ჯიმა უინსტონ, ქიმეჩით, მუჭო გეგჷ ჭეშმარიტება.

მა იბრდჷ კუინზლენდის, (ავსტრალია) რელიგიურ ვა რდუნ ფერ ოჯახის. ფერმას მუფშენდჷ, სოდეთ ხვალე ოჯახიშ წევრეფწკუმა მიხვადუდ ურთიერთობა. მუჟამსით 12 წანერო გინიფრთჷ, ღორონთიშ გორუა ქიდიბჭყჷ. ბლოცულენდჷ დო ღორონც ფთხინდჷ, ნამდა ჭეშმარიტება ქუგმოგებაფუკო. ჭიჭე ხანშა ფერმას მუშება მივოტე დო ოცხოვრეფშა ადელაიდშა (სამხრეთ ავსტრალია) გეგნოფრთჷ. სიდნეის შვებულებათ ვორდინ თეშ, ქეშეფხვად პამის. თიმ დროს 21 წანერ ვორდჷ. პამიქ მეჩუ ართ ბრიტანულ-ისრაელურ რელიგიურ ჯგუფშე. თინეფ იჩიებდეს, ნამდა ბრიტანელეფ ისრაელიშ ართ-ართ ტომიშ გამნარყეფ რდეს. თინეფიშ აზრით ისრაელიშ ჩრდილოეთ ვითტომიან სამეფოს მახორუ ხალხიქ ჯვ.წ მა-8 საუკუნეშო შხვადო გეგნიხორ. მუჟამსით ადელაიდშა დიფრთჷ, თე ირფელ ჩქიმ თანამშრომელს ქივეჩი, ნამუთ თი დროს იეჰოვაშ მოწმეეფწკუმა ბიბლიას გურაფლენდჷ. ჩქი მუსხირენ საათის ქიფჩით დო უმოსო თიშე ბრაგადეთ, მუ წანა იეჰოვაშ მოწმეეფს. თე ჩიებაშ უკულ ქიმეფხვად, ნამდა თენა თიშ პასუხ რდუ, მუდგას ბაღანობას ბლოცულენდჷ. ქიდიბჭყჷ ჭეშმარიტებაშ გურაფა ჩქიმ გუმაჭყაფალშე დო თიშ სამეფოშენ. თაშ ნამდა, ქიმვოგორე „ძვირფას მარგალიტის“ (მათ. 13:45, 46).

პამი, სი ხოლო ადრეულ ასაკის დიჭყჷ „მარგალიტეფიშ“ გორუა. მუჭო მიოგორე თის?

მა ქალაქ კოფს-ჰარბორს (ახალ სამხრეთ უელსი) რელიგიურ ოჯახის იბრდჷ. ჩქიმ მშობლეფს დო ბებ დო ბაბუს ბრიტანულ-ისრაელურ ჯგუფიშ გურაფეფიშ წანდეს. მა, ჩქიმ უკლაშ ჯიმას, უნჩაშ დას დო ნათესეფს ბაღანობაშე მოგურუანდეს, ნამდა ღორონთ ბრიტანელეფს განსაკუთრებულო იწონუანდჷ, მარა მა ვა ბჯერდჷ თენა. ათეშენ დღას ვამგინაფ ღორონთწკუმა დუდ ხოლოს.  14 წანერ ვორდინ თეშ შხვადოშხვა ადგილობრივ ეკლესიაშა ქიდიბჭყჷ გილულა, თინეფ შკას ანგლიკანურ, ბაპტისტურ დო მაშკვითა დღაშ ადვენტისტურ ეკლესიეფშა. მარა თე ირფელქ ღორონთიშ გაჩინებაფას ვემმეხვარ.

უმოს გვიანო, ოჯახით სიდნეიშა გეგნოფრთით ოცხოვრებშა, სოდეთ უინსტონ გეფჩინებაფე, ნამუთ თექ შვებულებათ რდუ. მუჭოთ თიქ მიშინუ, ჩქი რელიგიურ საკითხეფშე იფჩით, მუდგაქ მეხვარ, იეჰოვაშ მოწმეეფწკუმა ქიდიჭყკო ბიბლიაშ გურაფა. თეშ უკულ ჩქიმდა მოჭარილ წერილეფს ხშირას მიშინიუანდ ბიბლიურ მუხლეფს. სიმართლე ქოიწუათინ, დუდშე მანგარო მაღიზიანენდჷ დო გურ მუმალედ თეშე. მარა, საბოლათ ქიმეფხვად, ნამდა თენა ჭეშმარიტება რდუ.

1962 წანას ოცხოვრეფშა ადელაიდშა გეგნოფრთჷ, ნამდა უმოს ხოლოს ვორდიკო უინსტონწკუმა. თიქ სერით გაჩერებელ ადგილ დომგორ ართ იეჰოვაშ მოწმე წყვილ, ტომას დო ჯენის სლომანეფწკუმა, მით პაპუა ახალ გვინეას მისიონერო მსახურენდეს. თინეფ მანგარ ჯგირო მოქცუდეს. თიმწკუმა 18 წანერ ვორდჷ; ტომას დო ჯენი ირნერო მოხვარდეს სულიერო წიმი ულას. თაშ ნამდა, ბიბლიაშ გურაფა ქიდიბჭყჷ დო მალას დებრწმუნ, ნამდა ქიმვოგორე ჭეშმარიტებას. ქორწინებაშ უკულ მა დო უინსტონქ დუდ მევუძღვინით იეჰოვას, მუთ ჩქინ ცხოვრებას არძაშ უჯგუშ გადაწყვეტილება რდუ. ზუსტას თექ მიმეხვარეს, სირთულეეფიშ უმკუჯინუო, უმოსო დუვაფასითკო ჭეშმარიტება.

ჯიმა უინსტონ, ქიმეჩით იეჰოვაშ მსახურებაშ პირველ წანეფიშ გურშენ.

ჩქინ ქორწინებაშ უკულ ჭიჭე ხანშა, იეჰოვაქ მსახურებაშ „დიდ კარ“ გომინჯეს (1 კორ. 16:9). პირველ „დიდ კარქ“ გუმანჯეს, მუჟამსით ქეშეფხვადით ჯიმა ჯეკ პორტერს, ნამუთ ჩქინ ჭიჭე კრებას რაიონულ ზედამხედველო მსახურენდჷ (თინა ასე ავსტრალაზიაშ ფილიალიშ კომიტეტიშ წევრი რე). ჯეკიქ დო თიშ ოსურ როზლინქ, სრულ დროთ პიონერო მსახურებაშ დოჭყაფა ელამჩეს. ჩქინო დიდ პატი რდუ 5 წანას მიმსახურებდესკო პიონერო. 29 წანერ ვორდინ თეშ, ქოფთხუეს რაიონულ ზედამხდევლო ვიმსახურკო წყნარ ოკეანეშ სამხრეთ ნაწილიშ კუნძულეფს, ნამუსით უმოს გვიანო, ფიჯიშ ფილიალ ხემძღვანელენდჷ. თე კუნძულეფ რდუ: ამერიკაშ სამოა, სამოა, კირიბატი, ნაურუ, ნიუე, ტოკელაუ, ტონგა, ტუვალუ დო ვანუატუ.

თი დროს ნამთინე შორ კუნძულს მახორუ ხალხი ეჭვიშ თოლით უჯინედ იეჰოვაშ მოწმეეფს, ათეშენ ფრთხილაშო დო გონივრულო ოკო მიფქცითკო (მათ. 10:16). თექ ჭიჭე კრებეფ რდუ დო ნამთინე კრებას ვეშულებუდ სერით გაჩერებელ ადგილ დომგორესკო. ათეშენ თექ მახორუ ხალხის ფთხინდით სერით გიოჩერებელ ადგილს დო თინეფ ხოლო მთელ გურით ბღებულენდეს.

ჯიმა უინსტონ, სი დაინტერესებულ რექ მთარგმნელობით საქმიანობათ. მუქ გოირჩქინ თე ინტერეს?

თიმწკუმა კუნძულ ტონგას ხვალე მუსხირენ ტრაქტატ დო ბუკლეტ უღდეს პოლინეზიურ ნინაშა. თინეფ ბიბლიაშ გურაფას ატარენდეს ინგლისურ ნინაშა გიშაშკუმალირ წიგნით, „მარადიულ სიცოცხლეშა მიმაჸუნაფალ შემეცნება“. ათეშენ უხუცესეფიშ სკოლაშ ოთხ მარიან კურსიშ დროს სუმ უხუცესის, მიდგას ჯგირო ვა უჩქუდ ინგლისურ, ქოთხუეს თე წიგნი ტონგა ნინაშა გეგნოთარგმნესკო. პამიქ თე წიგნი ობეშტალო მამზად დო თინა შეერთებულ შტატეფიშ ბეთელშა მიდვოჯღონით. თე ირფელს 8 მარაქ დესაჭირ. მართალ რე, თენა ვარდჷ ჯგირ თარგმან, მარა თიქ ტონგა ნინაშა მორაგადე ბრელ პიროვნებას მეხვარ ჭეშმარიტებაშ გურაფას. მა დო პამი ვა ვორეთ მათარგმნალეფ, მარა თე შემთხვევაქ თე საქმეშ ინტერეს გომრჩქინეს.

პამი, მუჭო შეადარენდ ართიანს კუნძულეფს დო ავსტრალიას ცხოვრებას?

თინეფ მანგარო გენესხვავებუდ ართიანშე. შხვადოშხვა ადგილს, შხვადოშხვა სიტუაციეფ მიღდეს. ნამთინე ადგილს კოღოეფი, ვირთხეფი, მანგარ სინჩხე, სირისტი დო ლახალა რდუ. მინშა დასაბაღ ოჭკუმალ ვამღუდეს. მარა ირ დღაშ ბოლოს, ოკეანეშ სქვამ ხედიშ ჯინათ სიამოვნებას ბღებულენდით ტრადიციულ პოლინეზიურ ჸუდეშე, ნამდგას სამოურო „ფეილი“ ჯოხო. თე ჸუდე ჭათ რდუ რთვილ დო კიდალეფ ვა უღუდ. მინშა თუთარჩელამ სერს ქოქოსიშ პალმეფ ჯგირო  ირწყებედ დო ზღვას ხოლო სქვამაშე გიორედ თუთაშ სინთე. თეცალ სქვამ მომენტეფ აღბძრენდეს, იბლოცითკო, იფიფქრითკო დადებითშე დო ვართ ხოლო უარყოფითშე

ჩქი მანგარო ქიმეჸოროფეს თექიან ბაღანეფქ. თინეფ მხიარულეფ რდეს დო უკვენდეს ჩქინ, ჩეკანიანეფიშ ძირაფა. ნიუეს ვორდითინ, ართ ჭიჭე ბაღანაქ უინსტონიშ თუმამ კილეს ქიგნუსვჷ ხე დო უწუ: „მობწონს სქან თუმა“. არგამა რდუ, ნამდა თის დღას ვაფუდ ნაძირეფ თუმამ ხე.

გურ ელმაჭუდეს, მუჟამსით ვორწყედით, მუნერ უღონობას ცხოვრენდჷ ხალხ. მართალ რე, თინეფ მანგარ სქვამ ბუნებას ცხოვრენდეს, მარა გლახა ჯამრთელობა დო ოშუმალ წყარიშ სინაკლებე უღდეს. მარა ჩქინ ჯიმალეფ თეშენ ზედმეტო ვა წუხენდეს. თეცალ მდგომარეობა თინეფშო ჩვეულებრივ რდუ. თინეფ ბედნერეფ რდეს თით, ნამდა ჸუნდეს მოჸოროფე ოჯახიშ წევრეფ, უღდეს ადგილ, სოდეთ თაყვანიშცემაშო იშაყარუდეს დო თიშ პატი, განადიდესკო იეჰოვა. თინეფიშ მაგალით მოხვარდეს, ყურადღება მნიშვნელოვანშა გეგნიბღითკო დო იფცხოვრითკო უბრალოთ.

პამი, სი მინშა უჩინებ გარემოს გიხვადუდ წყარიშ შება დო ოჭკუმალიშ მომზადება. მუჭო ახერხენდჷ თეს?

მა მარდულ ვორექ მუაჩქიმიშ. თიქ ბრელ ჯგირ მუდგარენ დუმოგურუ. მაგალთო, დაჩხირიშ დორზამა, ოჭკუმალიშ კეთება დო თინა ხოლო, მუჭო შემლებუდ დუდ გეგნიფსქილიდეკო, მუჟამსით ბრელ მუთუნ ვამღუდ. ართშა კუნძულ კირიბატის ჭათ გინორთვილ ჭიჭე ჸუდეს გაფჩენდით, ნამდგას მარჯანიშ პროლ დო ბაბმუკიშ კიდალეფ უღუდ. ოჭკუმალიშ ოკეთებელო დიხა გეშამნთხორ დო ქოქოსიშ ნოხით ქუდვორზჷ დაჩხირ. წყარიშ ოშებელო თექიან ოსურეფწკუმა ართო რიგის გივორედ ინჭაწკუმა. თინეფს წყარ სოდგარე 2 მეტრიან კეტით ეშმუღდეს, ნამუსით ბოლოს ჭიფე თოკ მობუდ. თინა ანკესის მოგენდჷ, უბრალოთ კაღუშ მანგიორო ვედრა მობუდ. მუჟამსით რიგ ქიმიშ, თითოულ ოსურ ვედრას ინაჸათანდჷ ინჭას დო საჭირო მომენტის აწუქანჩუანდჷ თის. თე დროს ვედრა მინირთუდ დო წყარით იფშაფუდ. ფიფქრენდჷ, თენა ეფ ოკეთებელ რდუ. მარა ჩქიმ რიგიქ ქუმორთუნ, ქიმეფხვად, ნამდა გვალო ადვილ ხოლო ვა ჸოფე. მუსხირენშა ქენვოჸოთ ვედრა, მარა თიქ ვენწყვჷ დო ჟი იფაფუდ. ჩქიმ მიმაჯინუს, არძა იძიცანდჷ. ძიცა მიოტესინ, ართ ოსურქ ქუმორთჷ დო ქიმმეხვარ. ადგილობრივეფ ირიათო ჯგირო მოქცუდეს დო მზათ რდეს ქიმმეხვარესკო.

თქვა მანგარო გეჸოროფეს თქვან დანიშნულებაქ კუნძულეფს. მუსხირენ საინტერესო მომენტის ხომ ვეგიშინანდით?

უინსტონი: ჩქი დროქ დემესაჭირეს, ქიმვარჩქვანითკო თექიან კულტურას. მაგალთო, მუჟამსით ჯიმალეფ ოჭკუმალს მიკომღანდეს, ირფელს გილადვანდეს, მუთ უღდეს. დუდშე ვემეფხვადით, ნამდა ბოლოშა ვა მაფდეს ოჭკუმალ დო ჭიჭე თინეფშა ხოლო ოკო დომტებდესკო. ათეშენ ირფელს ბჭკუმუნდით. უმოს გვიანო, მუჟამსით ქიგებგით სინამდვილეს მუშა რდუ საქმე, ოჭკუმალს თინეფს ხოლო ვუტენდით. თეცალ გაუგებრობეფიშ უმკუჯინუო, ჯიმალეფს არჩქილედეს ჩქინ. თინეფს ოხიოლდეს ჩქინ ძირაფა, მუჟამსით ირ მამშვა თუთას რაიონულ მონახულებაშა მიფშით თინეფშა. თეს გეძინელ, ადგილობრივ ჯიმალეფს მუნეფიშ კრებაშ წევრეფიშ გარდა, ჩქინ მეტ შხვა მოწმეეფწკუმა ვა უხვადუდეს ურთიერთობა.

ჩქინ მონახულება ჯგირ დამოწმება რდუ შხვეფშო ხოლო. სოფელიშ მახორუეფიშ უმენტაშის ვა ჯერდჷ, ნამდა ადგილობრივ მოწმეეფ საერთაშორისო საჯიმალოშ წევრეფ რდეს. მარა, მუჟამსით მა დო ჩქიმ მეუღლექ მონახულებათ თე კუნძულეფშა ქიმეფრთით, ადგილობრივეფ გაკვირვებულ რდეს, მუშენდა ქიმეხვადეს, ნამდა თე რელიგიაშ წევრეფ ნამდვილო ზრუნენდეს ართიანშო.

პამი: არძაშ უმოს სასიამოვნოთ გუმაშინე კირიბატიშ ართ-ართ კრება, სოდეთ მუსხირენ და დო ჯიმა მსახურენდჷ. თი კრებას ხვალე ართ უხუცეს, ტინაკი მატერა რდუ. თინა ირნერო ზრუნენდჷ ჩქინო. ართშა თიქ ქიმემჸუნეს ოგვაჯეშა, სოდეთ ხვალე ართ კვერცხ გეძუდ დო მიწუეს: „თენა თქვან რე“. თიმ დროს ქოთომიშ კვერცხ ჩქინო ფუფუნება რდუ. თე უბრალო, მარა შურ დო გურით კეთებულ ჯგირობუა მანგარო შეხუ ჩქინ გურს.

 პამი, მუსხირენ წანაშ უკულ დაბადებულ ვა რდუნ ფერ ბაღანაქ დოიღურ. მუქ მიგეხვარ თეშ გინოღალას?

1973 წანას, მუჟამსით მა დო უინსტონ სამხრეთ წყნარ ოკეანეშ კუნძულეფს ვორდით, დებორსულ. ჩქი დიფრთით ავსტრალიაშა, სოდეთ 4 თუთაშ უკულ ბაღანაქ ქვარას ქელმოღურ. თე ამბე უინსტონქ ხოლო მანგარო გენიცად. დრო-ხანიშ მიკულაწკუმა ართო, თე გურჭუას ჭიე-ჭიეთ მივერი, მარა თენა იშენით მაწუხენდეს, სოიშახ 2009 წანაშ 15 აპრილიშ „გინაჯინალ კოშკი“ ვემიბღით. რუბრიკას „კითხვა დო პასუხი“, გარჩიებულ რდუ საკითხი, ნამუთ დიო ვა დაბადებენ ფერ ბაღანეფიშ გათელებას ოხუდ. თე სტატიაქ დუმარწმუნეს, ნამდა თე საკითხ იეჰოვას მივანდითკო, ნამუთ ირიათო სამართლიანო იქციებ. თინა ჩამთხინუანა ირნერ გურჭუას, ნამუთ თე უბადო ქიანაქ მომღეს დო მუშ სქუაშ საშვალებათ ბოლოს მუღენს სატანაშ საქმეეფს (1 იოან. 3:8). თეს გეძინელ, თე სტატიაქ მიმეხვარეს, უმოსო დუვაფასითკო თი „ძვირფას მარგალიტ“, ნამუთ ჩქი, იეჰოვაშ ხალხის მიღნა. წარმოდგენილ მაფჷ, მუნერ იჸუაფუდ ჩქინ ცხოვრება მომავალიშ იმენდიშ უმშო.

ბაღანაშ ღურაშ უკულ, კინ ქიდიბჭყით სრულ დროთ მსახურება. მუსხირენ თუთას ავსტრალიაშ ბეთელს ვიმსახურით დო უკულ გილმალ საქმიანობა გუვაგრძელით. თეშ უკულ 4 წანას ვიმსახურით ახალ სამხრეთ უელსის დო სიდნეის. 1981 წანას, ავსტრალიაშ ბეთელშა (ასე ჯოხო ავსტრალაზიაშ ბეთელ) ქიმემწვის დო ასეშახ თაქ ვორეთ.

ჯიმა უინსტონ, სი ასე ავსტრალაზიაშ ბეთელიშ კომიტეტიშ წევრო მსახურენქ. მუჭო მიგეხვარ სამხრეთ წყნარ ოკეანეშ კუნძულეფს მეღებულ გამოცდილებაქ თე დანიშნულებას?

თექ მართალო ბრელ მუდგარენს მიმეხვარ. პირველ, ავსტრალიაშ ბეთელს თხუეს ზედამხედველობა გაუწუკო ამერიკაშ სამოას დო სამოაშ კუნძულეფს. თეშ უკულ ახალ ზელანდიაშ დო ავსტრალიაშ ფილიალეფქ გეერთიან. ასე ავსტრალაზიაშ ფილიალიშ ტერიტორიაშა მიშურს ავსტრალია, ამერიკაშ სამოა დო სამოა, კუკიშ კუნძულეფ, ახალ ზელანდია, ნიუე, ტიმორიშ კუნძულეფ, ტოკელაუ დო ტონგა. მა მიღუდ თიშ პატი, ნამდა თე ტერიტორიეფიშ უმენტაშის გამკეთებუდკო მონახულება, მუჭოთ მთავარ სამმართველოშ წარმომადგენელ. თი გამოცდილება, ნამუთ თე კუნძულეფს მახორუ და დო ჯიმალეფწკუმა მსახურებაშ დროს მიბღჷ, მანგარო მოხვარ ასე, მუჟამსით თინეფს ვომსახურუქ ფილიალშე.

ჩქინ გამოცდილებაშე, თამამას შემლებ ფთქუე, ნამდა ხვალე უნჩაშ კათა ვა გორნა ღორონც. ახალგაზრდეფს ხოლო ოკონა ქიმიოგორუან „ძვირფას მარგალიტის“ თიმწკუმა ხოლო, მუჟამსით ოჯახიშ წევრეფ ვეგმირჩქინანა ინტერესის (2 მეფ. 5:2, 3; 2 მატ. 34:1—3). დარწმუნებულ ვორეთ, იეჰოვა რე მოჸოროფე ღორონთ, მიდგას ოკო არძაქ, მუჭოთ ახალგაზრდაქ, თეშ ხანშამიშულირქ ხოლო მიღას მარადიულ სიცოცხლე.

მუჟამსით მა დო პამიქ 50 წანაშე უმოს ხანიშ წოხოლე ჭეშმარიტებაშ გორუა დიბჭყით, წარმოდგენა ვამღუდეს, მუ შედეგიქ შილებე თე ირფელს მაჸუნკო. არგამა რე, ჭეშმარიტება სამეფოშ გურშენ არძაშ უმოს „ძვირფას მარგალიტ“ რე. ჩქი გინოჭყვიდილ მაფნა, მუთუნით ხეშე ვა გუტუათ თე „ძვირფას მარგალიტ“.