• Ropotoꞌwa nhimipitsudu. ‘Apito da, te ĩpitsudu hã wa tô datsimatsitsidzé ĩpire na hã titsã . . . Tawamhã uburé aꞌuwẽ ĩwamri mono bö ãma ĩtsitom na wa dza te aima ꞌre anhomri. Uburé petse te dza aima hã ꞌre dahöimana dzaꞌra dza, daro mono bö.’ — Salmo 2:6, 8.

• Rotiꞌwa Davi nhihudu. “ꞌWatébrémi ma tô wama tipoto dzaꞌra, daꞌra ma tô wama tsõmri dzaꞌra ni . . . Ĩtsimirobꞌrudzé hã duré rowẽ hã Davi tsimatsitsidzéb ãma te dza tãma tidzaꞌẽtẽ dzahuré, tsiꞌutõrĩ ãna, ꞌre höimana uꞌötsi mono da.” — Isaías 9:6, 7 TNM.

• Belém ãma ĩwaptãꞌãdzé. ‘A hã Belém, . . . aihawi te dza podo danhibꞌapito hã, ĩ̱nhibꞌaꞌuwẽ Israel nhihudu norĩ, dza te te ꞌre ĩtsimroi mono da hã.’ — Mateus 2:4-6.

• Ma tô datsiwi wẽꞌõ ni duré ma tô datsiwi wĩrĩ ni. “Õ hã ma tô ꞌre ꞌruiwapari ni duré wa tô rotsaꞌrata watsété dzaꞌra ni dama ĩwapu newa . . . Õ hã ma tô waꞌré ni wawatsété uꞌöbö, ma tô wati ni wanhimiꞌupai uꞌöbö.” — Isaías 53:3, 5 TNM.

• Ma tô apö höiwaꞌudu duré ma tô pitsutu ni danhipai u pire uptabi na ꞌre höimana mono da. ‘E marĩ wa. A hã ꞌRe ĩhöimana uꞌötsi mono, dadöꞌö nhiptetedzé wi ꞌre ĩ̱ꞌmadöꞌö uꞌötsi mono wa. Wa hã aiꞌãma tsi ꞌre ĩ̱morĩ wa, ĩ̱rẽme õ di dza, dadöꞌö petse dzéb u ĩ̱morĩ da hã . . . Te duré õne uꞌö ĩ̱ma ꞌre ĩrowẽ mono dzé hã te te ĩ̱ma ꞌre tsani.’ — Salmo 16:10, 11.

Duréi hawimhã, mitsi aibö ma tô ꞌre höimana Rotiꞌwa danhipai u ĩwẽ na: Jesus Cristo. Dawatsuꞌuꞌwa ma tô watsuꞌu Mariaha ma, Jesusihi na ma: ‘Uburé Danhibꞌapito uptabi hã te dza tiꞌra ma pitsutu, tihiꞌrata ne, tsiꞌapito da, Davihi ne. . . . Te dza ãma ꞌre tsibꞌaꞌuwẽ uꞌötsi dzaꞌra.’ — Lucas 1:31-33.

Jesus ꞌre höimana mono õ di Rotiꞌwa na Tiꞌab ré. Te dza daꞌãma roti höiwa hawi Ropotoꞌwa nhimirobꞌrudzéb ꞌremhã. E marĩ wa, õ hã Rotiꞌwa danhipai u ĩwẽ. Rotsaꞌrata te te ĩꞌmanharĩdzém na Tiꞌai ãma ꞌre höimana mono ré.

•   Jesus ma tô daꞌãma rotsaꞌrata duré ma tô daꞌmadöꞌö wẽ. Ma tô daꞌapawapto — aibö, piꞌõ, ĩhöibaté, ĩhi, ĩtsimarĩ pe duré ĩtsimarĩꞌõ norĩ. (Mateus 9:36; Marcos 10:16) Nimahã na hã, aibö ĩꞌwaꞌre ré hã ma tô Jesusihi wi waptẽ ãne: ‘Ĩ̱ma waihuꞌu petse di, dza ĩ̱petse waihuꞌu petse na hã, atsima wẽ wamhã.’ Tawamhã Jesus ãma pẽꞌẽdzé wa, ma tô petse. — Marcos 1:40-42.

• Jesus ma tô wama rowahutu dzaꞌra niha na Ropotoꞌwai ma wa te ĩrowẽ dzaꞌra dzé hã. Õ hã, te tinha: “ꞌRe romhuri mono õ di dza Dapotoꞌwai ma hã duré robꞌuipradzé ma dzéma hã.” Õ hã, te warétsi dzaꞌra dama ꞌre wahöimana dzaꞌra mono da, wa te watsima ꞌre ĩwẽ dzaꞌra mono ne wama ꞌre dahöimana dzaꞌra mono da hã. Jesus te dama höiꞌré Ropotoꞌwa te te ĩꞌmadöꞌö petse na hã wa te ĩꞌmanharĩ dzaꞌra dzé hã, wa te ĩrotsaꞌrata dzaꞌra dzé hã, duré wapẽꞌẽ ꞌremhã. Taha wa, Ropotoꞌwai ma wa te tãma rowẽ dzaꞌra da, wa dza tété dzaꞌra ni wa te ĩrotsaꞌrata dzaꞌra dzé hã. (Mateus 5:28; 6:24 RTN; 7:12) Duré Jesus te tinha Ropotoꞌwai ma ĩwẽ dzarina wa te waihuꞌu dzaꞌra wamhã duré ĩtsarina ꞌre wahöimana dzaꞌra mono wamhã, dza wama ꞌre ĩrowẽ uptabi dzaꞌra mono na. — Lucas 11:28.

• Jesus ma tô dama rowahutu wa te dadzawi dzaꞌra da. Jesus te te ĩnharĩdzé hã duré te te ĩꞌmanharĩdzé hã te te daꞌapẽꞌẽ rétsi waihuꞌu petse di. ‘Ma tô ãma tatobꞌudzu dzaꞌra ni, ĩtsimirowahutu na hã, tsimiroti pire na te te ꞌre rowahutu mono wa’. (Mateus 7:28, 29) Jesus te tinha: ‘Aiꞌruiwapariꞌwa norĩ hã ꞌre tsawi petse dzaꞌra waꞌaba mo.’ Taha nhipai u, õ hã ma tô rowaptẽ te te ĩwĩrĩ dzaꞌra norĩ ãma: “Ĩ̱mama, a te ꞌruiwapari dzaꞌra tõ, õ norĩ hã, tãma waihuꞌu dzaꞌra õ di, marĩ, te te ĩꞌmanharĩ dzaꞌra hã.” — Mateus 5:44; Lucas 23:34 RTN.

Jesus Rotiꞌwa danhipai u ĩwẽ te te daꞌãma roti da. E marĩ wa. Dama ꞌre höimana wẽ mono wa, duré te te daꞌãma rotsaꞌrata wa. E niwa bété õ hã, te dza daꞌãma roti Tiꞌai ãma.