჰოვაშ თოლს სწორ ვა რე? ჩქი მიჩქნა, მუ ჯოგჷ იეჰოვას, მაგალთო, ხირუა დო ტყურაშ რაგად (გამოსვლა 20:4; საქმეები 15:29; ეფესოელები 4:28; გამოცხადება 21:8). ათეშენ დუდ ოკო აურიდუათ არძანერ სამუშას, ნამუთ ოწინააღმდეგ იეჰოვაშ პრინციპეფს (წეკითხ 1 იოანე 5:3).

 ¹⁶ თე სამუშა ხომ ვა უნწყუნს ხეს თიცალ საქმეს, ნამუთ იეჰოვას ჯოგჷ? მაგალთო, ქიმუშენდიო რეგისტრატურას თიცალ კლინიკას, სოდეთ აბორტეფს ორთნა? მუშო ოკო რაგად, რეგისტრატურას მუშებას გლახა მუთუნ ვა რე, მარა გიჩქჷ, მუნერ დამოკიდებულება უღჷ იეჰოვას აბორტშე. ათეშენ დეფიქრ: მართალ რე, პირადო სი ვაკეთენქ აბორტეფს, მარა იეჰოვაშ თოლს თე საქმეშ მონაწილე ხომ ვეგშურქ? (გამოსვლა 21:22—24).

17. მუ მიმეხვარებნა ღორონთიშ მოსაწონ გადაწყვეტილებეფიშ მეღებას?

¹⁷ ღორონთიშ პრინციპეფიშ გიმორნაფათ შემალებენა, ქუვაგურათ პირველ ქრისტიანეფს, „მიდგას გოწაფილ აფჷ გონება ჯგირ დო ფურიშ გარჩიებელო“ (ებრაელები 5:14). ქოკითხ სქან დუც: მითინს ხომ ვადვაბრკოლენქ თე სამუშაშ დოჭყაფათ? ხომ ვა მაჸუაფ ჩილ დო სქუა დატებელ დო შხვა ქიანაშა გინაულარ თე სამუშაშ გურშენ? მუჭო იმოქმედენს თე ირფელ ჩქიმ ოჯახწკუმა?

18. მუშენ ვა რე ირო ადვილ, პირველ ადგილს გივორინუათ იეჰოვაშ თაყვანიშცემა?

¹⁸ შილებე ირო ადვილ ვა რდას, იეჰოვაშ მსახურება პირველ ადგილს გივორინუათ, მუშენდა ფცხოვრენთ „მანგარ ძნელ გინაღალარ“ დროს (2 ტიმოთე 3:1). ამდღა ადვილ ვა რე, დოგორე დო ვადინუე სამუშა. მართალ რე, ოჯახ ოკო ეიბჯუმუათ, მარა თეწკუმა ართო მარჩქილენა, ნამდა იეჰოვაშ თაყვანიშცემა პირველ ადგილს ოკო გივორინუათ. ათეშენ ირნერო ოკო ვეცადათ, მატერიალურქ ჩქინ ცხოვრებას მნიშვნელოვან ადგილ ვედეკინას (1 ტიმოთე 6:9, 10). მუჭო შეულებ თიშ რჩქინას, „მუ რე უმოს მნიშვნელოვან“, ქიმმეხვარან პირველ ადგილს  გივორინუათ იეჰოვაშ თაყვანიშცემა დო თეწკუმა ართო, იფხანდათ ჩქინ ოჯახშო? (ფილიპელები 1:10).

19. მუჭო მიმეხვარებნა იეჰოვაშ მენდება, სამუშას მუშ ადგილ ქიმურჩქინათ?

¹⁹ ბოლოშა მიენდ იეჰოვას (წეკითხ იგავები 3:5, 6). იეჰოვას ჯგირო უჩქჷ, მუ მოსაჭირნა დო ყურადღებას ვა მარკენა (ფსალმუნი 37:25; 1 პეტრე 5:7). ღორონთიშ სიტყვა მირაგადნა: «იცხოვრით ფარაშ ჸოროფაშ უმშო დო ქიგუჯერდით თის, მუთ გიღნა, მუშენდა თიქ თქუ: „ვა დოიტენქ დო ვემგოტენქ“» (ებრაელები 13:5). იეჰოვას ვაკო, გინოჸუნელო ფიფქრენდათ, მუჭო ეიბჯუმუათ ოჯახ. თიქ ბრელშა დუმარწმუნეს, ნამდა მუშ ხალხის ვემიარკენს აუცილებერს (მათე 6:25—32). ვა უღჷ მნიშვნელობა, მუნერ სიტუაცია მიღნა სამუშას, ჩქი რეგულარულო ოკო დიბგურუათ ღორონთიშ სიტყვა, იფქადაგათ სახიოლო ამბე დო ვაგვოჩილითუათ ქრისტიანულ შეხვალამეფ (მათე 24:14; ებრაელები 10:24, 25).

20. მუჭო შემლებნა ცხოვრებაშ გამარტივება?

²⁰ სუფთა თოლ გიღდას (წეკითხ მათე 6:22, 23). თე სიტყვეფ ნიშნენს ცხოვრებაშ გამარტივებას, ნამდა მთელ ყურადღება გეგნიღე იეჰოვაშ მსახურებაშა. ჩქი მიჩქნა, ნამდა გონივრულ ვეჸუაფ ღორონთწკუმა მეგობრობაშე უმოს მნიშვნელოვანო მიფრჩქინათ ფარა, კომფორტულ ცხოვრება ვარდა ბოლო მოდაშ ტექნიკა. მუ მიმეხვარებნა, პირველ ადგილს გივორინუათ თინა, მუთ მნიშვნელოვან რე? ირნერო ოკო ვეცადათ, ვალეფ ვეგიბდვათ. ვალ ქიგმადვეს-და, თიცალ გეგმა ოკო ქიმიფიფქრათ, ნამდა ქეშმალებუან თიშ ჭიჭე-ჭიჭეთ ვარდა სრულას გინოგაფაქ. ფრთხილას ვეპჸით-და, მატერიალურ საკითხეფქ შილებე თისხი დრო დო ენერგია მიდამღან, ნამდა დროქ  ვადმოსქიდან ლოცვა, პირად გურაფა დო ქადაგებაშო; თაშ ნამდა, საშვალება ოკო ვემეფჩათ ფარას დო მატერიალურ ნივთეფს, უმოს ოწუხებელ გომრჩქინან; თეშ მანგიორო, მოკონა, გეუჯერდათ თის, მუთ მიღნა (1 ტიმოთე 6:8). მუნერ სიტუაციას ვა ვორდათინ, ჯგირ იჸუაფ, ირო ქიგნვოჯინათ ჩქინ მდგომარეობას დო ქობძირათ, მუჭო შემლებნა უმოს მეტ ვაკეთათ იეჰოვაშ მსახურებას.

21. მუშენ რე მნიშვნელოვან, მუს გივორინუანთ პირველ ადგილს ჩქინ ცხოვრებას?

²¹ სწორ პრიორიტეტეფ. საჭირო რე სწორაშე გეგმიბრინუათ  ჩქინ დრო, ენერგია დო მატერიალურ სახსრეფ. ფრთხილას ვეპჸით-და, შილებე ნაკლებო მნიშვნელოვან საქმეეფქ, მუნერით რე განათლებაშ მეღება დო ფარაშ შიბა, მიმოდინაფუან ძვირფას დრო. იესოქ თქუ: „პირველ რიგის გორით სამეფო“ (მათე 6:33). ჩქინ გადაწყვეტილებეფ, მიზნეფ, ჩვევეფ დო ირდღაშიან საქმეეფ ოძირანს, მუს უკებ პირველ ადგილ ჩქინ გურს.

22, 23. ა) მუ რე არძაშ უმოს მნიშვნელოვან საქმე ქრისტიანეფშო? ბ) მუ მიმეხვარებნა სამუშაქ ხიოლ მომღან?

²² ჩქინო არძაშ უმოს მნიშვნელოვან საქმე იეჰოვაშ მსახურება დო სახიოლო ამბეშ ქადაგება რე (მათე 24:14; 28:19, 20). იესოცალო, ჩქი ხოლო მოკონა დუდ ვა დაბზოგათ თე საქმეშო. მაგალთო, ნამთინექ თიცალ ადგილშა გეგნორთ, სოდეთ მეტ მაქადაგებელ რე საჭირო. შხვეფ გურაფლენა ახალ ნინას, ნამდა უქადაგან თე ნინაშა მორაგადე ხალხის. ქუდურაგადე თინეფს დო ქიგეგ, მუშენ გინოჭყვიდეს თეშ კეთება. თე და დო ჯიმალეფ ქოიწინა, ნამდა ასე უმოს ბედნერ დო საინტერესო ცხოვრება უღნა (წეკითხ იგავები 10:22).

²³ ამდღა ჩქინ უმენტაშ ბრელს ხანდენს დო ნამთინე შილებე მუსხირენ ადგილს ხოლო მუშენდას, ნამდა ოჯახ გეიჯუმუას. იეჰოვა ორწყე დო აფასენს ირფელს, მუდგას ჩქინ ოჯახიშ საჯგირობუოთ ვორთუთ. თაშ ნამდა, მივაჸუნათ დიდებულ მოხანდეეფიშ, იეჰოვაშ დო იესოშ მაგალითის დო გურგედვალირო იფხანდათ, თიშ უმკუჯინუო, მობწონა დო ვარ ჩქინ სამუშა. დღას ვაგმოჭყორდან, არძაშ უმოს მნიშვნელოვან რე იეჰოვაშ მსახურება დო სამეფოშ გურშენ სახიოლო ამბეშ ქადაგება. თენა რე თი საქმე, ნამუთ ნამდვილ ხიოლს მომღანა.