ʼI ʼihi temi ʼe vaʼi tatou e te hahaʼi peʼe natou iita mai moka tou palalau age ʼo ʼuhiga mo Sehova. ʼE lagi mole kei tou fia palalau ai ʼo ʼuhiga mo te ʼAtua. Neʼe kua ke logoʼi koa ia te faʼahi ʼaia?— ʼE talanoa ʼi te Tohi-Tapu ʼo ʼuhiga mo te tama neʼe ʼofa kia Sehova kaʼe neʼe meihiʼi pe ke ina tuku tana palalau ʼo ʼuhiga mo te ʼAtua. Neʼe higoa ko Selemia. Ta vakaʼi he tahi ʼu faʼahi ʼo ʼuhiga mo ia.

ʼI te kei tupulaga ʼa Selemia, neʼe fakatotonu age e Sehova ke ina fakatokaga te hahaʼi ke tuku tanatou fai te meʼa ʼae ʼe kovi. Neʼe faigataʼa ʼaupito kia Selemia pea neʼe mataku. Neʼe ina ui kia Sehova: ‘ ʼE mole au poto palalau. Ko au ko te tamasiʼi.’ Kaʼe neʼe ui age e Sehova: ‘ ʼAua naʼa ke mataku. ʼE au tokoni atu anai.’

 Neʼe kamata fakatokaga ai e Selemia te hahaʼi ʼe tauteaʼi anai natou mo kapau ʼe mole natou fetogi ʼanatou aga. ʼI tau manatu la, neʼe mulimuli koa ia te hahaʼi ki te ʼu palalau ʼa Selemia?— Kailoa ia. Neʼe natou vaʼi ia ia pea mo iita ki ai. Neʼe toe loto pe la e ʼihi ke natou matehi ia ia. ʼI tau manatu la, neʼe feafeaʼi ia Selemia?— Neʼe mataku pea neʼe ina ui: ‘ ʼE mole au toe palalau anai ʼo ʼuhiga mo Sehova.’ Kaʼe neʼe ina tuku moʼoni koa tana palalau ʼo ʼuhiga mo Sehova?— Kailoa ia. Neʼe mole feala ia he neʼe ʼofa lahi kia Sehova. Pea ʼi te hoko atu e Selemia tana palalau ʼo ʼuhiga mo Sehova, neʼe haofaki ia ia.

Ohage la, neʼe li e ʼihi tagata agakovi ia Selemia ki he foʼi tane vai ʼe fonu pela. Neʼe mole hana meʼa kai pea mo hana meʼa inu. Neʼe loto e te ʼu tagata ʼaia ke mate ai ia Selemia. Kaʼe ʼaki te tokoni ʼa Sehova, neʼe hao ia mai ai.

Kotea te ako ʼe feala ke ke maʼu mai te faʼifaʼitaki ʼo Selemia?— Logo la neʼe mataku ʼi ʼihi temi, kaʼe neʼe mole tuku e Selemia tana palalau ʼo ʼuhiga mo Sehova. Ka ke palalau ʼo ʼuhiga mo Sehova ki te hahaʼi ʼe lagi natou vaʼi koe peʼe iita atu kia koe. ʼE lagi ʼe ke ufiufi peʼe ke mataku ai. Kaʼe ʼaua naʼa ke tuku tau palalau ʼo ʼuhiga mo Sehova. ʼE tokoni tuʼumaʼu atu anai, ohage pe ko tana tokoni kia Selemia.