თე მუხლის ბკითხულენთ: „ქარწყექ, ნამდა ნამთინე სამთავროს ღარიბეფს აჩაგრენა დო ძალით მიდმუღანა სამართლიანობას დო სიმართლეს-და, თექ ვაგგაკვირას, მუშენდა მაღალშე უმოს მაღალო გერენ ფერ უჯინე თეს; რენა თინეფშე მაღალო გერენან ფერეფ ხოლო“ (ეკლ. 5:8).

ადამიანურ თვალსაზრისით, თე მუხლის ინოჭარილ სიტყვეფ ეჭარუნს თინეფს, მიდგას ხელისუფლებას ძალაუფლება უღნა. მარა ჯგირო დეფიფქრებუთ-და, თე მუხლის იეჰოვაშ გურშენ ხოლო მეურს ჩიება, მუთ გურშა ემქექუანა დო შინაგან სიმშვიდეს მარზენა.

ეკლესიასტეშ 5:8-ს იგულისხმებ მართველ, ნამუთ ღარიბეფს აჩაგრენს დო უსამართლოთ ოქცუ. მართველს ოკო შუდას, ნამდა თის თიცალ მიდგარენ უჯინე, მიდგას უმოს მაღალ მდგომარეობა უკინებ დო უმოს მეტ ძალაუფლება უღჷ, ვინემ მუს. შილებე რდან თიცალეფ, მიდგას ხოლო უმოს მაღალ მდგომარეობა უკებ. სანარღოთ, ადამიანურ მთავრობას, შილებე არძა მართველ გლახა რდას დო თინეფიშ უსამართლო საქციელიშ გურშენ უბრალო ხალხ იტანჯებდას.

მარა, მუდგა უიმენდოთ ვერწყებედას მდგომარეობა, გურშა ემქექუანა თიშ რჩქინა, ნამდა იეჰოვა უჯინე თინეფს, მიდგას ხოლო უმოს მეტ ძალაუფლება უღჷ ადამიანურ ხელისუფლებას. ჩქი შემლებნა ღორონთის ფთხუათ მოხვარა დო ჩქინ ოღალ თის გეგნოფჩათ (ფსალმ. 55:22; ფილ. 4:6, 7). ჩქი მიჩქნა, ნამდა „იეჰოვაშ თოლეფ ოკვირ მთელ დედამიწას, ნამდა მუშ ძალათ ქიმეხვარას თინეფს, მით მთელ გურით რე თიწკუმა“ (2 მატ. 16:9).

თაშ ნამდა, ეკლესიასტეშ 5:8 გუმოშინანა თი რეალურ სიტუაციას, ნამუთ ადამიანურ ხელისუფლებას რე — ირო რე თიცალ მიდგარენ, მიდგას მეტ ძალაუფლება უღჷ. მარა, მუთ უმოს მნიშვნელოვან რე, თე მუხლ მოხვარნა, ყურადღება გეგნიბღათ თიშა, ნამდა იეჰოვა რე უმაღლეს, უზენაეს მართველ. თინა ასე მართველენს მუშ სქუა, იესო ქრისტეშ საშვალებათ, ნამუთ ღორონთიშ სამეფოშ მეფე რე. იეჰოვა, ირფელიშშემალებე ღორონთ, ნამუთ ოკვირ ირფელს, სამართლიან რე დო თიშ სქუა ხოლო თეცალ რე.