Neʼe fekauʼi te ʼaselo ko Kapeliele ki te finemui neʼe higoa ko Malia. Neʼe ina ʼui age ki ai ʼe ina maʼu anai te tamasiʼi ʼaē ka hau anai ʼo talu ai. Ko te tamasiʼi, ko Sesu, neʼe tupu ʼi te falemanu, pea neʼe ʼōmai te ʼu tagata tauhi ōvi ʼo fakasiosio ia ia. Ki muli age, neʼe taki e te fetuʼu ia te ʼu tagata mai te Potu Hahake ke nātou ʼōmai ki te kiʼi tamasiʼi ʼaia. ʼE tou vakaʼi anai pe ko ai ia ia ʼaē neʼe ina uga ia nātou ke nātou mulimuli ki te fetuʼu ʼaia, pea neʼe hāo feafeaʼi ia Sesu ʼi te ʼu puleʼaki ʼaē neʼe fai ke matehi ia ia.

Ki muli age, ʼe tou maʼu anai ia Sesu ʼi tona taʼu 12, ʼe fai palalau mo te hahaʼi faiako ʼi te fale lotu. Neʼe papitema ia Sesu ia taʼu e hogofulu-ma-valu ki muli age, pea neʼe ina kamata faka mafola ai te Puleʼaga pea mo fai te gāue ʼaē neʼe fekauʼi e te ʼAtua ke ina fai ʼi te kele, ʼaē ko te akoʼi ʼo te hahaʼi. Moʼo tokoni kia ia ʼi te gāue ʼaia, neʼe filifili e Sesu te ʼu tagata e toko 12 pea ina fakaliliu ia nātou ko tana ʼu ʼapositolo.

Neʼe toe fai foki e Sesu mo te ʼu tuʼuga milakulo. Neʼe ina fafaga te toko lauʼi afe hahaʼi ʼaki pe te ʼu kiʼi ika pea mo te ʼu kiʼi foʼi pane. Neʼe ina fakamālōlō te ʼu mahaki pea mo fakatuʼuake te ʼu mate. Pea ʼe tou akoʼi ai te ʼu meʼa kehekehe ʼaē neʼe hoko lolotoga te ʼu ʼaho fakaʼosi ʼo tona maʼuli, pea mo te ʼu faʼahiga meʼa ʼaē neʼe hoko kia ia ʼi tona matehi. Neʼe fai faka mafola ia Sesu ia taʼu e tolu vaelua, koia ko te Faʼahi ONO ʼe talanoa anai ki he temi ʼe fakalaka ia taʼu e 34.