1, 2. მუ ოკო მიჩქუდან სატანა დო დემონეფშე?

წერმიდგინ, მუ ჯგირ იჸუაფ ცხოვრება იეჰოვაშ დაპირებულ ახალ ქიანას. საბოლათ თექ ირფელ თეშ იჸუაფ, მუჭოთ ღორონთის დუდშე აფუდ ჩაფიქრებულ. მარა ამდღა თიცალ ქიანას ფცხოვრენთ, სოდეთ სატანა დო თიშ დემონეფ მართველენა (2 კორინთელები 4:4). მართალ რე, ჩქი თინეფს ვა ვორწყეთ, მარა სატანა დო დემონეფ არსებენა დო დიდ ძალა უღნა.

² თე დუც გუვარჩიენთ, მუჭო შემლებნა ვორდათ იეჰოვაწკუმა ხოლოს დო დუდ დიფთხილუათ სატანაშე. იეჰოვა მოპირნა, ნამდა ქიმმეხვარებნა. მარა ჩქი ოკო მიჩქუდან, მუ მეთოდეფს გიმირინუანა სატანა დო დემონეფ ჩქინ მიოჩილითაფარო.

3. მუ რე ეშმაკიშ მიზან?

³ სატანა აცხადენს, ნამდა ადამიანეფ იეჰოვას ეგოისტურ მიზნეფით ომსახურნა დო პრობლემეფიშ დროს მიოტენა თიშ მსახურებას (წეკითხ იობი 2:4, 5). მუჟამსით მითინ იეჰოვაშ გაჩინებაფას იჭყანს, სატანა დო დემონეფ ოცადნა, ქეცილან თის. თინეფ იჟღამებნა, მუჟამსით ორწყენა, ნამდა პიროვნება დუც უძღვინენს იეჰოვას დო ინათუ. ბიბლია ეშმაკის უგურუანს მაღირთალ ლომს, ნამუთ  გორუნს, მი გინორყინტას (1 პეტრე 5:8). სატანაშ მიზან რე, ნამდა გილამლუან იეჰოვაწკუმა ურთიერთობა (ფსალმუნი 7:1, 2; 2 ტიმოთე 3:12).

4, 5. ა) მუშ კეთება ვეშულებ სატანას? ბ) მუჭო შემლებნა, ქივეწინააღმდეგათ ეშმაკის?

⁴ ჩქი ოკო ვა დუშქურდათ სატანა დო თიშ დემონეფს. იეჰოვას თინეფშა ვემუჩამ ირფელიშ უფლება, მუჭო ოკონან თეშ მიმექცუან. ღორონთ პირობას დვანს, ნამდა „ანაყუ ხალხ“, ჭეშმარიტ ქრისტიანეფ, გინასქიდუნა „დიდ გასაჭირიშ“ დროს (გამოცხადება 7:9, 14). სატანას ვეშიალებე, ქეცილას  თე დუნაპირებუშ შესრულებას, მუშენდა იეჰოვა თხილანს მუშ ხალხის.

⁵ მუჟამსით იეჰოვაწკუმა ხოლოს იპჸით, სატანას ვეშიალებე გილამლუან თიწკუმა ურთიერთობა. ღორონთიშ სიტყვა მარწმუნენა: „იეჰოვაწკუმა ქუდოსქიდუთ-და, თინა ხოლო ვემგოტენა“ (2 მატიანე 15:2; წეკითხ 1 კორინთელები 10:13). ჯვეშ დროშ ართგურ მსახურეფს იეჰოვაწკუმა ხოლოშიან ურთიერთობაქ მეხვარ, ვა დაჸუნესკო ეშმაკის. თინეფშე ნამთინე რდუ: აბელი, ენოქი, ნოე, სარა დო მოსე (ებრაელები 11:4—40). ჩქი ხოლო შემლებნა ვადვაჸუნათ ეშმაკის. ღორონთიშ სიტყვა მოპირნა: „ქეწინააღმდეგით ეშმაკის დო თინა ხოლო დეგეთხიებნა“ (იაკობი 4:7).

6. მუშ კეთებას ოცად სატანა?

⁶ სატანას ჯგირო უჩქჷ, ნამდა იეჰოვას ვემუჩამ თიშა ირფელიშ უფლება, მუჭო ოკო თეშ მიმექცუან, მარა თეშ უმკუჯინუო, თინა იშენით ირნერო ეცადებ, გილამლუან ღორონთწკუმა ურთიერთობა. ჯვეშ დროშე მოჸუნაფილ ამდღარშახ ანთასობით წანა რე, მუთ სატანა შხვადოშხვა მეთოდის გიმირინუანს თეშ მიოჭირნაფალო. მორთ გუვარჩუათ თე მეთოდეფშე ნამთინე.

7. მუშენ ოცად ეშმაკ, ღორონთიშ ართგურობა მიმოდინაფუან?

⁷ მოციქულ იოანექ ჭარჷ: „მთელ ქიანა უბადოშ ხეს რე“ (1 იოანე 5:19). სატანა მართუნს თე უბადო ქიანას დო ოკო, იეჰოვაშ ხალხ ხოლო ქიდიჸუნუას (მიქა 4:1; იოანე 15:19; გამოცხადება 12:12, 17). ეშმაკის უჩქჷ, ნამდა ბრელ დრო ვაფჷ დოსქილადირ, ათეშენ ირნერო ოცად, თითოულს მიმოდინაფუან ღორონთიშ ართგურობა. თეშ მიოჭირნაფალო სატანა ნამთინეშა პირდაპირ დო არგამათ მოქმედენს, მარა მინშა თეს ფულირო ორთჷ დო ძნელ გიშაჩინებელ რე.

8. მუ ოკო არჩქილედას თითოულ ქრისტიანს?

 ⁸ ეფესოელეფიშ 6:12-ს ბკითხულენთ: „ვობრძოლუთ ზეციერ უბადო შურეფს“. სატანა დო დემონეფიშ წინააღმდეგ ბრძოლას თითოულ ქრისტიან პირადო ღებულენს მონაწილებას. ჩქი ოკო მარჩქილედან, ნამდა არძა, მით დუც უძღვინენს იეჰოვას, ჩართულ რე თე ბრძოლას. ათეშენ პავლე მოციქულქ ეფესოელეფშა მეჭარილ წერილს ქრისტიანეფს სუმშა უწუ: „მანგარო გერდათ“ (ეფესოელები 6:11, 13, 14).

9. მუშ გაგებას ოცადნა სატანა დო დემონეფ?

⁹ სატანა დო დემონეფ შხვადოშხვა საშვალებათ ოცადნა ჩქინ ჩილათას. შილებე სატანას ართშა გივორჯგინათ, მარა თენა ვა ნიშნენს, ნამდა შხვა დროს ხოლო თაშ იჸუაფ. ეშმაკ ოცად, დოგორას ჩქინ სუსტ მხარეეფ, ნამდა შესაფერის მეთოდ გეგმირინუას ჩქინ მიოჩილითაფარო. თეშ უმკუჯინუო, ჩქი შემლებნა დუდ ევუჩილითუათ თეს, მუშენდა ბიბლია მოგურუანა, მუ მეთოდეფს გიმირინუანს სატანა (2 კორინთელები 2:11; ქოძირ დანართ 31). თიშ ართ-ართ მეთოდ რე დემონიზმ.

10. ა) მუ რე დემონიზმ? ბ) მუჭო უჯინე იეჰოვა დემონიზმის?

¹⁰ დემონიზმ რე უბადო შურეფიშ, დემონეფიშ არსებობაშ რწმენა დო თინეფწკუმა კავშირიშ დამყარება თიცალ საქმეეფით, მუნერით რე: მაკითხობა, ჯადოქრობა, შელორსა ვარდა ღურელიშ შურიშ გიმოძახება. ბიბლია იჩიებ, ნამდა „ჯოგჷ იეჰოვას“ დემონიზმ, ათეშენ ვეგშურს, ქოთ დემონეფწკუმა მიღდან კავშირ დო ქოთ იეჰოვას ვემსახურათ (კანონი 18:10—12; გამოცხადება 21:8). საჭირო რე, ქრისტიანქ ვემკანჭას დო ირნერო ეუჩილითუას დუდ დემონიზმიშ ნებისმიერ ფორმას (რომაელები 12:9).

11. მუ შედეგის მომღანა ზებუნებრივ ძალეფით დაინტერესება?

 ¹¹ სატანას უჩქჷ, ნამდა ზებუნებრივ ძალეფიშ ინტერესის ჭიჭეთ ვარა გეგმიფრჩქინანთ-და, თიშო ადვილ იჸუაფ თიცალ საქმეეფშა გემშამტყურუან, ნამუთ დემონიზმწკუმა რე დაკავშირებულ. დემონიზმიშ ნებისმიერ ფორმას შეულებ გილამლუან იეჰოვაწკუმა ურთიერთობა.

12. მუჭო ოცად სატანა, ტვინ მომრთან?

¹² სატანა ოცად ხალხის ტვინ მოურთას. თინა ეჭვეფს ჭიე-ჭიეთ თასუნს, ნამდა ხალხიქ გლახა ჯგირო მირჩქინას დო ჯგირ — გლახათ (ესაია 5:20). ეშმაკ ავრცელენს აზრის, ნამდა ბიბლიურ რჩევეფს მუთუნ სარგებელ ვა მოუღ დო უმოს ბედნერეფ იპჸუაფუთ, მუჟამსით ვემვაჸუნუთ ღორონთიშ ნორმეფს.

13. მუჭო ოცად სატანა ეჭვეფიშ თასუას?

¹³ ეჭვეფიშ თასუა სატანაშ ართ-ართ ეფექტურ მეთოდ რე. თინა ბრელ ხან რე თე მეთოდის გიმირინუანს. დიო ხოლო ედემიშ ბაღის სატანაქ ეჭვის ქინაჸათ ევა, მუჟამსით კითხჷ: „მართალო გიწისო ღორონთიქ, ბაღიშ ნამთინ ჯაშე ვა ჭკუმათია?“ (დაბადება 3:1). უმოს გვიანო, იობიშ დროს სატანაქ ანგელოზეფიშ გასაგონეთ კითხჷ იეჰოვას: „ტყურათ უღუნო იობის ღორონთიშ შიშ?!“ (იობი 1:9). სატანაქ იესოს ნათუაშ უკულ უწუ: „ღორონთიშ სქუა ქორექ-და, ქოთქვი, ნამდა თე ქუალეფქ ქობალო გინირთას“ (მათე 4:3).

14. მუჭო ოცად სატანა ხალხ დაეჭვას, ნამდა დემონიზმ ვა რე ოშქურანჯ?

¹⁴ სატანას ამდღა ხოლო ვემუტებ ეჭვეფიშ თასუა. თის ოკო, ხალხიქ იფიქრას, ნამდა დემონიზმიშ არძა ფორმა სინამდვილეს ვა რე გლახა. ნამთინე ქრისტიანქ ვა გოხვად თის, მუსხით ოშქურანჯ რდუ თენა (2 კორინთელები 11:3).  თაშ ნამდა, მუჭო შემლებნა დუდ დეფცვათ? მუჭო დებრწმუნათ, ნამდა სატანას ვა ვაფუთ თეშა მიშატყურაფილ? მორთ გუვარჩუათ ჟირ სფერო, სოდეთ შილებე სატანაქ დუმაღორან. თენა რე: გართობა დო მკურნალობა.

15. მუჭო შილებე გართობათ მონაწილება მიბღათ დემონიზმის?

¹⁵ ამდღა კინოეფ, ვიდეოეფ, სატელევიზიო გადაცემეფ, კომპიუტერულ ლაჸაფეფ დო ინტერნეტ ეფშა რე ზებუნებრივ ძალეფით, დემონიზმით დო მაგიათ. ბრელიშ აზრით თეცალ გართობას მუთუნ გლახა ვა მოჸუნს. თინეფ ვენანჭუნა, მუსხით ოშქურანჯ რე, მუჟამსით დემონეფს თიშ ნებას არზენა, მუნეფიშ ცხოვრებას ჩერუან. მუჟამსით პიროვნება მომავალიშ გაგებელო გიმირინუანს ჰოროსკოპის, კითხულენს კარტით, ყავათ ვარდა მარჩიელენს ხეშ გურს, თეთ მონაწილებას ღებულენს დემონიზმის. სატანა ფულუნს, მუსხით ოშქურანჯ რე თე ირფელ დო ოცად ხალხის მაძირუას, ითამ თინა მანგარ საინტერესო დო სახალისო რე. ნამთინე შილებე თაშ ხოლო ფიქრენდას, ნამდა მუთუნ ზარალს ვა მუღანს თიცალ მუდგარენეფიშ ჯინა, სოდეთ მაგია დო დემონიზმ რე, მუშენდა მუ თვითონ ვა ღებულენს თე ირფელს მონაწილებას. მუშენ რე თეცალ აზროვნება ოშქურანჯ? (1 კორინთელები 10:12).

16. მუშენ ოკო ფთქუათ ვარია თიცალ გართობაშე, მუდგას დემონიზმ ოკათ?

¹⁶ სატანა დო დემონეფს ვეშულებნა ჩქინ ფიქრეფიშ გაგება. მარა თინეფს შეულებნა გიშეჩინან ჩქინ სურვილეფ დო ფიქრეფ, მუჟამსით ოკვირნა, მუნერ გართობას გიშაბგორუნთ ჩქინო დო ჩქინ ოჯახიშ წევრეფშო. მუჟამსით გიშებგორუნთ თიცალ კინოეფს, მუსიკას ვარდა წიგნეფს, სოდეთ მოჩამილ რე მედიუმეფშე, ჯადოქრობაშე, დემონეფშე,  შელორსეფშე, ვამპირეფშე ვარდა თეცალ მუდგარენეფშე, სატანა დო დემონეფ გებულენა, ნამდა თეთ ვორეთ დაინტერესებულ. თეშ უკულ თინეფ ქეშეცადებნა, ხოლო უმოს მონაწილება მიმოღებაფუან დემონიზმიშ საქმეეფს (წეკითხ გალატელები 6:7).

17. მუჭო გიმირინუანს სატანა ჩქინ სურვილს, ვორდათ ჯამრთელეფ?

¹⁷ თეს გეძინელ, სატანა ოცად, მუშ ინტერესეფშო გეგმირინუას თიშ სურვილ, ვორდათ ჯამრთელეფ. ამდღა ბრელ იტანჯებ გლახა ჯამრთელობაშ გურშენ. თინეფქ შილებე მკურნალობაშ შხვადოშხვა მეთოდ გიმირინუეს, მარა უშედეგოქ იჸუ (მარკოზი 5:25, 26). თეცალ პიროვნებას შილებე გურქ გუტირხას დო მკურნალობაშ ნებისმიერ მეთოდშა  დეთანხმას. მარა იეჰოვაშ მსახურეფ დაკვირებულეფ ოკო ვორდათ, ნამდა თიცალ მკურნალობაშ მეთოდ ვეგშებგორათ, ნამუთ მაგიაწკუმა რე დაკავშირებულ (ესაია 1:13).

18. მკურნალობაშ მუნერ მეთოდის ოკო აურიდუან ქრისტიანეფქ დუდ?

¹⁸ ჯვეშ ისრაელს, ნამთინე მაგიას გიმირინუანდჷ. ათეშენ იეჰოვაქ თინეფს უწუ: „ბრელს ლოცულენთ, მარა ვაირჩქილეთ“ (ესაია 1:15). წერმიდგინ, იეჰოვა ვა ურჩქილედ თინეფიშ ლოცვეფს! ჩქი ვა მოკონა თიცალ მუთუნ ვაკეთათ, მუთ გილამლუანა იეჰოვაწკუმა ურთიერთობას დო ხე შევუშალათ თის, ქიმმეხვარან, განსაკუთრებულო თი დროს, მუჟამსით ლეხ ვორეთ (ფსალმუნი 41:3). ათეშენ საჭირო რე, ჯგირო ქიგებგათ ჩქინ გიშაგორილ მკურნალობაშ მეთოდის მუთუნნერ კავშირ ხომ ვა უღჷ დემონიზმწკუმა ვარდა ზებუნებრივ ძალეფწკუმა (მათე 6:13). მუჟამსით ფიფქრენთ, ნამდა თის შილებე მუთუნ კავშირ უღჷ დემონიზმწკუმა, ირნერო ოკო ავურიდუათ დუდ! (ქოძირ დანართ 32).

19. მუჭო ოშქურინუანს ეშმაკ ხალხის?

¹⁹ ნამთინე ფიქრენს, ნამდა ეშმაკიშ დო დემონეფიშ არსებობა კოჩიშ მოგონილ რე, მარა ნამთინეს პირად გამოცდილებაშე უჩქჷ, ნამდა თინეფ ნამდვილო არსებენა. ბრელ ამდღა დემონეფიშ შიშით ცხოვრენს დო ცრურწმენას აფჷ დამონებულ. თეცალ შიშიშ გავრცელებას ნამთინე თით უნწყუნს ხეს, ნამდა იჩიებ ამბეს, მუჭო ატანჯენა დემონეფ ხალხის. ხშირას ხალხის მოწონს თეცალ ისტორიეფიშ მორჩქილაფა დო შხვეფწკუმა თეშ ჩიება. თე ირფელიშ რჩქილა ხალხის ეშმაკიშ შიშის ურჩქინანს.

20. მუჭო შილებე ხე ქეშუნწყუათ სატანას ტყურეფიშ გავრცელებას?

²⁰ დეფიქრ: სატანას ოკო, ნამდა ხალხის თიშა ოშქურუდას (2 თესალონიკელები 2:9, 10). თინა მეტყურე რე დო  უჩქჷ, მუჭო იმოქმედას თინეფიშ აზროვნებაწკუმა, მით დემონიზმიშ ინტერესის გიმირჩქინანს დო ოცად, თინეფს ქუდაჯერუას თიცალ მუდგარენ, მუთ სიმართლეშ ხოლოს ვა რე. თე ხალხ შილებე იჩიებდას თიცალ ამბეეფს, ნამუთ მუნეფიშ აზრით, ძირეს დო მირჩქილეს. ხალხ მუთ უმოსო იმეორენს თეცალ ამბეს, თით უმოსო ხეს უნწყუნს თე ამბეშ გაზვიადებას. ჩქი ვა მოკონა თეცალ ამბეშ გამეორებათ სატანას ხე ქეშუნწყუათ, დაშქურინუას ხალხ (იოანე 8:44; 2 ტიმოთე 2:16).

21. მუ ოკო რდას ჩქინ მთავარ ორაგადე თემა?

²¹ შილებე ქრისტიანს პირად გამოცდილებაშე მუდგარენ უჩქუდას დემონეფიშ გურშენ, მარა თინა ვეგიმეორენს თე ამბეს შხვეფიშ ართუაფალო. სწორ ვეჸიდ, იეჰოვაშ ხალხ დუვოშქურინეთკო თიშე რაგადით, მუდგას სატანა დო დემონეფ აკეთენა. თეშ მანგიორო, უჯგუშ რე, იფჩუათ იესოშე დო თი ძალაშე, ნამუთ იეჰოვაქ მეჩჷ (ებრაელები 12:2). იესო დემონეფშე ჩიებათ ვეირთუანდჷ მოწაფეეფს. თიშ მთავარ ორაგადე თემა სამეფოშ გურშენ სახიოლო ამბე დო „ღორონთიშ დიდებულ საქმეეფ“ რდუ (საქმეები 2:11; ლუკა 8:1; რომაელები 1:11, 12).

22. მუშ კეთება გაფჷ გინოჭყვიდილ?

²² დღას ვაგგოჭყორდას, სატანაშ მიზან რე გილამლუან იეჰოვაწკუმა ურთიერთობა. თინა ოცად, ირფელ გაკეთას თეშ მიოჭირნაფალო. მარა ჩქი ჯგირო მიჩქნა ეშმაკიშ მეთოდეფ დო გინოჭყვიდილ მაფნა, დუდ ევუჩილითუათ დემონიზმიშ ირნერ ფორმას, ათეშენ სატანას, ჩქინ ნტერს ვემეფჩანთ თიშ საშვალებას, ნამდა თეს ხე შემშალან (წეკითხ ეფესოელები 4:27). თაშ ნამდა, მუჟამსით ქივეწინააღმდეგებუთ ეშმაკის, თეთ დუც ევუჩილითუანთ თიშ მაჩილითაფარ მეთოდეფს, დო შედეგო იეჰოვა დოფთხილანა მუშ ძალიერ ხეთ (ეფესოელები 6:11).